 |
ຄະນະນໍາລັດວິສາຫະກິດລາວໂທລະຄົມ ໄດ້ນໍາເງິນຈໍານວນ 2 ຕື້ກີບ ມາມອບໃຫ້ລັດຖະບານ ກໍຄື ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂ ພະຍາດອັກເສບປອດ ຈາກເຊື້ອຈຸລາໂລກສາຍພັນໃໝ່ COVID-19.(ພາບ:v2.vientianemai.net)
ໃນວັນທີ 28 ມີນາ 2020 ຢູ່ທີ່ສໍານັກງານນາຍົກລັດຖະມົນຕີ, ຄະນະນໍາລັດວິສາຫະກິດລາວໂທລະຄົມ ນໍາໂດຍ ທ່ານ ສຸພົນ ຈັນທະວີໄຊ ຜູ້ອໍານວຍການໃຫຍ່ ລັດວິສາຫະກິດດັ່ງກ່າວ ໄດ້ນໍາເງິນຈໍານວນ 2 ຕື້ກີບ ມາມອບໃຫ້ລັດຖະບານ ກໍຄື ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂ ພະຍາດອັກເສບປອດ ຈາກເຊື້ອຈຸລາໂລກສາຍພັນໃໝ່ COVID-19 ເພື່ອປະ ກອບສ່ວນຊ່ວຍລັດຖະບານ ນໍາໃຊ້ເຂົ້າໃນວຽກງານປ້ອງກັນ ແລະ ແກ້ໄຂການລະບາດຂອງພະຍາດ ດັ່ງ ກ່າວໃຫ້ມີປະສິດທິຜົນສູງ.
ເມື່ອບໍ່ດົນມານີ້, ທີ່ຫ້ອງວ່າການປົກຄອງນະຄອນຫຼວງວຽງຈັນ ບໍລິສັດທີ່ປຶກສາດ້ານການລົງທຶນ ແລະ ກໍ່ສ້າງເຂື່ອນໄຟຟ້າ ຈຳກັດຜູ້ດຽວ ນຳເອົາອຸປະກອນການແພດມາມອບໃຫ້ອົງການປົກຄອງນະຄອນຫຼວງວຽງຈັນ (ນວ) ເປັນກຽດມອບໂດຍທ່ານ ປີຊາໄຊ ແກ້ວໄຊຍະຈັກ ປະທານບໍລິສັດທີ່ປຶກສາດ້ານການລົງທຶນ ແລະ ກໍ່ສ້າງເຂື່ອນໄຟຟ້າຈຳກັດຜູ້ດຽວ ຮັບໂດຍທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ມີພະນັກງານກ່ຽວເຂົ້າສອງຝ່າຍເຂົ້າຮ່ວມ.
 |
ເຄື່ອງທີ່ນຳມາມອບຄັ້ງນີ້ ປະກອບມີຜ້າອັດປາກ-ດັງ 8 ແກັດ ເຄື່ອງວັດແທກອຸນຫະພູມ 2 ເຄື່ອງ ເພື່ອນຳໃຊ້ເຂົ້າໃນການປ້ອງກັນ ສະກັດກັ້ນ ແລະ ຕອບໂຕ້ພະຍາດ COVID-19.(ພາບ:v2.vientianemai.net)
ເຄື່ອງທີ່ນຳມາມອບຄັ້ງນີ້ ປະກອບມີຜ້າອັດປາກ-ດັງ 8 ແກັດ ເຄື່ອງວັດແທກອຸນຫະພູມ 2 ເຄື່ອງ ເພື່ອນຳໃຊ້ເຂົ້າໃນການປ້ອງກັນ ສະກັດກັ້ນ ແລະ ຕອບໂຕ້ພະຍາດ COVID-19 ໂອກາດັ່ງກ່າວ ທ່ານເຈົ້າຄອງກໍໄດ້ສະແດງຄວາມຂອບໃຈມາຍັງບໍລິສັດທີ່ປຶກສາດ້ານການລົງທຶນ ແລະ ກໍ່ສ້າງເຂື່ອນໄຟຟ້າ ຈຳກັດຜູ້ດຽວ ທີ່ເຫັນໄດ້ຄວາມສຳຄັນ ແລະ ເປັນຫ່ວງເປັນໄຍສຸຂະພາບຂອງປະຊາຊົນ ກໍຄືຊາວນະຄອນຫຼວງວຽງຈັນ.
ວັນທີ 28 ມີນາ 2020 ຕົວເລກຜູ້ຕິດເຊື້ອພະຍາດໂຄວິດ-19ເພີ່ມຂຶ້ນອີກ 2ກໍລະນີ ຢູ່ຫຼວງພະບາງ ແລະ ນະຄອນຫຼວງວຽງຈັນ ລວມທັງໝົດ ເປັນ 8 ກໍລະນີ. ມາຮອດວັນທີ 28 ມີນາ ເວລາ 15:00 ໂມງ ເຮັດໃຫ້ຍອດຜູ້ຕິດເຊື້ອພະຍາດໂຄວິດ-19 ໃນ ສປປ ລາວ ລວມທັງໝົດ 8 ຄົນຄື:
1. ເພດຍິງ ອາຍຸ 36 ອາຊີບພະນັກງານນຳທ່ຽວ ຢູ່ນະຄອນຫຼວງວຽງຈັນ.
2. ເພດຊາຍ ອາຍຸ 28 ອາຊີບພະນັກງານໂຮງແຮມ ຢູ່ນະຄອນຫຼວງວຽງຈັນ.
3. ເພດຊາຍ ອາຍຸ 26 ອາຊີບນັກທຸລະກິດ ຢູ່ນະຄອນຫຼວງວຽງຈັນ.
4. ເພດຊາຍ ອາຍຸ 42 ອາຊີບຂັບລົດນຳທ່ຽວ ຢູ່ແຂວງຫຼວງພະບາງ.
5. ເພດຊາຍ ອາຍຸ 52 ອາຊີບຂັບລົດນຳທ່ຽວ ຢູ່ແຂວງຫຼວງພະບາງ.
6. ເພດຊາຍ ອາຍຸ 41 ຢູ່ນະຄອນຫຼວງວຽງຈັນ.
7. ເພດຍິງ ອາຍຸ 50 ປີ ຢູ່ນະຄອນຫຼວງພະບາງ, ແຂວງຫຼວງພະບາງ.
8. ເພດຊາຍ ອາຍຸ 18 ປີ ຢູ່ບ້ານດອນນົກຂຸ້ມ ເມືອງສີສັດຕະນາກ, ນະຄອນຫຼວງວຽງຈັນ.
（ໄຊພອນ）
