 |
ໄຂກອງປະຊຸມລັດຖະມົນຕີຊາວໜຸ່ມອາຊຽນ ຄັ້ງທີ 11 ຢູ່ນະຄອນຫຼວງວຽງຈັນ. (ພາບ: nhandan.com.vn)
ກອງປະຊຸມປີນີ້ໂດຍສູນກາງຄະນະຊາວໜຸ່ມປະຊາຊົນປະຕິວັດລາວ ຈັດຕັ້ງເປັນຄັ້ງທຳອິດ ດ້ວຍຫົວຂໍ້ວ່າ “ບົດບາດຂອງຊາວໜຸ່ມອາຊຽນ ໃນການພັດທະນາແບບຍືນຍົງ ແລະ ເຊື່ອມຕໍ່ພາກພື້ນ”, ເພື່ອແນໃສ່ຍົກສູງບົດບາດຂອງຊາວໜຸ່ມໃນການສ້າງສາ, ເຊື່ອມໂຍງ ແລະ ເຊື່ອມຕໍ່ກັບປະຊາຄົມອາຊຽນ. ເຂົ້າຮ່ວມກອງປະຊຸມມີທ່ານຮອງນາຍົກລັດຖະມົນຕີລາວ ສອນໄຊ ສີພັນດອນ, ທ່ານຮອງເລຂາທິການໃຫຍ່ອາຊຽນ Kung Phoak, ພ້ອມດ້ວຍລັດຖະມົນຕີຊາວໜຸ່ມ, ການນຳຂັ້ນສູງຊາວໜຸ່ມ 11 ປະເທດອາຊຽນ ແລະ 3 ປະເທດຄູ່ຮ່ວມມືແມ່ນ ຈີນ, ຍີ່ປຸ່ນ ແລະ ສ.ເກົາຫຼີ.
ກ່າວຄໍາເຫັນທີ່ພິທີໄຂກອງປະຊຸມ AMMY XI, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີລາວ ໄດ້ຕີລາຄາສູງການຊຸກຍູ້ບົດບາດຂອງຊາວໜຸ່ມໃນພາກພື້ນອາຊຽນ, ຍ້ອນນີ້ແມ່ນແຫຼ່ງກໍາລັງອັນລໍ້າຄ່າຂອງຊາດ, ຮັກສາບົດບາດສໍາຄັນໃນທຸກຂົງເຂດພັດທະນາຂອງແຕ່ລະປະເທດ ແລະ ພາກພື້ນ; ແມ່ນກໍາລັງເຊື່ອມສານລະຫວ່າງປະຈຸບັນກັບໃນອະນາຄົດ, ຮັດແໜ້ນນໍ້າໃຈສາມັກຄີ, ມິດຕະພາບລະຫວ່າງບັນດາປະເທດໃນພາກພື້ນ ແລະສາກົນ.
 |
ທ່ານ ຫງວຽນແອັງຕ໊ວນ ເລຂາຜູ້ປະຈໍາການຄະນະບໍລິຫານງານສູນກາງຊາວໜຸ່ມກອມມູນິດໂຮ່ຈີມິນ. (ພາບ: nhandan.com.vn)
ກ່າວຄໍາເຫັນທີ່ກອງປະຊຸມ, ທ່ານ ຫງວຽນແອັງຕ໊ວນ ເລຂາຜູ້ປະຈໍາການຄະນະບໍລິຫານງານສູນກາງຊາວໜຸ່ມກອມມູນິດໂຮ່ຈີມິນ ສະເໜີບັນດາຜູ້ແທນປຶກສາຫາລື, ຊຸກຍູ້ການຮ່ວມມືກ່ຽວກັບບັນດາບັນຫາບໍາລຸງສ້າງອາຊີບ, ໜູນຊ່ວຍເລີ່ມທຸລະກິດ, ກໍ່ສ້າງທັກສະ, ພ້ອມທັງສະໜັບສະໜູນຫົວຂໍ້ກ່ຽວກັບການພັດທະນາແບບຍືນຍົງຂອງປີນີ້ ເພາະວ່ານີ້ກໍ່ແມ່ນຫົວຂໍ້ເຊິ່ງຫວຽດນາມ ສຸມໃສ່ການເຄື່ອນໄຫວຕ່າງໆໃນຊຸມປີມໍ່ໆມານີ້.
ກອງປະຊຸມຍັງມີວາລະປຶກສາຫາລືກັບສາມປະເທດຄູ່ຮ່ວມມືແມ່ນຈີນ, ຍີ່ປຸ່ນ ແລະ ສ.ເກົາຫຼີ ພ້ອມກັບບັນດາເວທີປາໄສຢູ່ນອກກອງປະຊຸມ, ເພື່ອແລກປ່ຽນບັນດາບັນຫາກ່ຽວຂ້ອງເຖິງການພັດທະນາ ແລະ ການຮ່ວມມືຂອງຊາວໜຸ່ມບັນດາປະເທດ ແລະ ອື່ນໆ. ກອງປະຊຸມ AMMY XI ແລະ 7th AMMY+3 ໂດຍສູນກາງຊາວໜຸ່ມປະຊາຊົນປະຕິວັດລາວ ເປັນເຈົ້າພາບຈັດຕັ້ງຄັ້ງທຳອິດ, ມຸ່ງໄປເຖິງຍົກສູງບົດບາດຂອງຊາວໜຸ່ມໃນການກໍ່ສ້າງ, ເຊື່ອມໂຍງ ແລະ ເຊື່ອມສານປະຊາຄົມອາຊຽນ.
（ໄຊພອນ）
