 |
ທ່ານເລຂາທິການໃຫຍ່ ຫງວ໋ຽນຟູ໋ ຈ້ອງ ຕ້ອນຮັບ ສະຫາຍ ພັນຄຳ ວິພາວັນ ຮອງປະທານປະເທດ ພ້ອມຄະນະຜູ້ແທນຂັ້ນສູງຂອງ ສປປ ລາວ.
ສະຫາຍ ພັນຄຳ ວິພາວັນ ໄດ້ສະແດງຄວາມເສຍໃຈຢ່າງສຸດຊື້ງ ອັນຫາປຽບບໍ່ໄດ້ ຂອງພັກ, ລັດ, ສະພາແຫ່ງຊາດ, ລັດຖະບານ, ແນວລາວສ້າງຊາດ ມາຍັງ ພັກ, ລັດ , ສະພາແຫ່ງຊາດ, ລັດຖະບານ ແລະ ແນວໂຮມຊາດ ຫວຽດນາມ ຕໍ່ການຈາກໄປຢ່າງບໍ່ມີວັນຫວນກັບຂອງທ່ານປະທານປະເທດ ເຈີ່ນດ້າຍ ກວາງ.
ສະຫາຍ ພັນຄຳ ວິພາວັນ ຕີລາຄາສູງ ການປະກອບສ່ວນຂອງ ສະຫາຍ ປະທານປະເທດ ເຈີ່ນດ້າຍ ກວາງ ໃນພາລະກິດປົກປັກຮັກສາ, ສ້າງສາ ແລະ ພັດທະນາ ປະເທດ ຫວຽດນາມ.ສະຫາຍ ເຈີ່ນດ້າຍ ກວາງ ແມ່ນການນຳຜູ້ໜຶ່ງ ທີ່ປະກອບສ່ວນເຂົ້າໃນວຽກງານການພັດທະນາ ສາຍພົວພັນມິດຕະພາບ ອັນຍິ່ງໃຫຍ່, ສາມັກຄີພິເສດ ແລະ ຮ່ວມມືຮອບດ້ານ ລະຫວ່າງ ລາວ-ຫວຽດນາມ ໃນໄລຍະທີ່ຜ່ານມາ.
ຕ່າງໜ້າໃຫ້ແກ່ ຄະນະບໍລິຫານງານສູນກາງພັກ, ລັດ ແລະ ປະຊາຊົນຫວຽດນາມ, ເລຂາທິການໃຫຍ່ ຫງວ໋ຽນຟູ໋ຈ້ອງ ໄດ້ສະແດງຄວາມຂອບອົກຂອບໃຈ ຕໍ່ກັບນ້ຳໃຈ ຂອງຄະນະບໍລິຫານ ສູນກາງພັກ, ລັດ, ສະພາແຫ່ງຊາດ, ລັດຖະບານ ແລະ ແນວລາວສ້າງຊາດ ໄດ້ ສົ່ງໂທລະເລກມາສະແດງຄວາມເສຍໃຈ ເຖິງສະຫາຍ ປະທານປະເທດ ເຈີ່ນດ້າຍກວາງ ທີ່ໄດ້ມໍລະນະກຳນັ້ນ, ພິເສດແມ່ນໄດ້ສົ່ງຄະນະຜູ້ແທນຂັ້ນສູງຂອງພັກ, ລັດ ແຫ່ງ ສປປ ລາວ ນຳໂດຍ ສະຫາຍ ພັນຄຳ ວິພາວັນ ມາເຂົ້າຮ່ວມງານສົ່ງສະການຄັ້ງນີ້; ທ່ານເລຂາທິການໃຫຍ່ ຍັງຕີລາຄາສູງ ທີ່ ສປປ ລາວ ໄດ້ຈັດການໄຫວ້ອາໄລທົ່ວປະເທດ ໃນສອງມື້, ສິ່ງດັ່ງກ່າວສະແດງເຖິງສາຍພົວພັນອັນເລິກເຊິ່ງ, ນ້ຳໃຈສາມັກຄີພິເສດ, ຊື່ສັດ, ໂປ່ງໃສ, ຍາກຈະມີສາຍພົວພັນສາກົນໃດໃນໂລກ ທີ່ຈະຄືກັບການພົວພັນ ລະຫວ່າງ ສອງພັກ, ສອງລັດ ແລະ ປະຊາຊົນ ສອງຊາດ ຫວຽດນາມ-ລາວ.
（ຫັດທະບູນ）
