ອົງການປົກປັກຮັກສາສິ່ງແວດລ້ອມ ຊູແອັດ ປາດຖະໜາຢາກຮ່ວມມືກັບ ຫວຽດນາມ ເພື່ອພັດທະນາຕົວເມືອງແບບຍືນຍົງ
	ທ່ານເອກອັກຄະລັດຖະທູດ ບຸຍວັນຫງີ້ ໄດ້ມີການເຮັດວຽກກັບອະດີດສະມາຊິກສະພາສູງ, ຮອງລັດຖະມົນຕີຜູ້ປະຈຳການ ກະຊວງວິທະຍາສາດ, ເຕັກໂນໂລຊີ ແລະ ການປ່ຽນແປງໃໝ່ ບຣາຊິນ.

ວັນທີ 11 ມັງກອນ ປີ 2024 ເປັນຂີດໝາຍວັນສ້າງຕັ້ງການພົວພັນທາງການທູດລະຫວ່າງ ຫວຽດນາມ-ຊູແອັດ ຄົບຮອບ 55 ປີ. ຊູແອັດ ແມ່ນປະເທດຝ່າຍຕາເວັນຕົກທຳອິດທີ່ສ້າງຕັ້ງການພົວພັນທາງການທູດກັບຫວຽດນາມ ໃນວັນທີ 11 ມັງກອນ ປີ 1969, ໃນເວລາທີ່ຫວຽດນາມ ກຳລັງດໍາເນີນການຕໍ່ຕ້ານທີ່ຫຍຸ້ງຍາກລຳບາກ ເພື່ອຍາດເອົາເອກະລາດ ແລະທ້ອນໂຮມປະເທດຊາດໃຫ້ເປັນເອກະພາບ. ໃນຕະຫຼອດໄລຍະປະຫວັດສາດ 55 ປີ, ສອງປະເທດໄດ້ສ້າງຕັ້ງການພົວພັນມິດຕະພາບ, ຄວາມໄວ້ເນື້ອເຊື່ອໃຈໃນຫຼາຍຂົງເຂດ. ເນື່ອງໃນໂອກາດນີ້, ສໍານັກຂ່າວສານຫວຽດນາມ ໄດ້ສຳພາດທ່ານ ເຈິ່ນວັນຕ໊ວນ ເອກອັກຄະລັດຖະທູດຫວຽດນາມ ປະຈຳ ຊູແອັດ.

ທ່ານເອກອັກຄະລັດຖະທູດ ເຈິ່ນວັນຕ໊ວນ ແລະຄະນະພະນັກງານສະຖານທູດຫວຽດນາມ ປະຈໍາ ຊູແອັດ ພົບປະກັບຜູ້ຕາງໜ້າກະຊວງການຕ່າງປະເທດຊູແອັດ ກ່ອນພິທີຍື່ນສານຕາຕັ້ງ.ພາບ: ສະຖານທູດຫວຽດນາມ

ນັກຂ່າວ: ຮຽນທ່ານເອກອັກຄະລັດຖະທູດ ຕີລາຄາຄືແນວໃດກ່ຽວກັບໝາກຜົນແຫ່ງການຮ່ວມມືລະຫວ່າງ ຫວຽດນາມ ແລະ ຊູແອັດ ໃນ 55 ປີຜ່ານມາ?

ທ່ານເອກອັກຄະລັດຖະທູດ ເຈິ່ນວັນຕ໊ວນ: ຫວຽດນາມ ແລະ ຊູແອັດ ມີສາຍພົວພັນມິດຕະພາບທີ່ເປັນມູນເຊື້ອ, ມີການຮ່ວມມືທີ່ສະເໝີພາບ, ຕ່າງຝ່າຍຕ່າງມີຜົນປະໂຫຍດ ດ້ວຍປະຫວັດສາດທີ່ຍາວນານ 55 ປີ. ໃນໄລຍະເຄິ່ງສະຕະວັດທີ່ຜ່ານມາ, ສອງປະເທດໄດ້ຕັ້ງໜ້າກໍ່ສ້າງ, ເພີ່ມພູນຄູນສ້າງ, ພັດທະນາສາຍພົວພັນສອງຝ່າຍໃຫ້ນັບມື້ນັບຍືນຍົງ, ເຂົ້າສູ່ລວງເລິກ ແລະບັນລຸໄດ້ຜົນງານທີ່ເປັນໜ້າພາກພູມໃຈໃນຫຼາຍຂົງເຂດ.

ກ່ຽວກັບດ້ານການເມືອງ, ຄວາມໄວ້ເນື້ອເຊື່ອໃຈດ້ານການເມືອງ ແລະນໍ້າໃຈມິດຕະພາບແມ່ນຊັບສົມບັດອັນລໍ້າຄ່າຂອງສອງປະເທດ. ຊູແອັດ ແມ່ນປະເທດຝ່າຍຕາເວັນຕົກທຳອິດທີ່ສ້າງຕັ້ງການພົວພັນທາງການທູດກັບຫວຽດນາມ, ຊູແອັດ ໄດ້ສະຫງວນການສະໜັບສະໜູນ, ການໜູນຊ່ວຍອັນລ້ຳຄ່າທັງດ້ານຈິດໃຈ ແລະວັດຖຸໃຫ້ຫວຽດນາມ ໃນພາລະກິດຕໍ່ສູ້ຍາດເອົາເອກະລາດແຫ່ງຊາດ, ທ້ອນໂຮມປະເທດຊາດເປັນເອກະພາບໃນເມື່ອກ່ອນ, ກໍ່ຄືໃນກິດຈະການປ່ຽນແປງໃໝ່ສ້າງສາປະເທດຊາດ ແລະເຊື່ອມໂຍງເຂົ້າກັບສາກົນໃນທຸກມື້ນີ້.

ກ່ຽວກັບດ້ານເສດຖະກິດ - ສັງຄົມ, ແຕ່ປີ 1967 ຮອດປີ 2013, ຊູແອັດ ແມ່ນປະເທດເອີລົບເໜືອ ທີ່ໃຫ້ທຶນຊ່ວຍເຫຼືອລ້າຫຼາຍທີ່ສຸດແກ່ ຫວຽດນາມ. ຊູແອັດ ເປັນຄູ່ຮ່ວມມືດ້ານການຄ້າໃຫຍ່ທີ່ສຸດຂອງຫວຽດນາມ ຢູ່ເອີລົບເໜືອ ແລະ ກົງກັນຂ້າມ ຫວຽດນາມ ກໍ່ເປັນຄູ່ຮ່ວມມືນຳເຂົ້າໃຫຍ່ທີ່ສຸດຂອງ ຊູແອັດ ຢູ່ໃນອາຊີຕາເວັນອອກສ່ຽງໃຕ້.

ກ່ຽວກັບວັດທະນະທຳ-ການສຶກສາ-ວິທະຍາສາດ: ຊູແອັດ ໄດ້ໜູນຊ່ວຍ ຫວຽດນາມ ບຳລຸງສ້າງນັກຊ່ຽວຊານ, ວິສະວະກອນຫຼາຍຄົນໃນຂົງເຂດປ່າໄມ້, ເຈ້ຍ, ພະລັງງານ, ຊີວະວິທະຍາ, ການແພດ ແລະສື່ມວນຊົນ.

ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ພົບປະກັບທ່ານ Ulf Kristersson ນາຍົກລັດຖະມົນຕີຊູແອັດ ຢູ່ນອກກອງປະຊຸມ COP28. ພາບ: TTXVN

ເຖິງຢ່າງໃດກໍຕາມ, ສາຍພົວພັນຫວຽດນາມ - ຊູແອັດ ໃນບາງຂົງເຂດຍັງບໍ່ທັນສົມກັບຄວາມສາມາດບົ່ມຊ້ອນ ແລະສາຍພົວພັນມິດຕະພາບລະຫວ່າງ 2 ປະເທດ. ແຕ່ບົນພື້ນຖານມິດຕະພາບທີ່ເປັນມູນເຊື້ອ, ຄວາມໄວ້ເນື້ອເຊື່ອໃຈທີ່ມີມາແຕ່ດົນນານລະຫວ່າງສອງປະເທດ, ພ້ອມກັບການພັດທະນາກ້າວກະໂດດຂອງວິທະຍາສາດ-ເຕັກໂນໂລຢີ ຄືໃນປະຈຸບັນ, ຫວຽດນາມ ແລະ ຊູແອັດ ໄດ້ແກ້ໄຂຈຸດອ່ອນທີ່ກ່າວມາຂ້າງເທິງນັ້ນໂດຍໄວ ເພື່ອນຳການພົວພັນສອງຝ່າຍຂຶ້ນສູ່ລະດັບສູງໃໝ່, ປະກອບສ່ວນທີ່ແທດຈິງເຂົ້າໃນການພັດທະນາເສດຖະກິດ - ສັງຄົມ ແລະຮັບໃຊ້ຜົນປະໂຫຍດຂອງປະຊາຊົນສອງປະເທດ.

ນັກຂ່າວ: ທ່ານຕີລາຄາຄືແນວໃດກ່ຽວກັບຄວາມສາມາດບົ່ມຊ້ອນການຮ່ວມມືລະຫວ່າງສອງປະເທດໃນໄລຍະຈະມາເຖິງ, ທັງໃນການພົວພັນສອງຝ່າຍ ກໍ່ຄືການສົມທົບກັນໃນບັນຫາສາກົນ ຢູ່ເວທີປາໄສຫຼາຍຝ່າຍ, ຮຽນທ່ານ?

ທ່ານເອກອັກຄະລັດຖະທູດ ເຈິ່ນວັນຕ໊ວນ: ໃນການພົວພັນສອງຝ່າຍ, 2 ຝ່າຍມີຄວາມສາມາດບົ່ມຊ້ອນຫຼາຍຢູ່ໃນຫຼາຍຂົງເຂດ. ກ່ອນອື່ນໝົດ, ສອງປະເທດມີຄວາມສາມາດບົ່ມຊ້ອນຮ່ວມມືອັນໃຫຍ່ຫຼວງກ່ຽວກັບການຕ້ານການປ່ຽນແປງຂອງດິນຟ້າອາກາດ ແລະປົກປັກຮັກສາສິ່ງແວດລ້ອມ. ນີ້ແມ່ນຂົງເຂດທີ່ ຊູແອັດ ມີທ່າແຮງ ແລະເປັນປະເທດນຳໜ້າໃນໂລກ, ໃນຂະນະທີ່ ຫວຽດນາມ ແມ່ນໜຶ່ງໃນບັນດາປະເທດທີ່ຖືກຜົນສະທ້ອນຢ່າງໜັກໜ່ວງຈາກການປ່ຽນແປງຂອງດິນຟ້າອາກາດ. ມີຫຼາຍວິສາຫະກິດຂອງຊູແອັດ ຕີລາຄາສູງຕໍ່ຄຳໝັ້ນສັນຍາຂອງລັດຖະບານຫວຽດນາມ ໃນການຕ້ານການປ່ຽນແປງຂອງດິນຟ້າອາກາດ ແລະສະແດງຄວາມພ້ອມທີ່ຈະຮ່ວມມື ແລະໜູນຊ່ວຍ ຫວຽດນາມ ໃຫ້ບັນລຸເປົ້າໝາຍພັດທະນາແບບຍືນຍົງ.

ທີສອງ, ສອງປະເທດມີຄວາມສາມາດບົ່ມຊ້ອນຮ່ວມມືທີ່ດີໃນຂົງເຂດວິທະຍາສາດ ແລະເຕັກໂນໂລຢີ, ເປັນຕົ້ນແມ່ນໃນບັນດາຂົງເຂດທີ່ ຊູແອັດ ມີປະສົບການຫຼາຍຢ່າງ, ຄື: ເຕັກໂນໂລຢີເກັບຮັກສາອາຍກາກບອນ ແລະບຳບັດສິ່ງເສດເຫຼືອ; ການຫັນປ່ຽນດີຈີຕອນ, ການຫັນປ່ຽນພະລັງງານ, ການຄຸ້ມຄອງການເງິນ; ການຕິດຕາມ ແລະເບິ່ງແຍງດູແລສຸຂະພາບຊຸມຊົນ...

ທີສາມ, ສອງປະເທດຍັງມີຄວາມສາມາດບົ່ມຊ້ອນຮ່ວມມືດ້ານແຮງງານ, ການຄ້າ ແລະ ການລົງທຶນຢ່າງມີປະສິດທິຜົນ. ດ້ວຍພົນລະເມືອງປະມານ 100 ລ້ານຄົນ, ມີລະບອບການເມືອງທີ່ໝັ້ນຄົງ ແລະ ການເຕີບໂຕດ້ານເສດຖະກິດທີ່ໜ້າປະທັບໃຈ, ຫວຽດນາມ ແມ່ນຕະຫຼາດທີ່ດຶງດູດດ້ວຍຄວາມສາມາດບົ່ມຊ້ອນອັນໃຫຍ່ຫຼວງຕໍ່ກັບວິສາຫະກິດ ຊູແອັດ.

ກ່ຽວກັບການສົມທົບກັນຢູ່ເວທີປາໄສຫຼາຍຝ່າຍ, ທີ່ການພົບປະກັບທ່ານນາຍົກລັດຖະມົນຕີຫວຽດນາມ ຟ້າມມິງຈິ໊ງ ຢູ່ນອກກອງປະຊຸມ COP 28 ຢູ່ UAE ຫວ່າງມໍ່ໆມານີ້, ທ່ານນາຍົກລັດຖະມົນຕີຊູແອັດ Ulf Kristersson ໄດ້ຕີລາຄາສູງ ຕໍ່ຫຼັກໝັ້ນຂອງຫວຽດນາມ ໃນການແກ້ໄຂຄວາມຂັດແຍ້ງກັນ ແລະການປະທະກັນໂດຍສັນຕິວິທີ, ໂດຍເຊື່ອໝັ້ນວ່າ ຫວຽດນາມ ຈະສືບຕໍ່ມີການປະກອບສ່ວນຢ່າງຕັ້ງໜ້າເຂົ້າໃນການຊຸກຍູ້ ແລະເສີມຂະຫຍາຍບົດບາດໃຈກາງຂອງອາຊຽນ ກໍຄື ເຂົ້າຮ່ວມການແກ້ໄຂບັນຫາລວມຂອງປະຊາຄົມສາກົນ.

ນັກຂ່າວ: ຂໍຮຽນທ່ານເອກອັກຄະລັດຖະທູດ, ໃນປີນີ້, ສອງປະເທດໄດ້ສົມທົບກັນຄືແນວໃດເພື່ອສະເຫຼີມສະຫຼອງ 55 ປີແຫ່ງວັນສ້າງຕັ້ງສາຍພົວພັນທາງການທູດ?

ທ່ານເອກອັກຄະລັດຖະທູດ ເຈິ່ນວັນຕວ໊ນ: ແຕ່ກາງປີ 2023, ສະຖານທູດຫວຽດນາມ ປະຈຳ ຊູແອັດ ໄດ້ຂຶ້ນແຜນການຈັດຕັ້ງການເຄື່ອນໄຫວຕ່າງໆເນື່ອງໃນໂອກາດສະເຫຼີມສະຫຼອງ 55 ປີແຫ່ງວັນສ້າງຕັ້ງສາຍພົວພັນທາງການທູດລະຫວ່າງສອງປະເທດດ້ວຍຫຼາຍຮູບການ ແລະຂອບຂະໜາດທີ່ເໝາະສົມ.

ຢູ່ ຊູແອັດ, ພວກຂ້າພະເຈົ້າ ຄາດວ່າ ຈະຈັດຕັ້ງບາງການເຄື່ອນໄຫວໂຄສະນາວັດທະນະທຳ-ການຄ້າ-ການທ່ອງທ່ຽວຂອງຫວຽດນາມ; ຊຸກຍູ້ການລົງນາມໃນບົດບັນທຶກຊ່ວຍຈຳການຮ່ວມມືລະຫວ່າງອົງການທີ່ກ່ຽວຂ້ອງຂອງ 2 ປະເທດ... ສະຖານທູດຊູແອັດ ປະຈຳຫວຽດນາມ ກໍ່ຈະມີຫຼາຍການເຄື່ອນໄຫວເພື່ອສະເຫຼີມສະຫຼອງ 55 ປີແຫ່ງວັນສ້າງຕັ້ງການພົວພັນທາງການທູດລະຫວ່າງ 2 ປະເທດໃນປີນີ້.

ນັກຂ່າວ: ໃນໄລຍະໃກ້ໆນີ້, ທ່ານເອກອັກຄະລັດຖະທູດ ມີແຜນການອັນໃດແດ່ເພື່ອຊຸກຍູ້ການພົວພັນສອງຝ່າຍໃຫ້ນັບມື້ນັບພັດທະນາ? ຈຸດສຸມຂອງການຮ່ວມມື ຫວຽດນາມ - ຊູແອັດ ໃນຊຸມປີຕໍ່ໄປແມ່ນຫຍັງ, ຮຽນທ່ານ?

ທ່ານເອກອັກຄະລັດຖະທູດ ເຈິ່ນວັນຕວ໊ນ: ໃນໄລຍະຈະມາເຖິງ, ສະຖານທູດຫວຽດນາມ ປະຈຳຊູແອັດ ຈະສຸມໃສ່ຊຸກຍູ້ການພົວພັນຮ່ວມມືລະຫວ່າງ 2 ປະເທດໃນຂົງເຂດການເມືອງ - ການຕ່າງປະເທດ, ການຄ້າ - ການລົງທຶນ ແລະ ວິທະຍາສາດ - ເຕັກໂນໂລຢີ.

ເພື່ອອຳນວຍຄວາມສະດວກໃຫ້ການຮ່ວມມື ແລະການຄ້າລະຫວ່າງສອງປະເທດ, ພວກຂ້າພະເຈົ້າ ພວມຕັ້ງໜ້າຊຸກຍູ້ການສ້າງສາຍການບິນໂດຍກົງ ແລະເສັ້ນທາງຄົມມະນາຄົມທາງທະເລທີ່ເຊື່ອມຕໍ່ສອງປະເທດ. ພວກຂ້າພະເຈົ້າ ຈະເພີ່ມທະວີວຽກງານການທູດວັດທະນະທຳ, ການທູດປະຊາຊົນ, ເພີ່ມທະວີການຮ່ວມມືດ້ານການສຶກສາ-ບຳລຸງສ້າງລະຫວ່າງສອງປະເທດ, ໃນນັ້ນມີການຊຸກຍູ້ອົງການທີ່ກ່ຽວຂ້ອງຂອງສອງປະເທດ ສະໜອງທຶນການສຶກສາ, ແລກປ່ຽນນັກສຶກສາ ແລະຄູອາຈານລະຫວ່າງສອງປະເທດໃຫ້ຫຼາຍຕື່ມອີກ.

ສະຖານທູດຫວຽດນາມ ປະຈຳ ຊູແອັດ ຈະສົມທົບກັນຢ່າງຕັ້ງໜ້າກັບບັນດາອົງການທີ່ກ່ຽວຂ້ອງຂອງສອງປະເທດພະຍາຍາມຄົ້ນຄວ້າ ແລະເປັນເສນາທິການ ເພື່ອແນໃສ່ຍົກລະດັບການພົວພັນຮ່ວມມືລະຫວ່າງສອງປະເທດໃຫ້ຂຶ້ນສູ່ລະດັບສູງໃໝ່, ຕອບສະໜອງຄວາມຕ້ອງການ ແລະຜົນປະໂຫຍດທີ່ແທດຈິງຂອງປະຊາຊົນສອງປະເທດ, ໃຫ້ສົມກັບປະຫວັດສາດແຫ່ງການພົວພັນມິດຕະພາບທີ່ເປັນມູນເຊື້ອອັນດີງາມລະຫວ່າງຫວຽດນາມ ແລະ ຊູແອັດ ໃນຕະຫຼອດໄລຍະ 55 ປີຜ່ານມາ.

ນັກຂ່າວ: ຂໍຂອບໃຈທ່ານເອກອັກຄະລັດຖະທູດ!