ທ່ານນາຍົກລັດຖະມົນຕີ ຫວຽດນາມ ຫງວຽນຊວນຟຸກ ເປັນປະທານກອງປະຊຸມລັດຖະບານ ກ່ຽວກັບການຊຸກຍູ້ການຮ່ວມມືກັບລາວ.(ພາບ:dangcongsan.vn)
ປີ 2019 ເປັນປີທີ່ການພົວພັນ ລະຫວ່າງ ຫວຽດນາມ ແລະ ລາວ ມີບາດກ້າວຂະຫຍາຍຕົວທີ່ເປັນໜ້າພາກພູມໃຈໃນບັນດາຂົງເຂດວຽກງານ ກຳລັງເຂົ້າສູ່ແທ້ຈິງ ແລະ ມີປະສິດທິຜົນກວ່າເກົ່າ, ພິເສດແມ່ນການຮ່ວມມື ໃນບັນດາຂົງເຂດການເມືອງ, ການຕ່າງປະເທດ, ການປ້ອງກັນຊາດ-ປ້ອງກັນຄວາມສະຫງົບ, ການຮ່ວມມືດ້ານເສດຖະກິດ ມີບາດກ້າວຂະຫຍາຍຕົວ ທີ່ຕັ້ງໜ້າດ້ວຍບັນດາໂຄງການທີ່ມີ ຄວາມໝາຍຍຸດທະສາດຍາວນານ, ເຊື່ອມຈອດສອງພື້ນຖານເສດຖະກິດ; ປະສິດທິຜົນຂອງການພົວພັນແລກປ່ຽນ ແລະ ການຮ່ວມມື ລະຫວ່າງບັນດາທ້ອງຖິ່ນ ຂອງສອງປະເທດສືບຕໍ່ ໄດ້ຮັບການເພີ່ມທະວີ. ໃນປີທີ່ຜ່ານມາ ພັກ, ລັດ ແລະ ປະຊາຊົນລາວອ້າຍນ້ອງ ຍາມໃດກໍ່ໃຫ້ການສະໜັບສະໜູນ ຊ່ວຍເຫລືອທີ່ສຸດອົກສຸດໃຈ ແລະ ມີປະສິດທິຜົນແກ່ຫວຽດນາມ, ກໍ່ຄື ສະຖານທູດ ແລະ ບັນດາອົງການຜູ້ຕາງໜ້າ, ບັນດາວິສາຫະກິດ ແລະ ຊາວຫວຽດນາມ ທີ່ອາໄສຢູ່ລາວ.
ໃນກອງປະຊຸມ ຄັ້ງທີ 42 ປະຈຳປີ 2020 ຂອງຄະນະກຳມະການຮ່ວມມືທະວິພາຄີ ລະຫວ່າງລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງ ສສ ຫວຽດນາມ ສອງຝ່າຍ ໄດ້ຮ່ວມກັນຕີລາຄາຜົນຂອງການຈັດຕັ້ງປະຕິບັດບົດບັນທຶກກອງປະຊຸມ ຄັ້ງທີ 41 ກໍຄື ຂໍ້ຕົກລົງວ່າດ້ວຍແຜນການຮ່ວມມື ປະຈຳປີ 2019 ແລະ ພ້ອມກັນປຶກສາຫາລື ກ່ຽວກັບທິດທາງການຮ່ວມມືໃນປີ 2020 ສອງຝ່າຍ ໄດ້ຕີລາຄາສູງຕໍ່ບັນດາຜົນສຳເລັດຂອງການຈັດຕັ້ງປະຕິບັດ ຂໍ້ຕົກລົງວ່າດ້ວຍແຜນການຮ່ວມມື ໃນປີ2019 ຜ່ານມາ ໄດ້ບັນລຸຜົນສຳເລັດໃນຫຼາຍດ້ານເປັນຕົ້ນແມ່ນ ການຮ່ວມມືດ້ານການເມືອງ-ການຕ່າງປະເທດ ປ້ອງກັນຊາດ-ປ້ອງກັນຄວາມສະຫງົບແມ່ນສືບຕໍ່ໄດ້ຮັບການຈັດຕັ້ງປະຕິບັດເປັນຢ່າງດີ ມີການເຄື່ອນໄຫວແລກປ່ຽນຄະນະຜູ້ແທນຂັ້ນສູງຂອງສອງພັກ ສອງລັດ ຢ່າງເປັນປົກກະຕິ ດ້ານເສດຖະກິດ-ການຄ້າ ແລະ ການລົງທຶນ ມາຮອດປັດຈຸບັນ ການລົງທຶນຂອງບັນດາວິສາຫະກິດຫວຽດນາມຢູ່ລາວ ລວມມູນຄ່າມີເຖິງ 4,2 ຕື້ ໂດລາສະຫະລັດ ຈັດຢູ່ໃນອັນດັບ 3 ໃນຈຳນວນການລົງທຶນຂອງຕ່າງປະເທດຢູ່ ສປປ ລາວ ແລະ ມູນຄ່າການຄ້າສອງຝ່າຍປີ 2019 ບັນລຸໄດ້ 1,2 ລ້ານ ໂດລາສະຫະລັດ ເພີ່ມຂື້ນ 12,4% ການຮ່ວມມືໃນຂົງເຂດການສຶກສາ-ບຳລຸງສ້າງ ກໍໄດ້ຮັບເປີດກວ້າງດ້ວຍຫຼາຍຮູບການ, ປັດຈຸບັນ ຈຳນວນນັກສຶກສາລາວ ທີ່ກຳລັງຄົ້ນຄວ້າຮ່ຳຮຽນ ຢູ່ ສສ ຫວຽດນາມ ມີຫຼາຍກວ່າ 16.600 ຄົນ ນອກຈາກນີ້ ສອງຝ່າຍຍັງມີການຮ່ວມມືໃນຂົງເຂດອື່ນໆອີກ.
ສຳລັບທິດທາງແຜນການຮ່ວມມື ໃນປີ 2020 ສອງຝ່າຍໄດ້ຕົກລົງເຫັນດີເປັນເອກະພາບ ສືບຕໍ່ຈັດຕັ້ງປະຕິບັດຕາມທິດຊີ້ນຳຂອງສອງກົມການເມືອງ ແລະ ຂໍ້ຕົກລົງວ່າດ້ວຍແຜນການຮ່ວມມື ລະຫວ່າງສອງລັດຖະບານ ໃຫ້ປາກົດຜົນເປັນຈິງ ໃນນັ້ນ ເອົາໃຈໃສ່ສືບຕໍ່ເພີ່ມທະວີການພົວພັນດ້ານການເມືອງ ປ້ອງກັນຊາດ-ປ້ອງກັນຄວາມສະຫງົບ ຍົກສູງປະສິດທິຜົນຂອງບັນດາກົນໄກການຮ່ວມມື ແລະ ການຈັດຕັ້ງຜັນຂະຫຍາຍເນື້ອໃນຖະແຫຼງການຮ່ວມ ແລະ ບັນດາຂໍ້ຕົກລົງຕ່າງໆໃຫ້ເປັນຮູບປະທຳຍິ່ງຂຶ້ນ ໂດຍສະເພາະແມ່ນການຜັນຂະຫຍາຍການບົດບັນທຶກຄວາມເຂົ້າໃຈ ກ່ຽວກັບ ການຮ່ວມມືດ້ານຄົມມະນາຄົມ ແລະ ຂົນສົ່ງ ການຮ່ວມມືພັດທະນາບັນດາໂຄງການໄຟຟ້າຢູ່ລາວ ເຊື່ອມຕໍ່ລະບົບໄຟຟ້າ ແລະ ການຊື້-ຂາຍ ໄຟຟ້າ ດັ່ງນີ້ເປັນຕົ້ນ ຄຽງຄູ່ກັນນີ້ ສອງຝ່າຍ ກໍ່ຈະພ້ອມກັນ ສືບຕໍ່ເພີ່ມທະວີການຮ່ວມມື ແລະ ສ້າງເງື່ອນໄຂເພື່ອເອື້ອອຳນວຍຄວາມສະດວກໃຫ້ແກ່ການຮ່ວມມືດ້ານການຄ້າ ການລົງທຶນ ການສຶກສາ ກໍ່ຄື ການພັດທະນາຊັບພະຍາກອນມະນຸດສອງປະເທດ ແລະ ການຮ່ວມມືໃນບັນດາຂົງເຂດທີ່ສອງຝ່າຍມີທ່າແຮງບົ່ມຊ້ອນ.
ໃນໂອກາດກອງປະຊຸມຄັ້ງນີ້ ສອງນາຍົກລັດຖະມົນຕີລາວ ແລະ ຫວຽດນາມ ໄດ້ຖະແຫຼງຂ່າວຮ່ວມຜົນສຳເລັດ ແລະ ຮ່ວມເປັນສັກຂີພະຍານໃນການລົງນາມເອກະສານຮ່ວມມືເຖິງ 8 ສະບັບ ໃນນັ້ນມີຂໍ້ຕົກລົງວ່າດ້ວຍການຮ່ວມມືລະຫວ່າງລັດຖະບານ ສປປ ລາວ ແລະ ສສ ຫວຽດນາມ ບົດບັນທຶກກອງປະຊູມຄະນະກຳມະການຮ່ວມມືດັ່ງກ່າວ ສົນທິສັນຍາສອງຝ່າຍວ່າດ້ວຍການໂອນຕົວຜູ້ຖືກຕັດສິນລົງໂທດ ແລະ ສັນຍາກ່ຽວກັບການຊື້-ຂາຍໄຟຟ້າ ຂອງ 5 ໂຄງການ.
(ໄຊພອນ)