ກອງປະຊຸມສົ່ງເສີມການຮ່ວມມືດ້ານການທ່ອງທ່ຽວ ລະຫວ່າງ ແຂວງພາກເໜືອຂອງຫວຽດນາມ ແລະ ບັນດາແຂວງພາກເໜືອຂອງລາວ

ກອງປະຊຸມສົ່ງເສີມການຮ່ວມມືດ້ານການທ່ອງທ່ຽວ ລະຫວ່າງ ແຂວງພາກເໜືອຂອງຫວຽດນາມ ແລະ ບັນດາແຂວງພາກເໜືອຂອງລາວ.

ທ່ານຫົວໜ້າກົງສູນໃຫຍ່ແຫ່ງ ສສ.ຫວຽດນາມ ປະຈຳແຂວງຫຼວງພະບາງ ໄດ້ໃຫ້ກຽດກ່າວເປີດກອງປະຊຸມຢ່າງເປັນທາງການວ່າ: ປະຊາຊົນສອງຊາດລາວ ແລະ ຫວຽດນາມ ແມ່ນມີມູນເຊື້ອວັດທະນະທຳຮີດຄອງປະເພນີອັນດີງາມຄ້ານຄືກັນ ໂດຍສະເພາະແມ່ນມີເມືອງມໍລະດົກໂລກ ເປັນສູນກາງໃນການພົວພັນຮ່ວມມືດ້ານການພັດທະນາການທ່ອງທ່ຽວ. ປະເທດຫວຽດນາມ ແລະ ປະເທດລາວ ຍາມໃດກໍ່ໄດ້ປະຕິບັດຕາມສັນຍາວ່າດ້ວຍກາານທ່ອງທ່ຽວທີ່ສອງຝ່າຍໄດ້ລົງນາມຮ່ວມກັນແຕ່ປີ 1991 ເປັນຕົ້ນມາ.

ຜ່ານມາການຮ່ວມມືການທ່ອງທ່ຽວຂອງສອງປະເທດລາວ ແລະ ຫວຽດນາມ ເວົ້າລວມ, ເວົ້າສະເພາະແມ່ນບັນດາແຂວງພາກເໜືອຂອງສອງປະເທດໄດ້ຮ່ວມກັນພັດທະນາມີຜົນສຳເລັດຢ່າງຕັ້ງໜ້າ. ໃນປີ 2017 ທີ່ຜ່ານມາ, ຜ່ານການແລກປ່ຽນຂອງບັນດາແຂກ ຂອງບັນດາສອງປະເທດເຫັນວ່າບັນລຸເຖິງ 1, 130,000 ຄົນ, ໃນນັ້ນ ນັກທ່ອງທ່ຽວຂອງ ຫວຽດນາມ ເຂົ້າມາທ່ຽວລາວ 1 ລ້ານຄົນ, ນັກທ່ອງທ່ຽວລາວ ເຂົ້າໄປທ່ຽວຫວຽດນາມ 137,000 ຄົນ.

ກອງປະຊຸມຄັ້ງນີ້ແມ່ນເປັນການເປີດໂອກາດໃຫ້ບັນດາຂະແໜງການທ່ອງທ່ຽວຂອງ 02 ປະເທດ ໄດ້ມີການສະເໜີບັນຫາທັດສະນິຍະພາບຂອງການທ່ອງທ່ຽວຂອງຫວຽດນາມ ແລະ ລາວ ຂອງບັນດາແຂວງ ຂໍ້ມູນກ່ຽວກັບການເຄື່ອນໄຫວທຸລະກິດການທ່ອງທ່ຽວທີ່ມີຂໍ້ສະດວກ ແລະ ຂໍ້ຫຍຸ້ງຍາກ ແລະ ຂໍ້ຄົງຄ້າງ ເພື່ອຊອກຫາທາງອອກ ແລະ ວ່າງມາດຕະການໃນການແກ້ໄຂ ເພື່ອດຶງດູດເອົາບັນດາແຂກທັງພາຍໃນ ແລະ ພາກພື້ນ ກໍຄືສາກົນໃຫ້ເຂົ້າມາທ່ຽວຊົມຫຼາຍຂື້ນ.

ພ້ອມນີ້, ກອງປະຊຸມຍັງໄດ້ມີການປຶກສາຫາລືຢ່າງຈິງຈັງ ເພື່ອຊຸກຍູ້ຂະແໜງການທ່ອງທ່ຽວ, ປະສານສົມທົບຊ່ວຍເຫຼືອພາກສ່ວນທີ່ກ່ຽວຂ້ອງໃນການສົ່ງເສີມວຽກງານການທ່ອງທ່ຽວ ໃຫ້ມີຜົນສຳເລັດ ແລະ ເປັນການປະກອບສ່ວນຢ່າງຕັ້ງໜ້າເຂົ້າໃນການສ້າງສາຍພົວພັນມິດຕະພາບ ລະຫວ່າງ ລາວ ແລະ ຫວຽດນາມ ໃຫ້ມີຄວາມໝັ້ນຄົງທະນົງແກ່ນຂື້ນໄປເລື້ອຍໆ. ຢູ່ໃນກອງປະຊຸມດັ່ງກ່າວຄະນະຜູ້ແທນທັງສອງຝ່າຍໄດ້ຮັບຟັງລາຍງານສະພາບການທ່ອງທ່ຽວຈາກທ່ານ ນາງ ສຸດາພອນ ຄົມທະວົງ ພ້ອມທັງປຶກສາຫາລືແລກປ່ຽນບົດຮຽນດ້ານການທ່ອງທ່ຽວເຊິ່ງກັນ ແລະ ກັນ ແນ່ໃສ່ຊຸກຍູ້ສົ່ງເສີມການພົວພັນຮ່ວມມືວຽກງານການທ່ອງທ່ຽວຮ່ວມກັນໃນອານາຄົດ ລະຫວ່າງ ແຂວງພາກເໜືອຂອງ 02 ປະເທດໃຫ້ດີຂື້ນ.

（ຫັດ​ທະ​ບູນ）