ໂດຍຮັບຄໍາເຊີນຂອງລັດຖະບານສະຫະລັດ ອາຣັບ ເອມີເລັດ (UAE) ແລະລັດຖະບານສາທາລະນະລັດ ຕວກກີ, ທ່ານນາຍົກລັດຖະມົນຕີ ຫວຽດນາມ ຟ້າມມິງຈິ໊ງ ແລະພັນລະຍາ ພ້ອມດ້ວຍຄະນະຜູ້ແທນຂັ້ນສູງຫວຽດນາມ ໄດ້ເຂົ້າຮ່ວມກອງປະຊຸມສຸດຍອດການກະທຳເພື່ອດິນຟ້າອາກາດໂລກໃນຂອບເຂດກອງປະຊຸມ ຄັ້ງທີ 28 ບັນດາຝ່າຍເຂົ້າຮ່ວມສົນທິສັນຍາແມ່ຂອງ ສປຊ ກ່ຽວກັບການປ່ຽນແປງຂອງດິນຟ້າອາກາດ (COP28), ດໍາເນີນການເຄື່ອນໄຫວສອງຝ່າຍຢູ່ UAE ແລະຢ້ຽມຢາມຕວກກີ ຢ່າງເປັນທາງການໃນລະຫວ່າງວັນທີ 29 ພະຈິກ ຫາວັນທີ 3 ທັນວາ.
 |
| ທ່ານນາຍົກລັດຖະມົນຕີ ຫວຽດນາມ ຟ້າມມິງຈິ໊ງ ແລະພັນລະຍາ. ພາບ: baoquocte.vn |
ກອງປະຊຸມສຸດຍອດການກະທໍາເພື່ອດິນຟ້າອາກາດໂລກໄດ້ຈັດຕັ້ງໃນຂອບເຂດ COP28 ແມ່ນເຫດການຫຼາຍຝ່າຍສໍາຄັນສຸດໃນປີກ່ຽວກັບການປ່ຽນແປງຂອງດິນຟ້າອາກາດ. ປີ 2023 ກໍ່ແມ່ນຈຸດເວລາສິ້ນສຸດການຕີລາຄາຄວາມມານະພະຍາຍາມທົ່ວໂລກກ່ຽວກັບການປະຕິບັດຂໍ້ຕົກລົງ ປາຣີ ຮອບທໍາອິດ, ໄລຍະ 2015-2023. ກອງປະຊຸມແມ່ນໂອກາດສໍາຄັນເພື່ອໃຫ້ການນໍາຂັ້ນສູງບັນດາປະເທດ ກວດຄືນຄວາມກ້າວໜ້າທີ່ບັນລຸໄດ້ ແລະກໍານົດບັນດາຂົງເຂດບຸລິມະສິດໃຫ້ການກະທໍາຮັບມືກັບການປ່ຽນແປງຂອງດິນຟ້າອາກາດໃນໄລຍະຈະມາເຖິງ. ນີ້ກໍ່ແມ່ນເວທີປາໄສເພື່ອໃຫ້ບັນດາປະເທດຍົກອອກບັນດາຄໍາໝັ້ນສັນຍາ, ການກະທໍາໃໝ່ທີ່ເຂັ້ມແຂງກວ່າອີກໃນການປະກອບສ່ວນດ້ານການເງິນ, ເຕັກໂນໂລຢີ, ຫຼຸດຜ່ອນການປ່ອຍອາຍພິດເຮືອນແກ້ວ, ມຸ່ງເຖິງການປະຕິບັດເປົ້າໝາຍຂໍ້ຕົກລົງ ປາຣີ.
ທີ່ COP26 (ປີ 2021), ຫວຽດນາມ ໄດ້ຍົກອອກຄໍາໝັ້ນສັນຍາບັນລຸລະດັບປ່ອຍອາຍພິດເປັນ 0 ໃນປີ 2050 ດ້ວຍແຫຼ່ງກຳລັງພາຍໃນປະເທດ ແລະການຊ່ວຍເຫຼືອຂອງສາກົນ. ບໍ່ພຽງແຕ່ຕັ້ງໜ້າປະຕິບັດຄໍາໝັ້ນສັນຍາສາກົນກ່ຽວກັບການຮັບມືກັບການປ່ຽນແປງຂອງດິນຟ້າອາກາດ, ຫວຽດນາມ ຍັງແມ່ນໜຶ່ງໃນ 30 ປະເທດທໍາອິດທີ່ມອບໃບປະກອບສ່ວນໂດຍປະເທດຕັດສິນເອງ (NDC) ນີ້ແມ່ນການປະກອບສ່ວນໂດຍປະເທດໃຫ້ຄໍາໝັ້ນສັນຍາກ່ຽວກັບການຮັບມືກັບດິນຟ້າອາກາດ. ຫວຽດນາມ ກໍ່ແມ່ນໜຶ່ງໃນສາມປະເທດພວມພັດທະນາທໍາອິດ ທີ່ເຂົ້າຮ່ວມຖະແຫຼງການການເມືອງສ້າງຕັ້ງການພົວພັນຄູ່ຮ່ວມມືກ່ຽວກັບການຫັນປ່ຽນພະລັງງານຢ່າງຍຸຕິທໍາ (JETP), ພ້ອມກັນນັ້ນ ກໍ່ພວມປະຕິບັດໃຫ້ສໍາເລັດໂດຍໄວ ແລະຄາດວ່າ ຈະປະກາດແຜນການລະດົມແຫຼ່ງກຳລັງ JETP ຢູ່ COP28.
ທ່ານນາຍົກລັດຖະມົນຕີ ຟ້າມມິງຈິ໊ງ ເຂົ້າຮ່ວມກອງປະຊຸມສຸດຍອດການກະທໍາເພື່ອດິນຟ້າອາກາດໂລກທີ່ຈັດຕັ້ງໃນຂອບເຂດ COP28 ແມ່ນໂອກາດເພື່ອໃຫ້ຫວຽດນາມ ສະແດງສານຄວາມຮັບຜິດຊອບ, ເປັນເຈົ້າການ, ຕັ້ງໜ້າໃນການແກ້ໄຂສິ່ງທ້າທາຍລວມໃນທົ່ວໂລກກ່ຽວກັບການປ່ຽນແປງຂອງດິນຟ້າອາກາດ.
ສໍາລັບ UAE, ຫວຽດນາມ ມີການພົວພັນຄູ່ຮ່ວມທີ່ມືພັດທະນາຢ່າງຈົບງາມ. ປີ 2023, ສອງປະເທດສະເຫຼີມສະຫຼອງ 30 ປີແຫ່ງວັນສ້າງຕັ້ງການພົວພັນທາງການທູດ. UAE ຖື ຫວຽດນາມ ແມ່ນຄູ່ຮ່ວມມືສໍາຄັນຢູ່ພາກພື້ນອາຊີ-ປາຊີຟິກ, ປາດຖະໜາຢາກເພີ່ມທະວີການຮ່ວມມືກັບຫວຽດນາມ ໃນທຸກຂົງເຂດ. UAE ແມ່ນຄູ່ຮ່ວມມືດ້ານການຄ້າ, ການລົງທຶນແຖວໜ້າຂອງຫວຽດນາມ ຢູ່ພາກພື້ນຕາເວັນອອກກາງດ້ວຍວົງເງິນການຄ້າໃນຊຸມປີມໍ່ໆມານີ້ຍາມໃດກໍ່ບັນລຸເກືອບ 5 ຕື້ໂດລາສະຫະລັດ, ສະເພາະເດືອນ ຕຸລາ 2023, ຍອດວົງເງິນການຄ້າສອງສົ້ນບັນລຸເກືອບ 4 ຕື້ໂດລາສະຫະລັດ, ເພີ່ມ 1,8% ເມື່ອທຽບໃສ່ໄລຍະດຽວກັນຂອງປີ 2022. ສອງປະເທດໄດ້ດຳເນີນການເຈລະຈາສັນຍາຄູ່ຮ່ວມມືເສດຖະກິດຮອບດ້ານ (CEPA) ແລະພວມມຸ່ງເຖິງການສຳເລັດການເຈລະຈາ, ລົງນາມ.
ສໍາລັບຕວກກີ, ຫວຽດນາມ ມີການພົວພັນມິດຕະພາບ ແລະການຮ່ວມມືອັນດີງາມໃນຫຼາຍຂົງເຂດ. ສອງປະເທດແບ່ງປັນຫຼາຍຈຸດທີ່ຄ້າຍຄືກັນກ່ຽວກັບປະຫວັດສາດ, ວັດທະນະທໍາ ແລະການພັດທະນາປະເທດ. ຕວກກີ ຖືຫວຽດນາມ ແມ່ນຄູ່ຮ່ວມມືສໍາຄັນແຖວໜ້າຢູ່ອາຊຽນ. ຕວກກີ ແມ່ນໜຶ່ງໃນບັນດາຄູ່ຮ່ວມມືການຄ້າ, ການລົງທຶນແຖວໜ້າຂອງຫວຽດນາມ ຢູ່ຕາເວັນອອກກາງ. ການຢ້ຽມຢາມຕວກກີ ຢ່າງເປັນທາງການຄັ້ງທໍາອິດຂອງນາຍົກລັດຖະມົນຕີຫວຽດນາມ ຍິ່ງມີຄວາມໝາຍ, ເມື່ອປີ 2023 ສອງປະເທດສະເຫຼີມສະຫຼອງ 45 ປີແຫ່ງວັນສ້າງຕັ້ງການພົວພັນທາງການທູດ (7-6-1978 / 7-6-2023). ການຢ້ຽມຢາມມີຄວາມໝາຍສໍາຄັນໃນການປັບປຸງຄວາມໄວ້ເນື້ອເຊື່ອໃຈດ້ານການເມືອງ, ຍົກສູງປະສິດທິຜົນການຮ່ວມມືຫຼາຍດ້ານລະຫວ່າງສອງປະເທດ, ຊຸກຍູ້ການພົວພັນຮ່ວມມື ຫວຽດນາມ-ຕວກກີ ໃຫ້ນັບມື້ນັບພັດທະນາ, ເຂົ້າສູ່ງລວງເລິກ, ມີປະສິດທິຜົນ, ແທດຈິງ.
ການໄປປະຕິບັດງານຄັ້ງນີ້ຂອງທ່ານນາຍົກລັດຖະມົນຕີ ໄດ້ປະກອບສ່ວນຢັ້ງຢືນແຜນນະໂຍບາຍສະເໝີຕົ້ນສະເໝີປາຍຂອງຫວຽດນາມ ກ່ຽວກັບການເຕີບໂຕສີຂຽວ, ການຮັບມືກັບການປ່ຽນແປງຂອງດິນຟ້າອາກາດ; ສະແດງໃຫ້ເຫັນປະເທດຫວຽດນາມ ທີ່ຈິງໃຈ, ມີຄວາມໄວ້ເນື້ອເຊື່ອໃຈ, ຍາມໃດກໍ່ຕັ້ງໜ້າເຂົ້າຮ່ວມຊຸກຍູ້ຄວາມສາມັກຄີທົ່ວໂລກໃນການຕ້ານການປ່ຽນແປງຂອງດິນຟ້າອາກາດ, ເພື່ອໂລກສີຂຽວ, ເພື່ອໃຫ້ທຸກປະເທດຍືນຍົງຄົງຕົວ. ພ້ອມທັງ ເນັ້ນໜັກບົດບາດ, ທີ່ຕັ້ງຂອງຫວຽດນາມ ໃນບັນດາຂອບເຂດການຮ່ວມມືຫຼາຍຝ່າຍຢູ່ພາກພື້ນກໍ່ຄືສາກົນ; ຍົກສູງປະສິດທິຜົນການຮ່ວມມືສອງຝ່າຍກັບ UAE ແລະຕວກກີ.
ປະຊາຊົນຫວຽດນາມ ຫວັງວ່າການໄປປະຕິບັດງານຂອງທ່ານນາຍົກລັດຖະມົນຕີ ຈະບັນລຸໝາກຜົນອັນດີງາມ, ເພີ່ມທະວີການພົວພັນມິດຕະພາບ, ການສົນທະນາ ແລະການຮ່ວມມືທີ່ຕ່າງຝ່າຍຕ່າງມີຜົນປະໂຫຍດ, ສ້າງສະພາບແວດລ້ອມພາກພື້ນ ແລະສາກົນແຫ່ງ ສັນຕິພາບ, ສະຖຽນລະພາບ, ພັດທະນາກັບທຸກປະເທດ.
ບູນມີ
