ເພື່ອແກ້ໄຂບັນຫາພົນລະເມືອງທີ່ບໍ່ມີສັນຊາດ ທີ່ອາໄສຢູ່ເຂດຊາຍແດນຫວຽດນາມ - ລາວ, ທ່ານນາຍົກລັດຖະມົນຕີໄດ້ອະນຸມັດແຜນການຈັດຕັ້ງປະຕິບັດ "ຂໍ້ຕົກລົງລະຫວ່າງລັດຖະບານສາທາລະນະລັດສັງຄົມນິຍົມຫວຽດນາມ ແລະ ລັດຖະບານແຫ່ງສປປລາວ ກ່ຽວກັບການແກ້ໄຂບັນຫາອົບພະຍົບແລະ ການແຕ່ງດອງທີ່ບໍ່ມີທະບຽນແຕ່ງງານຢູ່ເຂດຊາຍແດນຂອງສອງປະເທດ” (ຂໍ້ຕົກລົງເລກທີ 2627).
ເມື່ອບໍ່ດົນມານີ້, ຄະນະກຳມະການປະຊາຊົນແຂວງ ເທື່ອ ທຽນ ເຫວ້ ໄດ້ອອກເອກະສານຊີ້ນຳ ກຸ່ມຊ່ຽວຊານຮ່ວມປະສານສົມທົບກັບ ໜ່ວຍງານຕ່າງໆເພື່ອຄົ້ນຄວ້າ, ຈັດແບ່ງ ແລະ ລວບລວມເອກະສານຂອງຜູ້ອົບພະຍົບຄົນລາວ ແລະ ແຕ່ງງານທີ່ບໍ່ມີທະບຽນແຕ່ງງານ; ປະສານສົມທົບກັບຄະນະ ກຳມະການປົກຄອງແຂວງ ສາລະວັນ ແລະ ຄະນະກຳມະການປົກຄອງແຂວງເຊກອງ (ສປປລາວ) ເພື່ອລົງນາມໃນເອກະສານນິຕິກຳ ທີ່ກ່ຽວຂ້ອງຕາມສັນຍາ; ລາຍງານຕໍ່ກະຊວງຍຸຕິທຳ ເພື່ອພິຈາລະນາ ແລະ ຍື່ນສະເໜີ ຕໍ່ລັດຖະບານ, ເພື່ອພິຈາລະນາກ່ຽວກັບການເຂົ້າສັນຊາດຫວຽດນາມ.
 |
ພິທີເຂົ້າສັນຊາດ ຫວຽດນາມ ສຳລັບພົນລະເມືອງລາວ ທີ່ອາໄສຢູ່ເມືອງ ອ່າເລ໋ອຍ. (ພາບ: nhandan.com.vn)
ນາງ ກັ໋ນບ໋ິງ (ເກີດໃນປີ 1935 ໃນລາວ), ປະຈຸບັນອາໄສຢູ່ ເມືອງ ອ່າເລ໋ອຍ ແມ່ນໜຶ່ງໃນບັນດາຜູ້ທີ່ໄດ້ຮັບສັນຊາດຫວຽດນາມໃນຄັ້ງນີ້. ທ່ານນາງ ກັ໋ນບ໋ິງ ໄດ້ສະແດງອອກວ່າ: "ໃນຖານະເປັນຄົນຫວຽດນາມ, ນັບແຕ່ນີ້ໄປ, ລູກ ແລະ ຫລານຂອງເຂົາເຈົ້າຈະມີໃບຢັ້ງຢືນການເກີດ, ການຂຶ້ນທະບຽນຄົວເຮືອນ, ບັດປະຈຳ ຕົວ, ບໍ່ຕ້ອງເປັນຫ່ວງອີກຕໍ່ໄປ".
ອີງຕາມຂໍ້ມູນຈາກພະແນກຍຸຕິທຳ ແຂວງ ເທື່ອ ທຽນ ເຫວ້, ຜູ້ອົບພະຍົບ ແລະ ສົມລົດບໍ່ມີທະບຽນແຕ່ງງານຢູ່ເຂດຊາຍແດນຫວຽດນາມ - ລາວ ມີຈິງເປັນເວລາຫຼາຍປີແລ້ວໃນບັນດາແຂວງທີ່ມີຊາຍແດນຕິດກັບລາວ. ລວມທັງເມືອງ ອ່າເລ໋ອຍ. ໃນໄລຍະຫຼາຍປີທີ່ຢູ່ອາໄສ, ເຮັດວຽກ ແລະ ອາໄສຢູ່ໃນດິນແດນຂອງ ຫວຽດນາມ, ມາຮອດປະຈຸບັນຊາວເມືອງເຫຼົ່ານີ້ສ່ວນຫຼາຍໄດ້ເຊື່ອມໂຍງເຂົ້າກັບສັງຄົມ ຫວຽດນາມໃນຫຼາຍດ້ານ.
ແຕ່ວ່າ, ກ່ອນທີ່ຈະໄດ້ຮັບສັນຊາດຫວຽດນາມ, ໂດຍຖືກຕ້ອງຕາມກົດໝາຍ, ພວກເຂົາ ແລະ ລູກຫລານຂອງພວກເຂົາບໍ່ໄດ້ຖືກກຳນົດຢ່າງເຕັມສ່ວນວ່າເປັນພົນລະເມືອງ. ສະຖານະການນີ້ບໍ່ພຽງແຕ່ເຮັດໃຫ້ຊີວິດຂອງເຂົາເຈົ້າປະສົບກັບຄວາມຫຍຸ້ງຍາກເທົ່ານັ້ນ, ແຕ່ຍັງເຮັດໃຫ້ເກີດບັນຫາທີ່ສັບສົນຫຼາຍຢ່າງໃນການຄຸ້ມຄອງຊາວທ້ອງຖິ່ນ ແລະ ຄວາມໝັ້ນຄົງຊາຍແດນລະຫວ່າງສອງປະເທດ.
ກ່າວຄຳເຫັນທີ່ພິທີ, ທ່ານຮອງປະທານຄະນະກຳມະການປະຊາຊົນແຂວງ ເທື່ອ ທຽນ ເຫວ້, ທ່ານ ຟ່ານ ທຽນ ດິ໊ງ, ສະເໜີໃຫ້ ອຳນາດການປົກຄອງທ້ອງຖິ່ນຄວນເອົາໃຈໃສ່ເຖິງການໜູນຊ່ວຍ, ການສຶກສາ, ການໂຄສະນາເຜີຍແຜ່ກົດໝາຍ ກໍ່ຄື ນະໂຍບາຍຂອງບັນດາແຂວງ, ເມືອງ ເພື່ອໃຫ້ປະຊາຊົນເຂົ້າໃຈ, ໃຫ້ພວກເຂົາສາມາດເຊື່ອມໂຍງ ແລະ ອາໄສຢູ່ໃນຊຸມຊົນໂດຍໄວ.
（ຄຳຮຸ່ງ）
