ສະຫງວນບູລິມະສິດສູງສຸດໃຫ້ແກ່ການພົວພັນແບບພິເສດ ຫວຽດນາມ-ລາວ ຢ່າງສະເໝີຕົ້ນສະເໝີປາຍ

	ປ່າສະຫງວນແຫ່ງຊາດ ເຟືອກບິ່ງ - ແຫຼ່ງທ່ອງທ່ຽວທາງນິເວດ ທີ່ເໝາະສົມໃນລະດູຮ້ອນນີ້
	ຮອງປະທານສະພາແຫ່ງຊາດ ຫງວຽນດຶກຫາຍ ຢ້ຽມຢາມຫ້ອງຮຽນພາສາ ຫວຽດ ສະຫງວນໃຫ້ພະນັກງານ, ພາລະກອນຫ້ອງວ່າການສະພາແຫ່ງຊາດລາວ

ໂດຍຮັບຄຳເຊີນຂອງທ່ານນາຍົກລັດຖະມົນຕີຫວຽດນາມ ຟ້າມມິງຈິ໊ງ, ທ່ານນາຍົກລັດຖະມົນຕີລາວ ສອນໄຊ ສີພັນດອນ ພ້ອມດ້ວຍພັນລະຍາ ມີການຢ້ຽມຢາມຫວຽດນາມ ຢ່າງເປັນທາງການ, ສົມທົບການເປັນປະທານຮ່ວມກອງປະຊຸມ ຄັ້ງທີ 46 ຄະນະກຳມະການລະຫວ່າງລັດຖະບານຫວຽດນາມ-ລາວ ໃນລະຫວ່າງວັນທີ 6-7 ມັງກອນ 2024. ນີ້ແມ່ນການຢ້ຽມຢາມຫວຽດນາມ ຄັ້ງທຳອິດຂອງທ່ານນາຍົກລັດຖະມົນຕີ ສອນໄຊ ສີພັນດອນ ນັບແຕ່ດຳລົງຕຳແໜ່ງເປັນນາຍົກລັດຖະມົນຕີ.

ທ່ານນາຍົກລັດຖະມົນຕີຫວຽດນາມ ຟ້າມມິງຈິ໊ງ ແລະທ່ານນາຍົກລັດຖະມົນຕີລາວ ສອນໄຊ ສີພັນດອນ ໃນການຢ້ຽມຢາມ ສປປ ລາວ ຢ່າງເປັນທາງການ (ເດືອນມັງກອນ 2023). ພາບ: ສຳນັກຂ່າວສານຫວຽດນາມ

ການຢ້ຽມຢາມຫວຽດນາມ ຢ່າງເປັນທາງການຂອງທ່ານນາຍົກລັດຖະມົນຕີ ສອນໄຊ ສີພັນດອນ ພ້ອມດ້ວຍພັນລະຍາໄດ້ດຳເນີນໄປໃນສະພາບທີ່ການພົວພັນສອງປະເທດສືບຕໍ່ສະໜິດຕິດພັນ ແລະພັດທະນາຢ່າງດີງາມ. ການພົວພັນດ້ານການເມືອງໄດ້ຮັບການປັບປຸງ, ຄວາມໄວ້ເນື້ອເຊື່ອໃຈນັບມື້ນັບໄດ້ຮັບການເພີ່ມຂຶ້ນ, ຮັກສາບົດບາດຫຼັກແຫຼ່ງແກ່ນສານ, ກຳນົດທິດສັງລວມການພົວພັນສອງປະເທດ.

ການເລືອກເອົາລາວ ແມ່ນປະເທດທຳອິດເພື່ອດຳເນີນການຢ້ຽມຢາມ (ເດືອນເມສາ 2023) ເຊິ່ງແມ່ນເວລາສັ້ນໆພາຍຫຼັງທີ່ສະພາແຫ່ງຊາດໄດ້ເລືອກຕັ້ງປະທານປະເທດ, ການຢ້ຽມຢາມຂອງທ່ານ ຫວໍວັນເຖືອງ ໄດ້ສືບຕໍ່ເປັນພະຍານຫຼັກຖານທີ່ພິສູດໃຫ້ເຫັນຄຳຢັ້ງຢືນຂອງພັກ ແລະລັດຫວຽດນາມ, ຄວາມສະເໝີຕົ້ນສະເໝີປາຍ, ການຖືເປັນສຳຄັນ ແລະສະຫງວນບູລິມະສິດສູງສຸດໃຫ້ແກ່ການປັບປຸງ ແລະການເພີ່ມພູນຄູນສ້າງການພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານລະຫວ່າງສອງປະເທດ.

ສອງຝ່າຍພວມສົມທົບກັນປະຕິບັດຂໍ້ຕົກລົງລະຫວ່າງສອງກົມການເມືອງ ແລະກອງປະຊຸມ ຄັ້ງທີ 45 ຄະນະກຳມະການລະຫວ່າງລັດຖະບານຫວຽດນາມ-ລາວ (ເດືອນ ມັງກອນ 2023); ຕັ້ງໜ້າຜັນຂະຫຍາຍສັນຍາວ່າດ້ວຍການຮ່ວມມືສອງຝ່າຍ ຫວຽດນາມ-ລາວ ໄລຍະ 2021-2025 ແລະຍຸດທະສາດການຮ່ວມມື ຫວຽດນາມ-ລາວ ໄລຍະ 2021-2030.

ການຢ້ຽມຢາມ, ການພົບປະຕ່າງໆຂອງການນຳຂັ້ນສູງ ແລະຂັ້ນຕ່າງໆ ໄດ້ສືບຕໍ່ດຳເນີນຢ່າງເປັນປະຈຳ: ທ່ານເລຂາທິການໃຫຍ່ ຫງວຽນຝູຈ້ອງ ໄດ້ເຂົ້າຮ່ວມການພົບປະລະຫວ່າງຜູ້ນຳສາມພັກ ຫວຽດນາມ-ກຳປູເຈຍ-ລາວ (ເດືອນກັນຍາ 2023); ທ່ານປະທານປະເທດ ຫວໍວັນເຖືອງ ໄດ້ພົບປະທ່ານເລຂາທິການໃຫຍ່, ປະທານປະເທດລາວ ທອງລຸນ ສີສຸລິດ ໃນຂອບເຂດກອງປະຊຸມສຸດຍອດແລວທາງ, ເສັ້ນທາງ ຄັ້ງທີ 3 ຢູ່ປັກກິ່ງ (ເດືອນຕຸລາ 2023); ທ່ານນາຍົກລັດຖະມົນຕີ ຟ້າມມິງຈິ໊ງ ໄດ້ໄປຢ້ຽມຢາມລາວ ຢ່າງເປັນທາງການ (ເດືອນມັງກອນ 2023), ພົບປະທ່ານນາຍົກລັດຖະມົນຕີລາວ ທີ່ກອງປະຊຸມຂັ້ນສູງຄະນະກຳມະການແມ່ນ້ຳຂອງສາກົນ ຄັ້ງທີ 4 (ເດືອນເມສາ 2023), ກອງປະຊຸມສຸດຍອດ ອາຊຽນ-ສະພາຮ່ວມມືເຂດອ່າວ GCC (ເດືອນຕຸລາ 2023); ທ່ານນາຍົກລັດຖະມົນຕີ ໄດ້ຮັບປະທານອາຫານເຊົ້າ ແລະເຮັດວຽກກັບທ່ານນາຍົກລັດຖະມົນຕີລາວ ແລະທ່ານນາຍົກລັດຖະມົນຕີກຳປູເຈຍ ທີ່ກອງປະຊຸມຂັ້ນສູງອາຊຽນ ຄັ້ງທີ 43 (ເດືອນກັນຍາ 2023) ແລະກອງປະຊຸມຂັ້ນສູງ ສະເຫຼີມສະຫຼອງ 50 ປີແຫ່ງວັນສ້າງຕັ້ງການພົວພັນອາຊຽນ-ຍີ່ປຸ່ນ (ເດືອນ ຕຸລາ 2023); ທ່ານປະທານສະພາແຫ່ງຊາດ ເວືອງດິ່ງເຫວະ ໄດ້ເຂົ້າຮ່ວມກອງປະຊຸມຂັ້ນສູງສະພາແຫ່ງຊາດ 3 ປະເທດ ກຳປູເຈຍ-ລາວ-ຫວຽດນາມ ຄັ້ງທີ 1 (ເດືອນທັນວາ 2023).

ໃນການພົບປະຂັ້ນສູງຄັ້ງຕ່າງໆ, ຝ່າຍລາວ ໄດ້ສະແດງຄວາມຂອບອົກຂອບໃຈມາຍັງພັກ, ລັດ ແລະປະຊາຊົນຫວຽດນາມ ທີ່ໄດ້ສະໜັບສະໜູນ, ຄຽງບ່າຄຽງໄຫຼ່ພ້ອມກັບພັກ, ລັດ ແລະປະຊາຊົນລາວບັນດາເຜົ່າ, ເປັນການສະແດງນ້ຳໃຈຄວາມຮັກແພງເປັນພິເສດ ແລະການຊ່ວຍເຫຼືອອັນລ້ຳຄ່າຂອງພັກ, ລັດ ແລະປະຊາຊົນຫວຽດນາມ ທີ່ສະຫງວນໃຫ້ແກ່ລາວ.

ສ່ວນຝ່າຍຫວຽດນາມ, ບັນດາການນຳຫວຽດນາມ ໄດ້ເນັ້ນໜັກວ່າ ບົນເນື້ອໃນຈິດໃຈເປັນເພື່ອນມິດສະຫາຍອ້າຍນ້ອງ, ຫວຽດນາມ ຈະສະໜັບສະໜູນລາວດຳລົງຕຳແໜ່ງລະດັບສາກົນໃນໄລຍະຈະມາເຖິງໃຫ້ປະສົບຜົນສຳເລັດ, ໃນນັ້ນມີຕຳແໜ່ງປະທານອາຊຽນ 2024. ຫວຽດນາມ ກໍ່ສືບຕໍ່ໜູນຊ່ວຍລາວ ສ້າງພື້ນຖານເສດຖະກິດເອກະລາດ, ເປັນເຈົ້າຕົນເອງ, ສ້າງຖັນແຖວພະນັກງານໃຫ້ມີຄຸນນະພາບສູງ.

ການຮ່ວມມືດ້ານປ້ອງກັນຊາດ, ປ້ອງກັນຄວາມສະຫງົບ ແລະການພົວພັນຕ່າງປະເທດ ສືບຕໍ່ໄດ້ຮັບການຮັກສາ ແລະພັດທະນາດ້ວຍບົດບາດແມ່ນເສົາຄ້ຳສຳຄັນໃນການພົວພັນສອງປະເທດ. ສອງຝ່າຍໄດ້ສົມທົບກັນຢ່າງແໜ້ນແຟ້ນ, ໜູນຊ່ວຍກັນປະຕິບັດອະນຸສັນຍາກ່ຽວກັບການຮ່ວມມືໄລຍະ 2020-2024 ແລະແຜນການຮ່ວມມືປີ 2023 ກ່ຽວກັບການປ້ອງກັນຊາດ ແລະປ້ອງກັນຄວາມສະຫງົບ.

ການຮ່ວມມືດ້ານເສດຖະກິດ, ການຄ້າ, ການລົງທຶນ ສືບຕໍ່ມີການຫັນປ່ຽນຕັ້ງໜ້າ. ປະຈຸບັນ, ຫວຽດນາມ ມີ 241 ໂຄງການທີ່ລົງທຶນຢູ່ລາວ ດ້ວຍເງິນລົງທຶນຈົດທະບຽນທັງໝົດບັນລຸ 5,47 ຕື້ໂດລາສະຫະລັດ, ສືບຕໍ່ຮັກສາອັນດັບທີ 3 ໃນຈຳນວນບັນດາປະເທດ/ເຂດແຄ້ວນທີ່ລົງທຶນຢູ່ລາວ. ໄລ່ຮອດເດືອນສິງຫາ 2023, ມີ 7 ໂຄງການໄດ້ລົງທະບຽນໃໝ່ ແລະ 2 ໂຄງການໄດ້ປັບປຸງດ້ວຍເງິນທຶນຈົດທະບຽນທັງໝົດກວ່າ 114 ລ້ານໂດລາສະຫະລັດ (ເພີ່ມຂຶ້ນ 71,7% ເມື່ອທຽບໃສ່ກັບໄລຍະດຽວກັນຂອງປີ 2022).

ໄລ່ຮອດເດືອນຕຸລາ 2023, ວົງເງິນການຄ້າສອງສົ້ນບັນລຸກວ່າ 1,3 ຕື້ໂດລາສະຫະລັດ, ໃນນັ້ນມີຫວຽດນາມ ສົ່ງອອກໄປຍັງລາວບັນລຸ 441,9 ລ້ານໂດລາສະຫະລັດ ແລະນຳເຂົ້າຈາກລາວແມ່ນ 888,4 ລ້ານໂດລາສະຫະລັດ.

ການຮ່ວມມືໃນຂົງເຂດສຳຄັນຕ່າງໆ, ຄື: ວັດທະນະທຳ, ການສຶກສາ, ວິທະຍາສາດ, ເຕັກນິກ, ການຮ່ວມມືລະຫວ່າງບັນດາທ້ອງຖິ່ນ... ສືບຕໍ່ມີການຫັນປ່ຽນ ແລະໄດ້ເພີ່ມທະວີ, ນັບມື້ນັບແທດຈິງ, ເຂົ້າສູ່ລວງເລິກ ແລະຮອບດ້ານ.

ໃນປີ 2023, ສອງຝ່າຍໄດ້ຈັດຕັ້ງການລົງມືກໍ່ສ້າງ ແລະເປີດນຳໃຊ້, ຈັດພິທີມອບ-ຮັບບາງໂຄງການທີ່ນຳໃຊ້ທຶນຊ່ວຍເຫຼືອລ້າຂອງລັດຖະບານຫວຽດນາມ ທີ່ສະຫງວນໃຫ້ແກ່ ລາວ, ຄື: ເປີດນຳໃຊ້ໂຮງໝໍມິດຕະພາບ ລາວ-ຫວຽດນາມ ຢູ່ແຂວງຊຽງຂວາງ; ເປີດນຳໃຊ້ໂຮງຮຽນວັດທະນະທຳຊົນເຜົ່າກອງທັບປະຊາຊົນລາວ ແລະຫຼາຍໂຄງການທີ່ຄາດວ່າຈະສຳເລັດໃນປີນີ້.

ກ່ຽວກັບບັນຫາພາກພື້ນ ແລະສາກົນທີ່ຕ່າງຝ່າຍຕ່າງມີຄວາມສົນໃຈ, ສອງປະເທດໄດ້ສົມທົບກັນຢ່າງແໜ້ນແຟ້ນ, ສະໜັບສະໜູນກັນຢູ່ເວທີປາໄສຫຼາຍຝ່າຍ, ໂດຍສະເພາະແມ່ນຢູ່ອາຊຽນ ໃນສະພາບທີ່ລາວ ດຳລົງຕຳແໜ່ງປະທານອາຊຽນ 2024. ສອງຝ່າຍກໍ່ໄດ້ສົມທົບກັນຢູ່ກົນໄກອະນຸພາກພື້ນ ແລະສະຫະປະຊາຊາດຢ່າງເປັນປະຈຳ.

ບັນດາໝາກຜົນອັນດີງາມໃນການພົວພັນ ຫວຽດນາມ-ລາວ ໄດ້ພິສູດໃຫ້ເຫັນຄວາມສະເໝີຕົ້ນສະເໝີປາຍໃນນະໂຍບາຍພົວພັນຕ່າງປະເທດຂອງພັກ ແລະລັດຫວຽດນາມ, ຍາມໃດກໍ່ຖືເປັນສຳຄັນ ແລະສະຫງວນບຸລິມະສິດສູງສຸດໃຫ້ແກ່ການພົວພັນພິເສດ ຫວຽດນາມ-ລາວ.