ເຂົ້າຮ່ວມກອງປະຊຸມໃນຄັ້ງນີ້ ມີ ທ່ານ ໄຊສົມພອນ ພົມວິຫານ ກຳມະການກົມການເມືອງ ປະທານແນວລາວສ້າງຊາດ; ພະອາຈານໃຫຍ່ Tep Vong ພະສັງຄະລາດ ແຫ່ງ ລາດສະອານາຈັກ ກຳປູເຈຍ; ພະອາຈານໃຫຍ່ ທິກ ທ້ຽນເຍິນ ປະທານສະພາບໍລິຫານງານສູນກາງ ອົງການພຸດທະສາສະ ໜາ ຫວຽດນາມ ພ້ອມທັງ ຄະນະຜູ້ແທນມາຈາກ ສາມປະເທດ ເກືອບ 600 ອົງ.
 |
ຄະນະຜູ້ແທນ ອົງການພຸດທະສາດສະໜາ ຂອງຫວຽດນາມ. (ພາບ: vietnamplus.vn)
ກ່າວເປີດພິທີ ໂດຍ ພະອາຈານ ໃຫຍ່ ມະຫາງອນ ດຳລົງບຸນ ປະທານສູນກາງອົງການພຸດທະສາ ສະໜາສຳພັນລາວ ກ່າວຕ້ອນຮັບຕໍ່ການເຂົ້າຮ່ວມຂອງ ສິດຖະນຸສິດ ພຸດທະສາດສະໜາ ຫວຽດນາມ, ກຳປູເຈຍ, ການນຳຂອງອຳນາດການປົກຄອງ ມາຈາກ ສາມປະເທດ ກຳປູເຈຍ-ລາວ-ຫວຽດນາມ, ຢັ້ງຢືນວ່າ: ການເຂົ້າຮ່ວມຂອງບັນດາສິດຖະນຸສິດຄັ້ງນີ້ແມ່ນເພື່ອສະແດງເຖິງຄວາມສາມັກຄີຮັດແໜ້ນຂອງ ສາມຊາດ ແລະ ພຸດທະສາດສະໜາ ຂອງສາມປະເທດ, ຄວາມສາມັກຄີ ຕິພັນພິເສດ ດ້ານເສດຖະກິດ, ການເມືອງ, ວັດທະນະທຳ; ພະອາຈານໃຫຍ່ຍັງໄດ້ເນັ້ນໜັກວ່າ: “ ກອງປະຊຸມໃນມື້ນີ້ ແມ່ນມີຄວາມໝາຍ ແລະ ຄຸນຄ່າພິເສດ ຕໍ່ກັບ ອົງການພຸດທະສາດສະໜາ ແລະ ປະຊາຊົນ ທັງສາມຊາດ ຫວຽດນາມ-ລາວ-ກຳປູເຈຍ ອ້າຍນ້ອງ ເພື່ອແນໃສ່ການຈັດຕັ້ງປະຕິບັດ ບັນດາບົດສັນຍາ ລະຫວ່າງ ພຸດທະສາດສະໜາ ຂອງບັນດາປະເທດປະກົດຜົນເປັນຈິງ”.
 |
ບັນຍາກາດກອງປະຊຸມ ປະທານ ອົງການພຸດທະສາດສະໜາ ຫວຽດນາມ-ລາວ-ກຳປູເຈຍ ຄັ້ງທີ 1 ຢູ່ ນະຄອນຫຼວງວຽງຈັນ. (ພາບ: vietnamplus.vn)
ຜູ້ນຳທາງສາດສະໜາຂອງສາມປະເທດໄດ້ຢັ້ງຢືນວ່າຈະໃຫ້ຄວາມສຳຄັນ ແລະ ເປີດກວ້າງ ຮູບແບບໃນພົບປະແລກປ່ຽນ ມິດຕະພາບ ລະຫວ່າງ ພະພິຂຸຊາຍ ແລະ ແມ່ຊີ(ແມ່ຂາວ) ກໍ່ຄືພຸດທະສາສະນິກະຊົນຊົນເຜົ່າຂອງສາມປະເທດ; ເປັນເອກກະພາບກັນໃນການຊຸກຍູ້ບັນດາທ້ອງຖິ່ນລຽບຕາມແນວຊາຍແດນຂອງສາມປະເທດ ຮັດແໜ້ນນຳ້ໃຈສາມັກຄີ, ຮ່ວມມື, ຊ່ວຍເຫຼືອເຊິ່ງກັນແລະກັນ ໃນວຽກງານພຸດທະສາດສະໜາ ແລະ ຮ່ວມກັນ ສ້າງສາຊາຍແດນ ຂອງສາມປະເທດ ໃຫ້ກາຍເປັນ ຊາຍແດນແຫ່ງມິດຕະພາບ ແລະ ສັນຕິພາບ ດ້ານພຸດທະສາດສະໜາ.
ພ້ອມກັນນັ້ນອົງການພຸດທະສາດສະໜາ ທັງສາມປະເທດ ກໍ່ໄດ້ເຫັນດີເປັນເອກກະພາບໃນການເພີ່ມທະວີແລກປ່ຽນວັດທະນະທຳ ດ້ານພຸດທະສາດສະໜາ ລະຫວ່າງ ສາມປະເທດ ແລະ ຜັນຂະຫຍາຍ ບັນດາໂຄງການ ອະນຸລັກ, ຮັກສາ ຄຸນຄ່າດ້ານມໍລະດົກວັດທະນະທຳ ພຸດທະສາດສະໜາ ໃນແຕ່ລະປະເທດ; ພ້ອມກັນນັ້ນ ກໍ່ສ້າງເງື່ອນໄຂສະດວກ ໃນວຽກງານການແລກປ່ຽນ, ແບ່ງປັນຂ່າວສານ, ເອກກະສານ, ຊຸກຍູ້ຍູ້ໜູນພໍ່ແມ່ປະຊາຊົນຂອງສາມປະເທດ ຕັ້ງໜ້າເຂົ້າຮ່ວມການເຄື່ອນໄຫວໃນພາກພື້ນ ແລະ ສາກົນ ດ້ານພຸດທະສາດສະໜາ, ພິເສດແມ່ນການປະກອບສ່ວນກໍ່ສ້າງສັນຕິພາບ ແລະ ພັດທະນາ ໃນ ອາຊຽນ ແລະ ທະວີບອາຊີປາຊີຟິກ.
（ຫັດທະບູນ）
