 |
ພິທີໄຫວ້ອາໄລ ອາດີດເລຂາທິການໃຫຍ່ ສສ ຫວຽດນາມ ໂດ໋ເມື່ອຍ.
ໃນບັນຍາກາດທີ່ເຄັ່ງຂຶມ, ສະຫາຍ ນາງ ປານີ ຢາທໍ່ຕູ້ ໄດ້ວາງພວງມະລາ ແລະ ເຊັນປື້ມໄວ້ອາໄລ ດ້ວຍຄວາມໂສກເສົ້າເສຍໃຈ, ສະແດງຄວາມເຄົາລົບນັບຖື, ສັ່ງລາ ແລະ ຂໍໃຫ້ດວງວິນຍານຂອງ ສະຫາຍ ໂດ໋ ເມືອຍ ໄປສູ່ສຸຄະຕິ ແລະ ດົນບັນດານໃຫ້ປະເທດຊາດ ກໍຄື ປະຊາຊົນຫວຽດນາມ ຈົ່ງມີຄວາມຜາສຸກ ຕະຫລອດໄປ.
 |
 |
ທ່ານປະທານສະພາແຫ່ງຊາດ ສປປ ລາວ ເຂົ້າໄຫວ້ອາໄລ ແລະ ເຊັນປື້ມອາໄລ ອາດີດເລຂາທິການໃຫຍ່ ແຫ່ງ ສສ ຫວຽດນາມ.
ສະຫາຍ ໂດ໋ ເມືອຍ ແມ່ນພະນັກງານປະຕິວັດອາວຸໂສ ຜູ້ທີ່ໄດ້ອຸທິດຊີວິດ, ສະຕິປັນຍາ, ເຫື່ອແຮງ ແລະ ຜົນງານຂອງຕົນ ເພື່ອພາລະກິດຕໍ່ສູ້ປົດປ່ອຍປະເທດຊາດ ເພື່ອຍາດເອົາເອກະລາດແຫ່ງຊາດ ກໍຄື ພາລະກິດປົກປັກຮັກສາ ແລະ ສ້າງສາພັດທະນາ ປະເທດຊາດຫວຽດນາມ. ສະຫາຍ ເປັນຜູ້ນຳທີ່ໄດ້ຮັບຄວາມໄວ້ເນື້ອເຊື່ອໃຈ ແລະ ເຄົາລົບນັບຖືຈາກພັກ, ລັດ ແລະ ປະຊາຊົນຫວຽດນາມ ທັງເປັນເພື່ອນມິດທີ່ສະໜິດສະໜົມຂອງພັກ, ລັດ ແລະ ປະຊາຊົນລາວ, ສະຫາຍ ເປັນຜູ້ທີ່ໄດ້ປະກອບສ່ວນຢ່າງຫ້າວຫັນ ເຂົ້າໃນການເພີ່ມພູນຄູນສ້າງ ສາຍພົວພັນມິດຕະພາບ ທີ່ເປັນມູນເຊື້ອ, ຄວາມສາມັກຄິພິເສດ ແລະ ການຮ່ວມມືຮອບດ້ານ ລະຫວ່າງ ປະຊາຊົນສອງຊາດ ລາວ-ຫວຽດນາມ ຢ່າງສະເໝີຕົ້ນສະເໝີປາຍ ແລະ ນັບມື້ນັບແຕກອອກຜົນຍິ່ງໆຂຶ້ນ.
ຕໍ່ການຈາກໄປ ຂອງ ສະຫາຍ ໂດ໋ ເມືອຍ ບໍ່ພຽງແຕ່ເປັນການສູນເສຍ ຜູ້ນຳທີ່ເຄົາລົບຮັກ ຂອງພັກ, ລັດ ແລະ ປະຊາຊົນຫວຽດນາມ, ແຕ່ຍັງເປັນການສູນເສຍ ເພື່ອນມິດສະຫາຍ ທີ່ສະ ໜິດສະໜົມ ແລະ ໃກ້ຊິດຂອງພັກ, ລັດ ແລະ ປະຊາຊົນລາວ.
（ແຫຼ່ງຂໍ້ມູນ： ຂປລ）
