 |
ພາບປະກອບ
ປີ 2019 ເສດຖະກິດຫວຽດນາມ ບັນລຸໄດ້ຜົນງານເປັນຫນ້າປະທັບໃຈຫລາຍຢ່າງ. ຜົນງານພົ້ນເດັ່ນນັ້ນແມ່ນລະດັບການຈະເລີນເຕີບໂຕ GDP ບັນລຸ 7,2% ແມ່ນລະດັບສູງສຸດໃນໂລກ ແລະ ພາກພື້ນ. ເມື່ອສັງເກດຕົວເລກສະຖິຕິລະດັບການເຕີບໂຕ GDP ແຕ່ປີ 2016 ມາຮອດປະຈຸບັນ, ຈຶ່ງເຫັນໄດ້ຄວາມມານະພະຍາຍາມຈົນສຸດຄວາມສາມາດຂອງຕົນ ແລະ ຄວາມຕັດສິນໃຈຢ່າງສູງຂອງທົ່ວພັກ, ທົ່ວປວງຊົນ ແລະ ທົ່ວກອງທັບ.
ນີ້ແມ່ນປີທີສອງຢ່າງລຽນຕິດ GDP ຂອງຫວຽດນາມ ເຕີບໂຕຢູ່ໃນລະດັບກວ່າ 7%. ພ້ອມກັບລະດັບການເຕີບໂຕ GDP ຢູ່ໃນລະດັບສູງ, ເສດຖະກິດມະຫາພາກຍັງຄົງເປັນປົກກະຕິ, ດັດຊະນີລາຄາໃຊ້ສອຍທັງປີ ຍັງຄົງນອນໃນຄາດໝາຍຊື່ງສະພາແຫ່ງຊາດໄດ້ມອບໝາຍໃຫ້. ເປັນຫນ້າສົນໃຈ ເປັນຄັ້ງທຳອິດ ທີ່ວົງເງິນນຳເຂົ້າສົ່ງອອກບັນລຸລະດັບ 500 ຕື້ USD, ພາຍຫລັງພຽງ 2 ປີເມື່ອບັນລຸລະດັບ 400 ຕື້ USD. ຜົນງານນີ້ນັບມື້ນັບມີຄວາມໝາຍໃນສະພາບການຫລາຍປະເທດໃນພາກພື້ນ ແລະ ໂລກ ການນຳເຂົ້າສົ່ງອອກຊຸດໂຊມ ແລະ ໝາກຜົນນີ້ໄດ້ຊ່ວຍໃຫ້ຫວຽດນາມ ແມ່ນປະເທດສົ່ງອອກເກີນດຸນປີທີ 4 ລຽນຕິດ.
ກ້າວເຂົ້າສູ່ປີ 2020, ແມ່ນປີມີຄວາມໝາຍຕັດສິນໃຈສຳເລັດຄາດໝາຍ, ຫນ້າທີ່ຊື່ງກອງປະຊຸມໃຫຍ່ຄັ້ງທີ 12 ຂອງພັກໄດ້ວາງອອກ. ຫວຽດນາມ ຕ້ອງປະຕິບັດມະຕິກອງປະຊຸມໃຫຍ່ຄັ້ງທີ 12 ຂອງພັກວາງອອກຢ່າງມີໄຊ ດ້ວຍຈິດໃຈລວມ ແມ່ນເປັນເຈົ້າການ, ຕັ້ງຫນ້າ, ຂະຫຍັນຂັນເຄື່ອນ, ປະດິດຄິດສ້າງກວ່າ, ບັນລຸໝາກຜົນສັງລວມໃຫ້ສູງກວ່າເມື່ອທຽບໃສ່ປີ 2019. ປີ 2020 ຫວຽດນາມ ຕ້ອງມີບາດກ້າວບຸກທະລຸໃນການໝູນໃຊ້ການປະຕິວັດ 4.0 ນັ້ນແມ່ນເສດຖະກິດດີຈິີຕອນ, ເສດຖະກິດແບ່ງປັນ, ການເງິນອັດສະລິຍະ, ການຄ້າເອເລັກໂຕນິກ, Startup ປະດິດຄິດສ້າງ…ນີ້ແມ່ນປັດໄຈຫລັກແຫລ່ງໃນການສ້າງໂຄງປະກອບເສດຖະກິດຄືນໃຫມ່ ແມ່ນຄວາມສາມາດບົ່ມຊ້ອນເຕີບໂຕທີ່ດີ.
ປີ 2020 ໂອກາດໃຫມ່ພວມເປີດອອກໃຫ້ເສດຖະກິດຫວຽດນາມ. ຄວາມຕັດສິນໃຈ, ມານະພະຍາຍາມ, ຄວາມເປັນເອກະພາບໃນການກະທຳຈາກສູນກາງ ລົງຮອດທ້ອງຖິ່ນ, ການສະຫນັບສະຫນູນຈາກປະຊາຄົມວິສາຫະກິດຈະເພີ່ມກຳລັງແຮງໃຫ້ແກ່ພື້ນຖານເສດຖະກິດຫວຽດນາມ ບັນລຸການເຕີບໂຕຢູ່ໃນລະດັບສູງກວ່າໃນປີ 2020. ປີ 2020, ທ່ານ ຫງວຽນຊວນຟຸກ ຮຽກຮ້ອງຂະແໜງອຸດສາຫະກຳ ແລະການຄ້າຕ້ອງສຸມໃສ່ເພື່ອພ້ອມກັບລັດຖະບານສໍາເລັດບັນດາໜ້າທີ່ທີ່ໄດ້ວາງອອກ. ແລະໜຶ່ງໃນບັນດາໜ້າທີ່ສໍາຄັນເພື່ອປະຕິບັດບັນດາເປົ້າໝາຍນີ້ແມ່ນຂຸດຄົ້ນບັນດາຕະຫຼາດເຊິ່ງຫວຽດນາມ ເຂົ້າຮ່ວມການລົງນາມສັນຍາການຄ້າເສລີ: "ຂ້າພະເຈົ້າສະເໜີໃຫ້ຜັນຂະຫຍາຍບັນດາສັນຍາການຄ້າເສລີຢ່າງຄົບຊຸດ, ເອົາໃຈໃສ່ເຖິງບັນດາຕະຫຼາດທີ່ມີຄວາມສາມາດບົ່ມຊ້ອນ. ເອົາໃຈໃສ່ເຖິງຕະຫຼາດອາເມລິກາ ແຕ່ຕະຫຼາດອື່ນໆກໍ່ມີຄວາມສໍາຄັນທີ່ສຸດເປັນຕົ້ນແມ່ນຕະຫຼາດ CPTPP ແລະ ອີຢູ. ປັດຈຸບັນ, ການສົ່ງອອກຂອງຕະຫຼາດ ອີຢູ ບັນລຸລະດັບເຕີບໂຕໄດ້ພຽງ 1 – 2%, ໃນຂະນະທີ່ມີເຖິງ 28 ປະເທດອີຢູ ສໍາຄັນທີ່ສຸດນັ້ນແມ່ນບັນດາຕະຫຼາດຕ້ອງການສິນຄ້າທີ່ມີຄຸນນະພາບສູງເຊິ່ງພວກເຮົາຕ້ອງເອົາໃຈໃສ່, ນັບທັງຜະລິດຕະພັນກະເສດ, ສະບຽງອາຫານ, ບັນດາຜະລິດຕະພັນສົ່ງອອກອື່ນຂອງຫວຽດນາມ".
（ໄຊພອນ）
