ເຂົ້າຮ່ວມໃນງານຖະແຫຼງຂ່າວຄັ້ງນີ້ມີ ສະຫາຍ ວໍ໋ວັນເທື້ອງ ກຳມະການກົມການເມືອງ, ກຳມະການສູນກາງພັກ ຫົວໜ້າກຳມະການໂຄສະນາສູນກາງ; ສະຫາຍ ກິແກ້ວ ໄຂຄຳພິທູນ ກຳມະການສູນກາງພັກ ກຳມະການໂຄສະນາອົບຮົມສູນກາງ ພັກປະຊາຊົນປະຕິວັດລາວ; ການນຳ, ພະນັກງານ ສະຖາບັນການເມືອງແຫ່ງຊາດໂຮ່ຈີ໋ມິງ, ສະຖາບັນ ການເມືອງ ແລະ ການປົກຄອງແຫ່ງຊາດລາວ, ເອກອັກຄະລັດຖະທູດ ສສ ຫວຽດນາມ ປະຈຳລາວ ທ່ານ ຫງວ໋ຽນບ໋າຮ່າງ…
ການນຳທັງສອງສະຖາບັນເປັນສັກຂີພະຍານໃນການມອບຮັບ ຊຸດປື້ມເລື່ອງ ໂຮ່ຈີ໋ມິງ ພາກ II, IV, VI .
ກ່າວຄຳປາໄສທີ່ງານຖະແຫຼງຂ່າວ ຮສຈ.ປອ ຫງວ໋ຽນຫວຽດທ໋າວ ຮອງອຳນວຍການ ສະຖາບັນການເມືອງແຫ່ງຊາດໂຮ່ຈີ໋ມິງໄດ້ຍົກໃຫ້ເຫັນໄດ້ຢ່າງຊັດເຈນວ່າ: ປະທານໂຮ່ຈີ໋ມິງ ແມ່ນ ນັກເຄື່ອນໄຫວປະຕິວັດທີ່ຍິ່ງໃຫຍ່ແທ້ຈິງ, ນັກທິດສະດີ, ນັກຍຸດທະສາດທີ່ອັດສະລິຍະ. ປະທານໂຮ່ຈີ໋ມິງ ໄດ້ອຸທິດທັງຊີວິດຂອງຕົນໃຫ້ແກ່ພາລະກິດປົດປ່ອຍປະຊາຊົນບັນດາເຜົ່າ, ພ້ອມກັນນັ້ນຍັງປະກອບສ່ວນອັນໃຫຍ່ຫຼວງເຂົ້າໃນຂະບວນການຕໍ່ສູ້ເພື່ອສັນຕິພາບ, ເສລີພາບບັນດາເຜົ່າ, ປະຊາທິປະໄຕ ແລະ ຄວາມກ້າວໜ້າຂອງສັງຄົມ ໃນໂລກ; ແນວຄິດ ແລະ ຄຸນສົມບັດ ຂອງໂຮ່ຈີ໋ມິງ ຍັງຄົງຢູ່ໃນໃຈຂອງປະຊາຊົນຄອມມູນິດ ແລະ ປະຊາຊົນທັງສອງຊາດ ຫວຽດນາມ ແລະ ລາວ, ເປັນຄັນທຸງນຳພາ, ຊີທິດເຍືອງທາງ ໃຫ້ຂະບວນການຕໍ່ສູ້ຂອງປະຊາຊົນບັນດາເຜົ່າ ຫວຽດນາມ ແລະ ລາວ ຍາດໄດ້ໄຊຊະນະ.
ຮສຈ.ປອ ຫງວ໋ຽນຫວຽດທ໋າວ ເນັ້ນໜັກອີກວ່າ: ປື້ມເລື່ອງ ໂຮ່ຈີ໋ມິງ ສະບັບເຕັມແມ່ນ ຊຸດປື້ມຄຼາດສິກ, ສະທ້ອນເຖິງຄວາມອັດສະລິຍະ, ສະຕິປັນຍາ ຂອງ ປະທານ ໂຮ່ຈີ໋ມິງ; ດ້ວຍຄຸນຄາອັນຍິ່ງໃຫຍ່ຫຼາຍແງ່ຫຼາຍມຸມ, ຊຸດປື້ມ ໂຮ່ຈີ໋ມິງ ໄດ້ປະກອບສ່ວນສຳຄັນເຂົ້າໃນວຽກງານກໍສ້າງແນວຄິດທິດສະດີ, ວຽກງານການຄົ້ນຄວ້າວິທະຍາສາດ, ວຽກງານການກໍ່ສ້າງ ສຶກສາອົບຮົມພະນັກງານຂອງສອງພັກ-ສອງລັດ ແລະ ປະຊາຊົນສອງຊາດຫວຽດນາມ-ລາວ.
ຮສຈ.ປອ ທອງສະລິດ ມັງໜໍ່ເມກ ກຳມະການສູນກາງພັກ, ອຳນວຍການສະຖາບັນການເມືອງ ແລະ ການປົກຄອງແຫ່ງຊາດລາວ.
ສ່ວນສຳລັບລາວ ຮສຈ.ປອ ທອງສະລິດ ມັງໜໍ່ເມກ ກຳມະການສູນກາງພັກ, ອຳນວຍການສະຖາບັນການເມືອງ ແລະ ການປົກຄອງແຫ່ງຊາດ ລາວ ຢືນຢັນວ່າ: ການແປ ແລະ ຈັດພິມ ຊຸດປື້ມເລື່ອງ ໂຮ່ຈີ໋ມິງ ຈາກພາສາຫວຽດມາເປັນພາສາລາວ ແມ່ນມີຄວາມໝາຍສຳຄັນ ຕໍ່ກັບວຽກງານແນວຄິດ, ທິດສະດີ, ວຽກງານການກໍ່ສ້າງ, ສຶກສາອົບຮົມພະນັກງານ, ຄົ້ນຄວ້າທິດສະດີຂອງລາວ; ຢັ້ງຢືນອີກວ່າ ນີ້ແມ່ນສິ່ງສະແດງເຖິງຄວາມມີຊີວິດຊີວາໃນສາຍພົວພັນມິດຕະພາບພິເສດລາວ-ຫວຽດນາມ.
ບັນຍາກາດຂອງກອງປະຊຸມມອບຮັບ.
ໂຄງການ ແປ ຊຸດປື້ມເລື່ອງ ໂຮ່ຈີ໋ມິງ ຈາກພາສາຫວຽດ ມາເປັນພາສາລາວ ແມ່ນໂຄງການທີ່ສຳຄັນຂອງສອງປະເທດ ຫວຽດນາມ-ລາວ, ໄດ້ຮັບການມອບໝາຍຈາກ ພັກ-ລັດຖະບານ ໃຫ້ສະຖາບັນການເມືອງແຫ່ງຊາດໂຮ່ຈີ໋ມິງ ແລະ ສະຖາບັນການເມືອງ ແລະ ການປົກຄອງແຫ່ງຊາດລາວ ປະສານສົມທົບຈັດຕັ້ງປະຕິບັດ.
ເນື້ອໃນໂຄງການປະກອບມີການແປ ບັນດາຜົນງານໃນຊຸດປື້ມເລື່ອງ ໂຮ່ຈີ໋ມິງ ສະບັບເຕັມ ແລະ ວັດຈະນານຸກົມ ໂຮ່ຈີ໋ມິງ. ມາຮອດປະຈຸບັນ ທັງສອງສະຖາບັນໄດ້ປະສານສົມທົບກັນແປ, ກວດແກ້, ປະເມີນຜົນ ແລະ ຈັດພິມແລ້ວ ພາກ Tập I, II, IV ແລະ VI ພ້ອມກັນນັ້ນ ປະຈຸບັນແມ່ນແປແລ້ວໂດຍພື້ນຖານ ແລະ ຈັດຕັ້ງປະຕິບັດຮຽບຮຽງ, ຈັດໜ້າ, ເພື່ອສືບຕໍ່ຈັດພິມໃນອານາຄົດ. ກ່ອນໜ້ານັ້ນ ພາກ I ຂອງຜົນງານ ທີ່ໄດ້ຖະແຫຼງຂ່າວໄປແລ້ວ ໃນວັນທີ 1 ກັນຍາ 2017, ທີ່ ສະຖາບັນການເມືອງ ແລະ ປົກຄອງແຫ່ງຊາດລາວ.
(ຫັດທະບູນ)