ລາຍການໂດຍນັກສໍາມະນາກອນສະແດງ. (ພາບ: vov.vn)
ພິທີປິດຊຸດຝຶກອົບຮົມການປະດິດແຕ່ງ ແລະກໍາກັບການຟ້ອນໃຫ້ບັນດານັກສິລະປິນລາວ ໄດ້ດໍາເນີນໃນຕອນຄໍ່າວັນທີ 21 ມິຖຸນາຢູ່ນະຄອນຫຼວງວຽງຈັນ, ລາວ. ທ່ານພົນເອກ ຈັນສະໝອນ ຈັນຍາລາດ ລັດຖະມົນຕີກະຊວງປ້ອງກັນປະເທດລາວ, ທ່ານ ບໍ່ແສງຄຳ ວົງດາລາ ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວລາວ ແລະຕາງໜ້າສະຖານທູດຫວຽດນາມ, ສູນວັດທະນະທໍາຫວຽດນາມ ຢູ່ລາວ ພ້ອມກັບນັກສິລະປິນສອງປະເທດ ຫວຽດນາມ-ລາວ ໄດ້ເຂົ້າຮ່ວມພິທີເປັນຈໍານວນຫຼວງຫຼາຍ.
ຊຸດຝຶກອົບຮົມໄດ້ດໍາເນີນໃນ 3 ເດືອນດ້ວຍນັກສໍາມະນາກອນ 40 ຄົນແມ່ນນັກສິລະປິນຂອງກົມສິລະປະການສະແດງ, ຄະນະສິລະປະແຫ່ງຊາດ, ຄະນະສິລະປະກອງທັບ, ຄະນະສິລະປະກະຊວງປ້ອງກັນຄວາມສະຫງົບ, ສູນວັດທະນະທໍາເຍົາວະຊົນສູນກາງ ແລະບັນດາແຂວງທັງ 3 ພາກເໜືອ-ກາງ-ໃຕ້ລາວ. ຊຸດຝຶກອົບຮົມໄດ້ຮັບການແລກປ່ຽນບົດຮຽນຊ່ວຍຜູ້ປະດິດແຕ່ງ ແລະກຳກັບການສະແດງ, ນັກສະແດງຂອງລາວ ໄດ້ສຳຜັດກັບບັນດາທັກສະໃໝ່ຈາກບັນດານັກສິລະປິນຟ້ອນຂອງຫວຽດນາມ ຄື ຜູ້ກຳກັບການສະແດງ ໂດ້ຕຽນທິ້ງ, ນັກສິລະປິນປະຊາຊົນ ຮ່າກີມຈຸງ, ນັກສິລະປິນ ໂຮ່ມານແອງ.
ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວລາວ ມອບໃບຍ້ອງຍໍໃຫ້ບັນດານັກສິລະປິນຫວຽດນາມ ທີ່ເຂົ້າຮ່ວມຊຸດຝຶກອົບຮົມ. (ພາບ: vov.vn)
ນີ້ແມ່ນການເຄື່ອນໄຫວໃນຂອບເຂດຮ່ວມມືລະຫວ່າງຂະແໜງການວັດທະນະທໍາສອງປະເທດ, ເພື່ອແນໃສ່ຮັກສາ ແລະພັດທະນາຂະແໜງສິລະປະການສະແດງຂອງລາວ ກວ່າອີກ.
ທີ່ພິທີປິດ, ບັນດານັກສໍາມະນາກອນໄດ້ສະແດງລາຍການຟ້ອນທີ່ດີເລີດເຊິ່ງຫາກໍ່ຈັດສ້າງຂຶ້ນໃນເວລາເປີດຊຸດຝຶກອົບຮົມຈໍານວນໜຶ່ງ. ກະຊວງຖະແຫຼງຂ່າວ, ວັດທະນະທໍາ ແລະທ່ອງທ່ຽວລາວ ໄດ້ມອບໃບຢັ້ງຢືນປະເພດເກັ່ງ ແລະດີເລີດໃຫ້ບັນດານັກສໍາມະນາກອນ, ພ້ອມທັງມອບໃບຍ້ອງຍໍໃຫ້ບັນດານັກສິລະປິນຫວຽດນາມ ທີ່ເຂົ້າຮ່ວມຊຸດຝຶກອົບຮົມຄັ້ງນີ້.
(ແຫຼ່ງຂໍ້ມູນ: ຈາງຫງວຽນ/ກປ.ອອນໄລ)