 |
ພິທີຖະແຫຼງຂ່າວການແຂ່ງຂັນກີລາລົດໃຫຍ່ ອ໊ອບໂຣດນາໆຊາດ ຊີງຂັນທ່ານລັດຖະມົນຕີກະຊວງສຶກສາທິການ ແລະ ກີລາ (ສສກ) ຄັ້ງທີ l.
ທ່ານ ສົມພອນ ສະຫວັດວິພານ ປະທານສະຫະພັນກີລາລົດໃຫຍ່ ແລະ ລົດຈັກແຫ່ງຊາດລາວ ກ່າວວ່າ: ຈຸດປະສົງເພື່ອເປີດໂອກາດໃຫ້ຜູ້ທີ່ຮັກມັກກີລາແຂ່ງລົດ ໄດ້ມີເວທີເຄື່ອນໄຫວ ແລະ ແລກປ່ຽນປະສົບການກັບນັກຂັບຈາກປະເພດເພື່ອນບ້ານ ງານດັ່ງກ່າວຈະຈັດຂຶ້ນວັນທີ 5-11 ສິງຫາ 2019 ຢູ່ເຂດເສດຖະກິດສະເພາະບຶງທາດຫຼວງ ນະຄອນຫຼວງວຽງຈັນ ພາຍໃນງານຍັງຈະມີກິດຈະກຳຕ່າງໆທີ່ໜ້າສົນໃຈ ເປັນຕົ້ນການວາງສະແດງລົດ ທົດລອງຂັບລົດຕົວຈິງໃນສະໜາມ ງານສະແດງສິລະປະ ຕະຫຼາດນັດ ແລະ ອື່ນໆ ສະນັ້ນຂໍເຊີນຊວນປະຊາຊົນລາວ ກໍຄືຊາວນະຄອນຫຼວງວຽງຈັນ ມາຕິດຕາມຊົມ ແລະ ເຊຍ ເພື່ອເຮັດໃຫ້ນະຄອນຫຼວງວຽງຈັນ ສາມາດດຶງດູດນັກທ່ອງທ່ຽວໃຫ້ນັບມື້ຫຼາຍຂຶ້ນ.
ມື້ແຂ່ງຂັນເປັນທາງການແມ່ນວັນທີ 9-11 ສິງຫາ ໂດຍມີນັກກີລາແຈ້ງເຈດຈຳນົງເຂົ້າຮ່ວມແລ້ວມີ ລາວ ຫວຽດນາມ ໄທ ມາເລເຊຍ ກຳປູເຈຍ ມຽນມາ ແລະ ຈີນ ມີນັກກີລາ 50 ຄົນ ລົດແຂ່ງຂັນ 100 ກວ່າຄັນ ແຂ່ງຂັນ 6 ລາຍການ ຄື: ຮຸ່ນ VIP ຮຸ່ນປີກນົກ ຮຸ່ນຄານແຂງ ຮຸ່ນທ່ຽວປ່າທົ່ວໄປ ຮຸ່ນທ່ຽວປ່າ ໂອເພັນ ແລະ ຮຸ່ນຊຸບເປີ ໂອເພັນ ຊີງເງິນລາງວັນລວມ 120 ລ້ານກວ່າກີບ ຮູບແບບການແຂ່ງຂັນແມ່ນຈົກສະຫຼາກປະກົບຄູ່ ຈະແຂ່ງຂັນເທື່ອລະ 1 ຄັນ ແລະ 2 ຄັນຄູ່ກັນ ກ່ອນຈະຈັດເວລາການແຂ່ງຂັນ ເພື່ອຄັດເອົາຜູ້ໃຊ້ເວລາດີທີ່ສຸດເຂົ້າຮອບຕໍ່ໄປ.
（ແຫຼ່ງຂໍ້ມູນ： vientianemai.net）
