 |
Ảnh minh họa
ໂຄງການປະກວດແຕ້ມຮູບລົດໂຕໂຍຕ້າ ໃນຝັນຂອງຂ້ອຍປະຈຳປີ 2018 ໄດ້ຄັດເລືອກເອົາຮູບແຕ້ມຂອງເຍົາວະຊົນລາວ ທີມີຊື່ວ່າ: “ລົດສະຖາບັດຕະຍະກຳ ແລະ ປະຫວັດສາດໂລກ” ກໍຄື ນາງ ສຸກສະຫວັນ ມະນີວົງໄຊ ຈາກໂຮງຮຽນມັດທະຍົມຕອນຕົ້ນ ເພຍວັດ ນະຄອນຫລວງວຽງຈັນ ຜູ້ສະນະເລີດການແຂ່ງຂັນແຕ້ມຮູບ ອັນດັບ 2 ລຸ້ນອາຍຸ 12-15 ປີ ໃນລະດັບປະເທດ ເປັນຕົວແທນປະເທດ ໄປແຂ່ງຂັນຮູບແຕ້ມລະດັບໂລກ ຢູ່ປະເທດຍີ່ປຸ່ນ ໃນລະຫວ່າງວັນທີ 27-31 ສິງຫາ 2018 ນີ້.
ທ່ານ ນິກອນ ປະເສີດສົມ ທີ່ປຶກສາບໍລິຫານສຳນັກງານ ໂຄງການເຂດພູມີພາກແມ່ນ້ຳຂອງ ບໍລິສັດໂຕໂຍຕ້າ ມໍເຕີ ປະເທດໄທ ລາຍງານໃຫ້ຮູ້ ໃນວັນທີ 19 ມິຖຸນາ 2018 ນີ້ວ່າ: ໂຄງການປະກວດແຕ້ມຮູບ ລົດໂຕໂຍຕ້າ ໃນຝັນຂອງຂ້ອຍ ປະຈຳປີ 2018 ຈັດຂຶ້ນເພື່ອສົ່ງເສີມໃຫ້ເຍົາວະຊົນລາວ ກ້າສະແດງອອກຜ່ານຄວາມຄິດສ້າງສັນ ແລະ ຈິນຕະນາການ ໂດຍມີສິລະປະ ເປັນສື່ກາງຜ່ານການແຕ້ມຮູບ ໃນຫົວຂໍ້ “ລົດໂຕໂຍຕ້າ ໃນຝັນຂອງຂ້ອຍ” ເຊິ່ງໃນປີນີ້ ມີຜົນງານເຂົ້າປະກວດຫລາຍກວ່າ 650.000 ຜົນງານ, ຈາກ 76 ປະເທດທົ່ວໂລກ ແລະ ຄະນະກຳມະການໄດ້ຄັດເລືອກເອົາເຍົາ ວະຊົນ 30 ຄົນ ທີ່ມີຜົນງານດີເດັ່ນ ເຂົ້າຮ່ວມການແຂ່ງຂັນລະດັບໂລກ ຢູ່ປະເທດຍີ່ປຸ່ນ. ສຳລັບເຍົາວະຊົນ ທີ່ຈະໄປຮ່ວມແຂ່ງຂັນໃນລະດັບໂລກໃນຄັ້ງນີ້, ຈະໄດ້ເຂົ້າໄປຊົມໂຮງງານຜະລິດລົດໂຕໂຍຕ້າ ແລະ ຮ່ວມກິດ ຈະກຳ ຂອງທາງໂຄງການອີກຫລາຍຢ່າງ.
ໂຄງການປະກວດແຕ້ມຮູບ “ລົດໂຕໂຍຕ້າ ໃນຝັນຂອງຂ້ອຍ” ເລີ່ມໃນສປປ ລາວ ມາແຕ່ປີ 2011 ແລະ ໃນປີ 2014 ກໍມີຜົນງານຮູບແຕ້ມຂອງເຍົາວະຊົນລາວ ທີ່ສາມາດຄວ້າລາງວັນ Silver Award ໃນລະດັບໂລກມາແລ້ວ ແລະ ໃນປີ 2017 ກໍມີຜົນງານຂອງ 2 ນ້ອງເຍົາວະຊົນ ທີ່ສາມາດຄວ້າລາງວັນ Silver Award ແລະ Bronze Award.
（ແຫຼ່ງຂໍ້ມູນ： ຂປລ）
