ການເດີນທາງມາເປັນເວລາ 15 ປີທີ່ດັງກ້ອງກັງວານໄປດ້ວຍບົດເພງວິລະຊົນປະຕິວັດໃນປະເທດ ຝລັ່ງ

09:45 | 09/06/2024

ຍສໝ - ດົນຕີປະສານສຽງບ້ານ​ເກີດ​ເມືອງ​ນອນ​ໄດ້​ຜ່ານ​ການ​ເດີນທາງ​ມາ​ເປັນ​ເວລາ 15 ປີ, ປະກອບສ່ວນ​ຢ່າງ​ຕັ້ງໜ້າ​ເຂົ້າ​ໃນ​ການ​ແນະນຳ​ໃຫ້​ເພື່ອນ​ມິດສາ​ກົນ​ຮູ້ຈັກ​ພາບ​ພົດ​ຂອງ ​ຫວຽດນາມ ​ທີ່​​ສັນຕິພາບ ​ແລະ ສວຍ​ງາມ.

ເຊີດຊູນັກທຸລະກິດຜູ້ຍິງຫວຽດນາມ ຢູ່ ຝລັ່ງ
ພິທີສະເຫຼີມສະຫຼອງ 50 ປີແຫ່ງວັນສ້າງຕັ້ງການພົວພັນທາງການທູດລະຫວ່າງ ຫວຽດນາມ ແລະ ຝລັ່ງ ດຳເນີນຢູ່ ຮ່າໂນ້ຍ

ວັນທີ 8 ມິຖຸນາ, ຢູ່ສູນວັດທະນະທໍາ ຫວຽດນາມ ປະຈໍາ ຝລັ່ງ, ໄດ້ດຳເນີນພິທີສະເຫຼີມສະຫຼອງ 15 ປີແຫ່ງວັນສ້າງຕັ້ງກອງດົນຕີປະສານສຽງບ້ານເກີດເມືອງນອນ ຫວຽດນາມ, ດ້ວຍການເຂົ້າຮ່ວມຂອງບັນດາພໍ່ແມ່ປະຊາຊົນຊາວ ຫວຽດນາມ ຢູ່ ຝລັ່ງ ແລະ ຊາວ ຝລັ່ງ ທີ່ຮັກແພງດົນຕີ, ວັດທະນະທຳ ຫວຽດນາມ.

ໂດຍຕອບສະໜອງເຫດການນີ້, ມີ​ທ່ານ​ເອກ​ອັກ​ຄະ​ລັດ​ຖະ​ທູດ ​ຫວຽດ​ນາມ ປະ​ຈຳ​ ຝລັ່ງ ດິງຕວານຖັງ ແລະ ທ່ານ ​ເອກ​ອັກ​ຄະ​ລັດ​ຖະ​ທູດ, ຫົວ​ໜ້າ​ຄະ​ນະ​ຜູ້​ແທນ ​ຫວຽດ​ນາມ ປະ​ຈຳ UNESCO ນາງ ຫງວຽນ​ທິເ​ວີນ​ແອ່ງ ເຂົ້າຮ່ວມ.

ການເດີນທາງມາເປັນເວລາ 15 ປີທີ່ດັງກ້ອງກັງວານໄປດ້ວຍບົດເພງວິລະຊົນປະຕິວັດໃນປະເທດ ຝລັ່ງ

ທ່ານ​ເອກ​ອັກ​ຄະ​ລັດ​ຖະ​ທູດ ຫວຽດນາມ ດິງຕວານຖັງ ​ໃຫ້​ຮູ້​ວ່າ: ຄວາມ​ຮັກ​ແພງ​ຕໍ່​ບ້ານ​ເກີດ​ເມືອງ​ນອນ, ປະ​ເທດ​ຊາດ​ໄດ້​ຮັບ​ການ​ຖ່າຍ​ທອດ​ໂດຍ​ບັນ​ດາ​ສະ​ມາ​ຊິກ​ກອງດົນຕີປະສານສຽງບ້ານເກີດເມືອງນອນ ​ຜ່ານ​ບັນ​ດາ​ບົດ​ເພງ.

ກ່າວ​ຄຳ​ປາໄສ​ທີ່​ພິທີ​ສະ​ເຫຼີ​ມສະຫຼອງ, ທ່ານ​ເອກ​ອັກຄະ​ລັດຖະທູດ ຫວຽດນາມ ດິງຕວານຖັງ ​ໄດ້​ຕີ​ລາຄາ​ສູງ​ບັນດາ​ບາດກ້າວ​ພັດທະນາ​ຢ່າງ​ມີ​ຄວາມ​ໝາຍ​ຂອງ​ກອງດົນຕີປະສານສຽງບ້ານເກີດເມືອງນອນ. ສ້າງຕັ້ງເມື່ອ ປີ 2009, ກອງດົນຕີປະສານສຽງ ໄດ້ຮ່ວມເດີນທາງກັບບ້ານເກີດເມືອງນອນຜ່ານບັນດາບົດເພງວິລະຊົນຂອງການປະຕິວັດຊາດຢ່າງສະເໝີຕົ້ນສະເໝີປາຍ, ປະກອບສ່ວນໂຄສະນາບັນດາມໍລະດົກດົນຕີ ຫວຽດນາມ ໃຫ້ແກ່ພໍ່ແມ່ປະຊາຊົນຢູ່ຫ່າງໄກບ້ານ ແລະ ເພື່ອນມິດສາກົນ.

ບັນດາ​ລາຍການ​ສະ​ແດງທີ່ເຕັມໄປດ້ວຍ​ຄວາມ​ພາກພູມ​ໃຈ​ຕໍ່ປະ​ເທດ​ຊາດຂອງ​ກອງດົນຕີປະສານສຽງ​ບ້ານ​ເກີດ​ເມືອງ​ນອນ ​ແມ່ນ​ສິ່ງ​ທີ່​ຂາດ​ບໍ່​ໄດ້​ໃນ​ບັນດາ​ການ​ເຄື່ອນ​ໄຫວ​ໂຄສະນາ, ງານສະ​ເຫຼີມສະຫຼອງ​ວັນ​ບຸນ​ໃຫຍ່, ເຫດການປະຫວັດສາດ​ສຳຄັນ​ຂອງ​ປະ​ເທດ, ​ໂດຍ​ສະຖານທູດ ຫວຽດນາມ ປະຈຳ ຝລັ່ງ, ຄະນະ​ຜູ້​ແທນ ​ຫວຽດນາມ ປະຈຳ UNESCO ຫຼື ບັນດາສະມາຄົມຊາວ ຫວຽດນາມ ໄດ້​ຈັດ​ຕັ້ງຢູ່ປະ​ເທດ​ປະຈຳຖິ່ນ.

ທ່ານ​ເອກ​ອັກ​ຄະ​ລັດ​ຖະ​ທູດ ຫວຽດນາມ ດິງຕວານຖັງ ເນັ້ນ​ໜັກ​ວ່າ ບັນ​ດາ​ບົດ​ຂັບ​ຮ້ອງ​ບໍ່​ພຽງ​ແຕ່​ແມ່ນ​ທຳ​ນອງດົນຕີທຳ​ມະ​ດາ​ເທົ່າ​ນັ້ນ ຫາກ​ຍັງ​ແມ່ນ​ຈິດ​ວິນ​ຍານ, ສີສັນ ແລະ ຮີດຄອງປະ​ເພ​ນີ​ຂອງ​ຊາວ ​ຫວຽດ​ນາມ ນຳອີກ.

ບັນດາ​ບົດ​ເພງ​ອັນ​ສະຫງ່າ​ລາສີ​ນັ້ນ​ໄດ້​ກາຍ​ເປັນ​ຈຸດ​ພົບ​ປະ​ທີ່​ໄດ້​ຮັບ​ຄວາມ​ຄອງຄອຍຢ່າງ​ສູງ​ຂອງ​ປະຊາ​ຄົມ​ຊາວ​ ຫວຽດນາມ ຢູ່ ຝລັ່ງ, ຂອງເພື່ອນ​ມິດ​ຊາວ​ ຝລັ່ງ ​ແລະ ສາກົນ​ທີ່​ຮັກ​ແພງ​ວັດທະນະທຳ ຫວຽດນາມ.

ການເດີນທາງມາເປັນເວລາ 15 ປີທີ່ດັງກ້ອງກັງວານໄປດ້ວຍບົດເພງວິລະຊົນປະຕິວັດໃນປະເທດ ຝລັ່ງ

ທ່ານ​ນາງ ຫງວຽນ​ເງິນ​ຮ່າ, ​ແມ່ນ​ໜຶ່ງ​ໃນ​ບັນດາ​ຜູ້​ກໍ່​ຕັ້ງ​ກອງດົນຕີປະສານສຽງ​ບ້ານ​ເກີດ​ເມືອງ​ນອນ ​ຍ້ອນ​ຄວາມ​ຮັກ​ດົນຕີ​ປະຕິວັດ​ຂອງ​ປະ​ເທດຊາດ.

ໂດຍຫຼາຍ​ຄັ້ງ, ກອງດົນຕີປະສານສຽງ​ບ້ານ​ເກີດ​ເມືອງ​ນອນ​ໄດ້​ມີ​ໂອກາດ “ຕີ​ຣະຄັງຢູ່​ຕ່າງປະ​ເທດ” ​ເມື່ອ​ນຳ​ບັນດາ​ບົດ​ເພງຂອງ​ປະ​ເທດຊາດ​ເຂົ້າ​ໃນ​ບັນດາ​ລາຍການ​ໂດຍ​ອຳນາດການປົກຄອງ​ນະຄອນ Paris ຈັດ​ຕັ້ງ​ເນື່ອງ​ໃນໂອກາດ​ສະ​ເຫຼີ​ມສະຫຼອງ​ສາຍ​ພົວພັນ​ທາງ​ການ​ທູດ ​ແລະ ການ​ຮ່ວມ​ມືມິດຕະພາບ ຫວຽດນາມ - ຝລັ່ງ.

​ເນື່ອງ​ໃນ​ໂອກາດ​ນີ້, ສະຖານທູດ ​ຫວຽດນາມ ປະຈຳ ຝລັ່ງ ​ໄດ້​ມອບ​ໃບ​ຍ້ອງຍໍ​ໃຫ້​ກອງດົນຕີປະສານສຽງ​ບ້ານ​ເກີດ​ເມືອງ​ນອນ ​ໃນ​ບັນດາ​ຄວາມ​ມານະ​ພະຍາຍາມທີ່​ບໍ່​ຮູ້ອິດ​ເມື່ອຍ​ໃນ​ການ​ຊຸກຍູ້ການໂຄສະນາ​ວັດທະນະທຳ ​ແລະ ດົນຕີ​ຂອງ​ປະ​ເທດ​ຊາດ ຢູ່ ຝລັ່ງ ​ໃນ​ຕະຫຼອດ 15 ປີຜ່ານມາ.

ການເດີນທາງມາເປັນເວລາ 15 ປີທີ່ດັງກ້ອງກັງວານໄປດ້ວຍບົດເພງວິລະຊົນປະຕິວັດໃນປະເທດ ຝລັ່ງ

ກອງດົນຕີປະສານສຽງ​ບ້ານ​ເກີດ​ເມືອງ​ນອນ​ໄດ້​ຮັບ​ໃບ​ຍ້ອງຍໍ​ຂອງສະຖານທູດ ​ຫວຽດນາມ ປະຈຳ ຝລັ່ງ ​ຍ້ອນບັນດາຄວາມມານະພາຍາຍາມຊຸກຍູ້​ການໂຄສະນາ​ວັດທະນະທຳ, ດົນຕີ ​ແລະ ສິລະ​ປະ​ ຫວຽດນາມ ຢູ່​ປະ​ເທດ​ປະຈຳຖິ່ນ.

ຕາມ​ທ່ານ​​ ເອກ​ອັກຄະ​ລັດຖະທູດ ນາງ ຫງວຽນ​ທິເວີນ​ແອ່ງ ​ແລ້ວ, ກອງດົນຕີປະສານສຽງ​ບ້ານ​ເກີດ​ເມືອງ​ນອນ​​ໄດ້​ຮັບ​ການ​ເຊື້ອ​ເຊີນ​ໃຫ້​ເຂົ້າ​ຮ່ວມ​ບັນດາ​ກອງ​ປະຊຸມ ​ແລະ ​ເວທີ​ປາ​ໄສ UNESCO ເປັນ​ຫຼາຍ​ເທື່ອ, ປະກອບສ່ວນ​ເຂົ້າ​ໃນ​ວຽກ​ງານ​ປົກ​ປັກ​ຮັກສາ ​ແລະ ຊຸກຍູ້​ຄວາມ​ຫຼາກ​ຫຼາຍ​ດ້ານ​ວັດທະນະທຳ​ຂອງ​ ຫວຽດນາມ ຢູ່​ໃນ​ໂລກ. ທ່ານເອກ​ອັກຄະ​ລັດຖະທູດ ​ໄດ້​ຕີ​ລາຄາຢ່າງ​ສູງ​​ຄວາມ​ມານະ​ພະຍາຍາມ​ຂອງ​ບັນດາ​ລຸ້ນຄົນສະມາຊິກກອງດົນຕີປະສານສຽງ​ບ້ານ​ເກີດ​ເມືອງ​ນອນ​ໃນ​ຊຸມ​ປີ​ທີ່ຜ່ານ​ມາ​ ​ແລະ ປາດ​ຖະໜາ​ວ່າ ກອງດົນຕີປະສານສຽງຈະ​ສືບ​ຕໍ່​ມີ​ບັນດາ​ຜົນງານ​ໃໝ່​ໃນ​ໄລຍະ​ຈະ​ມາ​ເຖິງ.

ອະດີດ​ປະທານ​ສະມາຄົມ​ມິດຕະພາບ ​ຝລັ່ງ - ຫວຽດນາມ, ທ່ານ Gerard Daviot ​ແບ່ງປັນ​ວ່າ, ການ​ພົວພັນ​ລະຫວ່າງ​ ຝລັ່ງ ​ແລະ ຫວຽດນາມ ມີ​ປະຫວັດສາດ​ທີ່ຍາວ​ນານ, ​ເປັນຂີດໝາຍດ້ວຍບັນດາ​ການ​ຢ້ຽມຢາມ​ຂັ້ນ​ສູງ ​ແລະ ການ​​ແລກປ່ຽນ​ລະຫວ່າງ​ການ​ນຳ​ຂອງ​ສອງ​ປະ​ເທດ​ເປັນ​ປະຈຳ, ດ້ວຍ​ບັນດາ​ໂຄງການ​ເຮັດ​ວຽກ ແລະ​ ການ​ເຄື່ອນ​ໄຫວ​ສົ່ງ​ເສີມ​ໃນ​ຫຼາຍ​ຂົງ​ເຂດ​. ມາ​ຮອດ​ປະ​ຈຸ​ບັນ, ການ​ພົບ​ປະ​ແລກ​ປ່ຽນ​ວັດ​ທະ​ນະ​ທຳ​ຜ່ານ​ການ​ສະ​ແດງ​ດົນ​ຕີ ​ຫວຽດ​ນາມ ກໍ່ຍັງ​ໄດ້​ປະ​ກອບ​ສ່ວນ​ຊຸກ​ຍູ້​ຄວາມ​ເຂົ້າ​ໃຈ​ເຊິ່ງ​ກັນ​ແລະ​ກັນ​ລະ​ຫວ່າງ​ປະ​ຊາ​ຊົນ​ສອງ​ປະ​ເທດ.

ຈາກບັນດາສະມາຊິກທີ່ຮ້ອງເພງດ້ວຍຄວາມເມົາມົວຫຼົງໄຫຼ ແລະ ຍັງບໍ່ທັນສາມາດກຳເຄື່ອງໝາຍຂອງບັນດາໂນດ ແລະ ຈັງຫວະຂອງດົນຕີໄດ້, ມາຮອດປະຈຸບັນ, ກອງດົນຕີປະສານສຽງ​ບ້ານ​ເກີດ​ເມືອງ​ນອນ ໄດ້ເຕົ້າໂຮມສະມາຊິກຫຼາຍລຸ້ນຄົນຈາກທຸກໄວ ແລະ ທຸກອາຊີບໃນການດຳລົງຊີວິດ. ​ເຂົ້າ​ຮ່ວມ​ກອງດົນຕີປະສານສຽງ​ບ້ານ​ເກີດ​ເມືອງ​ນອນ​ມີ​ບັນດາ​ນັກ​ສຶກສາ​ທີ່​ພວມ​ຮ່ຳຮຽນ​ຢູ່​ຕ່າງປະ​ເທດ​, ​ໄວ​ໜຸ່ມ​ລຸ້ນທີ 2, 3 ​ແລະ ບັນດາ​ສະມາຊິກ​ຜູ້​ເຖົ້າ​ທີ່​ດຳລົງ​ຊີວິດ ​ແລະ ​ເຮັດ​ວຽກ​ຢູ່​ປະ​ເທດ​ປະຈຳຖິ່ນ​ເປັນ​ເວລາ​ຫຼາຍ​ປີ.

ການເດີນທາງມາເປັນເວລາ 15 ປີທີ່ດັງກ້ອງກັງວານໄປດ້ວຍບົດເພງວິລະຊົນປະຕິວັດໃນປະເທດ ຝລັ່ງ

ກອງດົນຕີປະສານສຽງ​ບ້ານ​ເກີດ​ເມືອງ​ນອນ​ໄດ້​ຖ່າຍຮູບ​ທີ່​ລະນຶກ​ກັບ​ທ່ານ​ເອກ​ອັກຄະ​ລັດຖະທູດ - ຫົວໜ້າ​ຄະນະ​ຜູ້​ແທນ ​ຫວຽດນາມ​ ປະຈຳ​ອົງການ UNESCO ນາງ ຫງວຽນ​ທິເວີນແອ່ງ (ເສື້ອຍາວ​ສີຂຽວ​) ​ແລະ ທ່ານ ເວືອງ​ຮຶວ​ເຍີນ ປະທານ​ສະມາຄົມ​ຊາວ ຫວຽດນາມ ປະຈຳ ຝລັ່ງ.

ທ່ານ Laurent Gaurois, ສະມາຊິກ​ພິ​ເສດ​ຂອງ​ກອງດົນຕີປະສານສຽງ​ບ້ານ​ເກີດ​ເມືອງ​ນອນ, ​ແບ່ງປັນ​ວ່າ: ​ເຖິງ​ວ່າ​ເປັນ​ຊາວ​ ຝລັ່ງ, ​ແຕ່​ບັນດາ​ບົດ​ເພງ​ຍ້ອງຍໍ​ບ້ານ​ເກີດ​ເມືອງ​ນອນ, ຄວາມ​ຮັກ​ແພງ​ປະ​ເທດ​ຊາດ ​ແລະ ຄວາມ​ພາກພູມໃຈ​ຂອງ​ປະ​ເທດ​ຊາດ​ຂອງ​ກອງດົນຕີປະສານສຽງ​ຊາວ ຫວຽດນາມ ລ້ວນ​ແຕ່​ໄດ້​ດຶງ​ດູດ​ຂ້າພະ​ເຈົ້າ​ນັບ​ແຕ່​ມື້​ທຳ​ອິດ.

ພາຍຫຼັງ​ໄດ້​ຕັດສິນ​ໃຈ​ເຂົ້າ​ຮ່ວມ​ກອງດົນຕີປະສານສຽງ​​ໃນ​ຖານະ​ແຍກສຽງສູງ, ​ເຖິງ​ວ່າ​​ຍັງ​ບໍ່​ເກັ່ງ​ພາສາ​ ຫວຽດນາມ, ​ແຕ່​ທ່ານ Laurent Gaurois ກໍ່​ບໍ່​ໄດ້​ປະສົບ​ກັບ​ຄວາມ​ຫຍຸ້ງຍາກ​ປານໃດ​ໃນ​ການ​ຈັບ​ເອົາ​ເນື້ອ​ໃນ​ຂອງ​ເພງ​ຍ້ອນ​ເນື້ອ​ໃນ​ທີ່​ແປ​ແລ້ວ, ກໍ່ຄື​ການ​ໜູນ​ຊ່ວຍການ​ອອກສຽງ​ຈາກ​ໝູ່​ເພື່ອນ​ໃນ​ກຸ່ມ, ຈາກ​ນັ້ນ​ຈຶ່ງສາມາດ​ສະ​ແດງ​ບົດ​ເພງ​ປະ​ຕິ​ວັດ ​ຫວຽດ​ນາມ ​ຢ່າງ​ເຕັມ​ທີ່.

ໂດຍໄດ້ກາຍເປັນນິໄສທີ່ຂາດບໍ່ໄດ້ໃນທຸກໆທ້າຍອາທິດ, ທ່ານ Laurent Gaurois ຍັງພະຍາຍາມຈັດແຈງວຽກງານຂອງຕົນເພື່ອເຂົ້າຮ່ວມຝຶກຊ້ອມສຽງກັບກອງດົນຕີປະສານສຽງບ້ານ​ເກີດ​ເມືອງ​ນອນ ໃນທຸກຕອນບ່າຍວັນອາທິດ.

ທ້າວ Mathieu Montagut ແລະ ນາງ Chloe Walfard ແມ່ນສອງຄົນໃນຈຳນວນຜູ້ຊົມຊາວ ຝລັ່ງ ຫຼາຍຄົນທີ່ໄດ້ເຂົ້າຮ່ວມ ແລະ ສະໜັບສະໜູນການສະເຫຼີມສະຫຼອງ 15 ປີແຫ່ງວັນສ້າງຕັ້ງກອງດົນຕີປະສານສຽງບ້ານ​ເກີດ​ເມືອງ​ນອນ. ທ້າວ Mathieu ແລະ ນາງ Chloe ແບ່ງ​ປັນວ່າ “ພວກ​ຂ້າພະເຈົ້າມີ​ຫມູ່​ເພື່ອນ​ທີ່​ເປັນ​ສະ​ມາ​ຊິກ​ຂອງ​ກອງດົນຕີປະສານສຽງ ແລະ ​ຍັງ​ໄດ້​​ຕິດຕາມ​ການ​ເດີນ​ທາງ​ຂອງ ກອງດົນຕີປະສານສຽງບ້ານ​ເກີດ​ເມືອງ​ນອນ ໃນໄລຍະ​ຫຼາຍປີຜ່ານມາ. ​ເມື່ອ​ເຂົ້າ​ຮ່ວມ​ພິທີ​ໃນ​ມື້​ນີ້, ພວກ​ຂ້າພະ​ເຈົ້າ​ໄດ້​ມີ​ໂອກາດ​ຊົມ​ບັນດາ​ລາຍການ​ສະ​ແດງ​ສິລະ​ປະ​ທີ່​ເປັນ​ເອກະລັກ​ສະ​ເພາະ​ຂອງ​ສະມາຄົມ​ຊາວ ​ຫວຽດນາມ​ ຈຳນວນ​ໜຶ່ງທີ່ໄດ້ປະກອບສ່ວນຄວາມມ່ວນຊື່ນ, ຄຽງຄູ່​ບັນດາ​ບົດ​ເພງ​ວິລະ​ຊົນ​ຂອງກອງດົນຕີປະສານສຽງ. ຜ່ານ​ບົດ​ເພງ, ພວກ​​ຂ້າພະ​ເຈົ້າເຂົ້າ​ໃຈ​ວ່າ: ພາສາ ຫວຽດ​ນາມ ແມ່ນ​ພາ​ສາ​ທີ່​ສວຍ​ງາມ​”.

ກອງດົນຕີປະສານສຽງບ້ານ​ເກີດ​ເມືອງ​ນອນ​ໄດ້​ຜ່ານ​​ໄລຍະ​ເວລາ 15 ປີ​ທີ່​ມີ​ຄວາມ​ໝາຍ, ປະກອບສ່ວນ​ຢ່າງ​ຕັ້ງໜ້າ​ເຂົ້າ​ໃນ​ການ​ແນະນຳເຖິງເພື່ອນມິດສາກົນ ກ່ຽວກັບຮູບ​ພາບ​ປະ​ເທດ​ຊາດ​ທີ່​ສະຫງ່າ​ຜ່າ​ເຜີຍ, ສັນຕິພາບ ​ແລະ ສວຍ​ງາມ​ຂອງ​ ຫວຽດນາມ.

ຄວາມປະທັບໃຈຂອງຫວຽດນາມ ທີ່ງານບຸນໜັງສືພິມມະນຸດສະທໍາ ຝລັ່ງ ປີ 2023 ຄວາມປະທັບໃຈຂອງຫວຽດນາມ ທີ່ງານບຸນໜັງສືພິມມະນຸດສະທໍາ ຝລັ່ງ ປີ 2023

ຍສໝ - ໃນລະຫວ່າງ 3 ວັນແຕ່ວັນທີ 15 – 17 ກັນຍາ, ກຸ່ມໜັງສືພິມປະຊາຊົນ ໄດ້ເຂົ້າຮ່ວມງານບຸນໜັງສືພິມມະນຸດສະທໍາ ຄັ້ງທີ 88 ທີ່ຈັດຂຶ້ນຢູ່ນະຄອນ Plessis-Pâté ແຂວງ Essonne, ທາງພາກໃຕ້ຂອງ ປາຣີ.

ການທູດວັດທະນະທຳ ຊ່ວຍໃຫ້ຫວຽດນາມ ແລະ ຝລັ່ງ ຫຍັບເຂົ້າໃກ້ກັນ ການທູດວັດທະນະທຳ ຊ່ວຍໃຫ້ຫວຽດນາມ ແລະ ຝລັ່ງ ຫຍັບເຂົ້າໃກ້ກັນ

ຍສໝ - ໃນ​ຂະ​ບວນການ​ເຊື່ອມ​ໂຍງ​ເຂົ້າ​ກັບ​ໂລກ, ການ​ທູດ​ວັດທະນະທຳ ​ແມ່ນ​ໜຶ່ງ​ໃນ 3 ​ເສົາ​ຄ້ຳ​ຂອງ​ພື້ນຖານການ​ທູດ​ຮອບດ້ານ​ຂອງ​ຫວຽດນາມ, ຄຽງ​ຄູ່​ກັບ​ການ​ທູດ​ດ້ານ​ການ​ເມືອງ, ​ເສດຖະກິດ. ພ້ອມກັນ​ນີ້​ ຍັງ​ເປັນ​ເຄື່ອງ​ມື​ທີ່​ມີ​ປະສິດທິ​ຜົນ​ ເພື່ອ​ເພີ່ມ​ທະວີ​ຄວາມ​ເຂົ້າ​ໃຈ​ເຊິ່ງກັນ ​ແລະ ​ກັນ​ລະຫວ່າງບັນດາ​ປະຊາຊາດ.

ມິງດຶກ

ທ່ານອາດຈະມັກ

ເບິ່ງເພີ່ມເຕີມໃນ: ຊາວຫວຽດນາມອາໃສຢູ່ຕ່າງປະເທດ

ເບິ່ງເພີ່ມເຕີມ
ເຫດການ
302 Found

Found

The document has moved here.