 |
ກອງປະຊຸມຂໍການສະໜັບສະໜູນຈາກຄູ່ຮ່ວມພັດທະນາສາກົນ.(ພາບ:vientianemai.net)
ກອງປະຊຸມຄັ້ງນີ້ ໄດ້ຮັບຟັງການລາຍງານສະພາບການເກີດພະຍາດປອດອັກເສບສາຍພັນໃໝ່ ໄວຣັສ ໂຄໂຣນາ (Novel Corona virus-NCOV) ຢູ່ທົ່ວໂລກ ແລະ ສະພາບການຢູ່ໃນ ສປປ ລາວ ພ້ອມທັງໄດ້ນຳສະເໜີການຈັດຕັ້ງປະຕິບັດມາດຕະການຕ່າງໆ ທີ່ກະຊວງສາທາລະນະສຸກໄດ້ວາງອອກ ເພື່ອກັນ ແລະ ຄວບຄຸມພະຍາດດັ່ງກ່າວ ເຊັ່ນ: ວຽກງານຈຸດຜ່ານແດນ ແລະ ກັກກັນ ການເຝົ້າລະວັງ ແລະ ການວິເຄາະຫາເຊື້ອພະຍາດ ການປ້ອງກັນການຕິດເຊື້ອ ແລະ ການຄຸ້ມຄອງກໍລະນີຄົນເຈັບ ການສື່ສານເພື່ອຫຼຸດຜ່ອນຄວາມສ່ຽງ ວຽກພາລາທິການ ແຜນການ ແລະ ການເງິນ.
ທ່ານ ບຸນກອງ ສີຫາວົງ ໄດ້ຮຽກຮ້ອງໃຫ້ຄູ່ຮ່ວມພັດທະນາສາກົນ ຈົ່ງໃຫ້ການສະໜັບສະໜູນຊ່ວຍເຫຼືອກະຊວງສາທາລະນະສຸກ ໃນສິ່ງທີ່ຈຳເປັນທາງການແພດ ເພື່ອໃຊ້ໃນກໍລະນີເກີດການລະບາດຂອງພະຍາດປອດອັກເສບສາຍພັນໃໝ່ ໄວຣັສໂຄໂຣນາ (Novel Corona virus-NCOV) ໃນ ສປປ ລາວ ໂດຍສະເພາະເຄື່ອງມືທາງການແພດທີ່ໃຊ້ໃນການກວດວິເຄາະຫາເຊື້ອພະຍາດ ເພື່ອສະໜອງໃຫ້ບັນດາແຂວງທີ່ຍັງບໍ່ທັນມີເຄື່ອງມືຄົບຊຸດ.
ທ່ານ ສີສະຫວາດ ສຸດທະນີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ໄດ້ຖະແຫຼງຂ່າວກ່ຽວກັບພະຍາດອັກເສບປອດທີ່ເກີດຈາກເຊື້ອຈຸລະໂລກສາຍພັນໃໝ່ ຫຼື ເຊື້ອໄວຣັສ ໂຄໂຣນາ 2019 ວັນທີ 4 ກຸມພາ 2020 ຢູ່ກະຊວງສາທາລະນະສຸກວ່າ: ປັດຈຸບັນ ກະຊວງສາທາລະນະ ສຸກໄດ້ເຝົ້າລະວັງພະຍາດອັກເສບປອດສາຍພັນໃໝ່ ຫຼື ເຊື້ອໂຄໂຣນາໄວຣັສຢ່າງໃກ້ຊິດ ໂດຍກຳນົດຈຸດ ປະສານງານໃນການຈັດຕັ້ງປະຕິບັດມາດຕະການກະກຽມຄວາມພ້ອມ ບັນດາດ່ານສາກົນໄດ້ມີການໃຫ້ຂໍ້ມູນແກ່ຜູ້ໂດຍສານຂາເຂົ້າ ແລະ ໄດ້ມີການກະກຽມຄວາມພ້ອມ ການຄັດກອງຜູ້ໂດຍສານທີ່ເດີນທາງມາຈາກປະເທດທີ່ມີລາຍງານການລະບາດ ກຽມພ້ອມບັນດາໂຮງໝໍທີ່ເປັນຕາໜ່າງເຝົ້າລະວັງ ໃຫ້ກຽມຫ້ອງແຍກປ່ຽວ ອຸປະກອນປ້ອງກັນຕົນເອງ ແລະ ລົດຮັບສົ່ງຄົນເຈັບ ເຊິ່ງຂໍ້ມູນເພີ່ມເຕີມ ຫຼື ຖ້າພົບເຫັນຄົນທີ່ມີອາການ ສົງໄສເປັນພະຍາດນີ້ ແລະ ຕ້ອງການຄວາມຊ່ວຍເຫຼືອ ຕິດຕໍ່ທີ່ເບີ 020 54066777 ຫຼື ສາຍດ່ວນ 166.
ການປະຕິບັດມາດຕະການດັ່ງກ່າວ ໃນໄລຍະຜ່ານມາສາມາດສັງລວມໄດ້ກໍລະນີທີ່ເຂົ້າກັບນິຍາມ ຫຼື ກໍລະນີສົງໄສມີ 14 ກໍລະນີ ໃນນີ້ ເປັນຄົນລາວ 10 ກໍລະນີ ຄົນຈີນ 4 ກໍລະນີ ໂດຍໄດ້ເກັບຕົວຢ່າງມາ ກວດ 14 ຕົວຢ່າງ ເຊິ່ງໄດ້ຜົນກວດ 13 ຕົວຢ່າງໃຫ້ຜົນລົບ ໝາຍວ່າບໍ່ພົບການຕິດເຊື້ອພະຍາດນີ້ ແລະ ຍັງ 1 ຕົວຢ່າງ ກຳລັງລໍຖ້າຜົນກວດວິເຄາະ ນອກນີ້ ຍັງໄດ້ສືບຕໍ່ຕິດຕາມຜູ້ທີ່ຢູ່ໃກ້ຊິດກັບນັກທ່ອງທ່ຽວຈີນທີ່ເຂົ້າມາ ສປປ ລາວ ແລ້ວກັບຄືນໄປ ສປ ຈີນ ຈຶ່ງມີອາການໄຂ້ ໄອ ຫາຍໃຈຍາກ ແລະ ກວດພົບວ່າ ຕິດເຊື້ອໄວຣັສໂຄໂຣນາ ອີງຕາມຂໍ້ມູນເບື້ອງຕົ້ນມີຜູ້ທີ່ສຳຜັດກັບນັກທ່ອງທ່ຽວຈີນດັ່ງກ່າວ 30 ຄົນ ໃນນີ້ ເປັນນັກທ່ອງທ່ຽວທີ່ມານຳກັນ 26 ຄົນ ເຊິ່ງໄດ້ກັບ ສປ ຈີນ ແລ້ວ ສ່ວນພະນັກງານຂັບລົດ 3 ຄົນ ຜູ້ ນຳທ່ຽວ 1 ຄົນ ທີ່ເປັນຄົນລາວ ພະນັກງານສາທາລະນະສຸກໄດ້ເຝົ້າລະວັງ ຕິດຕາມອາການຢ່າງໃກ້ຊິດ ປັດຈຸບັນມີສຸຂະພາບແຂງແຮງດີ ພ້ອມທັງແນະນຳວິທີການສັງເກດອາການຂອງພະຍາດ ຖ້າມີອາການໃຫ້ ລາຍງານຕໍ່ແພດທັນທີ.
（ໄຊພອນ）
