 |
ກອງປະຊຸມພົບປະ ລະຫວ່າງແຂວງ ສາລະວັນ ແລະ ແຂວງ ກ້ວາງຈິ.
ເມື່ອບໍ່ດົນມານີ້, ແຂວງສາລະວັນ ນຳໂດຍ ທ່ານ ຄໍາຈັນ ແຈ່ມສະໜອນ ຄະນະປະຈໍາພັກແຂວງ, ປະທານກວດກາພັກ, ອົງການກວດກາລັດແຂວງໄດ້ຕ້ອນຮັບ ແລະ ພົບປະສອງຝ່າຍກັບ ທ່ານ ໂຮ່ຮ໋າຍດັງ ກຳມະການພັກແຂວງ, ຮອງປະທານຜູ້ປະຈຳການ ຄະນະກຳມະການກວດກາພັກແຂວງກວາງຈິ ສສ ຫວຽດນາມ ພ້ອມຄະນະ ເພື່ອ ແລກປ່ຽນບົດຮຽນເຊິ່ງກັນ ແລະ ກັນ ກ່ຽວກັບວຽກງານກວດກາ.
ການພົບປະຄັ້ງນີ້, ສອງຝ່າຍຕ່າງກໍໄດ້ລາຍງານສະພາບການ ວຽກງານກວດກາ ເຊິ່ງມີທັງຂໍ້ສະດວກ ແລະ ຂໍ້ຫຍຸ້ງຍາກເພື່ອນຳໄປແກ້ໄຂ ຈັດຕັ້ງປະຕິບັດໃນຕໍ່ໜ້າ, ພ້ອມທັງໄດ້ລາຍງານສະພາບການ ພັດທະນາເສດຖະກິດ-ສັງຄົມ ຂອງແຂວງຕົນໃຫ້ກັນຊາບ, ຈາກນັ້ນກໍໄດ້ເຊັນ ບົດບັນທຶກຊ່ວຍຈຳຮ່ວມກັນ ຈະສືບຕໍ່ເຊື່ອມຊຶມການຮ່ວມມື, ເສີມສ້າງສາຍພົວພັນຂອງສອງແຂວງ ໃຫ້ນັບມື້ໃຫ້ແໜ້ນແຟ້ນຍິ່ງຂຶ້ນ; ສືບຕໍ່ປະຜັດປ່ຽນກັນເປັນເຈົ້າພາບ ໃນການຈັດກອງປະຊຸມພົບປະແລກປ່ຽນວຽກງານກວດກາໃນແຕ່ລະປີ, ພ້ອມທັງລາຍງານຜົນການພົບປະໃຫ້ການນຳຂອງແຕ່ລະຝ່າຍໄດ້ຮັບຮູ້.
ການເດີນທາງມາຢ້ຽມຢາມ ແລະ ເຮັດວຽດຢູ່ແຂວງສາລະວັນໃນຄັ້ງນີ້, ຄະຜູ້ແທນແຂວງກວາງຈິຍັງໄດ້ເດີນທາງໄປພົບປະຢ້ຽມຢາມ ທ່ານ ສີສຸວັນ ວົງຈອມສີ ກຳມະການສູນກາງພັກ, ເລຂາພັກແຂວງ ເຈົ້າແຂວງໆສາລະວັນ ແລະ ພົບປະຢ້ຽມຍາມ ຄະນະພັກ ອຳນາດການປົກຄອງເມືອງວາປີຕື່ມອີກ.
（ແຫຼ່ງຂໍ້ມູນ： ຂປລ）
