| ຫວຽດນາມ ໄດ້ເຂົ້າ top 3 ທ້ອງຕະຫຼາດອະສັງຫາລິມະຊັບທີ່ໄດ້ຮັບການຮັບຕ້ອນຢູ່ພາກພື້ນ | |
| IMF: ຄາດຄະເນການເຕີບໂຕດ້ານເສດຖະກິດລາວ ບັນລຸ 4% ໃນປີ 2023 |
ໂດຍເຂົ້າຮ່ວມການສຳມະນາ ມີບັນດາຜູ້ວ່າການທະນາຄານຈາກ ລາວ, ມາເລເຊຍ, ໄທ ແລະ ຫວຽດນາມ; ຮອງຜູ້ອຳນວຍການໃຫຍ່ຝ່າຍບໍລິຫານ IMF, ຫົວໜ້າຜູ້ຕາງໜ້າຫ້ອງການ IFC ປະຈໍາລາວ ແລະ ການເຂົ້າຮ່ວມຂອງຜູ້ຕາງໜ້າທະນາຄານສູນກາງ ແລະ ກະຊວງການເງິນຂອງບັນດາປະເທດສະມາຊິກ ອາຊຽນ, ອົງການສາກົນ, ສະຖາບັນການເງິນໃນພາກພື້ນ. ຄະນະຜູ້ແທນ ຫວຽດນາມ ໂດຍທ່ານຜູ້ວ່າການທະນາຄານແຫ່ງລັດ ຫວຽດນາມ ນາງ ຫງວຽນທິຮົ່ງ ເປັນຫົວໜ້າຄະນະ ເຂົ້າຮ່ວມການສຳມະນາດ້ວຍບົດບາດເປັນນັກປາຖະກະຖາຫຼັກ.
ທີ່ເຫດການ, ໄດ້ຈັດຂຶ້ນໃນສະພາບການທີ່ເສດຖະກິດໂລກ ແລະ ພາກພື້ນສືບຕໍ່ປະເຊີນໜ້າກັບຄວາມຫຍຸ້ງຍາກ, ສິ່ງທ້າທາຍ ແລະ ຄວາມຂາດສະຖຽນລະພາບຫຼາຍຢ່າງເຊິ່ງຮຽກຮ້ອງໃຫ້ມີການຮ່ວມແຮງຮ່ວມໃຈຊອກຫາມາດຕະການແກ້ໄຂ ເພື່ອຜ່ານບັນດາສິ່ງທີ່ກີດຂວາງຂອງພື້ນຖານເສດຖະກິດ, ການສຳມະນາແມ່ນເພື່ອປຶກສາຫາລືກ່ຽວກັບທ່າອ່ຽງການພັດທະນາໃນໄລຍະຍາວຂອງໂລກ ແລະ ວິທີໝູນໃຊ້ກາລະໂອກາດຈາກທ່າອ່ຽງການຜັນແປນີ້ ເພື່ອຊຸກຍູ້ການເຕີບໂຕດ້ານເສດຖະກິດ.
 |
| ທ່ານຜູ້ວ່າການທະນາຄານແຫ່ງລັດ ຫວຽດນາມ ນາງ ຫງວຽນທິຮົ່ງ ນຳໜ້າຄະນະຜູ້ແທນ ຫວຽດນາມ ເຂົ້າຮ່ວມການສຳມະນາ ດ້ວຍບົດບາດນັກປາຖະກະຖາຫຼັກ. ພາບ: ຟ້າມກຽນ/ນັກຂ່າວ TTXVN ປະຈຳລາວ |
ທີ່ການສຳມະນາ, IMF ພິນິດໄສວ່າ ໂດຍກົງກັນຂ້າມກັບທັດສະນະຄະຕິຂອງພື້ນຖານເສດຖະກິດທົ່ວໂລກທີ່ພວມຜ່ອນຄວາມໄວ ແລະ ຄວາມສ່ຽງຂອງການຖົດຖອຍ, ເຂດອາຊີ - ປາຊີຟິກ ສືບຕໍ່ຮັກສາແງ່ຫວັງຢ່າງໝັ້ນແກ່ນ, ຄາດຄະເນການປະກອບສ່ວນແມ່ນປະມານ 2/3 ຂອງການເຕີບໂຕທົ່ວໂລກໃນປີ 2024. ໃນນັ້ນ, ອາຊຽນ, ຮູບແບບການເຊື່ອມໂຍງເສດຖະກິດ ແລະ ການຮ່ວມມືດ້ານເສດຖະກິດທີ່ເປັນແບບຢ່າງ, ພວມນັບມື້ນັບກາຍເປັນພາກພື້ນເສດຖະກິດທີ່ຂະຫຍັນຂັນເຄື່ອນ, ຄາດຄະເນວ່າຈະປະກອບສ່ວນປະມານ 10% ຂອງ GDP ທົ່ວໂລກໃນປີນີ້.
ໃນຂອບເຂດຂອງການສຳມະນາ, ການນຳບັນດາທະນາຄານສູນກາງ ແລະ ຜູ້ຕາງໜ້າຂອງ IMF, IFC ໄດ້ໃຊ້ເວລາປຶກສາຫາລືກ່ຽວກັບທ່າອ່ຽງການພັດທະນາໃນໄລຍະຍາວຂອງໂລກ, ລວມມີ ການຫັນປ່ຽນໂຄງປະກອບເສດຖະກິດ, ການປ່ຽນປະຊາກອນວິທະຍາ, ການຮັບມືກັບການປ່ຽນແປງຂອງດິນຟ້າອາກາດ, ການພັດທະນາເຕັກໂນໂລຊີ, ປັນຍາປະດິດແລະຂະບວນການຫັນປ່ຽນສີຂຽວ ຕະຫຼອດເຖິງການເຄື່ອນໄຫວຂອງພື້ນຖານເສດຖະກິດ ອາຊຽນ ເວົ້າລວມ, ທ້ອງຕະຫຼາດການເງິນ ແລະ ການປະຕິບັດງານບໍລິຫານນະໂຍບາຍເງິນຕາຂອງທະນາຄານສູນກາງ ເວົ້າສະເພາະ.
ດ້ວຍມູມມອງຮອບດ້ານກ່ຽວກັບເສດຖະກິດ ກໍຄືປະສົບການຢ່າງເລິກເຊິ່ງໃນການປະຕິບັດການຄຸ້ມຄອງເງິນຕາ - ທະນາຄານ, ບັນດາຜູ້ວ່າການ ໄດ້ແບ່ງປັນກ່ຽວກັບບົດບາດຂອງທະນາຄານສູນກາງ ໃນການໝູນໃຊ້ກາລະໂອກາດຂອງທ່າອ່ຽງການປ່ຽນແປງຂອງທົ່ວໂລກ, ກໍຄືການຮັບມືກັບບັນດາສິ່ງທ້າທາຍກ່ຽວກັບປະຊາກອນຜູ້ອາຍຸສູງ ແລະ ການປ່ຽນແປງຂອງດິນຟ້າອາກາດ ເພື່ອປະກອບສ່ວນຊຸກຍູ້ຄວາມວັດທະນາຖາວອນຂອງປະເທດຊາດ ແລະ ພາກພື້ນ.
ກ່າວຄຳປາໄສທີ່ການສຳມະນາ, ທ່ານຜູ້ວ່າການທະນາຄານແຫ່ງລັດ ຫວຽດນາມ ນາງ ຫງວຽນທິຮົ່ງ ໄດ້ແບ່ງປັນບັນດາໝາກຜົນຢ່າງຕັ້ງໜ້າຂອງຮູບແບບຫັນປ່ຽນໂຄງປະກອບເສດຖະກິດຢູ່ ຫວຽດນາມ ໃນຊຸມປີມໍ່ໆມານີ້ ຈາກກະສິກຳໄປເຖິງອຸດສາຫະກຳ ແລະ ການບໍລິການ. ໃນຂະບວນນີ້, ວຽກງານບໍລິຫານນະໂຍບາຍເງິນ, ສິນເຊື່ອຂອງທະນາຄານແຫ່ງລັດ ກໍໄດ້ປະກອບສ່ວນຢ່າງຕັ້ງໜ້າເຂົ້າໃນເສດຖະກິດມະຫາພາກຢ່າງສະຖຽນລະພາບ, ສ້າງພື້ນຖານແບບໝັ້ນແກ່ນ ເພື່ອພັດທະນາແບບຍືນຍົງ ແລະ ຊຸກຍູ້ການຫັນເປັນອຸດສາຫະກຳ. ຄຽງຂ້າງນັ້ນ, ຂະແໜງການທະນາຄານຂອງ ຫວຽດນາມ ກໍ່ພວມຊຸກຍູ້ການຫັນເປັນດີຈີຕອນແຫ່ງຊາດ; ເປັນເຈົ້າການໃນການຜັນຂະຫຍາຍບັນດາກະທຳທີ່ແທດຈິງ ເພື່ອຮັບມືກັບການປ່ຽນແປງຂອງດິນຟ້າອາກາດ ແລະ ໄດ້ຮັບການຈັດອັນດັບສູງເມື່ອທຽບໃສ່ບັນດາປະເທດ ອາຊີ ໃນການຜັນຂະຫຍາຍບາງເນື້ອໃນທີ່ສຳຄັນຂອງສັນຍາ ປາຣີ.
ທີ່ການສຳມະນາ, ບັນດາຜູ້ແທນຍັງໄດ້ຮັບຟັງທັດສະນະຂອງຜູ້ວ່າການທະນາຄານສູນກາງ ມາເລເຊຍ ກ່ຽວກັບຂະບວນການປັບປຸງໃນລະບົບເສດຖະກິດ ແລະ ການເງິນ ເພື່ອບັນລຸໄດ້ເປົ້າໝາຍແບບຍືນຍົງຂອງດິນຟ້າອາກາດ, ປະສົບການຂອງທ່ານຜູ້ວ່າການທະນາຄານສູນກາງ ໄທ ເສດຖາພຸດ ກ່ຽວກັບຄວາມຈຳເປັນຂອງການປະສົມປະສານທ່າອ່ຽງການຫັນປ່ຽນໂຄງປະກອບປະຊາກອນເຂົ້າສູ່ການວາງແຜນນະໂຍບາຍການເງິນ - ເງິນຕາ, ມູມມອງຂອງທ່ານຜູ້ວ່າການທະນາຄານແຫ່ງ ສປປ ລາວ ບຸນເຫຼືອ ກ່ຽວກັບເນື້ອໃນຄວາມໝາຍນະໂຍບາຍຕໍ່ທະນາຄານແຫ່ງລັດ ເພື່ອໝູນໃຊ້ໂອກາດພັດທະນາໃນສະພາບການໃໝ່ຢ່່າງສູງສຸດ.
ກ່ຽວກັບບັນດາບັນຫາທີ່ກ່າວມານັ້ນ, ບັນດານັກປາຖະກະຖາຢືນຢັນວ່າ ຄວາມພ້ອມຈິດພ້ອມໃຈກັນ, ຄວາມສາມັກຄີຂອງບັນດາປະເທດ ອາຊຽນ ໃນການຮ່ວມມື ເພື່ອຮັບມືກັບບັນດາສິ່ງທ້າທາຍທີ່ເກີດຈາກທ່າອ່ຽງການເຄື່ອນໄຫວພັດທະນາຂອງໂລກ. ການສຳມະນາເຊື່ອໝັ້ນວ່າ ດ້ວຍການຮ່ວມມືຢ່າງແໜ້ນແຟ້ນ, ບັນດາທະນາຄານສູນກາງ ອາຊຽນ ຈະຮ່ວມກັນໝູນໃຊ້ກາລະໂອກາດ ແລະ ຜ່ານຜ່າບັນດາສິ່ງທ້າທາຍ ເພື່ອໃຫ້ຂະແໜງການທະນາຄານຂອງພາກພື້ນທີ່ມີການປະກອບສ່ວນຢ່າງຕັ້ງໜ້າເຂົ້າໃນຂະບວນການພັດທະນາເສດຖະກິດຂອງປະເທດຊາດ ກໍຄືທົ່ວພາກພື້ນ ອາຊຽນ.
ການສຳມະນາ ກໍໄດ້ຕີລາຄາສູງບັນດາຜົນງານດ້ານເສດຖະກິດມະຫາພາກຂອງ ຫວຽດນາມ ໃນຊຸມປີມໍ່ໆມານີ້, ປະກອບສ່ວນເຮັດໃຫ້ ອາຊຽນ ກາຍເປັນຈຸດພົ້ນເດັ່ນຂອງການເຕີບໂຕໃນພາກພື້ນ ແລະ ໃນໂລກ.
ມິງດຶກ
