ເມືອງເຈິ່ນເດ ຊຸກຍູ້ຄວາມສະເໝີພາບລະຫວ່າງຍິງ-ຊາຍ

ພາຍຫຼັງ 3 ປີີກວ່າ ທີ່ຜັນຂະຫຍາຍການປະຕິບັດໂຄງການ 8 ຂອງລາຍການ 1719, ເມືອງເຈິ່ນເດ ໄດ້ມີຫຼາຍວິທີເຮັດທີ່ດີ, ມີຫົວຄິດປະດິດສ້າງໃນການໂຄສະນາ, ຂົນຂວາຍປະຊາຊົນປະຕິບັດຄວາມສະເໝີພາບລະຫວ່າງຍິງ-ຊາຍ, ປົກປ້ອງສິດຂອງແມ່ຍິງ ແລະເດັກນ້ອຍ. ຄືໃນປີ 2023, ສະຫະພັນແມ່ຍິງເມືອງ ໄດ້ແຈກຢາຍໃບປິວກວ່າ 5.500 ໃບ, ປ້າຍໂຄສະນາ 240 ປ້າຍ, ເອກະສານ 2.500 ສະບັບ; ກໍ່ສ້າງ ແລະທະວີຄູນບັນດາຮູບແບບ, ວິທີເຮັດທີ່ດີ, ບັນດາການເຄື່ອນໄຫວໜູນຊ່ວຍແມ່ຍິງ ພັດທະນາເສດຖະກິດ; ສ້າງຕັ້ງ 16 ໜ່ວຍໂຄສະນາຊຸມຊົນຢູ່ 16 ບ້ານປະສົບຄວາມຫຍຸ້ງຍາກພິເສດ, 8 ສະຖານທີ່ໄວ້ເນື້ອເຊື່ອໃຈ, 5 ສະໂມສອນ “ຫົວໜ້າການປ່ຽນແປງ” ຢູ່ບັນດາໂຮງຮຽນ... ຜ່ານນັ້ນຊ່ວຍໃຫ້ປະຊາຊົນປ່ຽນແປງ “ວິທີຄິດ, ວິທີເຮັດ”, ກໍ່ສ້າງ ແລະທະວີຄູນບັນດາຮູບແບບພັດທະນາເສດຖະກິດ, ປົກປ້ອງທັດສະນະ ແລະການເຂົ້າຮ່ວມທີ່ແທດຈິງຂອງແມ່ຍິງ, ເດັກນ້ອຍໃນບັນດາການເຄື່ອນໄຫວສັງຄົມ...

ທີ່ຕາແສງ ວຽນອານ, ບັນດາຮູບແບບ, ການເຄື່ອນໄຫວມຸ່ງໄປຫາແມ່ຍິງ, ເດັກນ້ອຍຍາມໃດກໍໄດ້ຮັບການເຫັນດີເຫັນພ້ອມ ແລະສະໜັບສະໜູນຈາກປະຊາຊົນ; ໄດ້ຮັບການຕີລາຄາສູງຈາກຄະນະພັກ, ອໍານາດການປົກຄອງທ້ອງຖິ່ນ. ເອື້ອຍ ກິມທິແຈງທີ, ປະທານສະຫະພັນແມ່ຍິງຕາແສັງ ວຽນອານ ໃຫ້ຮູ້ວ່າ ໂດຍຜັນຂະຫຍາຍການ ປະຕິບັດໂຄງການ 8, ພວກຂ້າພະເຈົ້າ ບໍ່ພຽງແຕ່ຂົນຂວາຍປະຊາຊົນຍູ້ແຮງການປະຕິບັດຄວາມສະເໝີພາບລະຫວ່າງຍິງ-ຊາຍສໍາລັບແມ່ຍິງ ແລະເດັກນ້ອຍ ເທົ່ານັ້ນ ຫາກຍັງຜັນຂະຫຍາຍບັນດາຮູບແບບເສດຖະກິດ, ໜູນຊ່ວຍເອື້ອຍນ້ອງ ກູ້ຢືມທຶນ ເພື່ອພັດທະນາການຜະລິດ, ປະກອບສ່ວນຍົກສູງຄຸນນະພາບການດໍາລົງຊີວິດໃຫ້ແກ່ປະຊາຊົນອີກດ້ວຍ”.

ພົ້ນເດັ່ນຄື ເອື້ອຍ ແທກທິເຊືອນ, ຊົນເຜົ່າຂະແມ, ສະມາຊິກສະຫະພັນແມ່ຍິງ, ຢູ່ບ້ານບຶງຊາ, ຕາແສງວຽນອານ ກ່ອນນີ້ເປັນຄອບຄົວທຸກຍາກຢູ່ທ້ອງຖິ່ນ. ຍ້ອນມີການໜູນຊ່ວຍຂອງສະຫະພັນແມ່ຍິງຕາແສງ, ລາວ ໄດ້ເຂົ້າເຖິງທຶນກູ້ຢືມພິເສດເພື່ອພັດທະນາການລ້ຽງງົວພັນ, ເປີດຮ້ານຂາຍເຄື່ອງ ເພື່ອພັດທະນາເສດຖະກິດ. ມາຮອດປັດຈຸບັນ, ຄອບຄົວຂອງເອື້ອຍ ມີລາຍຮັບປົກກະຕິ, ປຸກເຮືອນໃໝ່, ເງື່ອນໄຂການດໍາລົງ ຊີວິດນັບມື້ນັບພັດທະນາ.

ການດໍາເນີນຊີວິດຂອງສະໂມສອນ “ຫົວໜ້າການປ່ຽນແປງ” ຢູ່ໂຮງຮຽນມັດທະຍົມຕອນຕົ້ນ ແທ້ງເທີ້້ຍອານ (ຕາແສງແທ້ງເທີ້ຍອານ, ເມືອງເຈິ່ນເດ). ພາບ: ແຄ໋ງອວຽນ.

ທີ່ໂຮງຮຽນມັດທະຍົມຕອນຕົ້ນ ແທ້ງເທີ້້ຍອານ, ຕາແສງແທ້ງເທີ້້ຍອານ, ພາຍຫຼັງ ເຄື່ອນໄຫວເປັນເວລາເກືອບ 2 ປີ, ສະໂມສອນ “ຫົວໜ້າການປ່ຽນແປງ” ໄດ້ດຶງດູດສະມາຊິກ 25 ຄົນ ແມ່ນພວກນ້ອງນັກຮຽນອາຍຸແຕ່ 11-15 ປີ ເຂົ້າຮ່ວມ. ສະໂມສອນ “ຫົວໜ້າການປ່ຽນແປງ” ແມ່ນເວທີທີ່ມີປະໂຫຍດ ເພື່ອຊ່ວຍໃຫ້ພວກນ້ອງຍົກສູງຄວາມຮູ້, ທັກສະໃນການປ້ອງກັນຕົນເອງ; ພ້ອມກັນນັ້ນ, ນີ້ແມ່ນບ່ອນ ເພື່ອໃຫ້ພວກນ້ອງ ພ້ອມກັນພົບປະແລກປ່ຽນ, ແບ່ງປັນ, ຍົກສູງຄວາມຮັບຮູ້, ຈັດຕັ້ງບັນດາການເຄື່ອນໄຫວລະຫຼິ້ນບັນເທິງທີ່ສອດຄ່ອງກັບເກ່ນອາຍຸ. ອາຈານ ເຈິ່ນຫຶວຕີ້ງ ອໍານວຍການໂຮງຮຽນມັດທະຍົມຕອນຕົ້ນ ແທ້ງເທີ້້ຍອານ ໃຫ້ຮູ້ວ່າ “ສະມາຊິກຂອງສະໂມສອນ “ຫົວໜ້າການປ່ຽນແປງ” ແມ່ນແກ່ນສານນໍາໜ້າປ່ຽນແປງຄວາມຮັບຮູ້, ລົບລ້າງຄວາມຄິດຕາຍຕົວທາງເພດ, ລົບລ້າງຄວາມຊິນເຄີຍ, ຮີດຄອງປະເພນີລ້າຫຼັງທີ່ມີຜົນຮ້າຍໃນຊີວິດການເປັນຢູ່ຂອງພວກນ້ອງນັກຮຽນ. ຜ່ານນັ້ນ ໄດ້ສ້າງການຫັນປ່ຽນທີ່ຕັ້ງໜ້າກ່ຽວກັບທ່າທີ, ຄວາມຮັບຮູ້ ແລະການປະພຶດໃນການສະກັດກັ້ນ ແລະຮັບມືກັບການໃຊ້ຄວາມຮຸນແຮງ, ການທາລູນເດັກ, ບັນດາບັນຫາກ່ຽວກັບສຸຂະພາບຈະເລີນພັນ...”.

ແລກປ່ຽນກັບພວກຂ້າພະເຈົ້າ, ສະຫາຍ ຮວິ່ງຍືອີ໊, ປະທານສະຫະພັນແມ່ຍິງເມືອງ ເຈິ່ນເດ ໃຫ້ຮູ້ວ່າ ເພື່ອສືບຕໍ່ຍົກສູງປະສິດທິຜົນໂຄງການ 8, ໃນໄລຍະຈະມາເຖິງ, ພວກຂ້າພະເຈົ້າ ຈະສົມທົບກັບບັນດາອົງການ, ຄະນະ, ຂະແໜງການຂອງເມືອງ ຈັດຕັ້ງການແຂ່ງຂັນແບ່ງປັນຮູບແບບປະດິດສ້າງ, ມີປະສິດທິຜົນ ປະກອບສ່ວນລົບລ້າງຄວາມຄິດຕາຍຕົວທາງເພດ, ການໃຊ້ຄວາມຮຸນແຮງໃນຄອບຄົວ ແລະຊື້ຂາຍແມ່ຍິງ, ເດັກນ້ອຍ ຢູ່ເຂດຊົນເຜົ່າສ່ວນໜ້ອຍ. ພ້ອມກັນນັ້ນ, ຍູ້ແຮງການຜັນຂະຫຍາຍຮູບແບບໜູນຊ່ວຍ ຊຸກຍູ້ຄວາມສະເໝີພາບລະຫວ່າງຍິງ-ຊາຍ ແລະແກ້ໄຂບັນດາບັນຫາຮີບຮ້ອນສໍາລັບແມ່ຍິງ ແລະເດັກນ້ອຍ ຢູ່ເຂດຊົນເຜົ່າສ່ວນໜ້ອຍ. ເອົາໃຈໃສ່ຍົກສູງຄວາມສາມາດຂອງພະນັກງານຍິງຊົນເຜົ່າສ່ວນໜ້ອຍ ແລະຄວາມສາມາດກ່ຽວກັບຄວາມສະເໝີພາບລະຫວ່າງຍິງ-ຊາຍ ໃຫ້ແກ່ພະນັກງານນາຍບ້ານ, ຜູ້ມີອິດທິພົນຊື່ສຽງໃນຊຸມຊົນ. ສົມທົບກັບສູນສາທາລະນະສຸກເມືອງ ແນະນໍາ, ຕິດຕາມກວດກາການປະຕິບັດນະໂຍບາຍໜູນຊ່ວຍແມ່ຍິງ ເກີດລູກປອດໄພ ຢ່າງມີປະສິດທິຜົນ...”.

ການຜັນຂະຫຍາຍປະຕິບັດໂຄງການ 8 ຢູ່ເມືອງ ເຈິ່ນເດ ໃນໄລຍະຜ່ານມາບັນລຸໄດ້ໝາກຜົນສໍາຄັນຫຼາຍຢ່າງ, ປະກອບສ່ວນປະຕິບັດບັນດາເປົ້າໝາຍກ່ຽວກັບການຍົກສູງອໍານາດ ແລະຄວາມສາມາດດ້ານເສດຖະກິດໃຫ້ແກ່ແມ່ຍິງ; ຊຸກຍູ້ຄວາມສະເໝີພາບລະຫວ່າງຍິງ-ຊາຍ ແລະແກ້ໄຂບັນດາບັນຫາຮີບຮ້ອນຂອງແມ່ຍິງ ແລະເດັກນ້ອຍເຂດຊົນເຜົ່າສ່ວນໜ້ອຍໃນບໍລິເວນ.