ທ່ານ ນາຍົກລັດຖະມົນຕີ ແຫ່ງ ສປປ ລາວ ທອງລຸນ ສີສຸລິດ.
ຜູ້ບໍລິຫານການສຶກສາ, ຄູອາຈານ, ນັກຮຽນ-ນັກສຶກສາ, ພີ່ນ້ອງ ປວງຊົນລາວ ໃນທົ່ວປະເທດ ທີ່ນັບຖື ແລະ ຮັກແພງ
ເນື່ອງໃນໂອກາດ ວັນໄຂສົກຮຽນໃໝ່ ສົກຮຽນ 2018-2019 ນີ້, ຂ້າພະເຈົ້າ ຂໍຕາງໜ້າກົມການເມືອງສູນກາງພັກ ແລະ ລັດຖະບານ ຂໍຝາກຄວາມຢ້ຽມຢາມຖາມຂ່າວ, ອັນອົບອຸ່ນ ຄວາມຮັກແພງ ອັນຈິງໃຈ ມາຍັງຜູ້ບໍລິຫານການ ສຶກສາທຸກຂັ້ນ, ຄູ, ອາຈານ ແລະ ນັກຮຽນ-ນັກສຶກສາທຸກຊັ້ນ, ທຸກສາຍ ທຸກລະດັບ ທຸກຂົງເຂດ ໃນຂອບເຂດທົ່ວປະເທດ ມານະໂອກາດນີ້.
ການສຶກສາ ແມ່ນຂະແໜງການໜຶ່ງ ທີ່ລັດຖະບານ ໄດ້ໃຫ້ຄວາມສຳຄັນຍິ່ງ ໃນການປະຕິບັດນະໂຍບາຍຂອງພັກ ແລະ ຜັນຂະຫຍາຍແຜນພັດທະນາເສດຖະກິດ -ສັງຄົມຂອງລັດ ການພັດທະນາການສຶກສາ ເປັນການພັດ ທະນາຄົນ ໃຫ້ມີຄວາມຮູ້, ຄວາມສາມາດນັບມື້ນັບສູງ ເພື່ອຕອບສະໜອງຄວາມຮຽກຮ້ອງຕ້ອງການ ຂອງການພັດທະນາປະເທດຊາດ ໃນປະຈຸບັນ ແລະ ອະນາຄົດ.
ໃນສົກຮຽນຜ່ານມາ ໄດ້ດຳເນີນໄປໃນບັນຍາກາດທີ່ດີ ແລະ ການພັດທະນາ ກໍ່ຄືການປະຕິຮູບການສຶກສາ ໄດ້ດຳເນີນໄປຕາມທິດທາງ ຂອງການພັດທະນາ ແບບ ຍືນຍົງ, ຊຶ່ງເຫັນວ່າສົກປີຜ່ານມາ ພວກເຮົາໄດ້ມີຜົນສຳເລັດຫຼາຍດ້ານ ເປັນຕົ້ນ ດ້ານຄຸນນະພາບຂອງການສຶກສາ ໄດ້ຮັບການຍົກລະດັບຂຶ້ນຕື່ມ ແນໃສ່ເພື່ອໃຫ້ເທົ່າທຽມກັບມາດຕະຖານ ຂອງບັນດາປະເທດໃນພາກພື້ນ ແລະ ສາກົນ ເທື່ອລະກ້າວ, ຊຶ່ງສະແດງອອກ ໃນການທີ່ນັກຮຽນ ຂອງພວກເຮົາ ຈຳນວນໜຶ່ງ ສາມາດເຂົ້າຮ່ວມ ການແຂ່ງຂັນ ແລະ ໄດ້ຮັບລາງວັນ ໃນເວທີການແຂ່ງຂັນ ດ້ານການສຶກສາ ໃນລະດັບພາກພື້ນ ແລະ ສາກົນ. ຄຽງຄູ່ກັບຄຸນນະພາບ ທີ່ປັບປຸງໃຫ້ດີຂຶ້ນ, ດ້ານປະລິມານ ກໍມີການຂະຫຍາຍຕົວ ສາມາດ ບັນລຸບາງຕົວເລກ ຄາດ ໝາຍຈຳນວນໜຶ່ງ ໃນນີ້ອັນພົ້ນເດັ່ນແມ່ນ ອັດຕາປະລະການຮຽນຂອງນັກຮຽນ ປ 1 ຫຼຸດລົງ, ອັດຕາການເຂົ້າຮຽນຂອງເດັກ 5 ປີ ເພີ່ມຂຶ້ນ, ຈຳນວນນັກຮຽນທີ່ສະໝັກເຂົ້າສາຍອາຊີວະສຶກສາ ເພີ່ມຂຶ້ນ.
ຕາງໜ້າໃຫ້ສູນກາງພັກ ແລະ ລັດຖະບານ, ຂ້າພະເຈົ້າ ຂໍສະແດງຄວາມຍ້ອງຍໍຊົມເຊີຍ ມາຍັງຄະນະພັກ-ຄະນະນໍາກະຊວງສຶກສາທິການ ແລະ ກິລາ, ບັນດາສະຖາບັນການສຶກສາທຸກຂັ້ນ, ອົງການຈັດຕັ້ງ ທັງພາກລັດ ແລະ ເອກະຊົນທີ່ ກ່ຽວຂ້ອງ ພະນັກງານອາວຸໂສ, ພໍ່ແມ່ປະຊາຊົນບັນດາເຜົ່າ ແລະ ນັກຮຽນ-ນັກສຶກສາທຸກຖ້ວນໜ້າ ທີ່ໄດ້ປະກອບສ່ວນຢ່າງຕັ້ງໜ້າ ຕໍ່ຜົນສໍາເລັດດັ່ງທີ່ກ່າວມານີ້. ພ້ອມກັນນີ້, ກໍ່ສະແດງຄວາມຂອບໃຈມາຍັງ ບັນດາຄູ່ຮ່ວມພັດທະນາ, ປະ ເທດເພື່ອນມິດ, ອົງການຈັດຕັ້ງສາກົນ ແລະ ອົງການຈັດຕັ້ງທີ່ບໍ່ສັງກັດລັດຖະບານ ທີ່ໃຫ້ການຊ່ວຍເຫຼືອ ແລະ ມີສ່ວນຮ່ວມໃນວຽກງານ ພັດທະນາການສຶກສາ ເຮັດໃຫ້ລະບົບການສຶກສາ ຂອງ ສປປ ລາວ ໄດ້ຮັບການປັບປຸງ ແລະ ພັດທະນາ ເປັນກ້າວໆ ແລະ ຫວັງຢ່າງຍິ່ງວ່າ ຈະໄດ້ຮັບການສືບຕໍ່ສະໜັບສະໜູນ ໃນຕໍ່ໜ້າ.
ພີ່ນ້ອງຮ່ວມຊາດ ທີ່ຮັກແພງທັງຫຼາຍ,
ເຖິງວ່າພວກເຮົາກ້າວເຂົ້າສູ່ ການໄຂສົກຮຽນໃໝ່ ຂອງປີ 2018-2019 ນີ້ ຈະມີອຸປະສັກນານາປະການ, ໂດຍສະເພາະ ທົ່ວປະເທດຂອງພວກເຮົາກຳລັງ ປະສົບກັບອຸທົກກະໄພ ຢ່າງຮ້າຍແຮງກໍ່ຕາມ, ເພື່ອຮັບປະກັນ ໃຫ້ການຮຽນ -ການສອນ ໃນສົກປີ 2018-2019 ດຳເນີນໄປຢ່າງ ມີປະສິດທິຜົນ ແລະ ເພື່ອສືບຕໍ່ພັດທະນາລະບົບການສຶກສາ ຂອງປະເທດເຮົາ ໃຫ້ຂະຫຍາຍຕົວ ເປັນພື້ນຖານ ໃຫ້ແກ່ການພັດທະນາເສດຖະກິດ ແລະ ສັງຄົມຂອງປະເທດເຮົາ, ຂ້າພະເຈົ້າ ຂໍຮຽກຮ້ອງມາຍັງ ທຸກພາກສ່ວນທົ່ວສັງຄົມ ໃຫ້ພ້ອມກັນເອົາໃຈໃສ່ ປະຕິບັດໜ້າທີ່ ຂອງຕົນ, ໃນນີ້:
- ໃຫ້ຜູ້ບໍລິຫານການສຶກສາ ຈົ່ງເພີ່ມທະວີຄວາມຮັບຜິດຊອບ ຕໍ່ໜ້າທີ່ວຽກງານຂອງຕົນໃຫ້ສູງຂຶ້ນ ແລະ ປະຕິບັດກົດໝາຍ ແລະ ລະບຽບການດ້ານການສຶກສາ ຢ່າງເຂັ້ມງວດ, ພັດທະນາສະຖາບັນການສຶກສາຂອງຕົນ ໃຫ້ມີຄຸນ ນະພາບ ແລະ ໄດ້ມາດຕະຖານ, ເອົາໃຈໃສ່ ຕ້ານທຸກປະກົດການຫຍໍ້ທໍ້ ໃນສະຖາບັນການສຶກສາຂອງຕົນ ກໍ່ຄືປະກົດການຫຍໍ້ທໍ້ ໃນຂະແໜງການສຶກສາ ໃຫ້ຕົກໄປ ແລະ ສ້າງໃຫ້ມີບາດກ້າວໃໝ່ ທີ່ນັບມື້ນັບມີຄຸນນະພາບ, ປອດໃສ ແລະ ກ້າວ ໜ້າທັນສະໄໝ.
- ບັນດາຄູ-ອາຈານ ຈົ່ງເພີ່ມທະວີ ຄວາມຮັບຜິດຊອບຕໍ່ໜ້າທີ່ວຽກງານຂອງຕົນ, ປະຕິບັດໜ້າທີ່ ເປັນແມ່ພິມ ທີ່ດີຂອງຊາດ ດ້ວຍຄວາມສັດຊື່ບໍລິສຸດ ແລະ ມີຈັນຍາບັນ, ເຝິກຝົນ ແລະ ພັດທະນາຕົນເອງ ດ້ານວິຊາສະເພາະ ແລະ ເຕັກນິກວິທີການສອນ ທີ່ສ້າງສັນ, ໃຫ້ທັນກັບສະພາບການ ແລະ ເຕັກໂນໂລຊີ ໃໝ່ ເພື່ອສົ່ງຄວາມຮູ້ ໃຫ້ແກ່ນັກຮຽນ-ນັກສຶກສາ ໃຫ້ມີປະສິດທິຜົນ.
- ຜູ້ປົກຄອງຂອງນັກຮຽນ-ນັກສຶກສາ ຈົ່ງພ້ອມກັນຊຸກຍູ້ສົ່ງເສີມ ໃຫ້ລູກຫຼານຢູ່ໃນເກນອາຍຸເຂົ້າຮຽນທັງສາມັນສຶກສາ ແລະ ວິຊາຊີບ ໄປເຂົ້າໂຮງຮຽນທັງສາມັນສຶກສາ ແລະ ວິຊາຊີບ ແລະ ເອົາໃຈໃສ່ຮ່ຳຮຽນ ພ້ອມທັງຊ່ວຍສຶກສາ ອົບຮົມຕັກເຕືອນລູກຫຼານຂອງຕົນ ໃຫ້ເຫັນຄວາມສຳຄັນຂອງການສຶກສາ ທີ່ມີຕໍ່ອານາຄົດຂອງຕົນເອງ ກໍ່ຄືປະເທດຊາດ.
- ນັກຮຽນ-ນັກສຶກສາ ຈົ່ງມີຄວາມຕັ້ງໃຈຄົ້ນຄວ້າ ຮ່ຳຮຽນຢູ່ໃນຫ້ອງຮຽນ ແລະ ຮຽນດ້ວຍຕົນເອງໃຫ້ຫຼາຍຂຶ້ນ, ມີຄວາມດຸໝັ່ນຂະຫຍັນພຽນ, ຈົ່ງຕັ້ງໜ້າຝຶກຝົນຫຼໍ່ຫຼອມ ໃຫ້ກາຍເປັນນັກຮຽນທີ່ດີ, ນັກຮຽນເກັ່ງ ຂອງຄູ-ອາຈານ, ເປັນລູກຫຼານທີ່ດີ ຂອງຜູ້ປົກຄອງ,ເປັນພົນລະເມືອງດີ ຂອງປະເທດຊາດ ແລະ ເປັນຜູ້ທີ່ມີຄວາມຮູ້ ຄວາມສາມາດ ເພື່ອພັດທະນາ ແລະ ສ້າງສາບ້ານເມືອງ.
- ການຈັດຕັ້ງພັກ-ລັດ, ອົງການຈັດຕັ້ງມະຫາຊົນ, ຊຸມຊົນ, ຜູ້ປະກອບການ ແລະ ສັງຄົມໂດຍລວມ ຈົ່ງພ້ອມກັນປະກອບສ່ວນ ຕາມພາລະບົດບາດຂອງຕົນ ໃນການສຶກສາອົບຮົມ, ບົ່ມສອນ ແລະ ສ້າງສະພາບແວດລ້ອມ ທີ່ດີເພື່ອ ໃຫ້ນັກຮຽນ-ນັກສຶກສາ ໄດ້ຮັບຄວາມຮູ້ ແລະ ເຕີບໃຫຍ່ຂະຫຍາຍຕົວ ເປັນພົນລະເມືອງທີ່ດີຂອງປະເທດຊາດ ແລະ ຖືເອົາວຽກງານການສຶກສາ ເປັນໜ້າທີ່ ແລະ ຄວາມຮັບຜິດຊອບ ຂອງໝົດທຸກຄົນໃນທົ່ວສັງຄົມ.
ເນື່ອງຈາກໃນປີນີ້ ປະເທດເຮົາ ໄດ້ປະສົບກັບໄພທໍາມະຊາດຢ່າງຮ້າຍແຮງຢູ່ນັ້ນ ການເປີດສົກ ຮຽນ ໃໝ່ 2018-2019 ນີ້ ຈະພົບກັບຄວາມຫຍຸ້ງຍາກຫຼາຍດ້ານ, ໂດຍສະເພາະຢູ່ບາງທ້ອງຖິ່ນ, ບາງໂຮງຮຽນ ອາດບໍ່ສາມາດ ໄຂສົກຮຽນ ໃໝ່ ໄດ້ຕາມກຳນົດເວລາ. ລັດຖະບານ ຈະຮີບຮ້ອນສຸມທຸກຄວາມສາມາດ ໃນການຟື້ນຟູ, ສ້ອມແປງໂຮງຮຽນ, ຫ້ອງຮຽນ ແລະ ສະໜອງວັດຖຸອຸປະກອນ ຮັບໃຊ້ການສອນ-ການຮຽນ ເພື່ອໃຫ້ສາມາດເປີດການສອນ-ການຮຽນ ໃຫ້ໄດ້ໄວທີ່ສຸດ ເທົ່າທີ່ຈະໄວໄດ້.
ໃນໂອກາດນີ້, ຂ້າພະເຈົ້າຈຶ່ງຂໍຮຽກຮ້ອງ ມາຍັງທຸກການຈັດຕັ້ງ ທັງພາກລັດ ແລະ ພາກເອກະຊົນໃນທົ່ວສັງຄົມ ຈົ່ງໃຫ້ການຮ່ວມມື ແລະ ເປັນເຈົ້າການຮ່ວມກັບ ຂະແໜງການສຶກສາ ແລະ ກິລາ ໃນການກະກຽມຄວາມພ້ອມ, ອໍານວຍ ຄວາມສະດວກ ແລະ ຊ່ວຍເຫຼືອ ຕາມເງື່ອນໄຂ ແລະ ຄວາມສາມາດຕົວຈິງຂອງແຕ່ລະພາກສ່ວນ ເພື່ອໃຫ້ການເປີດສົກຮຽນໃໝ່ 2018-2019 ດໍາເນີນໄປໄດ້ດ້ວຍດີ ແລະ ມີປະສິດທິຜົນ.
ທ້າຍສຸດນີ້, ຂ້າພະເຈົ້າ ຂໍອວຍພອນໄຊອັນປະເສີດ ມາຍັງຜູ້ບໍລິຫານການສຶກສາ, ຄູ-ອາຈານ, ນັກຮຽນ-ນັກສຶກສາ, ພະນັກງານ-ລັດຖະກອນ, ທະຫານ, ຕຳຫຼວດ ຕະຫຼອດຮອດປະຊາຊົນລາວບັນດາເຜົ່າ ໃນທົ່ວປະເທດ ຈົ່ງມີສຸຂະ ພາບເຂັ້ມແຂງ, ມີຄວາມສຸກ ແລະ ປະສົບຜົນສຳເລັດ ໃນໜ້າທີ່ວຽກງານຂອງຕົນ.
（ແຫຼ່ງຂໍ້ມູນ： ຂປລ）
