ອາຊຽນເສີມຂະຫຍາຍບົດບາດເປັນໃຈກາງ, ຢືນຢັນຄຸນຄ່າທາງຍຸດທະສາດ ແລະ ຄວາມເປັນໃຈກາງຂອງການເຕີບໂຕທົ່ວໂລກ

	ຫວຽດນາມ ປະກອບສ່ວນຢ່າງຕັ້ງໜ້າເຂົ້າໃນການຮ່ວມມືດ້ານປ້ອງກັນຊາດລະຫວ່າງບັນດາປະເທດ ASEAN.
	SOM ASEAN+3 ຄົ້ນຄວ້າ, ພັດທະນາ ແລະ ສຳຜັດກັບວັກຊິນກັນໂຄວິດ-19 ຢ່າງປອດໄພ, ມີປະສິດທິຜົນ

ອາຊຽນມີບົດບາດປຽບສະເໝືອນຕ່ອງໂສ້ທີ່ສຳຄັນໃນກົນໄກຮ່ວມມືຂອງພາກພື້ນຜ່ານການພົວພັນ ແລະ ການຮ່ວມມືກັບບັນດາຄູ່ເຈລະຈາ ໂດຍຜ່ານກົນໄກ: ອາຊຽນ +1, ອາຊຽນ +3 ແລະ ກອງປະຊຸມສຸດຍອດຂອງອາຊີຕາເວັນອອກ (EAS)...ບັນດາປະເທດອາຊຽນໄດ້ສ້າງຄວາມສົມດຸນ ແລະ ເປັນເຈົ້າການໃນການພົວພັນກັບບັນດາຄູ່ຮ່ວມມືຂອງຕົນເພື່ອຮັກສາຄວາມໝັ້ນຄົງ ແລະ ສ້າງເງື່ອນໄຂເພື່ອການພັດທະນາ. ບັນດາປະເທດຕ່າງໆລ້ວນແຕ່ໃຫ້ການສະໜັບສະໜູນບົດບາດເປັນໃຈກາງຂອງອາຊຽນ ແລະ ເຫັນຊອບກັບບັນດາຫຼັກການ, ມາດຕະຖານລວມຂອງອາຊຽນ. ຈາກຄວາມສຳຄັນຂອງກອງປະຊຸມສຸດຍອດຄັ້ງນີ້, ອິນໂດເນເຊຍຈຶ່ງຖືສຳຄັນເປັນພິເສດວຽກງານປ້ອງກັນຄວາມສະຫງົບ ຊຶ່ງຕ່າງກັບກອງປະຊຸມສຸດຍອດອາຊຽນຄັ້ງທີ 42 ຜ່ານມາທີ່ຈັດຂຶ້ນໃນເດືອນພຶດສະພາຢູ່ເກາະ Labuan Bajo ຊຶ່ງເປັນສະຖານທີ່ທີ່ມີຄວາມສະຫງົບປອດໄພດີ. ແຕ່ກອງປະຊຸມສຸດຍອດຄັ້ງນີ້ໄດ້ຈັດຂຶ້ນຢູ່ທີ່ນະຄອນຫຼວງຈາກາຕາ ຊຶ່ງເປັນບ່ອນທີ່ມີພົນລະເມືອງໜາແໜ້ນ 11 ລ້ານຄົນ, ການຈະລາຈອນຕິດຂັດ ຊຶ່ງມີຄວາມຫຍຸ້ງຍາກໃນການຮັບປະກັນຄວາມປອດໄພ. ສະນັ້ນ, ປະເທດເຈົ້າພາບຈຶ່ງຕ້ອງໄດ້ລະດົມກຳລັງທະຫານ, ຕຳຫຼວດ ແລະ ເຈົ້າໜ້າທີ່ອື່ນໆເກືອບ 20.000 ຄົນ ພ້ອມທັງພາຫະນະ, ເຄື່ອງມືທີ່ທັນສະໄໝເຂົ້າໃນການປ້ອງກັນສະຖານທີ່ຈັດກອງປະຊຸມ, ສະຖານທີ່ພັກເຊົາຂອງຄະນະຜູ້ແທນປະເທດຕ່າງໆ, ວາງກຳລັງລະບາຍການຈະລາຈອນຕາມທ້ອງຖະໜົນ ແລະ ຕ້ານການກໍ່ການຮ້າຍ...

ທີ່ກອງປະຊຸມສຸດຍອດອາຊຽນຄັ້ງທີ 43 ນີ້ໄດ້ຖືເອົາຮູບ "ເຮືອອາຊຽນ" ທີ່ກຳລັງລອຍລຳອອກສູ່ທະເລທີ່ກວ້າງໃຫ່ຍ, ເປີດກວ້າງຕໍ່ໂລກ, ຮ່ວມມືກັບບັນດາຄູ່ເຈລະຈາເພື່ອຈຸດໝາຍສັນຕິພາບ, ຄວາມສະຫງົບ ແລະ ຄວາມໝັ້ນຄົງ ເປັນສັນຍາລັກຂອງກອງປະຊຸມ, ທ່ານປະທານາທິບໍດີ ອິນໂດເນເຊຍ Joko Widodo ຢຶນຢັນຢ່າງໜັກແໜ້ນວ່າ: ອາຊຽນມີຄວາມເປັນເອກະພາບ ແລະ ເດັດດ່ຽວບໍ່ໃຫ້ພາກພື້ນນີ້ກາຍເປັນບ່ອນປະທະກັນທາງດ້ານສິດກຳລັງອຳນາດ ແຕ່ຈະໃຫ້ກາຍເປັນພາກພື້ນທີ່ຫຼ່ໍລ້ຽງການຮ່ວມມື ແລະ ສົນທະນາກັນເພື່ອສັນຕິພາບ ແລະ ຄວາມວັດທະນາຖາວອນ, ທ່ານເນັ້ນວ່າ: ມະຫາສະໝຸດທີ່ກວ້າງໃຫ່ຍບໍ່ມີໃຜທີ່ຈະພາຍເຮືອອອກໄປຄົນດຽວໄດ້, ອາຊຽນມີຄວາມມຸ່ງຫວັງຢາກຮ່ວມມືແບບຕ່າງຝ່າຍຕ່າງມີຜົນປະໂຫຍດກັບທຸກໆປະເທດເພື່ອຢືນຢັນເຖິງບົດບາດເປັນໃຈກາງຂອງການເຕີບໂຕ...

ບັນດາຜູ້ນຳອາຊຽນ ແລະ ນາຍົກລັດຖະມົນຕີຍີ່ປຸ່ນ Kishida Fumio, ປະທານາທິບໍດີເກົາຫຼີໃຕ້ Yoon Suk Yeol ແລະ ນາຍົກລັດຖະມົນຕີຈີນ ຫຼີເຄີສຽງ ຖ່າຍຮູບລວມໃນກອງປະຊຸມສຸດຍອດອາຊຽນ +3 (ພາບ: ເຍິດບັກ)

ທ່ານນາຍົກລັດຖະມົນຕີ ຫວຽດນາມ ຟາມມິງຈິງ ມີລາຍການເຂົ້າຮ່ວມຫຼາຍກອງປະຊຸມທີ່ສຳຄັນເຊັ່ນ: 17 ກອງປະຊຸມສຸດຍອດ, 17 ກອງປະຊຸມພົບປະສອງຝ່າຍກັບບັນດາຜູ້ນຳ, ປະມຸກລັດຂອງບັນດາປະເທດ ແລະ ອົງການຈັດຕັ້ງສາກົນ. ທ່ານນາຍົກລັດຖະມົນຕີໄດ້ສົ່ງສັນຍານທີ່ສຳຄັນວ່າ: ບັນດາປະເທດອາຊຽນ ຈົ່ງພ້ອມກັບບັນດາຄູ່ຮ່ວມມື ມານະພະຍາຍາມສົມທົບກັນ, ເພີ່ມທະວີການຮ່ວມມືກັນເພື່ອຮັກສາຄວາມເປັນຈຸດໃຈກາງຂອງການເຕີບໂຕເສດຖະກິດໂລກ, ບັນດາປະເທດຈົ່ງພ້ອມກັນແກ້ໄຂສິ່ງກີດຂວາງ, ຈຸດອຸດຕັນເພື່ອສ້າງຕັ້ງລະບົບຕອບສະໜອງ, ໝູນໃຊ້ສົນທິສັນຍາການຄ້າເສລີ (FTA) ໃຫ້ເກີດຜົນໄດ້ຫຼາຍທີ່ສຸດ, ຮັກສາສະພາບແວດລ້ອມແຫ່ງສັນຕິພາບ, ຄວາມໝັ້ນຄົງ, ຄວາມປອດໄພເພື່ອສ້າງປະຖົມປັດໄຈໃຫ້ແກ່ການພັດທະນາ, ຖືເອົາປະຊາຊົນເປັນໃຈກາງ, ເປັນຈຸດໝາຍ, ເປັນກຳລັງໜູນຂອງຂະບວນວິວັດແຫ່ງການກໍ່ສ້າງປະຊາຄົມອາຊຽນ ແລະ ພັດທະນາການພົວພັນຮ່ວມມືກັບບັນດາຄູ່ຮ່ວມມື, ຮັບປະກັນການຂະຫຍາຍຕົວແບບກວມລວມ, ໝັ້ນຄົງ, ສະເໝີພາບ ບໍ່ຖິ້ມໃຜໄວ້ຂ້າງຫຼັງ, ເສີມຂະຫຍາຍ ແລະ ໝູນໃຊ້ກຳລັງແຮງຂອງການເຕີບໂຕເສດຖະກິດໃໝ່ ນັ້ນຄື: ເສດຖະກິດ ດີຈິຕອນ, ເສດຖະກິດສີຂຽວ, ນະວັດຕະກຳ, ເສີມຂະຫຍາຍບົດບາດຂອງເຕັກໂນໂລຊີໃໝ່, ຮັບມືກັບການປ່ຽນແປງຂອງດິນຟ້າອາກາດ...

ທ່ານນາຍົກລັດຖະມົນຕີ ຟາມມິງຈິງ ຍົກໃຫ້ເຫັນທັດສະນະທີ່ວ່າ: ຢູ່ຕໍ່ໜ້າວົງຈອນການແກ້ງແຍ່ງແຂ່ງຂັນທີ່ດຸເດືອດລະຫວ່າງຊາດມະຫາອຳນາດນັ້ນ, ຖ້າອາຊຽນຢາກຮັກສາບົດບາດເປັນໃຈກາງໄວ້ໄດ້, ຄຳຕອບດຽວກໍຄືຕ້ອງເສີມຂະຫຍາຍກຳລັງແຮງຂອງຕົນເອງ, ປັບປຸງຄວາມສາມັກຄີພາຍໃນກຸ່ມໃຫ້ເຂັ້ມແຂງເພື່ອຢືນຢັນເຖິງຄຸນຄ່າຍຸດທະສາດຂອງຕົນ. ບັນດາປະເທດອາຊຽນຄວນຍົກສູງຈິດໃຈເອກະລາດ, ສ້າງຄວາມເຂັ້ມແຂງດ້ວຍຕົນເອງ, ເຄົາລົບກົດໝາຍ, ປະຕິບັດບັນດາຫຼັກການພື້ນຖານ ແລະ ມາດຕະຖານການປະພຶດຂອງອາຊຽນ.

ໂດຍຢືນຢູ່ຈຸດໃຈກາງຂອງການຄັດແຍ່ງ, ອາຊຽນຄວນຮັກສາຄວາມສົມດຸນທາງຍຸດທະສາດກັບບັນດາປະເທດມະຫາອຳນາດ, ຕ້ອງກາຍເປັນຂົວຕໍ່ທີ່ມີຄວາມໄວ້ເນື້ອເຊື່ອໃຈຢ່າງແທ້ຈິງຕໍ່ຄວາມສາມາດໃນການປະສານສົມທົບ ແລະ ຄວາມສົມດຸນລະຫວ່າງການພົວພັນກັບຜົນປະໂຫຍດ, ຢຶດໝັ້ນການສ້າງໂຄງປະກອບຂອງພາກພື້ນທີ່ເປີດກວ້າງ, ປອດໃສ ແລະ ກວມລວມ, ແຕ່ທີ່ສຳຄັນກໍຄືຄວາມເປັນເອກະພາບໃນການຮັກສາຫຼັກໝັ້ນ ແລະ ຫຼັກການຂອງຕົນຕໍ່ບັນດາບັນຫາທີ່ພົວພັນໂດຍກົງກັບສະພາບແວດລ້ອມຂອງຄວາມໝັ້ນຄົງ ແລະ ການພັດທະນາຂອງພາກພື້ນ. ທ່ານນາຍົກລັດຖະມົນຕີເນັ້ນໜັກວ່າ: ອາຊຽນຕ້ອງເພີ່ມທະວີຄວາມສາມັກຄີ, ຮັກສາ ແລະ ປັບປຸງທັດສະນະລວມຕໍ່ບັນຫາທະເລຕາເວັນອອກ, ທ່ານຢຶນຢັນວ່າ: ນີ້ທັງມີຜົນປະໂຫຍດ, ທັງແມ່ນຄວາມຮັບຜິດຊອບຂອງທຸກໆປະເທດສະມາຊິກ.

ໃນກອງປະຊຸມສຸດຍອດ ອາຊຽນ +3, ທ່ານນາຍົກລັດຖະມົນຕີສະເໜີໃຫ້ມີການເປີດກວ້າງຂອບເຂດການຮ່ວມມືທາງເສດຖະກິດ ໂດຍສະເພາະແມ່ນການຫັນເປັນດີຈິຕອນ, ເສດຖະກິດດີຈິຕອນ, ການຄ້າເອເລັກໂຕຣນິກ, ເຕັກໂນໂລຊີ ແລະ ການເງິນ Fintech, ປັນຍາປະດິດ, ການເງິນສີຂຽວ, ເຕັກໂນໂລຊີສີຂຽວ...ເພື່ອສ້າງຄວາມເຂັ້ມແຂງໃຫ້ແກ່ການເຕີບໂຕແບບກວມລວມຕື່ມອີກ, ມຸ່ງໄປເຖິງການພັດທະນາແບບຍືນຍົງ ນຳມາເຊິ່ງຜົນປະໂຫຍດອັນແທ້ຈິງມາໃຫ້ປະຊາຊົນ, ພ້ອມດຽວກັນນັ້ນ ກໍຕ້ອງປະສານສົມທົບກັນເພື່ອຄ້ຳປະກັນດ້ານສະບຽງອາຫານຂອງແຕ່ລະປະເທດ ແລະ ຂອງພາກພື້ນໃນທຸກສະຖານະການ.

ໃນກອງປະຊຸມສຸດຍອດອາຊີຕາເວັນອອກ (EAS) ຄັ້ງທີ 18 , ທ່ານນາຍົກລັດຖະມົນຕີ ຟາມມິງຈິງ ໄດ້ເນັ້ນເຖິງຂອບຂະໜາດ ແລະ ຄຸນຄ່າຍຸດທະສາດຂອງ EAS ວ່າແມ່ນເວທີຂອງບັນດາການນຳປະເທດຕ່າງໆປຶກສາຫາລື, ກຳນົດທິດທາງນຳກັນເພື່ອສັນຕິພາບ, ຄວາມໝັ້ນຄົງ, ການຮ່ວມມື ແລະ ວັດທະນາຖາວອນຂອງພາກພື້ນ ແລະ ໃນໂລກ, ພ້ອມກັນຍູ້ແຮງການຮ່ວມມື, ແກ້ໄຂຂໍ້ຄັດແຍ່ງ, ຍົກສູງຄວາມຮັບຮູ້ເພື່ອຫຍັບໃກ້ເຂົ້າຫາກັນກວ່າ, ກຳນົດການສ້າງໂຄງປະກອບຂອງພາກພື້ນແບບເປີດກວ້າງ, ກວມລວມ, ປອດໃສບົນພື້ນຖານກົດໝາຍສາກົນ.

ທ່ານນາຍົກລັດຖະມົນຕີຢຶນຢັນວ່າ ອາຊຽນພ້ອມແລ້ວທີ່ຈະເຂົ້າຮ່ວມສົນທະນາ, ປຶກສາຫາລື ແລະ ໃຫ້ການຮ່ວມມືກັບທຸກຝ່າຍເພື່ອຄວາມສະເໝີພາບ, ຄວາມໄວ້ວາງໃຈ ແລະ ເຄົາລົບຊຶ່ງກັນ ແລະ ກັນ, ພ້ອມກັນຮັບມືກັບສິ່ງທ້າທາຍລວມ ເພື່ອປະກອບສ່ວນປົກປັກຮັກສາສັນຕິພາບ, ຄວາມໝັ້ນຄົງ ແລະ ການພັດທະນາ. ບັນດາຜູ້ນໍາ ແລະ ປະມຸກລັດແຕ່ລະຊາດລ້ວນແຕ່ຕີລາຄາສູງຕໍ່ຄວາມເປັນທຳຂອງຫວຽດນາມໃນການສະເໜີເພີ່ມທະວີການຮ່ວມມື ເພື່ອຮັບປະກັນຄວາມໝັ້ນຄົງດ້ານສະບຽງອາຫານໃນສະຖານະການທີ່ບໍ່ມີຄວາມສະຫງົບໃນປັດຈຸບັນ.

ໄປພ້ອມກັບບັນດາກອງປະຊຸມສຸດຍອດອື່ນໆນັ້ນ, ທ່ານນາຍົກລັດຖະມົນຕີ ຟາມມິງຈິງ ຍັງໄດ້ມີການພົບປະສອງຝ່າຍກັບບັນດາຜູ້ນຳ ແລະ ປະມຸກລັດຂອງແຕ່ລະປະເທດຕື່ມອີກ ເພື່ອເພີ່ມທະວີການພົວພັນມິດຕະພາບ ແລະ ການຮ່ວມມືສອງຝ່າຍໃນຫຼາຍຂົງເຂດທີ່ແຕກຕ່າງກັນ. ບັນດາຄູ່ຮ່ວມມືເຫຼົ່ານັ້ນລ້ວນແຕ່ໃຫ້ຄວາມສຳຄັນໃນການພົວພັນກັບຫວຽດນາມ, ຕີລາຄາສູງຜົນສຳເລັດດ້ານເສດຖະກິດຂອງຫວຽດນາມ ແລະ ຄວາມສາມາດໃນການບໍລິຫານຂອງລັດຖະບານຫວຽດນາມ, ນາຍົກລັດຖະມົນຕີຫວຽດນາມ; ຫວັງຢາກເພີ່ມທະວີການຮ່ວມມືກັບຫວຽດນາມໃນທຸກຂົງເຂດ ໂດຍສະເພາະແມ່ນຂົງເຂດໃໝ່ໆທີ່ມີຄວາມສາມາດບົ່ມຊ້ອນຄື ເສດຖະກິດໝູນວຽນ, ເສດຖະກິດສີຂຽວ, ເສດຖະກິດແບ່ງປັນ ແລະ ການຫັນເປັນດີຈິຕອນ.

ໃນສະພາບການຂອງໂລກທີ່ມີການປ່ຽນແປງຢ່າງສັບສົນ, ຂາດສະຖຽນລະພາບ ແລະ ຍາກທີ່ຈະຄາດເດົາໄດ້ລ່ວງໜ້າຄືໃນປັດຈຸບັນ, ອາຊຽນຕ້ອງຮັກສາຄວາມເປັນເອກະລາດ ເປັນເຈົ້າຕົນເອງເພື່ອໃຫ້ກາຍເປັນຈຸດເດັ່ນຂອງການເຕີບໂຕທາງເສດຖະກິດ (ປີ 2022 ເຕີບໂຕ 5,6% ເມື່ອທຽບໃສ່ການເຕີບໂຕຂອງໂລກທີ່ມີພຽງແຕ່ 2,9%; ປີ 2023 ຄາດຄະເນວ່າຈະເຕີບໂຕຢູ່ທີ່ລະດັບ 4,5% ຊຶ່ງຄາດວ່າຈະສູງກວ່າການເຕີບໂຕຂອງກຸ່ມບັນດາປະເທດທີ່ພັດທະນາ).

ອາຊຽນໄດ້ເປີດກວ້າງພື້ນທີ່ເສດຖະກິດກັບ FTA 8 ສະບັບ ຊຶ່ງລວມມີທັງຂົງເຂດການຄ້າເສລີ ອາຊຽນ (AFTA) ແລະ 7 AFTA ກັບບັນດາຄູ່ຮ່ວມມືທີ່ສຳຄັນ, ໃນນັ້ນມີສົນທິສັນຍາຄູ່ຮ່ວມມືເສດຖະກິດຮອບດ້ານພາກພື້ນ RCEP ຊຶ່ງສ້າງເປັນພາກພື້ນການຄ້າເສລີທີ່ກວມເອົາ 30% ປະຊາກອນໂລກ (ມີປະຊາກອນຫຼາຍກວ່າ 688 ລ້ານຄົນ) ແລະ ກວມ 32% GDP ຂອງໂລກ (ດ້ວຍຂະໜາດຫຼາຍກວ່າ 3.600 ຕື້ໂດລາສະຫະລັດ ໃນປີ 2022). ຍ້ອນເຫດຜົນດັ່ງກ່າວ ການເພີ່ມທະວີດ້ານການຮ່ວມມືທາງເສດຖະກິດຈຶ່ງກາຍເປັນກະທູ້ສຳຄັນ ແລະ ໂດດເດັ່ນໃນໂຄງການດຳເນີນງານຕ່າງໆ.

ໃນຂອບເຂດກອງປະຊຸມສຸດຍອດອາຊຽນຄັ້ງນີ້, ສະພາທີ່ປຶກສາທຸລະກິດອາຊຽນ (ASEAN ABAC) ກໍໄດ້ຈັດກອງປະຊຸມສຸດຍອດທຸລະກິດ ແລະ ການລົງທຶນ ASEAN (ASEAN BIS) 2023 ຂຶ້ນເພື່ອດຶງດູດບັນດາເຈົ້າໜ້າທີ່, ສະມາຄົມນັກທຸລະກິດອາຊຽນ ແລະ ບັນດາຜູ້ຊ່ຽວຊານເຂົ້າຮ່ວມຢ່າງຫຼວງຫຼາຍ.

ໂດຍຄຳເຫັນຕໍ່ບັນດານັກທຸລະກິດຂອງອາຊຽນນັ້ນ, ທ່ານນາຍົກລັດຖະມົນຕີ ຟາມມິງຈິງ ໄດ້ຍົກໃຫ້ເຫັນວ່າ ທ່າອ່ຽງໂລກຫຼາຍຂົ້ວເປັນທ່າອ່ຽງທີ່ຈຳເປັນ, ການແກ້ງແຍ່ງທາງຍຸດທະສາດຂອງບັນດາປະເທດໃຫຍ່ນັບມື້ຂ້ຽວຂາດ, ທ່າອ່ຽງແຍກຕົວ ແລະ ເຕົ້າໂຮມກຳລັງນັບມື້ນັບຈະແຈ້ງ. ໂດຍຢືນຢູ່ຕໍ່ໜ້າພາລະກຳດັ່ງກ່າວ ອາຊຽນຕ້ອງຢືນຢັນໃຫ້ໄດ້ວ່າ ເປັນຂົ້ວໜຶ່ງຂອງໂລກຫຼາຍຂົ້ວ, ເປັນໃຈກາງຂອງການຮ່ວມມື ແລະ ເປັນສ່ວນໜຶ່ງໃນໂຄງປະກອບຂອງພາກພື້ນ ແລະ ຄິດວ່າ ອາຊຽນມີຄວາມສາມາດຢ່າງພຽງພໍທີ່ຈະແບກຫາບພາລະກຳດັ່ງກ່າວໄດ້. ອາຊຽນຄວນເພີ່ມທະວີການເຂົ້າຮ່ວມກັບພາກພື້ນໃຫ້ເລິກເຊິ່ງ ແລະ ກວ້າງຂວາງກວ່າເກົ່າ ເພື່ອຜັນຂະຫຍາຍບັນດາທ່າແຮງຂອງກັນແລະກັນໄດ້ດີກວ່າ ເພື່ອກຳໄດ້ກາລະໂອກາດໃໝ່ໃນພື້ນຖານເສດຖະກິດໂລກ ໂດຍສະເພາະແມ່ນກຳລັງໜູນຂອງການເຕີບໂຕໃໝ່.

ເພື່ອໃຫ້ອາຊຽນສາມາດສືບຕໍ່ເສີມຂະຫຍາຍບົດບາດ, ທີ່ຕັ້ງຂອງຕົນເອງ ແລະ ການນຳໃຊ້, ກຳໄດ້ບັນດາກາລະໂອກາດຈາກຄວາມເປັນລະບຽບໃນໂລກປັດຈຸບັນນັ້ນ, ທ່ານນາຍົກລັດຖະມົນຕີເນັ້ນວ່າ: ອາຊຽນຄວນຮັກສາຄວາມສົມດຸນຍຸດທະສາດໃນການພົວພັນກັບຄູ່ຮ່ວມມື, ຮັກສາຄຳໝັ້ນສັນຍາເປີດປະຕູຕະຫຼາດໃຫ້ຍາວນານ, ຊຸກຍູ້ການຄ້າ ແລະ ການລົງທຶນ, ຍາມໃດກໍ່ເປີດປະຕູຮັບເອົາບັນດານັກລົງທຶນ, ແນວຄິດປະດິດສ້າງ ແລະ ຜູ້ທີ່ມີຄວາມສາມາດ; ສືບຕໍ່ຊຸກຍູ້ບັນດາ FTA ຢ່າງແຮງ, ຮ່ວມສຳພັນເສດຖະກິດພາກພື້ນ ແລະ ທົ່ວໂລກ ເພື່ອເຊື່ອມຕໍ່ຊຶ່ງກັນແລະກັນທົ່ວທັງພາກພື້ນ, ເປີດກວ້າງພື້ນທີ່ແຫ່ງການຂະຫຍາຍຕົວໃໝ່, ຫຼຸດຜ່ອນຄ່າສິ້ນເປືອງດ້ານການຂົນສົ່ງ, ເອົາໃຈໃສ່ຮູບແບບຮ່ວມມືພາກລັດກັບພາກເອກະຊົນເພື່ອເສີມຂະຫຍາບກຳລັງແຮງ, ແຫຼ່ງກຳລັງຈາກລັດ ແລະ ວິສາສຫະກິດ. ສານຂອງນາຍົກລັດຖະມົນຕີຫວຽດນາມໄດ້ຮັບການຊົມເຊີຍ, ສະໜັບສະໜູນ ແລະ ຕີລາຄາສູງຈາກກອງປະຊຸມ.

ການເຂົ້າຮ່ວມກອງປະຊຸມສຸດຍອດອາຊຽນຄັ້ງທີ 43 ແລະ ກອງປະຊຸມສຸດຍອດອື່ນໆຂອງທ່ານນາຍົກລັດຖະມົນຕີ ຟາມມິງຈິງ ແລະ ຄະນະຜູ້ແທນຂອງຫວຽດນາມໄດ້ຮັບຜົນສຳເລັດຢ່າງຈົບງາມ, ບັນລຸໝາກຜົນຫຼາຍດ້ານທີ່ໃຫຍ່ຫຼວງ, ແທດຈິງ, ມີຄວາມໝາຍສພໍຳຄັນ, ໄດ້ຢືນຢັນເຖິງບົດບາດຂອງຫວຽດນາມໃນເວທີອາຊຽນ ແລະ ການຮ່ວມມືໃນພາກພື້ນ ແລະ ຍັງສືບຕໍ່ຢຶນຢັນວ່າ ຫວຽດນາມເປັນສະມາຊິກທີ່ຕັ້ງໜ້າ, ເປັນເຈົ້າການ, ມີຄວາມຮັບຜິດຊອບໃນປະຊາຄົມອາຊຽນ ແລະ ສາກົນ ປະກອບສ່ວນຮັກສາສັນຕິພາບ, ຄວາມໝັ້ນຄົງ, ຄວາມສີວິໄລໃນພາກພື້ນ ແລະ ໃນໂລກ.

ລາກ່ອນ ອິນໂດເນເຊຍ ທີ່ສວຍງາມ, ນັດພົບກັນໃໝ່ ໃນໂອກາດກອງປະຊຸມສຸດຍອດອາຊຽນ 2024 ທີ່ລາວ.