ສົມກັບນາມມະຍົດທະຫານລຸງໂຮ່ ຕະຫຼອດໄປ

ຍສໝ - ເນື່ອງໃນໂອກາດສະເຫຼີມສະຫຼອງ 80 ປີແຫ່ງວັນສ້າງຕັ້ງກອງທັບປະຊາຊົນຫວຽດນາມ, 35 ປີແຫ່ງວັນບຸນທົ່ວປວງຊົນປ້ອງກັນຊາດ, ວັນທີ 10 ທັນວາ, ຢູ່ຮ່າໂນ້ຍ, ຄະນະພັກການທະຫານສູນກາງ, ກະຊວງປ້ອງກັນປະເທດໄດ້ຈັດຕັ້ງການພົບປະສັງສັນກັບບັນດາຜູ້ແທນນັກຮົບເກົ່າຫວຽດນາມ. ທ່ານພົນເອກ ຟານວັນຢາງ, ກໍາມະການກົມການເມືອງ, ຮອງເລຂາຄະນະພັກການທະຫານສູນກາງ, ລັດຖະມົນຕີກະຊວງປ້ອງກັນປະເທດຫວຽດນາມ ເປັນປະທານການພົບປະສັງສັນ.

80 ປີແຫ່ງການສ້າງຕັ້ງ, ຕໍ່ສູ້, ຍາດເອົາໄຊຊະນະ ແລະເຕີບໃຫຍ່ຂອງກອງທັບປະຊາຊົນຫວຽດນາມ ມີການປະກອບສ່ວນອັນໃຫຍ່ຫຼວງກ່ຽວກັບເຫື່ອແຮງ, ພູມປັນຍາ ແລະເລືອດເນື້ອຂອງນັກຮົບເກົ່າຫວຽດນາມ ລຸ້ນຕ່າງໆ. ດ້ວຍຈິດໃຈຕັ້ງໜ້າເປັນເຈົ້າການຜ່ານຜ່າທຸກຄວາມຫຍຸ້ງຍາກ, ສາມັກຄີ, ມານະພະຍາຍາມສູ້ຊົນ, ສະມາຄົມນັກຮົບເກົ່າຫວຽດນາມ ໄດ້ປະຕິບັດສຳເລັດໜ້າທີ່ທີ່ໄດ້ຮັບມອບໝາຍ. ນັກຮົບເກົ່າຮຸ່ນຕ່າງໆໄດ້ຕັ້ງໜ້າກໍ່ສ້າງລະບົບການເມືອງທີ່ໝັ້ນຄົງ ເຂັ້ມແຂງ, ເຂົ້າຮ່ວມການພັດທະນາເສດຖະກິດ - ສັງຄົມ, ໄດ້ຮັບການຕີລາຄາສູງຈາກຄະນະພັກ, ອຳນາດການປົກຄອງ ແລະປະຊາຊົນ. ໂດຍໄດ້ຮັບຄວາມຮັກແພງ ແລະຄວາມເຄົາລົບນັບຖືຈາກຄະນະພັກການທະຫານສູນກາງ, ກະຊວງປ້ອງກັນປະເທດ, ທ່ານພົນໂທ ເບ໊ຊວນເຈື່ອງ ປະທານສະມາຄົມນັກຮົບເກົ່າຫວຽດນາມ ໄດ້ຕາງໜ້າໃຫ້ນັກຮົບເກົ່າຫວຽດນາມ ຮຸ່ນຕ່າງໆ ສະແດງຄວາມຕັດສິນໃຈເບິ່ງແຍງດູແລກໍ່ສ້າງສະມາຄົມໃຫ້ໝັ້ນຄົງເຂັ້ມແຂງຢ່າງບໍ່ຢຸດຢັ້ງ, ສ້າງມະມາຊິກສະມາຄົມໃຫ້ມີຄຸນທາດ, ກໍາລັງຄວາມສາມາດ, ຄຸນທາດທາງດ້ານການເມືອງທີ່ໝັ້ນຄົງເຂັ້ມແຂງ, ປົກປັກຮັກສາ ແລະເສີມຂະຫຍາຍຄຸນທາດທະຫານລຸງໂຮ່, ປະກອບສ່ວນເສີມສ້າງມູນເຊື້ອອັນສະຫງ່າລາສີຂອງສະມາຄົມນັກຮົບເກົ່າຫວຽດນາມ ແລະກອງທັບປະຊາຊົນຫວຽດນາມ ວິລະຊົນ. ພາບ: ຫວຽດຈູງ