 |
ວິທະຍາໄລແພດກວາງຈິ ສສ ຫວຽກນາມ ໄດ້ໃຫ້ການຊ່ວຍເຫລືອ ກໍ່ສ້າງຊັບພະຍາກອນມະນຸດ ໃນຂະແໜງການແພດ ຢູ່ແຂວງສາລະວັນ
ວິທະຍາໄລແພດກວາງຈິ ສສ ຫວຽກນາມ ໄດ້ໃຫ້ການຊ່ວຍເຫລືອ ກໍ່ສ້າງຊັບພະຍາກອນມະນຸດ ໃນຂະແໜງການແພດ ຢູ່ແຂວງສາລະວັນ ເຊິ່ງໃນແຕ່ລະປີຈະຮັບນັກຮຽນຈາກແຂວງສາລະວັນ ໄປສຶກສາຕໍ່ ໃນສາຂາວິຊາການຢາ ແລະ ພະຍາບານຊັ້ນສູງ ຈຳນວນ 50-100 ຄົນ, ໄລຍະເວລາຮຽນ 4 ປີ (ໃນນັ້ນກຽມພາສາຫວຽດ 1 ປີ ແລະ ຮຽນສາຍວິຊາສະເພາະ 3 ປີ) ສຳລັບຄ່າຮຽນໃນປີກຽມ ພາສາຫວຽດແມ່ນ 300 ໂດລາ/ຄົນ/ປີ, ຄ່າຮຽນໄລຍະເຂົ້າຮຽນສາຍວິຊາສະເພາະ 350 ໂດລາ/ຄົນ/ປີ, ນອກ ຈາກນັ້ນມີຄ່າຫໍພັກ 60 ໂດລາ/ຄົນ/ປີ ແລະ ຄ່ານ້ຳ, ໄຟຟ້າ ຂຶ້ນກັບການນຳໃຊ້ຕົວຈິງ ຂອງນັກສຶກສາ.
ຂໍ້ມູນດັ່ງກ່າວ ໄດ້ຮັບການລາຍງານ ໃນໂອກາດທີ່ ທ່ານ ສີລິສັກ ຖະໜອມຮັກ ຫົວໜ້າ ພະແນກ ສຶກສາທິການ ແລະ ກິລາແຂວງສາລະວັນ ພົບປະ ແລະ ເຮັດວຽກຮ່ວມກັບ ຄະນະວິທະຍາໄລແພດກວາງຈິ ສສ ຫວຽດນາມ ນຳໂດຍທ່ານ ເຈື່ອງດຶກຕຸ ຜູ້ອຳນວຍການວິທະຍາໄລ ແພດກວາງຈິ ໃນທ້າຍອາທິດຜ່ານມາ. ໃນການພົບປະຄັ້ງນີ້ ສອງຝ່າຍ ໄດ້ແລກປ່ຽນຄຳຄິດຄຳເຫັນ ໃນການຮ່ວມມືກໍ່ສ້າງຊັບພະຍາກາອນມະນຸດ ໃນຂະແໜງການແພດ. ເຊິ່ງໃນ 1 ປີຜ່ານມາແມ່ນໄດ້ພົວພັນ ຮ່ວມມືຢ່າງແໜ້ນແຟ້ນ, ວິທະຍາໄລແພດກວາງຈິ ໄດ້ຊ່ວຍເຫລືອທຶນການຮຽນ ໃນສາຂາວິຊາການຢາ-ພະຍາບານ ແລະ ທຶນສ່ວນຕົວ ໃຫ້ນັກຮຽນແຂວງສາລະວັນ.
ໃນແຕ່ລະປີທັງສອງຝ່າຍ ຈະໄດ້ຜັດປ່ຽນກັນພົບປະຢ້ຽມຢາມ ແລະ ຖອດຖອນບົດຮຽນ ໃນການຮ່ວມມືກໍ່ສ້າງນັກສຶກສາ, ຝ່າຍແຂວງສາລະວັນ ຈະຊ່ວຍເຫລືອ ໂຄສະນາເຜີຍແຜ່ຂໍ້ມູນການສຶກສາ, ຮັບສະໜັກນັກສຶກສາໃຫ້ແກ່ ວິທະຍາໄລກວາງຈິ ເພື່ອເປັນການກໍ່ສ້າງ ຊັບພະຍາກອນມະນຸດ ໃນຂະແໜງການສຶກສາ ໃຫ້ມີຄວາມຮູ້ຄວາມສາມາດ ແລະ ມີຄວາມກ້າວໜ້າທາງດ້ານ ວຽກງານການສຶກສາ ນັບມື້ນັບຂະຫຍາຍ ຕົວສູງຂຶ້ນເລື້ອຍໆ.
（ແຫຼ່ງຂໍ້ມູນ： ຂປທ）
