 |
ພາບປະກອບ.
ບັນດານັກຊ່ຽວຊານດ້ານເສດຖະກິດສາກົນຖືວ່າ: ການເຕີບໂຕເສດຖະກິດຂອງ ຫວຽດນາມ ໃນອະນາຄົດຈະສືບຕໍ່ໄດ້ຮັບການຊຸກຍູ້ຍ້ອນມີທ່າໄດ້ປຽບກ່ຽວກັບໂຄງປະກອບປະຊາກອນ, ກໍາລັງແຮງງານ, ພື້ນຖານໂຄງລ່າງນັບມື້ນັບໄດ້ຮັບການປົວແປງ, ພື້ນຖານດ້ານການເມືອງມີສະຖຽນລະພາບ, ສະມັດຕະພາບແຮງງານເພີ່ມຂຶ້ນ, ສ້າງກໍາລັງດຶງດູດບັນດາກະແສເງິນລົງທຶນຈາກຕ່າງປະເທດ. ກົມສະຖິຕິ ອາເມລິກາ ໄດ້ປະກາດຕົວເລກ ໂດຍສະແດງໃຫ້ເຫັນວ່າ ວົງເງິນນໍາເຂົ້າ ອາເມລິກາ ຈາກ ຫວຽດນາມ ໃນໄລຍະ 3 ເດືອນຕົ້ນປີ 2019 ເພີ່ມຂຶ້ນ 40,2% ເມື່ອທຽບໃສ່ໄລຍະດຽວກັນຂອງປີ 2018; ຖ້າຫາກວ່າລະດັບການນໍາເຂົ້າສິນຄ້າຈາກຫວຽດນາມ ໄປຍັງ ອາເມລິກາ ໄດ້ຮັບການຮັກສາຄືລະດັບດັ່ງກ່າວໃນທັງປີ 2019 ນັ້ນ ຫວຽດນາມຈະລື່ນກາຍ ອີຕາລີ, ຝລັ່ງ, ອັງກິດ ແລະ ອິນເດຍ ແລະ ຢືນອັນດັບທີ 7 ໃນບັນຊີລາຍຊື່ບັນດາປະເທດມີວົງເງິນສົ່ງອອກຫຼາຍທີ່ສຸດໄປຍັງ ອາເມລິກາ. ກອງທຶນເງິນຕາສາກົນ (IMF) ຖືວ່າ: ການເຕີບໂຕເສດຖະກິດທົ່ວໂລກໃນປີ 2019 ກໍພຽງແຕ່ບັນລຸໄດ້ 3,5% ເທົ່ານັ້ນ. ດັ່ງນັ້ນ, ພື້ນຖານເສດຖະກິດຂອງຫວຽດນາມ ຈຶ່ງມີກາລະໂອກາດຮັດແຄບຊ່ອງຫວ່າງກັບຫຼາຍພື້ນຖານເສດຖະກິດທີ່ພັດທະນາກວ່າ ໃນໄລຍະຈະມາເຖິງ.
ພື້ນຖານເສດຖະກິດ ຫວຽດນາມ ພວມຢູ່ໃນໄລຍະພັດທະນາ, ນີ້ແມ່ນໝາກຜົນຂອງບັນດາແຜນນະໂຍບາຍ, ການກຳນົດທິດຢ່າງຖືກຕ້ອງ, ບັນດາມາດຕະການຂອງລັດຖະບານໄດ້ປະຕິບັດຢ່າງຂ້ຽວຂາດໃນໄລຍະຜ່ານມາ ແນໃສ່ພັດທະນາເສດຖະກິດການຕະຫລາດກຳນົດທິດສັງຄົມນິຍົມ, ພັດທະນາເສດຖະກິດພາກເອກະຊົນ, ປະຕິຮູບການບໍລິຫານ, ປັບປຸງສະພາບແວດລ້ອມແຫ່ງການລົງທຶນດຳເນີນທຸລະກິດ, ພັດທະນາວິສາຫະກິດ.
（ໄຊພອນ）
