 |
ທ່ານ ຫງວຽນ ບ່າ ຮຸງ ຕໍາຈອກກັບ ທ່ານ ຈັນສະໝອນ ຈັນຍາລາດ ເນື່ອງໃນໂອກາດສະເຫຼີມສະຫຼອງບຸນປີໃໝ່ປະຈຳຊາດຫວຽດນາມ
ເຂົ້າຮ່ວມງານດັ່ງກ່າວໂດຍມີ ທ່ານ ພົນເອກ ຈັນສະໝອນ ຈັນຍາລາດ ກຳມະການກົມການເມືອງສູນກາງພັກ ລັດຖະມົນຕີກະຊວງປ້ອງກັນປະເທດ, ທ່ານ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ ເຈົ້າຄອງນະຄອນຫຼວງວຽງຈັນ ພ້ອມດ້ວຍບັນດາທູດ, ທູຕານຸທູດ ແລະ ແຂກເຂົ້າຮ່ວມ. ທ່ານ ຫງວຽນ ບ່າ ຮຸງ ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງ ສສ ຫວຽດນາມ ປະຈໍາລາວ ໄດ້ຂຶ້ນກ່າວໃນພິທີບາງຕອນສໍາຄັນວ່າ: ຊາວຫວຽດນາມພວກຂ້າພະເຈົ້າຕ້ອນຮັບປີໃໝ່ປີກຸນດ້ວຍຄວາມເບີກບານມ່ວນຊື່ນ, ທ່າມກາງຄວາມສຳເລັດໃນການພັດທະນາເສດຖະກິດ-ສັງຄົມໃນປີ 2018 ຜ່ານມາ.
ໃນນັ້ນ ດ້ານເສດຖະກິດ-ສັງຄົມໄດ້ຮັບການພັດທະນາຢ່າງຮອບດ້ານ, ສາມາດປະຕິບັດສໍາເລັດລື່ນຄາດໝາຍຂອງແຜນພັດທະນາເສດຖະກິດ-ສັງຄົມ, ໃນນັ້ນ ປະຕິບັດລື່ນ 9 ຄາດໝາຍຂອງແຜນການ; ຈັງຫວະການຂະຫຍາຍຕົວ GDP ບັນລຸໄດ້ 7,08% ຊຶ່ງບັນລຸກວ່າ 240 ຕື້ໂດລາ; ການເກັບລາຍຮັບງົບປະມານແຫ່ງລັດກໍບັນລຸເກີນແຜນທີ່ວາງໄວ້, ຂົງເຂດວັດທະນະທໍາ-ສັງຄົມສືບຕໍ່ມີຄວາມກ້າວໜ້າ ແລະ ວຽກງານອື່ນໆກໍໄດ້ຮັບການພັດທະນາຢ່າງບໍ່ຢຸດຢັ້ງ. ເວົ້າລວມແລ້ວ ປີ 2018 ຜ່ານມາ, ເຖິງວ່າສອງປະເທດຕ້ອງປະເຊີນໜ້າກັບສິ່ງທ້າທາຍອັນໃຫຍ່ຫຼວງຫຼາຍປະການກໍຕາມແຕ່ວ່າພາຍໃຕ້ການຊີ້ນໍາ, ນໍາພາຂອງພັກກອມມູນິດຫວຽດນາມ ແລະ ພັກປະຊາຊົນປະຕິວັດລາວ, ຫວຽດນາມ ແລະ ລາວ ໄດ້ສາມັກຄີກັນບຸກບືນຜ່ານຜ່າຄວາມຫຍຸ້ງຍາກນາໆປະການສາມາດຍາດເອົາບັນດາຜົນສໍາເລັດອັນສໍາຄັນທີ່ສຸດເຊັ່ນ: ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບໂດຍພື້ນຖານ, ການປ້ອງກັນຊາດ, ປ້ອງກັນຄວາມສະຫງົບໄດ້ຮັບການຮັກສາໄວ້ໄດ້ຢ່າງໝັ້ນຄົງ; ພື້ນຖານເສດຖະກິດຂອງທັງສອງປະເທດມີຈັງຫວະການເຕີບຕົວຢູ່ໃນລະດັບສູງ; ຖານະບົດບາດ ແລະ ຊື່ສຽງຂອງທັງສອງປະເທດ ໃນພາກພື້ນ ແລະ ສາກົນ ໄດ້ຮັບການຍົກສູງເດັ່ນຂຶ້ນຢ່າງບໍ່ຢຸດຢັ້ງ.
ພວກຂ້າພະເຈົ້າຂໍສະແດງຄວາມຮູ້ບຸນຄຸນຢ່າງເລິກເຊິ່ງຕໍ່ພັກ-ລັດ ແລະ ປະຊາຊົນລາວອ້າຍນ້ອງ ທີ່ຍາມໃດກໍໄດ້ໃຫ້ການຊ່ວຍເຫຼືອຢ່າງໝົດຈິດໝົດໃຈໃຫ້ແກ່ຫວຽດນາມ ກໍຄືການຊ່ວຍເຫຼືອທີ່ທັນການ ແລະ ມີປະສິດທິຜົນ ໃຫ້ແກ່ສະຖານທູດຫວຽດນາມ, ບັນດາອົງການຜູ້ຕາງໜ້າ, ວິສາຫະກິດ ແລະ ວົງຄະນາຍາດຊາວຫວຽດນາມທີ່ໄດ້ດໍາລົງຊີວິດ, ສຶກສາຮໍ່າຮຽນຢູ່ລາວໃນຕະຫຼອດຫຼາຍປີທີ່ຜ່ານມາ, ພວກຂ້າພເຈົ້າເຊື່ອໝັ້ນວ່າຈະສືບຕໍ່ໄດ້ຮັບການສະໜັບສະໜູນ, ການຮ່ວມມື, ຊ່ວຍເຫຼືອຂອງບັນດາສະຫາຍ. ພວກເຮົາສະເຫຼີມສະຫຼອງປີໃໝ່ 2019 ຊຶ່ງເປັນປີໝູຄໍາຢູ່ຫວຽດນາມ, ເລື່ອງພື້ນເມືອງຖືວ່າໂຕໝູເປັນສັນຍາລັກແຫ່ງຄວາມອຸດົມສົມບູນພູນສຸກ, ຄວາມສົມບູນທາງດ້ານວັດຖຸ ແລະ ຈິດໃຈ, ໂຕໝູຍັງຖືວ່າແມ່ນສັນຍາລັກແຫ່ງການແຜ່ພັນ ແລະ ແຜ່ຂະຫຍາຍຕົວ. ນອກນັ້ນ, ຍັງປຽບເໝືອສັນຍາລັກແຫ່ງຄວາມສຸກ, ຊ່ວຍໃຫ້ແຕ່ລະຄອບຄົວດໍາລົງຊີວິດດ້ວຍຄວາມເບີກບານມ່ວນຊື່ນ ແລະ ຄວາມສາມັກຄີປອງດອງອີກດ້ວຍ.
（ແຫຼ່ງຂໍ້ມູນ： pasaxon.org.la）
