 |
ທ່ານຮອງນາຍົກລັດຖະມົນຕີ ສອນໄຊ ສີພັນດອນ ຕີຄ້ອງເປີດງານປີທ່ອງທ່ຽວລາວ 2018.
ກ່ອນເລີ່ມພິທີຢ່າງເປັນທາງການ, ຜູ້ເຂົ້າຮ່ວມໄດ້ຮັບຊົມການສະແດງ ສິລະປະວັນນະຄະດີ ທີ່ສ່ອງແສງເຖິງວັດທະນະທຳ, ຮີດຄອງປະເພນີ, ວິຖີການດຳລົງຊີວິດ, ຄວາມອຸດົມຮັ່ງມີ ແລະ ຄວາມສາມັກ ຄີ ຂອງປະຊາຊົນບັນດາເຜົ່າ ແລະ ທ້ອງຖິ່ນ ແຂວງອັດຕະປື.
ໃນໂອກາດດັ່ງກ່າວ, ທ່ານ ອຸ່ນຫລ້າ ໄຊຍະສິດ ຮອງເຈົ້າແຂວງອັດຕະປື, ປະທານຈັດງານປີທ່ອງທ່ຽວລາວ 2018 ແຂວງອັດຕະປື ໄດ້ລາຍງານໃຫ້ຮູ້ ກ່ຽວກັບຜົນສຳເລັດ ແລະ ການກະກຽມຄວາມ ພ້ອມ ໃນການຈັດງານຄັ້ງນີ້ ວ່າ: ນັບແຕ່ເດືອນມັງກອນ 2018 ເປັນຕົ້ນມາ, ການນຳຂອງແຂວງ ໄດ້ນຳພາ ຈັດຕັ້ງປະຕິບັດບັນດາກິດຈະກຳ ເພື່ອຊຸກຍູ້ວຽກງານທ່ອງທ່ຽວ ເປັນຕົ້ນ ບຸນປະເພນີ ໄຂປະຕູເລົ້າ ຕິດ ພັນກັບເທດສະການປາຫລຸມ ຂອງເຜົ່າອິນທີ ເມືອງສະໜາມໄຊ; ງານບຸນເຂົ້າບ້ານ ທີ່ບ້ານວັງຍາງ ເມືອງພູວົງ, ເທດສະການປີໃໝ່ລາວ ປ່ຽນຜ້າບ່ຽງຢະອົງແສນ ທີ່ວັດສະແຄະ, ງານບຸນບັ້ງໄຟ ທີ່ບ້ານວັດ ຫລວງ ເມືອງໄຊເຊດຖາ, ບຸນກິນເຂົ້າໃໝ່ຂອງເຜົ່າຕະຫລຽງ ເມືອງຊານໄຊ, ເທດສະການອອກພັນສາ ເມືອງສາມັກຄີໄຊ. ນອກຈາກນັ້ນ, ຍັງມີງານປະກວດນາງສາວອັດຕະປື ປະຈຳປີ, ງານປະກວດເຂົ້າປຸ້ນ, ເຂົ້າເຕົ້າ ເອກະລັກ, ງານປະກວດພາຂວັນ, ງານສະແດງສິລະປະວັດທະນະທຳບັນດາເຜົ່າ, ງານເທດສະການອາຫານທ້ອງຖິ່ນ, ງານຕະຫລາດນັດ ແລະ ອື່ນໆ. ການຈັດບັນດາກິດ ຈະກຳເຫລົ່ານີ້, ກໍ່ເພື່ອ ຊຸກຍູ້ສົ່ງເສີມ ມູນເຊື້ອວັດທະນະທຳອັນດີງາມ ຂອງປະຊາຊົນບັນດາເຜົ່າ ແຂວງອັດຕະປື ໃຫ້ນັບມື້ກວ້າງຂວາງ ແລະ ຍືນຍົງ, ເພື່ອສົ່ງເສີມການຜະລິດສິນຄ້າພາຍໃນ ກໍ່ຄື ປະຊາຊົນທ້ອງຖິ່ນ ໃຫ້ມີ ຄວາມຫລາກຫລາຍ, ມີມູນຄ່າເພີ່ມ, ສາມາດສ້າງລາຍຮັບໃຫ້ປະຊາຊົນ, ທັງເປັນການສ້າງເງື່ອນໄຂໃຫ້ປະຊາຊົນ, ຜູ້ປະກອບການ ໄດ້ມີການແລກປ່ຽນສິນຄ້າ, ແລກປ່ຽນບົດຮຽນ ແລະ ປະສົບການ ເຊິ່ງກັນ ແລະ ກັນ ຫລາຍ ກວ່າ ເກົ່າ. ພ້ອມດຽວກັນ, ກໍ່ຍັງເປັນການຍົກລະດັບຄວາມສາມາດ ໃນວຽກງານການບໍລິການ ນຳໃຊ້ທ່າແຮງບົ່ມຊ້ອນຂອງແຂວງ ໃຫ້ເກີດປະໂຫຍດສູງສຸດ ເວົ້າລວມ, ເວົ້າສະເພາະ ກໍ່ ເພື່ອສ້າງກິດຈະກຳ ແລະ ເງື່ອນໄຂ ເພື່ອດຶງດູດການທ່ອງທ່ຽວ ຕິດພັນກັບການສ້າງລາຍຮັບໃຫ້ແຂວງ ກໍ່ຄື ປະຊາຊົນ ເພື່ອປະກອບສ່ວນຫລຸດພົ້ນ ອອກຈາກຄວາມທຸກຍາກເປັນກ້າວໆ. ນອກຈາກນັ້ນ, ຍັງເຮັດໃຫ້ຜູ້ຄົນທັງພາຍໃນ ແລະ ຕ່າງປະເທດ ໄດ້ຮູ້ຄວາມອຸດົມສົມບູນ, ຮັ່ງມີ ຂອງແຂວງອັດຕະປືຫລາຍຂຶ້ນ.
ໂອກາດດຽວກັນ, ທ່ານເຈົ້າແຂວງອັດຕະປື ກໍ່ໄດ້ຕາງໜ້າໃຫ້ການນຳແຂວງ ແລະ ປະຊາຊົນບັນດາເຜົ່າ ຊາວແຂງອັດຕະປື ກ່າວສະແດງຄວາມຂອບໃຈຕໍ່ບັນດາທ່ານ ທີ່ໄດ້ໃຫ້ກຽດເຂົ້າ ຮ່ວມ ງານ ໃນຄັ້ງນີ້. ພ້ອມທັງ ເຊີນຊວນແຂກພາຍໃນ ແລະ ຕ່າງປະເທດ ເຂົ້າມາທ່ຽວຊົມດິນແດນອັດຕະປື ຜືນແຜ່ນດິນຄຳ ຕຳນານພະເຈົ້າໄຊຍະເຊດຖາ ຊົມໜອງຟ້າເທິງພູ ບູຊາຍະອົງແສນ ດິນແດນປ່າໄມ້ຂຽວ ມາທ່ຽວ ເມືອງອົງການເດິຢະເອີຍ ພ້ອມສຳພັດກັບວັດທະນະທຳ ທີ່ເປັນເອກະລັກ, ທຳມະຊາດທີ່ຊົງຄຸນຄ່າ ແລະ ສວຍສົດງົດງາມ, ປະຫວັດສາດທີ່ໜ້າຄົ້ນຫາ, ປະຊາທັງປວງ ຍິນດີຕ້ອນຮັບຢ່າງສຸດໃຈ. ພ້ອມດຽວ ກັນນີ້, ທ່ານ ສອນໄຊ ສີພັນດອນ ໄດ້ຕັດແຖບຜ້າ ແລະ ລັ່ນຄ້ອງ 9 ບາດ ເພື່ອເປັນສີລິມຸງຄຸນ ໃນພິທີເປີດງານດັ່ງກ່າວ.
（ແຫຼ່ງຂໍ້ມູນ： ຂປລ）
