ທີ່ການພົບປະເຈລະຈາ, ຫົວໜ້າຄະນະຜູ້ແທນຂອງສອງແຂວງໄດ້ແຈ້ງໃຫ້ກັນຊາບກ່ຽວກັບໝາກຜົນທີ່ບັນລຸໄດ້ຈຳນວນໜຶ່ງໃນການປະຕິບັດບົດບັນທຶກຮ່ວມມືກ່ຽວກັບວຽກງານຊາຍແດນລະຫວ່າງສອງແຂວງທີ່ໄດ້ເຊັນໃນວັນທີ 30 ຕຸລາ 2019 ທີ່ນະຄອນໄກສອນ ພົມວິຫານ, ແຂວງສະຫວັນນະເຂດ. ຕາມນັ້ນແລ້ວ, ເຖິງວ່າຖືກຜົນສະທ້ອນຈາກພະຍາດໂຄວິດ-19 ກໍຕາມ, ແຕ່ສອງແຂວງກວາງບິ່ງ ແລະ ສະຫວັນນະເຂດ ຍັງຄົງຮັກສາສາຍພົວພັນຮ່ວມມືໃນບັນດາຂົງເຂດປ້ອງກັນປະເທດຊາດ - ປ້ອງກັນຄວາມສະຫງົບ ແລະ ເຂດຊາຍແດນລະຫວ່າງອົງການປົກຄອງທຸກຂັ້ນ, ກຳລັງສະເພາະກິດເປັນຢ່າງດີ.
 |
| ຄະນະຜູ້ແທນຊາຍແດນແຂວງກວາງບິ່ງ ແລະ ຄະນະຜູ້ແທນຊາຍແດນແຂວງສະຫວັນນະເຂດ(ພາບ: Minh Huyền/quangbinh.gov.vn) |
ສອງແຂວງກວາງບິ່ງ ແລະ ສະຫວັນນະເຂດ ກໍເອົາໃຈໃສ່ໃນການຜັນຂະຫຍາຍວຽກງານໂຄສະນາເຜີຍແຜ່ ແລະ ສຶກສາກົດໝາຍກ່ຽວກັບຊາຍແດນແຫ່ງຊາດໃຫ້ແກ່ພະນັກງານ ແລະ ປະຊາຊົນສອງຟາກຊາຍແດນ ກໍາແໜ້ນ ແລະ ປະຕິບັດບັນດາເອກະສານນິຕິກຳທີ່ສອງປະເທດລົງນາມ ແລະ ກົດໝາຍຂອງແຕ່ລະປະເທດຢ່າງເຂັ້ມງວດ ໂດຍຜ່ານຫຼາຍຮູບແບບ.
ຄວາມໝັ້ນຄົງທາງດ້ານການເມືອງ - ຄວາມເປັນລະບຽບຮຽບຮ້ອຍ ແລະ ຄວາມປອດໄພທາງສັງຄົມ ຢູ່ເຂດຊາຍແດນລະຫວ່າງສອງແຂວງ ສືບຕໍ່ໄດ້ຮັບການຮັກສາ; ລະບົບເສັ້ນຊາຍແດນ, ຫຼັກແດນຂອງຊາດຈະໄດ້ຮັບການຄຸ້ມຄອງ ແລະ ປົກປັກຮັກສາຄືສະພາບເດີມ; ກໍາລັງປ້ອງກັນຊາຍແດນຂອງສອງຝ່າຍ ຕ້ອງແລກປ່ຽນຂໍ້ມູນ, ສະພາບການເປັນປະຈໍາ, ຜັນຂະຫຍາຍປະຕິບັດບັນດາເນື້ອໃນຮ່ວມມືຢ່າງແໜ້ນແຟ້ນ, ມີປະສິດທິຜົນ, ສົມທົບກັນເພື່ອແກ້ໄຂບັນດາກໍລະນີທີ່ເກີດຂຶ້ນຢູ່ຊາຍແດນເປັນຢ່າງດີ. ກຳລັງທີ່ມີໜ້າທີ່ຂອງສອງແຂວງໄດ້ສົມທົບກັນເປັນຢ່າງດີໃນການລາດຕະເວນສອງຝ່າຍເພື່ອປົກປັກຮັກສາເສັ້ນຊາຍແດນ ແລະ ຫຼັກແດນຂອງຊາດ.
 |
| ການເຊັນບົດບັນທຶກລະຫວ່າງຄະນະຜູ້ແທນຊາຍແດນແຂວງກວາງບິ່ງ ແລະ ຄະນະຜູ້ແທນຊາຍແດນແຂວງສະຫວັນນະເຂດ(ພາບ: Minh Huyền/quangbinh.gov.vn) |
ພ້ອມກັນນັ້ນ, ສອງແຂວງກໍໄດ້ສົມທົບກັນຢ່າງແໜ້ນແຟ້ນໃນການປ້ອງກັນ ແລະ ຄວບຄຸມພະຍາດໂຄວິດ-19; ຕ້ານອາດຊະຍາກຳຂ້າມຊາຍແດນ ແລະ ໃນຂົງເຂດຊາຍແດນ. ອົງການທຸກຂັ້ນຂອງສອງແຂວງ ກໍມີນະໂຍບາຍ ແລະ ວິທີການລົງທຶນກໍ່ສ້າງພື້ນຖານໂຄງລ່າງ, ພັດທະນາເສດຖະກິດ - ສັງຄົມ, ລົບລ້າງຄວາມອຶດຫິວ, ຫຼຸດຜ່ອນຄວາມທຸກຍາກຢູ່ເຂດຊາຍແດນ, ປະກອບສ່ວນເຂົ້າໃນການປັບປຸງຊີວິດການເປັນຢູ່ຂອງປະຊາຊົນຢູ່ສອງຟາກຊາຍແດນ. ນອກຈາກນັ້ນ, ສອງແຂວງ ຍັງໄດ້ສົມທົບກັນປະຕິບັດຂໍ້ຕົກລົງກ່ຽວກັບການແກ້ໄຂບັນຫາອົບພະຍົບແບບເສລີ ແລະ ແຕ່ງງານໂດຍບໍ່ຈົດທະບຽນສົມລົດຢູ່ໃນເຂດຊາຍແດນຫວຽດນາມ-ລາວ, ສະກັດກັ້ນຄົນອົບພະຍົບຄືນໃໝ່ແບບເສລີ, ຄົນອົບພະຍົບໃໝ່ແບບເສລີ ແລະ ແຕ່ງງານໂດຍບໍ່ຈົດທະບຽນສົມລົດຢູ່ໃນເຂດຊາຍແດນ.
ທີ່ການພົບປະເຈລະຈາ, ສອງຝ່າຍໄດ້ດໍາເນີນການແລກປ່ຽນ, ປຶກສາຫາລື ແລະ ຕົກລົງເປັນເອກະພາບກ່ຽວກັບເນື້ອໃນການຮ່ວມມືໃນໄລຍະຈະມາເຖິງ. ລະອຽດ, ສອງຝ່າຍສືບຕໍ່ສົມທົບກັນຢ່າງແໜ້ນແຟ້ນ, ເປັນປົກກະຕິ ແລະ ມີປະສິດທິຜົນລະຫວ່າງອົງການປົກຄອງທຸກຂັ້ນ ແລະ ກໍາລັງຄຸ້ມຄອງ, ປົກປັກຮັກສາເຂດຊາຍແດນຂອງສອງແຂວງ; ຮັກສາການພົບປະ ປະຈຳໄລຍະ ແລະ ກະທັນຫັນ; ເພີ່ມທະວີການແລກປ່ຽນຂໍ້ມູນລະຫວ່າງອົງການປົກຄອງທຸກຂັ້ນ, ອົງການວິຊາສະເພາະ ແລະ ກໍາລັງສະເພາະກິດປ້ອງກັນຊາຍແດນຂອງສອງແຂວງ; ຈັດຕັ້ງປະຕິບັດຢ່າງມີປະສິດທິຜົນກ່ຽວກັບວຽກງານໂຄສະນາ, ເຜີຍແຜ່ ແລະ ສຶກສາກ່ຽວກັບຂໍ້ກໍານົດຂອງກົດຫມາຍຂອງແຕ່ລະປະເທດ.
 |
| ປະທານຄະນະກໍາມະການປົກຄອງແຂວງກວາງບິ່ງມອບໃບຍ້ອງຍໍໃຫ້ແກ່ໝູ່ຄະນະ ແລະ ບຸກຄົນແຂວງສະຫວັນນະເຂດທີ່ມີຜົນງານດີເດັ່ນໃນການຮັກສາ ແລະ ພັດທະນາສາຍພົວພັນມິດຕະພາບ, ຄວາມສາມັກຄີແບບພິເສດລະຫວ່າງແຂວງກວາງບິ່ງ ແລະ ແຂວງສະຫວັນນະເຂດ(ພາບ: Minh Huyền/quangbinh.gov.vn) |
ພ້ອມກັນນັ້ນ, ສອງແຂວງ ຍັງສ້າງເງື່ອນໄຂສະດວກໃຫ້ແກ່ປະຊາຊົນ ແລະ ວິສາຫະກິດລົງທຶນຜະລິດ, ດຳເນີນທຸລະກິດ, ພັດທະນາເສດຖະກິດ, ວັດທະນະທຳ - ສັງຄົມຢູ່ເຂດຊາຍແດນ, ເປັນຕົ້ນຄື ໜູນຊ່ວຍວິສາຫະກິດ ກວາງບິ່ງ ປະຕິບັດໂຄງການພະລັງງານລົມຢູ່ເຂດ ລະວິນ ແລະ ເຂດທີ່ຢູ່ອ້ອມຂ້າງ ເມືອງເຊໂປນ, ແຂວງສະຫວັນນະເຂດ (ໂຄງການເຂື່ອນໄຟຟ້າພະລັງງານລົມ AMI Savannakhet) ເພື່ອຮັບປະກັນຄວາມໝັ້ນຄົງດ້ານພະລັງງານ, ພັດທະນາເສດຖະກິດ, ປະກອບສ່ວນເຂົ້າໃນການພັດທະນາພື້ນຖານໂຄງລ່າງຢູ່ເຂດຊາຍແດນຂອງສອງຝ່າຍ, ໂດຍສະເພາະແມ່ນການຄົມມະນາຄົມ, ຜ່ານນັ້ນ ກໍພັດທະນາເສດຖະກິດ - ສັງຄັມໃນຂົງເຂດນີ້...
ໃນໄລຍະຈະມາເຖິງ, ການພົບປະເຈລະຈາຄັ້ງຕໍ່ໄປລະຫວ່າງຄະນະຜູ້ແທນເຂດຊາຍແດນຂອງສອງແຂວງໃນປີ 2023 ຈະໄດ້ຈັດຂຶ້ນຢູ່ນະຄອນໄກສອນພົມວິຫານ, ແຂວງສະຫວັນນະເຂດ.
ຫອມມາລາ
