 |
ສະຫາຍ ຫງວຽນຟູ໋ ຈ້ອງ ຕ້ອນຮັບ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ.
ໃນໂອກາດດັ່ງກ່າວນີ້, ສະຫາຍ ຫງວຽນ ຟູ ຈ້ອງ ກໍໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ, ຊົມເຊີຍ ແລະ ຕີລາຄາສູງຕໍ່ສະຫາຍນາຍົກລັດຖະມົນຕີ ແຫ່ງ ສປປ ລາວ ແລະ ຄະນະ ທີ່ໄດ້ເດີນທາງມາເຂົ້າຮ່ວມກອງປະຊຸມ ແລະ ຢ້ຽມຢາມເຮັດວຽກຢູ່ ສສ.ຫວຽດນາມ ໃນຄັ້ງນີ້, ເຊິ່ງເປັນຂີດໝາຍອັນສຳຄັນປະກອບສ່ວນເຂົ້າໃນການຮັດແໜ້ນສາຍພົວພັນອັນພິເສດ ແລະ ການພົວພັນຮ່ວມມືຮອບດ້ານ, ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ຫວຽດນາມ-ລາວ ທີ່ມີມາແຕ່ດົນນານນັ້ນ, ໂດຍສະເພາະແມ່ນການແລກປ່ຽນບົດຮຽນ, ການຊ່ວຍເຫຼືອເຊິ່ງກັນ ແລະ ກັນ ໃນວຽກງານຕ່າງໆໃຫ້ແຕກດອກອອກຜົນຍິ່ງໆຂຶ້ນ. ໃນໂອກາດນີ້, ສະຫາຍ ທອງລຸນ ສີສຸລິດ ກໍໄດ້ສະແດງຄວາມຂອບໃຈຢ່າງຈິງໃຈມາຍັງສະຫາຍ ຫງວຽນ ຟູ ຈ້ອງ, ກໍາມະການກົມການເມືອງສູນກາງພັກ, ເລຂາທິການໃຫຍ່ຄະນະບໍລິຫານງານສູນກາງພັກຄອມມູນິດຫວຽດນາມ, ທີ່ໄດ້ສະລະເວລາອັນມີຄ່າໃຫ້ການຕ້ອນຮັບຢ່າງອົບອຸ່ນ, ພ້ອມທັງສະແດງຄວາມຂອບໃຈຢ່າງສູງມາຍັງ ພັກ-ລັດ ແລະ ປະຊາຊົນຫວຽດນາມ ທີ່ໄດ້ໃຫ້ການຊ່ວຍເຫຼືອອັນລໍ້າຄ່າແກ່ປະຊາຊົນລາວໃນເມືອງສະໜາມໄຊ, ແຂວງອັດຕະປື ທີ່ໄດ້ຮັບຜົນກະທົບຈາກຄູກັ້ນນໍ້າເຂື່ອນໄຟຟ້າ ເຊປຽນ-ເຊນໍ້ານ້ອຍ ແຕກໃນທ້າຍເດືອນ ກໍລະກົດ ທີ່ຜ່ານມາ.
 |
ທ່ານ ຫງວຽ໋ນຊົນ ຟຸກ ຕ້ອນຮັບ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ.
ໃນຕອນເຊົ້າຂອງວັນດຽວກັນ ສະຫາຍ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ກໍໄດ້ນຳພາຄະນະຜູ້ແທນພົບປະສອງຝ່າຍກັບ ສະຫາຍ ຫງວຽນ ຊັວນ ຟຸກ, ນາຍົກລັດຖຖະມົນຕີ ແຫ່ງ ສສ.ຫວຽດນາມ. ສະຫາຍ ທອງລຸນ ສີສຸລິດ ໄດ້ສະແດງຄວາມຊົມເຊີຍຕໍ່ຜົນສຳເລັດອັນຈົບງາມ ໃນການເປັນເຈົ້າພາບຈັດກອງປະຊຸມເວທີປຶກສາຫາລືເສດຖະກິດໂລກວ່າດ້ວຍ ອາຊຽນ ທີ່ ຮ່າໂນ້ຍ, ຊຶ່ງເປັນການປະກອບສ່ວນຍົກສູງຖານະບົດ ບາດ, ຊື່ສຽງຂອງ ສສ.ຫວຽດນາມ ຢູ່ໃນເວທີສາກົນຂື້ນອີກບາດກ້າວໜຶ່ງ. ການພົບປະສອງຝ່າຍໃນຄັ້ງນີ້, ສະຫາຍ ນາຍົກລັດຖະມົນຕີ ທອງລຸນ ສີສຸລິດ ກໍໄດ້ສະແດງຄວາມຊົມເຊີຍຕໍ່ການຕ້ອນຮັບອັນອົບອຸ່ນມາຍັງສະຫາຍ ຫງວຽນ ຊັວນ ຟຸກ ແລະ ໄດ້ພົບປະກັນເປັນປົກກະຕິໃນທຸກໆກອງປະຊຸມທີ່ສຳຄັນໃນພາກພື້ນ ແລະ ສາກົນ, ເຊິ່ງສະແດງເຖີງມູນເຊື້ອສາຍພົວພັນພິເສດເພື່ອເສີມຂະຫຍາຍສາຍພົວພັນຮ່ວມມືລະຫວ່າງສອງຊາດລາວ-ຫວຽດນາມ ໃຫ້ນັບມື້ນັບມີປະສິດທິຜົນຍິ່ງໆຂຶ້ນ, ແລະ ໄດ້ຕີລາຄາສູງຕໍ່ຄວາມພະຍາຍາມຂອງສະຫາຍນາຍົກລັດ ຖະມົນຕີ ແລະ ພັກ-ລັດຖະບານຫວຽດນາມ ທີ່ໄດ້ເອົາໃຈໃສ່ສ້າງເງື່ອນໄຂອຳນວຍຄວາມສະດວກ ແລະ ໃຫ້ການຊ່ວຍເຫຼືອເພື່ອການພັດທະນາແກ່ ສປປ ລາວ ມາຕະຫຼອດ, ພ້ອມທັງເຊື່ອໜັ້ນວ່າສອງນາຍົກພວກເຮົາຈະພ້ອມກັນເຮັດວຽກຮ່ວມກັນບົນຈິດໃຈການຕົກລົງຂອງສອງພັກ ສອງລັດ ແລະ ສັນຍາຕ່າງໆທີ່ສອງຝ່າຍໄດ້ລົງນາມຮ່ວມກັນ.
ໃນໂອກາດດັ່ງກ່າວນີ້, ສະຫາຍ ທອງລຸນ ສີສຸລິດ ໄດ້ຕາງໜ້າໃຫ້ພັກ, ລັດຖະບານ ແລະ ປະຊາຊົນລາວ ໄດ້ສະແດງຄວາມຮູ້ບຸນຄຸນ ແລະ ຄວາມຂອບໃຈຢ່າງຈິງໃຈມາຍັງພັກ, ລັດຖະບານ ແລະ ປະຊາຊົນ ຫວຽດນາມ ອ້າຍນ້ອງ, ໂດຍສະເພາະມາຍັງສະຫາຍ ນາຍົກລັດຖະມົນຕີ ຫງວຽນ ຊັວນ ຟຸກ, ທີ່ໄດ້ສົ່ງຄວາມເຫັນອົກເຫັນໃຈ ແລະ ການຊ່ວຍເຫຼືອເປັນເງິນ, ວັດຖຸສິ່ງຂອງບັນເທົາທຸກ, ທີມກູ້ໄພ, ແພດໝໍ ແລະ ອຸປະກອນຕ່າງໆໄປຊ່ວຍໄປຊ່ວຍເຫຼືອຕໍ່ເຫດການໄພພິບັດຢູ່ແຂວງ ອັດຕະປືໄດ້ທັນການ, ໃນຂະນະທີ່ປະຊາຊົນຫວຽດນາມ ໄດ້ປະສົບໄພທໍາມະຊາດອັນຮ້າຍແຮງ, ມີຝົນຕົກໜັກ ຢູ່ຫຼາຍແຂວງພາກເໜືອຂອງຫວຽດນາມເຊັ່ນດຽວກັນ, ສະຫາຍ ທອງລຸນ ສີສຸລິດ ກໍໄດ້ ຕາງໜ້າພັກ, ລັດຖະບານ ແລະ ປະຊາຊົນລາວ ສະແດງຄວາມເຫັນອົກເຫັນໃຈມາຍັງພັກ, ລັດຖະບານ ແລະ ປະຊາຊົນຫວຽດນາມອ້າຍນ້ອງມານະໂອກາດນີ້ດ້ວຍ.
（ຫັດທະບູນ）
