 |
ປີ 2019, ສະພາແຫ່ງຊາດໄດ້ຮັບຮອງເອົາຮ່າງກົດໝາຍ, ປະມວນກົດໝາຍ 18 ສະບັບດ້ວຍຈຳນວນສະມາຊິກສະພາແຫ່ງຊາດສະໜັບສະໜູນສູງ.(ພາບ:TTXVN)
ບັນດາຮ່າງກົດໝາຍ, ປະມວນກົດໝາຍໄດ້ຮັບຮອງເອົານັ້ນແມ່ນພື້ນຖານນິຕິກຳສຳຄັນທີ່ສຸດ ເພື່ອແກ້ໄຂບັນດາບັນຫາເກີດຂຶ້ນຈາກພຶດຕິກຳຕົວຈິງໄດ້ຢ່າງທັນການ; ປະກອບສ່ວນພັດທະນາເສດຖະກິດ-ສັງຄົມຢ່າງວ່ອງໄວ ແລະຍືນຍົງ; ຍົກສູງຄຸນນະພາບຊີວິດການເປັນຢູ່ຂອງປະຊາຊົນ; ເຄົາລົບ, ປົກປ້ອງ, ຮັບປະກັນສິດທິມະນຸດ, ສິດ ແລະພັນທະພື້ນຖານຂອງພົນລະເມືອງ... ໃນປີ 2019, ສະພາແຫ່ງຊາດ ສືບຕໍ່ມີບັນດາການປັບປຸງ, ຍົກສູງປະສິດທິຜົນຂອງການເຄື່ອນໄຫວຊັກຖາມຕາມຮູບການ ຖາມໄວ-ຕອບກະທັດຮັດ. ບັນຍາກາດທີ່ເປີດອົກເປີດໃຈ, ປະຊາທິປະໄຕ, ປ່ຽນແປງໃໝ່ ແລະມີລັກສະນະອາຊີບນັບມື້ນັບສູງໃນການເຄື່ອນໄຫວຊັກຖາມ ເຊິ່ງໄດ້ດຶງດູດຄວາມສົນໃຈ, ຕິດຕາມຈາກປະຊາຊົນ ແລະຜູ້ມີສິດເລືອກຕັ້ງໃນທົ່ວປະເທດເປັນຈຳນວນຫຼວງຫຼາຍ.
ທີ່ກອງປະຊຸມສະພາແຫ່ງຊາດສະໄໝສາມັນ ເທື່ອທີ 8, ນີ້ແມ່ນຄັ້ງທໍາອິດໃນອາຍຸການ 14 ສະໄໝຂອງສະພາແຫ່ງຊາດທີ່ມີມະຕິກ່ຽວກັບບັນດານະໂຍບາຍພັດທະນາເສດຖະກິດສັງຄົມເຂດຊົນເຜົ່າສ່ວນໜ້ອຍ ແລະເຂດພູດອຍ ໃຫ້ກາຍເປັນໂຄງການເປົ້າໝາຍແຫ່ງຊາດກ່ຽວກັບການພັດທະນາແບບຍືນຍົງໃຫ້ເຂດຊົນເຜົ່າສ່ວນໜ້ອຍ ແລະເຂດພູດອຍ. ຄະນະປະຈຳສະພາແຫ່ງຊາດ ໄດ້ປະກາດໃຊ້ຂໍ້ຕົກລົງສຳຄັນຕ່າງໆເພື່ອຫັນແຜນນະໂຍບາຍສືບຕໍ່ປ່ຽນແປງໃໝ່ໃຫ້ເປັນລະບອບລະບຽບການ, ສັບຊ້ອນກົງຈັກການຈັດຕັ້ງຂອງລະບົບການເມືອງຢ່າງກະທັດຮັດ, ເຄື່ອນໄຫວຢ່າງມີປະສິດທິພາບ, ປະສິດທິຜົນຕາມຂໍ້ກຳນົດໃນມະຕິສະບັບເລກທີ 18-NQ/TW ຂອງຄະນະບໍລິຫານງານສູນກາງພັກ ຊຸດທີ XII.
ເຫດການ ທ່ານນາງ ຫງວຽນທິກິມເງິນ ປະທານສະພາແຫ່ງຊາດຫວຽດນາມ ໄດ້ຕາງໜ້າສະພາແຫ່ງຊາດຫວຽດນາມ ຮັບຄ້ອນຕີກິດຕິມະສັກຈາກສະມັດຊາໃຫຍ່ລັດຖະສະພາລະຫ່ວາງຊາດອາຊຽນ (AIPA) ເພື່ອຮັບຕໍາແໜ່ງປະທານ AIPA-41 ອາຍຸການ 2019-2020 ແມ່ນໜຶ່ງໃນບັນດາຂີດໝາຍສຳຄັນ ເພື່ອກະກຽມໃຫ້ປີ 2020 ແມ່ນປີທີ່ມີຄວາມໝາຍພິເສດສຳລັບຫວຽດນາມ ເມື່ອພ້ອມທັງໄດ້ດຳລົງຕໍາແໜ່ງເປັນກຳມະການບໍ່ປະຈຳການສະພາຄວາມໝັ້ນຄົງສະຫະປະຊາຊາດ, ປະທານອາຊຽນ ແລະປະທານ AIPA.
ສະພາແຫ່ງຊາດ ໄດ້ປະກາດໃຊ້ມະຕິວ່າດ້ວຍການໃຫ້ສັດຕະຍາບັນສົນທິສັນຍາເພີ່ມເຕີມໃຫ້ສົນທິສັນຍາວ່າດ້ວຍການວາງແຜນກຳນົດຊາຍແດນແຫ່ງຊາດ ປີ 1985 ແລະສົນທິສັນຍາເພີ່ມເຕີມປີ 2005 ແລະອະນຸສັນຍາວ່າດ້ວຍການຂີດເສັ້ນຊາຍແດນ, ປັກຫຼັກໝາຍຊາຍແດນທາງບົກລະຫວ່າງ ສສ. ຫວຽດນາມ ແລະລາຊະອານາຈັກກຳປູເຈຍ. ມະຕິສະບັບນີ້ກາຍເປັນກອບນິຕິກຳທີ່ໜັກແໜ້ນໃຫ້ການຄຸ້ມຄອງ ແລະພັດທະນາເສັ້ນຊາຍແດນ ຫວຽດນາມ-ກຳປູເຈຍ, ຮັບປະກັນການຮັກສາການປ້ອງກັນຊາດ, ປ້ອງກັນຄວາມສະຫງົບ, ຄວາມເປັນລະບຽບຮຽບຮ້ອຍ, ຄວາມປອດໄພທາງສັງຄົມຢູ່ເຂດຊາຍແດນ, ເປັນການສະແດງໃຫ້ເຫັນເຈດຈຳນົງ, ຄວາມຕັດສິນໃຈຮ່ວມມືກໍ່ສ້າງເສັ້ນຊາຍແດນແຫ່ງສັນຕິພາບ, ມິດຕະພາບ, ການຮ່ວມມື, ຮ່ວມກັນພັດທະນາບົນພື້ນຖານເຄົາລົບຜືນແຜ່ນດິນອັນຄົບຖ້ວນ...
（ໄຊພອນ）
