ກ່າວຄໍາເຫັນທີ່ກອງປະຊຸມພົບປະກັບບັນດາບໍລິສັດລົງທຶນຕະຫຼາດຫຼັກຊັບແຖວໜ້າຂອງ ສ.ເກົາຫຼີ, ທ່ານປະທານ KOFIA Kwon Yong Won ຢັ້ງຢືນວ່າ: ການພົວພັນ ລະຫວ່າງ ຫວຽດນາມ - ສ.ເກົາຫຼີ ກຳລັງໄດ້ຮັບການພັດທະນາເປັນຢ່າງດີ, ໂດຍສະເພາະແມ່ນການພົວພັນດ້ານເສດຖະກິດ. ບັນດາບໍລິສັດຕະຫຼາດຫຼັກຊັບ ສ.ເກົາຫຼີ ພວມເປີດກວ້າງການລົງທຶນ ແລະ ນັບມື້ນັບສົນໃຈຕະຫຼາດຫຼັກຊັບຂອງຫວຽດນາມ.
 |
ທັດສະນີຍະພາບກອງປະຊຸມ KOFIA. (ພາບ: baoquocte)
ດ້ານທ່ານຮອງນາຍົກລັດຖະມົນຕີ ເວືອງ ດິ່ງ ເຫວ້ ກໍ່ໄດ້ກ່າວວ່່າ: ຫວຽດນາມ ແລະ ສ.ເກົາຫຼີ ກຳລັງມີສາຍພົວພັນອັນດີໃນຫຼາຍຂົງເຂດ, ປັດຈຸບັນ, ສ.ເກົາຫຼີ ແມ່ນນັກລົງທຶນໂດຍກົງ ທີ່ໃຫຍ່ທີ່ສຸດ ເຂົ້າມາລົງທືນຢູ່ ສສ ຫວຽດນາມ ແລະ ແມ່ນຄູ່ຮ່ວມມືດ້ານການຄ້າໃຫຍ່ອັນດັບທີ 3 . ທ່ານຮອງນາຍົກລັດຖະມົນຕີ ເວືອງ ດິ່ງ ເຫວ້ ໃຫ້ຮູ້ຕື່ມອີກວ່າ: ຫວຽດນາມ ມີລະດັບການຈະເລີນເຕີບໂຕດ້ານເສດຖະກິດສູງ, ເງິນເຟີ້ຕໍ່າ, ເສດຖະກິດມະຫາພາກມີຄວາມດຸ່ນດຽງເປັນປົກກະຕິ ແລະ ແມ່ນຈຸດນັດພົບຂອງການລົງທຶນທີ່ໜ້າສົນໃຈ. ຫວຽດນາມ ຈະປະກາດຍຸດທະສາດ ໃນການດຶງດູດນັກລົງທຶນຕ່າງປະເທດໃນໄລຍະ 10 ປີ ຕໍ່ໜ້າ, ຕາມແຜນການດຶງດູດການລົງທຶນໂດຍກົງຈາກຕ່າງປະເທດ (FDI) ເຂົ້າໃນບັນດາຂົງເຂດທີ່ ຫວຽດນາມ ມີຄວາມຕ້ອງການໂດຍໄວ. ທ່ານຮອງນາຍົກລັດຖະມົນຕີ ເວືອງ ດິ່ງ ເຫວ້ ຢັ້ງຢືນວ່າ: ລັດຖະບານຫວຽດນາມ ມີຄວາມມຸ້ງມາດປາດຖະໜາ ແລະ ຈະສ້າງທຸກເງື່ອນໄຂສະດວກໃຫ້ນັກທຸລະກິດ ສ.ເກົາຫຼີ, ພ້ອມທັງຫວັງເປັນຢ່າງຍິ່ງວ່າ ບັນດາວິສາຫະກິດ ທີ່ກຳລັງລົງທຶນຢູ່ຫວຽດນາມ ຈະສືບຕໍ່ເປີດກວ້າງການລົງທຶນຕື່ມອີກ. ຄຽງຄູ່ກັນນັ້ນ ຈະມີບັນດານັກລົງທຶນ ສ.ເກົາຫຼີໃໝ່ ມາລົງທຶນຢູ່ຫວຽດນາມ.
 |
ທ່ານຮອງນາຍົກລັດຖະມົນຕີ ເວືອງດິ່ງເຫວ້ ກ່າວຄຳປາໄສ ໃນການພົບປະເຈລະຈາ. (ພາບ: baoquocte)
ໃນມື້ດຽວກັນ, ທ່ານຮອງນາຍົກລັດຖະມົນຕີ ເວືອງ ດິ່ງ ເຫວ້ ໄດ້ມີການເຮັດວຽກກັບ ສະພາອຸດສາຫະກໍາ ສ.ເກົາຫຼີ (FKI) ເຊິ່ງເປັນອົງການຈັດຕັ້ງໜຶ່ງທີ່ມີສະມາຊິກ ກຳລັງເຄື່ອນໄຫວດຳເນີນທຸລະກິດ ຢູ່ ສສ ຫວຽດນາມ. ນອກຈາກນັ້ນ, ກໍໃຫ້ກຽດຕ້ອນຮັບການນໍາທະນາຄານ, ບໍລິສັດການເງິນຕ່າງໆ, ການນໍາກຸ່ມບໍລິສັດ Hyundai ແລະ Samsung ຫວຽດນາມ ຢູ່ນະຄອນຫຼວງ ເຊີອູນ ແລະ ເຮັດວຽກກັບກອງທຶນເງິນລົງທຶນ Vinacapital ແລະ ວິສາຫະກິດອື່ນໆ ຂອງ ສ.ເກົາຫຼີ ກ່ຽວກັບ ຫົວຂໍ້ການລົງທຶນຕື່ມອີກ.
（ຄຳຮຸ່ງ）
