 |
ການສະແດງຂອງນັກຮ້ອງກອງສິລະປະກອນແຫ່ງຊາດລາວ ທີ່ ງານມະໂຫລານດົນຕີ ອາຊຽນ 2019
ເຂົ້າຮ່ວມງານມະໂຫລານດົນຕີ ອາຊຽນ 2019, ກອງສິລະປະລາວ ລວມມີນັກສິລະປິນ 15 ຄົນ ແລະ ໄດ້ສະແດງ 5 ລາຍການ. ກອງສິລະປະກອນລາວ ໄດ້ເອົາເຄື່ອງດົນຕີພື້ນເມືອງຊະນິດຕ່າງໆຄື: ແຄນ, ຊໍ, ຄ້ອງວົງໃຫຍ່, ພິນ ແລະ ອື່ນໆ ເພື່ອຮັບໃຊ້ໃຫ້ແກ່ 5 ລາຍການສະແດງ ເຊິ່ງລວມມີ: ລາຍການເປົ່າແຄນບົດເພງ ຮັກບ້ານເກີດ; ລາຍການທີ 2 ແມ່ນ ຮ້ອງດຽວຍິງ ລໍາຕັ່ງຫວາຍ; ລາຍການທີີ 3 ແມ່ນ ແຄນວົງ; ລາຍການທີ 4 ແມ່ນ ສາລະວັນບ້ານຂ້ອຍ ແລະ ລາຍການສຸດທ້າຍ ແມ່ນເພງລາວອະມະຕະ ທີ່ມີຊື່ສຽງມາແຕ່ດຶກດໍາບັນ. ນີ້ແມ່ນບັນດາລາຍການທີ່ເຂັ້ມຂຸ້ນໄປດ້ວຍລັກສະນະພື້ນເມືອງຂອງປະເທດລາວ ກ່ຽວກັບຄວາມຮັກປະເທດຊາດ, ການຕໍ່ສູ້ກູ້ຊາດ ແລະ ການພັດທະນາຂອງປະເທດລາວ.
ການແລກປ່ຽນສະແດງສິລະປະກັບມະຫາຊົນໃນຄໍ່າຄືນຕ່າງໆ, ໂດຍສະເພາະ ແມ່ນການແລກປ່ຽນການສະແດງສິລະປະລະຫວ່າງກອງສິລະປະກອນລາວ ແລະ ກອງສິລະປະກອນ ບົງແຊນ ຂອງ ຫວຽດນາມນັ້ນ ໄດ້ຊ່ວຍໃຫ້ກອງສິລະປະກອນລາວ ມີຄວາມສະດວກຫຼາຍຢ່າງໃນການແລກປ່ຽນບົດຮຽນກັບບັນດາກອງສິລະປະກອນທີ່ມາຈາກປະເທດອື່ນໆ. ສະພາສິລະປະ ໄດ້ເລືອກເອົາ 12 ລາຍການຍາດໄດ້ຫຼຽນຄໍາ,19 ລາຍການ ຍາດໄດ້ຫຼຽນເງິນ. ໃນນັ້ນ, ກອງສິລະປະກອນລາວ ໄດ້ຮັບລາງວັນຫຼຽນຄໍາ 1 ລາງວັນ ສໍາລັບລາຍການສະແດງການເປົ່າແຄນບົດເພງ ຮັກບ້ານເກີດ; ລາງວັນຫຼຽນເງິນ 1 ລາງວັນ ສໍາລັບບົດເພງ ສາລະວັນບ້ານຂ້ອຍ. ນອກຈາກນັ້ນ, ກອງສິລະປະລາວ ຍັງຍາດໄດ້ລາງວັນ ກອງສິລະປະກອນທີ່ໄດ້ຮັບຄວາມນິຍົມຊົມຊອບທີ່ສຸດ ອີກດ້ວຍ.
（ໄຊພອນ）
