ຂໍ້ຕົກລົງດັ່ງກ່າວ ໄດ້ເປີດກາລະໂອກາດເພື່ອໃຫ້ຫວຽດນາມ ໄດ້ແຊກຊຶມເຂົ້າຕະຫຼາດສະມາຊິກ 28 ປະເທດ ຂອງສະຫະພາບເອີຣົບ ຢ່າງເລິກເຊິ່ງຕື່ມຂື້ນ ກາຍເປັນບ່ອນດຶງດູດການລົງທຶນອັນແຂງແຮງຂອງກຸ່ມ ແລະ ແມ່ນສູນກາງການເຊື່ອມໂຍງ, ເຊື່ອມຕໍ່ກັບບັນດາການເຄື່ອນໄຫວດ້ານການຄ້າ - ການລົງທຶນ ກັບ ສະຫະພາບເອີຣົບ ຢູ່ ພາກພື້ນ ອາຊຽນ.

ທ່ານນາຍົກລັດຖະມົນຕີ ຫງວຽນ ຊວນ ຝູ້ກ ໃນການເຈລະຈາ ກັບປະທານລັດຖະສະພາ ເອີລົບ Antonio Tajani ເພື່ອສົ່ງເສີມ EVFTA ໃນການຢ້ຽມຢາມເອີຣົບ ເດືອນຕຸລາປີ 2018. (ພາບ: VGP)

ທ່ານນາງ Cecilia Malmstrom ຂ້າຫຼວງໃຫຍ່ການຄ້າ ໄດ້ຍ້ອງຍໍຊົມເຊີຍຄວາມສາມາດບົ່ມຊ້ອນຂອງຫວຽດນາມ, ໂດຍໃຫ້ຂໍ້ສັງເກດວ່າ: ຫວຽດນາມ ແມ່ນຕະຫຼາດທີ່ຟົດຟື້ນ ແລະ ຕະຫຼາດຫວຽດນາມ ກໍ່ນັບມື້ນັບກາຍເປັນຈຸດນັດພົບ ຂອງວິສາຫະກິດ ເອີຣົບ. ທ່ານນາງ Cecilia Malmstrom ກໍ່ເນັ້ນໜັກວ່າ ນອກຈາກບັນດາຜົນປະໂຫຍດທາງດ້ານເສດຖະກິດແລ້ວ, ຂໍ້ຕົກລົງສອງສະບັບດັ່ງກ່າວນີ້ ຍັງແນໃສ່ຈຸດປະສົງຊຸກຍູ້ການເຄົາລົບຕໍ່ສິດທິມະນຸດ, ປົກປັກຮັກສາສິ່ງແວດລ້ອມ ກໍຄືສິດຜົນປະໂຫຍດຂອງຊົ້ນຊັ້ນແຮງງານອີກດ້ວຍ.

ຕາມການຕີລາຄາຂອງຜູ້ຊ່ຽວຊານ ສະຖາບັນ WTO ແລະ ການເຊື່ອມໂຍງ, ຫ້ອງການການຄ້າ ແລະ ອຸດສາຫະກໍາ ຫວຽດນາມ ໃຫ້ຮູ້ວ່າ: ຫວຽດນາມ ໃຫ້ຄໍາໝັ້້ນສັນຍາເປີດປະຕູໃຫ້ສະຫະພາບເອີຣົບໃນຫຼາຍຂົງເຂດຂື້ນ ເມື່ອທຽບໃສ່ WTO ລວມມີບາງບໍລິການດໍາເນີນທຸລະກິດ, ຮັກສາສຸຂະພາບ, ສິ່ງແວດລ້ອມ, ການສຶກສາ ແລະ ການເງິນ. ເມື່ອສັນຍາ EVFTA ໄດ້ຮັບການລົງນາມ ແລະ ມີຜົນສັກສິດ ແລ້ວນັ້ນ ຈະຊຸກຍູ້ການຄ້າ ລະຫວ່າງ ຫວຽດນາມ ແລະ ສະຫະພາບເອີຣົບ ຫຼາຍພໍສົມຄວນ ເຊິ່ງເປັນສອງຕະຫຼາດທີ່ມີໂຄງປະກອບຜະລິດຕະພັນເຕີ່ມເຕັມໜູນຊ່ວຍເຊິ່ງກັນແລະກັນ.

（ຄຳຮຸ່ງ）