 |
ບັນຍາກາດຂອງກອງປະຊຸມພົບປະ.
ໂອກາດນີ້, ສະຫາຍ ບຸນທອງ ຈິດມະນີ ໄດ້ກ່າວສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການມາຢ້ຽມຢາມ ແລະ ເຮັດວຽກຂອງ ສະຫາຍ ເຈິນເກີ້ມຕູ້ ພ້ອມຄະນະໃນຄັ້ງນີ້, ເຊິ່ງເປັນການປະກອບສ່ວນສຳຄັນ ເຂົ້າໃນການສືບຕໍ່ຜັນຂະຫຍາຍມູນເຊື້ອສາຍພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ, ປະຊາຊົນ 2ຊາດ ລາວ-ຫວຽດນາມ, ຫວຽດນາມ-ລາວ ໂດຍສະເພາະ ແມ່ນການປະຕິບັດບົດບັນທຶກການພົວພັນຮ່ວມມືລະຫວ່າງ 2ອົງການກວດກາ ຂອງ 2ພັກ ໃຫ້ນັບມື້ກ້າວສູ່ລວງເລິກ.ການພົບປະແລກປ່ຽນບົດຮຽນຄັ້ງນີ້, ທັງສອງຝ່າຍໄດ້ຜັດປ່ຽນກັນ ແຈ້ງສະພາບການຈັດຕັ້ງປະຕິບັດວຽກງານ ຕິດຕາມ-ກວດກາພັກ; ວຽກງານກວດກາລັດ, ສະກັດກັ້ນ ແລະ ຕ້ານການສໍ້ລາດບັງຫລວງ; ຄວາມຫຍຸ້ງຍາກໃນການຈັດຕັ້ງປະຕິບັດວຽກງານກວດກາ ແລະ ວຽກງານຈຸດສຸມໃນຕໍ່ໜ້າ ຈະປະຕິບັດບົດບັນທຶກການຮ່ວມມືໄລຍະ 2016-2021 ລະຫວ່າງສອງອົງການກວດກາ ທີ່ໄດ້ເຊັນຮ່ວມກັນໃນວັນທີ 24 ພຶດສະພາ 2016, ສືບຕໍ່ແລກປ່ຽນຄະນະຜູ້ແທນໃນຫລາຍລະດັບ ແຕ່ສູນກາງຮອດທ້ອງຖິ່ນ, ໂດຍສະເພາະ ແມ່ນສົ່ງເສີມໃຫ້ບັນດາແຂວງ ທີ່ມີຊາຍ ແດນຕິດຈອດກັນ ໄດ້ໄປມາຫາສູ່ແລກປ່ຽນບົດຮຽນເຊິ່ງກັນ ແລະ ກັນ, ສະເໜີຝ່າຍຫວຽດນາມ ຊ່ວຍກໍ່ສ້າງພະນັກງານຂອງລາວ ກ່ຽວກັບວຽກງານກວດກາພັກ, ກວດກາລັດ, ສະກັດກັ້ນ ແລະ ຕ້ານການສໍ້ລາດບັງຫລວງ ທັງໄລຍະ ສັ້ນ ແລະ ໄລຍະຍາວໃນ ປີ 2019 ແລະ ຕໍ່ໆໄປ. ການພົບປະແລກປ່ຽນຄັ້ງນີ້ ໄດ້ປະກອບຄໍາຄິດເຫັນ ກ່ຽວກັບບັນຫາທີ່ຕ່າງຝ່າຍໃຫ້ຄວາມສົນໃຈ ເຊິ່ງທັງສອງຝ່າຍເຫັນກົງກັນວ່າ ວຽກງານຕິດຕາມ-ກວດກາພັກ; ວຽກງານກວດກາ ລັດ, ສະກັດກັ້ນ ແລະ ຕ້ານການສໍ້ລາດບັງຫລວງ ເປັນວຽກງານໜຶ່ງທີ່ສໍາຄັນ ແລະ ຈໍາເປັນໃນການຈັດຕັ້ງປະຕິບັດແນວທາງນະໂຍບາຍຂອງພັກ, ກົດໝາຍຂອງລັດ ແນໃສ່ປະຕິບັດແຜນພັດ ທະນາ ເສດຖະກິດ -ສັງຄົມໃຫ້ບັນລຸເປົ້າ ໝາຍ ສ້າງໃຫ້ສັງຄົມມີຄວາມສະຫງົບ ແລະ ນໍາພາປະຊາຊົນ ກໍຄື ປະເທດຊາດກ້າວເຂົ້າສູ່ຄວາມສີວິໄລ.
ໃນໂອກາດມາຢ້ຽມຢາມແລກປ່ຽນບົດຮຽນຢູ່ ສປປ ລາວ, ຄະນະຜູ້ແທນຂັ້ນສູງຄະນະກຳມະການກວດກາ ສູນກາງພັກກອມມູນິດຫວຽດນາມ ໄດ້ເຂົ້າຢ້ຽມຂໍ່ານັບການນຳພັກ-ລັດຂັ້ນສູງຂອງລາວ, ແລກປ່ຽນບົດຮຽນ ວຽກງານຕິດຕາມ-ກວດກາ ຢູ່ນະຄອນຫລວງວຽງຈັນ; ຢ້ຽມຢາມ ແລະ ເຮັດວຽກກັບສະຖານທູດຫວຽດນາມ ປະຈຳ ສປປ ລາວ, ບໍລິສັດສະຕາໂທລະຄົມ, ໂຄງການກໍ່ສ້າງຫໍສະພາແຫ່ງຊາດ ທີ່ພວມກໍ່ສ້າງໂດຍ ທັບ 11ກະຊວງ ປ້ອງກັນປະເທດຫວຽດນາມ, ຢ້ຽມຢາມໂຮງຮຽນມັດທະຍົມສົມບູນ ເຊິ່ງເປັນຂອງຂວັນຊ່ວຍເຫລືອຈາກ ສະຫາຍ ຫງວຽນຟູຈ້ອງ ເລຂາທິການໃຫຍ່ ຄະນະບໍລິ ຫານງານສູນກາງພັກກອມມູນິດຫວຽດນາມ ຢູ່ແຂວງບໍລິຄຳໄຊ ອີກ ດ້ວຍ.
（ແຫຼ່ງຂໍ້ມູນ： ຂປລ）
