ໂດຍໄດ້ຮັບຄໍາເຊີນຂອງທ່ານ ສອນໄຊ ສີພັນດອນ ນາຍົກລັດຖະມົນຕີລາວ, ທ່ານ ຟ້າມມິງຈີ໊ງ ນາຍົກລັດຖະມົນຕີຫວຽດນາມ ພ້ອມດ້ວຍຄະນະຜູ້ແທນຂັ້ນສູງລັດຖະບານຫວຽດນາມ ຈະເດີນທາງໄປຢ້ຽມຢາມລາວ ແລະເປັນປະທານຮ່ວມກອງປະຊຸມ ຄັ້ງທີ 47 ຄະນະກຳມະການຮ່ວມມືທະວີພາຄີລະຫວ່າງລັດຖະບານຫວຽດນາມ-ລາວ ໃນລະຫວ່າງວັນທີ 9-10 ມັງກອນ 2025.
ເນື່ອງໃນໂອກາດນີ້, ນັກຂ່າວຫວຽດນາມ ປະຈຳ ລາວ ໄດ້ມີການສຳພາດທ່ານ ຫງວຽນມິງເຕິມ ເອກອັກຄະລັດຖະທູດຫວຽດນາມ ປະຈໍາ ລາວ ກ່ຽວກັບຄວາມໝາຍ ແລະຄວາມສຳຄັນຂອງການຢ້ຽມຢາມ, ກໍ່ຄືບົດບາດຂອງສາຍພົວພັນແບບພິເສດຫວຽດນາມ-ລາວ ໃນການພັດທະນາເສດຖະກິດ-ສັງຄົມຂອງແຕ່ລະປະເທດ. ຕໍ່ໄປນີ້ແມ່ນເນື້ອໃນຂອງການສໍາພາດ:
ຂໍຮຽນທ່ານເອກອັກຄະລັດຖະທູດ, ໃນສະພາບການແກ່ງແຍ້ງດ້ານພູມສາດການເມືອງໃນໂລກ ແລະພາກພື້ນພວມສົ່ງຜົນສະທ້ອນຫຍໍ້ທໍ້ເຖິງການພັດທະນາເສດຖະກິດ-ສັງຄົມຢູ່ແຕ່ລະປະເທດ, ໃນນັ້ນມີ ຫວຽດນາມ-ລາວ, ການຢ້ຽມຢາມລາວ ຂອງທ່ານນາຍົກລັດຖະມົນຕີຫວຽດນາມ ໃນຕົ້ນປີ 2025 ແລະເປັນປະທານຮ່ວມກອງປະຊຸມ ຄັ້ງທີ 47 ຄະນະກຳມະການຮ່ວມມືທະວີພາຄີລະຫວ່າງລັດຖະບານ ຫວຽດນາມ-ລາວ ມີຄວາມໝາຍຄືແນວໃດຕໍ່ການພັດທະນາເສດຖະກິດ-ສັງຄົມຢູ່ແຕ່ລະປະເທດ, ປະກອບສ່ວນພັດທະນາສາຍພົວພັນແບບພິເສດຫວຽດນາມ-ລາວ ໃຫ້ນັບມື້ນັບເຂົ້າສູ່ລວງເລິກ ແລະມີປະສິດທິຜົນກວ່າອີກ?
 |
| ທ່ານ ຫງວຽນມິງເຕິມ ເອກອັກຄະລັດຖະທູດຫວຽດນາມ ປະຈໍາ ລາວ. ພາບ: ສໍານັກຂ່າວສານຫວຽດນາມ |
ການຢ້ຽມຢາມລາວຂອງທ່ານນາຍົກລັດຖະມົນຕີຫວຽດນາມ ແລະເປັນປະທານຮ່ວມກອງປະຊຸມ ຄັ້ງທີ 47 ຄະນະກຳມະການຮ່ວມມືທະວີພາຄີລະຫວ່າງລັດຖະບານຫວຽດນາມ-ລາວ ດໍາເນີນແຕ່ຊຸມມື້ທຳອິດຂອງປີ 2025 ມີຄວາມໝາຍສຳຄັນທີ່ສຸດສຳລັບຫວຽດນາມ ແລະລາວ. ການຢ້ຽມຢາມໄດ້ດຳເນີນໄປໃນສະພາບການທີ່ນັບມື້ນັບມີການຜັນແປຢ່າງວ່ອງໄວ, ສັບສົນ ແລະຍາກທີ່ຈະຄາດຄະເນລ່ວງໜ້າໄດ້; ສອງພັກ, ສອງລັດ ຫວຽດນາມ ແລະລາວ ພວມຕັ້ງໜ້າຜັນຂະຫຍາຍການປະຕິບັດມະຕິກອງປະຊຸມໃຫຍ່ຂອງແຕ່ລະພັກ, ແຜນການພັດທະນາເສດຖະກິດ-ສັງຄົມຂອງແຕ່ລະປະເທດ ແລະພວມກະກຽມໃຫ້ກອງປະຊຸມໃຫຍ່ອົງຄະນະພັກທຸກຂັ້ນກ້າວເຖິງກອງປະຊຸມໃຫຍ່ທົ່ວປະເທດຂອງແຕ່ລະພັກໃນຕົ້ນປີ 2026. ພ້ອມກັນນັ້ນ, ຫວຽດນາມ ແລະລາວ ພວມຕັ້ງໜ້າຜັນຂະຫຍາຍຂໍ້ຕົກລົງລະຫວ່າງການນຳຂັ້ນສູງສອງພັກ, ສອງລັດ ແລະບັນລຸໄດ້ບັນດາໝາກຜົນທີ່ແທດຈິງ. ການຢ້ຽມຢາມລາວຄັ້ງນີ້ຂອງທ່ານນາຍົກລັດຖະມົນຕີຫວຽດນາມ ມີຄວາມໝາຍສຳຄັນທີ່ສຸດ:
ທີໜຶ່ງ, ການຢ້ຽມຢາມຄັ້ງນີ້ສືບຕໍ່ຢັ້ງຢືນທັດສະນະ, ແຜນນະໂຍບາຍຂອງຫວຽດນາມ ແມ່ນຖືເປັນສຳຄັນ, ໃຫ້ບຸລິມະສິດແຖວໜ້າໃນການພົວພັນຮ່ວມມືກັບລາວ ໃນສະພາບການໃໝ່; ສືບຕໍ່ເຮັດໃຫ້ການພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານ ຫວຽດນາມ-ລາວ ເລິກເຊິ່ງກວ່າອີກ.
ທີສອງ, ໃນຂອບເຂດກອງປະຊຸມ ຄັ້ງທີ 47 ຄະນະກຳມະການຮ່ວມມືທະວີພາຄີລະຫວ່າງລັດຖະບານ ຫວຽດນາມ-ລາວ, ສອງຝ່າຍຈະສຸມໃສ່ຕີລາຄາສະພາບການປະຕິບັດຂໍ້ຕົກລົງກ່ຽວກັບແຜນການຮ່ວມມືຫວຽດນາມ-ລາວ ໃນປີ 2024 ໃນທຸກຂົງເຂດ; ແລກປ່ຽນເຫັນດີເປັນເອກະພາບຕໍ່ທິດທາງການຮ່ວມມືໃນປີ 2025 ກ່ຽວກັບການພົວພັນດ້ານການເມືອງ, ການຕ່າງປະເທດ, ການຮ່ວມມືປ້ອງກັນຊາດ-ປ້ອງກັນຄວາມສະຫງົບ, ການຮ່ວມມືດ້ານເສດຖະກິດ, ການຮ່ວມມືດ້ານການສຶກສາພັດທະນາແຫຼ່ງຊັບພະຍາກອນມະນຸດ ແລະບຳລຸງກໍ່ສ້າງວິຊາຊີບ, ຮ່ວມມືໃນຂົງເຂດອື່ນໆເຊິ່ງຕ່າງຝ່າຍຕ່າງມີຄວາມສົນໃຈ. ພ້ອມທັງສອງຝ່າຍຈະແລກປ່ຽນຢ່າງເລິກເຊິ່ງກ່ຽວກັບມາດຕະການເພື່ອສ້າງບາດກ້າວບຸກທະລຸຍົກສູງປະສິດທິຜົນໃນການຮ່ວມມື, ເປັນຕົ້ນແມ່ນດ້ານເສດຖະກິດ, ການຄ້າ ແລະການລົງທຶນ.
ທີສາມ, ແມ່ນເພີ່ມທະວີການເຊື່ອມຕໍ່ລະຫວ່າງສອງພື້ນຖານເສດຖະກິດຫວຽດນາມ-ລາວ, ເປັນຕົ້ນແມ່ນການເຊື່ອມຕໍ່ກ່ຽວກັບລະບອບລະບຽບການ, ການເງິນ-ເງິນຕາ, ພື້ນຖານໂຄງລ່າງຄົມມະນາຄົມ, ພະລັງງານ, ໂທລະຄົມມະນາຄົມ, ກະສິກຳ, ວິສາຫະກິດ, ການທ່ອງທ່ຽວ ແລະຫັນເປັນດີຈີຕອນ, ພ້ອມທັງໝູນໃຊ້ກາລະໂອກາດຈາກທ່າອ່ຽງໃໝ່ເພື່ອພັດທະນາ.
ທີສີ່, ການພົວພັນຫວຽດນາມ-ລາວ ຮັກສາບົດບາດສໍາຄັນໃນການຮັກສາສັນຕິພາບ, ສະຖຽນລະພາບ, ການຮ່ວມມື ແລະພັດທະນາຢູ່ພາກພື້ນອາຊີຕາເວັນອອກສ່ຽງໃຕ້ ແລະໃນໂລກ, ສະນັ້ນ, ການເພີ່ມທະວີການຮ່ວມມືສອງຝ່າຍຈະປະກອບສ່ວນປັບປຸງ, ຍົກສູງບົດບາດ, ທີ່ຕັ້ງຂອງແຕ່ລະປະເທດ ກໍ່ຄືທັດສະນະລວມຂອງສອງປະເທດໃນອາຊຽນ ແລະເວທີປາໄສພາກພື້ນ, ຜ່ານນັ້ນຊຸກຍູ້ຄວາມສາມັກຄີ ແລະຫຼັກການເຫັນດີເຫັນພ້ອມໃນສະພາບການໃໝ່.
ທີຫ້າ, ການຢ້ຽມຢາມໄດ້ສະແດງໃຫ້ເຫັນຄວາມຕັດສິນໃຈດ້ານການເມືອງຂອງການນໍາຂັ້ນສູງສອງພັກ, ສອງລັດ ໃນການເຮັດໃຫ້ສາຍພົວພັນສາມັກຄີແບບພິເສດຫວຽດນາມ-ລາວ ນັບມື້ນັບພັດທະນາເຂົ້າສູ່ລວງເລິກ, ແທດຈິງ ແລະມີປະສິດທິຜົນໃນທຸກຂົງເຂດຕໍ່ໜ້າສິ່ງທ້າທາຍທີ່ມາຈາກພາກພື້ນ ແລະສາກົນ. ນີ້ເປັນເຂັມທິດໃຫ້ແກ່ການພັດທະນາແບບຍືນຍົງ ແລະໝັ້ນຄົງຂອງສອງປະເທດໃນອະນາຄົດ.
ຂໍຮຽນທ່ານເອກອັກຄະລັດຖະທູດ, ໃນໄລຍະຈະມາເຖິງ, ຫວຽດນາມ-ລາວ ຄວນຊຸກຍູ້ການຮ່ວມມືໃນຂົງເຂດໃດເພື່ອໃຫ້ສອງປະເທດພ້ອມກັນພັດທະນາ?
ຂ້າພະເຈົ້າ ຖືວ່າ, ການຈັດຕັ້ງຜັນຂະຫຍາຍ ແລະປະຕິບັດບັນດາຂໍ້ຕົກລົງລະຫວ່າງການນຳຂັ້ນສູງສອງພັກ, ສອງລັດ ກໍ່ຄືຖະແຫຼງການຮ່ວມ, ສັນຍາຮ່ວມມືລະຫວ່າງສອງລັດຖະບານ ແລະບັນດາຂໍ້ຕົກລົງ, ໂຄງການຮ່ວມມືລະຫວ່າງບັນດາກະຊວງ, ຂະແໜງການ, ທ້ອງຖິ່ນ ແລະວິສາຫະກິດ, ມີຄວາມສໍາຄັນທີ່ສຸດເພື່ອຊ່ວຍໃຫ້ສອງປະເທດພັດທະນາແບບຍືນຍົງ.
ເພື່ອເຮັດໄດ້ສິ່ງເຫຼົ່ານັ້ນ, ກ່ອນອື່ນໝົດ, ບັນດາກະຊວງ, ຄະນະ, ຂະແໜງການ ແລະທ້ອງຖິ່ນສອງປະເທດຄວນຮັບຮູ້ຢ່າງເລິກເຊິ່ງ, ຄົບຖ້ວນ ແລະເຊື່ອມຊຶມຄວາມໝາຍ ແລະຄຸນຄ່າອັນໃຫຍ່ຫຼວງຂອງສາຍພົວພັນແບບພິເສດຫວຽດນາມ-ລາວ ແລະຄວາມສາມັກຄີຊ່ວຍເຫຼືອລະຫວ່າງສອງພັກ, ສອງລັດແມ່ນປັດໄຈພາວະວິໄສ, ແມ່ນກົດເກນປະຫວັດສາດ, ແມ່ນໜຶ່ງໃນບັນດາແຫຼ່ງກຳລັງແຮງອັນໃຫຍ່ຫຼວງ ແລະມີຄວາມໝາຍສຳຄັນທີ່ສຸດໃນພາລະກິດສ້າງສາ ແລະປົກປັກຮັກສາປະເທດຊາດຂອງແຕ່ລະປະເທດ.
ສອງຝ່າຍຄວນສືບຕໍ່ຮັກສາ ແລະຍົກສູງປະສິດທິຜົນບັນດາກົນໄກຮ່ວມມື, ກວດກາຄືນ ແລະຍົກອອກບັນດາກົນໄກຮ່ວມມືໃໝ່; ສົມທົບກັນຢ່າງແໜ້ນແຟ້ນໃນບັນຫາທີ່ກ່ຽວຂ້ອງເຖິງການປ້ອງກັນຄວາມສະຫງົບ ແລະການພັດທະນາຂອງແຕ່ລະປະເທດ; ເພີ່ມທະວີການແລກປ່ຽນຂໍ້ມູນຂ່າວສານ, ແບ່ງປັນບົດຮຽນກ່ຽວກັບວຽກງານກໍ່ສ້າງພັກ, ກໍ່ສ້າງລະບົບການເມືອງ, ການພັດທະນາເສດຖະກິດ-ສັງຄົມ, ສະຖຽນລະພາບທາງດ້ານເສດຖະກິດມະຫາພາກ, ຮັບປະກັນປ້ອງກັນຊາດ-ປ້ອງກັນຄວາມສະຫງົບ, ການເຊື່ອມໂຍງ ແລະເປີດກວ້າງການພົວພັນສາກົນ; ສົມທົບກັນເພື່ອກະກຽມໃຫ້ການຢ້ຽມຢາມຂັ້ນສູງໃນປີ 2025 ເປັນຢ່າງດີ; ສະເຫຼີມສະຫຼອງບັນດາວັນບຸນໃຫຍ່ ແລະເຫດການສໍາຄັນໃນປີ 2025, ຄື: 80 ປີແຫ່ງວັນຊາດຫວຽດນາມ ແລະ 50 ປີແຫ່ງວັນຊາດລາວ, 95 ປີແຫ່ງວັນສ້າງຕັ້ງພັກກອມມູນິດຫວຽດນາມ ແລະ 70 ປີແຫ່ງວັນສ້າງຕັ້ງພັກປະຊາຊົນປະຕິວັດລາວ...
ຂ້າພະເຈົ້າ ເຊື່ອໝັ້ນວ່າ ການຢ້ຽມຢາມລາວຂອງທ່ານນາຍົກລັດຖະມົນຕີຫວຽດນາມ ແລະເປັນປະທານຮ່ວມກອງປະຊຸມ ຄັ້ງທີ 47 ຄະນະກຳມະການຮ່ວມມືທະວີພາຄີລະຫວ່າງລັດຖະບານຫວຽດນາມ-ລາວ ຈະປະສົບຜົນສໍາເລັດຢ່າງຈົບງາມ, ສ້າງພະລັງແຮງໃໝ່ປະກອບສ່ວນປັບປຸງ ແລະເພີ່ມພູນຄູນສ້າງການພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານລະຫວ່າງສອງພັກ, ສອງລັດ, ສອງລັດຖະບານ ແລະປະຊາຊົນສອງປະເທດຫວຽດນາມ-ລາວ ໃຫ້ນັບມື້ນັບເຂົ້າສູ່ລວງເລິກ, ແທດຈິງ, ມີປະສິດທິຜົນໃນທຸກຂົງເຂດ ແລະຂຽວສົດງົດງາມ, ໝັ້ນຄົງຂະໜົງແກ່ນໄປຊົ່ວກາລະນານ.
ຂໍຂອບໃຈທ່ານເອກອັກຄະລັດຖະທູດ!
