 |
ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ເປັນກຽດລັ່ນຄ້ອງເປີດງານສະເຫລີມສະຫລອງຫລັກເມືອງ ຄົບຮອບ 10 ປີ ຢູ່ແຂວງຫົວພັນ.
ໃນຕອນແລງຂອງ ວັນທີ 18 ພຶດສະພາ 2018, ໄດ້ຈັດມີພິທີເປີດ ປີທ່ອງທ່ຽວລາວ 2018 ແລະ ງານສະເຫລີມສະຫລອງ ໜ່ວຍແກ້ວຫລັກເມືອງ ຄົບຮອບ 10 ປີ ຢູ່ແຂວງຫົວພັນ ຢ່າງຄຶກຄື້ນ, ໂດຍມີທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ທ່ານ ວັນໄຊ ແພງຊຸມມາ ເຈົ້າແຂວງຫົວພັນ, ພ້ອມດ້ວຍບັນດາແຂກຜູ້ມີກຽດ ແລະ ມວນຊົນຊາວແຂວງຫົວພັນ ເຂົ້າຮ່ວມຢ່າງຫລວງຫລາຍ.
ທ່ານ ພູວັນ ເພັດມີໄຊ ຮອງຫົວໜ້າ ພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວ ກ່າວວ່າ: ພາຍຫລັງທີ່ລັດຖະບານໄດ້ປະກາດ ເປີດປີທ່ອງທ່ຽວລາວ 2018 ຢ່າງເປັນທາງການ ເມື່ອທ້າຍປີ 2017 ເປັນຕົ້ນມາ, ບັນດາແຂວງຕ່າງໆໄດ້ສຸມໃສ່ສ້າງກິດຈະກຳ ທີ່ເປັນມູນເຊື້ອປະເພນີ ແລະ ປະດິດສ້າງສິ່ງໃໝ່ໆ ເພື່ອດຶງດູດນັກທ່ອງທ່ຽວ ເຂົ້າມາທ່ຽວ ໃນແຂວງຂອງຕົນໃຫ້ຫລາຍຂຶ້ນ. ເພາະແຂວງຫົວພັນ ກໍໄດ້ສ້າງປະຕິທິນ ປີທ່ອງທ່ຽວ 2018 ຂຶ້ນ, ລວມມີ 19 ລາຍການ ເຊັ່ນ: ບຸນຊົນເຜົ່າເມືອງວຽງໄຊ, ບຸນກິນຈຽງເຜົ່າມົ້ງ ເມືອງຊຳເໜືອ, ບຸນເກຣິເຜົ່າຂະມຸ ເມືອງຫົວເມືອງ, ບຸນກິນຈຽງເຜົ່າໄທດຳ ເມືອງຊ່ອນ, ບຸນເຂົ້າໃໝ່ໄຕແດງ, ເທດສະການໄໝມ້ອນ, ບຸນປົດປ່ອຍຜາຖີ່ຄົບຮອບ 50 ປີ, ລວມທັງບຸນໜ່ວຍແກ້ວຫລັກເມືອງ, ບຸນສ້າງຕັ້ງເມືອງວຽງໄຊ ຄົບຮອບ 50 ປີ ແລະ ອື່ນໆ. ກິດຈະກຳທັງໝົດໄດ້ຮັບການ ຈັດຕັ້ງປະຕິບັດແລ້ວ ແລະ ສືບຕໍ່ປະຕິບັດໄປຈົນສິ້ນປີ. ສຳລັບປີ 2017 ຜ່ານມາ ມີນັກທ່ອງທ່ຽວເຂົ້າມາທ່ຽວ ຢູ່ແຂວງຫົວພັນ ປະມານ 50 ພັນເທື່ອຄົນ, ສ້າງລາຍຮັບໃຫ້ສັງຄົມຫລາຍກວ່າ 34 ຕື້ກີບ ແລະ ຄາດວ່າປີນີ້ ຈະມີນັກທ່ທອງທ່ຽວ ເຂົ້າມາແຂວງຫົວພັນເພີ່ມຂຶ້ນ.
ທ່ານ ພູວັນ ເພັດມີໄຊ ໃຫ້ຮູ້ຕື່ມວ່າ: ໜ່ວຍແກ້ວຫລັກເມືອງຂອງແຂວງຫົວພັນ ໄດ້ຮັບການສ້າງຕັ້ງຂຶ້ນໃນປີ 2008, ໂດຍການຊີ້ນຳ-ນຳພາ ຂອງອົງຄະນະພັກແຂວງ ຊຸດທີ VII, ໂດຍທ່ານ ພັນຄຳ ວິພາວັນ ເປັນແຈົ້າແຂວງໃນເວລານັ້ນ. ມາເຖິງປັດຈຸບັນ ໜ່ວຍແກ້ວໄດ້ກາຍເປັນສັນຍາລັກ ໜຶ່ງທີ່ສະແດງເຖິງຄວາມຮູ້ບຸນຄຸນ ຕໍ່ວິລະກຳອັນລ້ຳເລີດຂອງບັນພະບຸລຸດ, ພະນັກງານນັກຮົບ ແລະ ປະຊາຊົນບັນດາເຜົ່າ ທີ່ໄດ້ເສຍສະຫລະຊີວິດ ເພື່ອຊາດ, ເພື່ອແຜ່ນດິນແຂວງຫົວພັນ ເຊິ່ງ ເປັນການຢັ້ງຢືນວ່າ ປະຊາຊົນທີ່ດຳລົງຊີວິດ ຢູ່ຜືນແຜນດິນແຫ່ງນີ້ ມີມູນເຊື້ອຄວາມສາມັກຄີ, ຮັກຫອມຕອມຕຸ້ມເປັນປຶກແຜ່ນແໜ້ນໜາ, ມີວັດທະນະທຳຮີດຄອງປະເພນີອັນດີງາມ ແລະ ມີນ້ຳໃຈເດັດດ່ຽວອົງອາດກ້າຫານ ບໍ່ຍອມຈຳນົນມາແຕ່ດຶກດຳບັນ. ໜ່ວຍແກ້ວຫລັກເມືອງ ແມ່ນສະຖາປັດຕະຍາກຳ ແຫ່ງຍຸກສະໄໝ ຕິດພັນກັບມູນເຊື້ອ ປະຫວັດ ສາດ ແລະ ວັດທະນະທຳອັນດີງາມ ຂອງຊາວແຂວງຫົວພັນ ທີ່ຖ່າຍຖອດມາແຕ່ຍຸກສະໄໝ ກາຍເປັນສິ່ງສັກສິດ ແລະ ລ້ຳຄ່າ ຢູ່ຄູ່ບ້ານຄູ່ເມືອງ, ທັງເປັນບ່ອນທ່ຽວຊົມ ແລະ ເຄົາລົບບູຊາຂອງຊາວແຂວງຫົວພັນ.
ໃນໂອກາດດຽວກັນ, ທ່ານ ວັນໄຊ ແພງຊຸມມາ ໄດ້ກ່າວສະແດງຄວາມຊົມເຊີຍ ຄະນະຮັບຜິດ ຊອບຈັດງານ ແລະ ທຸກພາກສ່ວນກ່ຽວຂ້ອງ ທີ່ໄດ້ເອົາໃຈໃສ່ກະກຽມທຸກດ້ານ ເຮັດໃຫ້ງານນີ້ດຳເນີນໄປດ້ວຍຜົນສຳເລັດ, ພ້ອມໄດ້ກ່າວເປີດປີທ່ອງທ່ຽວລາວ 2018 ຢູ່ແຂວງຫົວພັນ ຂຶ້ນຢ່າງເປັນທາງການ. ໃນຂະນະດຽວກັນ ທ່ານຮອງນາຍົກລັດຖະມົນຕີ ສອນໄຊ ສີພັນດອນ ກໍໄດ້ໃຫ້ກຽດລັ່ນຄ້ອງ 9 ບາດ ເພື່ອເປັນສີລິມຸງຄຸນໃນງານນີ້ດ້ວຍ.
（ແຫຼ່ງຂໍ້ມູນ： ຂປລ）
