 |
ບັນຍາກາດກອງປະຊຸມ.
ໃນການພົບປະສອງຝ່າຍຄັ້ງນີ້, ສອງຝ່າຍ ໄດ້ຕີລາຄາສູງ ຕໍ່ສາຍພົວພັນອັນແໜ້ນແຟ້ນ ແລະ ມີປະສິດທິພົນ ລະຫວ່າງ ສອງຄະນະໂຄສະນາອົບຮົມ ແລະ ສອງທິດສະດີ ແລະ ພຶດຕິກໍາໃນການປະກອບສ່ວນ ເຂົ້າໃນການເສີມສ້າງມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານລະ ຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ ໃຫ້ນັບມື້ ແໜ້ນແຟ້ນ ແລະ ເກີດດອກອອກຜົນຍິ່ງໆຂຶ້ນ. ພ້ອມນີ້, ສອງຝ່າຍຍັງໄດ້ມີການແລກປ່ຽນ ຄໍາເຫັນ ແລະ ປຶກສາຫາລືກັນ ດ້ວຍບັນຍາກາດພິເສດ ສະໜິດສະໜົມ, ເຂົ້າອົກເຂົ້າໃຈ ແລະ ກົງໄປກົງມາ ກ່ຽວກັບການຮ່ວມມືແບບພິເສດ ຂອງສອງປະເທດໃນຕໍ່ໜ້າ, ເຊິ່ງສອງຝ່າຍໄດ້ເປັນເອກະພາບ ໃຫ້ມີການສືບຕໍ່ຈັດຕັ້ງປະຕິບັດ ແຜນການຮ່ວມມື ລະ ຫວ່າງ ສອງຄະນະໂຄສະນາອົບຮົມ ໃນໄລຍະຕໍ່ໜ້າໃຫ້ປະກົດເປັນຈິງ ແລະ ຕໍ່ເນື່ອງ, ໃນການແລກປ່ຽນບົດຮຽນ ແລະ ຂໍ້ມູນຂ່າວສານ ກ່ຽວກັບສະພາບການພາຍໃນ ແລະ ສາກົນ; ແລກປ່ຽນບົດຮຽນກ່ຽວກັບການກະກຽມ ສະເຫລີມສະຫລອງວັນສໍາຄັນຂອງຊາດ ແລະ ຂອງພັກ; ສ້າງກົນໄກປະສານງານ ລະຫວ່າງ 2 ຄະນະໂຄສະນາ ໃຫ້ມີປະສິດທິຜົນສູງ.
ໃນໂອກາດນີ້, ຝ່າຍລາວ ໄດ້ສະເໜີຝ່າຍຫວຽດນາມ ໃຫ້ມີການຊ່ວຍເຫລືອການຈັດຝຶກອົບຮົມໄລຍະສັ້ນ, ໄລຍະກາງ ກ່ຽວກັບວຽກງານວິຊາສະເພາະ ໃຫ້ພະນັກງານ ຄະນະໂຄສະນາອົບຮົມສູນກາງພັກ ສປປ ລາວ ແລະ ພະນັກງານໂຄສະນາອົບຮົມຢູ່ທ້ອງຖິ່ນ ເປັນຕົ້ນ ບັນດາແຂວງ ທີ່ມີຊາຍແດນຕິດກັບ ສສ.ຫວຽດນາມ. ນອກນັ້ນ, ກໍໃຫ້ມີການຄົ້ນຄວ້າ ຮ່ວມກັນສ້າງພິມເອກະສານ ໃນຫົວຂໍ້ “ປະທານໄກສອນ ພົມວິຫານ ກັບ ສສ.ຫວຽດນາມ”, ເນື່ອງໃນໂອກາດສະເຫລີມສະຫລອງວັນເກີດ ຂອງເພີ່ນຄົບຮອບ 100 ປີ (2020). ພ້ອມນີ້, ກໍໃຫ້ເພີ່ມການພົບປະແລກປ່ຽນ ຄະນະວິຊາການໃຫ້ຫລາຍຂຶ້ນ ເພື່ອທອດຖອນບົດຮຽນ ກ່ຽວກັບວຽກງານໂຄສະນາອົບຮົມ ຂອງສອງຝ່າຍດ້ວຍລະບົບສື່ສານ ທີ່ທັນສະໄໝ ສາມາດເຊື່ອມຕໍ່ກັນ ດ້ວຍລະບົບເອເລັກໂຕນິກ. ພ້ອມດຽວກັນ ກໍໃຫ້ຈັດຕັ້ງ ການພົບປະແລກປ່ຽນ ການທັດສະນະສຶກສາ ແລະ ເຄື່ອນໄຫວກິດຈະກໍາອື່ນໆ ຮ່ວມກັນ.
（ແຫຼ່ງຂໍ້ມູນ： ຂປລ）
