| ຫວຽດນາມ - ຣູມານີ ຍັງມີຊ່ອງຫວ່າງຫຼາຍເພື່ອພັດທະນາການຮ່ວມມືລະຫວ່າງວິສາຫະກິດ | |
| ທ່ານນາຍົກລັດຖະມົນຕີ ຫວຽດນາມ ແລະ ຮົງກາຣີ ໄດ້ເຂົ້າຮ່ວມເວທີປາໄສວິສາຫະກິດ 2 ປະເທດ |
ວັນທີ 13 ມີນານີ້, ຢູ່ສຳນັກງານລັດຖະບານ, ທ່ານຮອງນາຍົກລັດຖະມົນຕີ ຫວຽດນາມ ເຈີ່ນຮົງຮ່າ ໄດ້ຕ້ອນຮັບທ່ານອຸປະທູດຊົ່ວຄາວສະຖານທູດ ແດນມາກ ປະຈຳ ຫວຽດນາມ ນາງ Mette Ekeroth ແລະ ທ່ານປະທານກຸ່ມບໍລິສັດ Vestas Anders Runevad.
ໂດຍເນັ້ນໜັກເຖິງການພົວພັນຮ່ວມມືຮອບດ້ານ, ການໜູນຊ່ວຍຂອງ ແດນມາກ ຕໍ່ ຫວຽດນາມ ໃນຊຸມປີມໍ່ໆມານີ້, ພິເສດແມ່ນໃນຂົງເຂດສິ່ງແວດລ້ອມ, ດິນຟ້າອາກາດ, ທ່ານຮອງນາຍົກລັດຖະມົນຕີ ຫວຽດນາມ ໃຫ້ຮູ້ວ່າ ຫວຽດນາມ ພວມຕັ້ງໜ້າຜັນຂະຫຍາຍຂໍ້ຕົກລົງວ່າດ້ວຍການຫັນປ່ຽນພະລັງງານຍຸດຕິທຳ (JETP) ບົນພື້ນຖານການຮ່ວມມືກັບບັນດາປະເທດ G7, ແດນມາກ ແລະ ບັນດາຄູ່ຮ່ວມມືສາກົນ.
ຈຸດສຸມຂອງການປະຕິບັດ ແມ່ນການຫັນພະລັງງານໄຟຟ້າຖ່ານຫີນເປັນພະລັງງານສະອາດ, ພັດທະນາລະບົບນິເວດອຸດສາຫະກຳ ແລະ ການບໍລິການກ່ຽວກັບພະລັງງານທົດແທນ, ຍົກລະດັບລະບົບສາຍສົ່ງ ແລະ ຈຳໜ່າຍໄຟຟ້າ, ຍູ້ໄວຂັ້ນຕອນການກໍ່ສ້າງຕາໜ່າງໄຟຟ້າອັດສະລິຍະ, ພັດທະນາລະບົບເກັບພະລັງງານ...
 |
| ທ່ານຮອງນາຍົກລັດຖະມົນຕີ ຫວຽດນາມ ເຈີ່ນຮົງຮ່າ ໄດ້ຕ້ອນຮັບທ່ານນາງ Mette Ekeroth ອຸປະທູດຊົ່ວຄາວສະຖານທູດ ແດນມາກ ປະຈຳ ຫວຽດນາມ ແລະ ທ່ານ Anders Runevad, ປະທານກຸ່ມບໍລິສັດ Vestas. (ທີ່ມາ: TTXVN) |
"ແດນມາກສາມາດແບ່ງປັນປະສົບການ, ໜຸ່ມຊ່ວຍເຕັກໂນໂລຢີ, ການເງິນ ເພື່ອຫວຽດນາມ ປະຕິບັດບັນດາຂໍ້ລິເລີ່ມຫຼຸດຜ່ອນອາຍພິດເຮືອນແກ້ວ, ການຫັນປ່ຽນສີຂຽວ, ການຫັນປ່ຽນພະລັງງານຍຸດຕິທຳ", ທ່ານຮອງນາຍົກລັດຖະມົນຕີກ່າວ.
ທ່ານຮອງນາຍົກລັດຖະມົນຕີ ໃຫ້ຮູ້ວ່າ ຫວຽດນາມ ພວມສຳເລັດແຜນການປະຕິບັດແຜນການໄຟຟ້າເລກ 8 ດ້ວຍໜ້າທີ່ວາງແຜນຜັງແຫຼ່ງກຳລັງໄຟຕາມຄວາມຕ້ອງການເຕີບໂຕຂອງພື້ນຖານເສດຖະກິດ; ໂຄງປະກອບທີ່ເຫມາະສົມ, ການດຸ່ນດ່ຽງ, ສະຖຽນລະພາບລະຫວ່າງປະເພດຂອງແຫຼ່ງໄຟຟ້າ (ໄຟຟ້າຖ່່ານຫີນ, ໄຟຟ້ານ້ຳຕົກ, ໄຟຟ້າແສງຕາເວັນ, ໄຟຟ້າແຮງລົມ), ຮັບປະກັນຄວາມປອດໄພຂອງລະບົບກໍຄືປະສິດທິຜົນການລົງທຶນ, ເສດຖະກິດໃຫ້ດີທີ່ສຸດ.
ຕາມທ່ານຮອງນາຍົກລັດຖະມົນຕີແລ້ວ, ບັນດາວິທີການແກ້ໄຂການເກັບຮັກສາພະລັງງານໄຟຟ້າ, ຜະລິດ ແລະ ນຳໃຊ້ hydro ສີຂຽວ, amoniac ສີຂຽວ ຫຼື ສົມທົບກັບການເກັບຮັກສາແຫຼ່ງພະລັງງານທົດແທນ ລ້ວນແຕ່ຕ້ອງການເຕັກໂນໂລຢີ. ສະນັ້ນ, ຫວຽດນາມ ປາດຖະໜາວ່າ ແດນມາກ ຈະໜູນຊ່ວຍກ່ຽວກັບເຄື່ອງມື, ນັກຊ່ຽວຊານ, ເຕັກໂນໂລຢີ, ວິທີແກ້ໄຂ ເພື່ອສຳເລັດແຜນການປະຕິບັດແຜນການໄຟຟ້າເລກ 8, ພັດທະນາພະລັງງານທົດແທນຢ່າງສູງສຸດ, ຫັນຈາກພະລັງງານຟອກຊິວເປັນພະລັງງານທົດແທນ.
ນອກຈາກນັ້ນ, ລັດຖະບານ ຫວຽດນາມ ກໍ່ພວມຄົ້ນຄວ້າ, ປະກາດໃຊ້ບັນດາກົນໄກ, ນະໂຍບາຍໃໝ່ກ່ຽວກັບໄຟຟ້າ ເພື່ອຊຸກຍູ້ພະລັງງານສະອາດ, ການຄ້າຂາຍໄຟຟ້າຕາມທ້ອງຕະຫຼາດ, ໃນນັ້ນ ກໍ່ມີການຄ້າຂາຍໄຟຟ້າໂດຍກົງ...
ທ່ານຮອງນາຍົກລັດຖະມົນຕີ ຫວັງວ່າໃນໄລຍະຈະມາເຖິງ, 2 ຝ່າຍຈະສືບຕໍ່ໃຫ້ບຸລິມະສິດການຮ່ວມມືໃນຂົງເຂດເສດຖະກິດສີຂຽວ, ສຳເລັດລະບົບກົດໝາຍວ່າດ້ວຍໄຟຟ້າ, ພະລັງງານ, ເສດຖະກິດໝູນວຽນ, ທ້ອງຕະຫຼາດ ກາກບອນ...; ເຊື່ອມຕໍ່ວິສາຫະກິດຂອງສອງປະເທດຮ່ວມມື, ຜັນຂະຫຍາຍໂຄງການພະລັງງານທົດແທນ.
ກ່ຽວກັບບາງຂໍ້ສະເໜີລະອຽດຂອງການນຳກຸ່ມບໍລິສັດ Vestas, ທ່ານຮອງນາຍົກລັດຖະມົນຕີ ເນັ້ນໜັກວ່າ ແຜນການປະຕິບັດແຜນການໄຟຟ້າເລກ 8 ບໍ່ຈຳກັດການພັດທະນາບັນດາແຫຼ່ງພະລັງງານໄຟຟ້າທົົດແທນ ເພື່ອຮັບໃຊ້ການສົ່ງອອກ, ຜະລິດ hydro, ການຄ້າໄຟຟ້າໂດຍກົງ. ຫວຽດນາມ ໄດ້ສະແດງຄວາມຊົມເຊີຍບັນດາວິສາຫະກິດທີ່ມີກຳລັງຄວາມສາມາດ, ເຕັກໂນໂລຢີ, ປະສົບການລົງທຶນເຂົ້າບັນດາໂຄງການສະເພາະ, ວາງພື້ນຖານພັດທະນາອຸດສາຫະກຳພະລັງງານທົດແທນ, ປະກອບສ່ວນພ້ອມກັບລັດຖະບານປັບປຸງ, ເຮັດສຳເລັດນະໂຍບາຍ, ສະພາບແວດລ້ອມແຫ່ງການລົງທຶນໃນຂົງເຂດພະລັງງານ.
ທ່ານອຸປະທູດຊົ່ວຄາວສະຖານທູດ ແດນມາກ ປະຈຳ ຫວຽດນາມ ນາງ Mette Ekeroth ຢືນຢັນວ່າ ການສ້າງຕັ້ງການພົວພັນຄູ່ຮ່ວມມືຍຸດທະສາດສີຂຽວລະຫວ່າງ ຫວຽດນາມ - ແດນມາກ ມີຄວາມໝາຍສຳຄັນທີ່ສຸດ ເພື່ອຍົກສູງການພົວພັນຮ່ວມມືລະຫວ່າງ 2 ປະເທດຂຶ້ນສູ່ລະດັບສູງໃໝ່ໃນການພັດທະນາແບບຍືນຍົງ, ການປ່ຽນແປງຂອງດິນຟ້າອາກາດ ແລະ ການຫັນປ່ຽນສີຂຽວ, ການຫັນປ່ຽນພະລັງງານ.
ແດນມາກ ກໍ່ມີຄວາມພາກພູມໃຈ ແມ່ນຄູ່ຮ່ວມມືສະໜອງບັນດາການໜຸ່ມຊ່ວຍກ່ຽວກັບຊ່ຽວຊານ, ເຕັກນິກ ເພື່ອຊ່ວຍ ຫວຽດນາມ ສ້າງບົດລາຍງານແງ່ຫວັງກ່ຽວກັບພະລັງງານ, ເພື່ອຜັນຂະຫຍາຍແຜນການໄຟຟ້າເລກ 8 ໂດຍໄວ, ດ້ວຍບັນດາຄຳໝັ້ນສັນຍາໃນຂົງເຂດ JETP.
ໂດຍຕີລາຄາສູງບຸລິມະສິດການພັດທະນາອຸດສາຫະກຳພະລັງງານທົດແທນໃນແຜນການໄຟຟ້າເລກ 8, ທ່ານປະທານກຸ່ມບໍລິສັດ Vestas Anders Runevad ໃຫ້ຮູ້ວ່າ ກຸ່ມບໍລິສັດ ໄດ້ສ້າງຕັ້ງວິສາຫະກິດຢູ່ ຫວຽດນາມ, ປະສົບຜົນສຳເລັດໃນການຕິດຕັ້ງກັງຫັນລົມ ປະມານ 1.400 MW.
Vestas ປາດຖະໜາຢາກສືບຕໍ່ປະກອບສ່ວນເຂົ້ສໃນຍຸດທະສາດນຳ ຫວຽດນາມ ກາຍເປັນສູນກາງອຸດສາຫະກຳພະລັງງານທົດແທນຂອງພາກພື້ນ ດ້ວຍການເຂົ້າຮ່ວມຂອງບັນດາບໍລິສັດຜະລິດອຸປະກອນ ແລະ ບັນດາຜູ້ພັດທະນາໂຄງການໄຟຟ້າແຮງລົມ.
ມິງດຶກ
