 |
| ຂໍ້ລິເລີ່ມສ້າງເປົ້າໝາຍ “30% ເນື້ອທີ່ມະຫາສະໝຸດໄດ້ຮັບການປົກປ້ອງ ໃນປີ 2030” |
ກົມອະນຸລັກທຳມະຊາດ ແລະ ຊີວະນາໆພັນ (ກົມໃຫຍ່ສິ່ງແວດລ້ອມ) ຫາກໍອອກແຈ້ງການວ່າດ້ວຍລັດຖະບານໄດ້ມີຂໍ້ຕົກລົງເຫັນດີນະໂຍບາຍເຂົ້າຮ່ວມສະຫະພັນມະຫາສະໝຸດທົ່ວໂລກ (GOA) ຂອງກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ພ້ອມກັນນັ້ນ ກໍສະໜັບສະໜູນຂໍ້ລິເລີ່ມສ້າງເປົ້າໝາຍ “30% ເນື້ອທີ່ມະຫາສະໝຸດໄດ້ຮັບການປົກປ້ອງ ໃນປີ 2030” (ຂໍ້ລິເລີ່ມ 30x30).
ລະອຽດ, ໃນຕອນເຊົ້າວັນທີ 21 ທັນວາ, ຜູ້ຕາງໜ້າກົມອະນຸລັກທຳມະຊາດ ແລະ ຊີວະນາໆພັນ ເນັ້ນໜັກວ່າ ການກາຍເປັນສະມາຊິກຂອງ GOA ຈະແມ່ນບາດກ້າວໃໝ່ຂອງຫວຽດນາມ ໃນການເພີ່ມທະວີການພົວພັນຄູ່ຮ່ວມມືເພື່ອປົກປັກຮັກສາຊີວະນາໆພັນ, ເຊື່ອມຕໍ່ກັບປະຊາຄົມສາກົນເພື່ອແລກປ່ຽນປະສົບການ; ຈາກນັ້ນ ກໍຊ່ວຍຍົກສູງທີ່ຕັ້ງຂອງຫວຽດນາມໃນການອະນຸລັກຮັກສາຊີວະນາໆພັນໃນທົ່ວໂລກ.
ຕາມກົມອະນຸລັກທຳມະຊາດ ແລະ ຊີວະນາໆພັນ, ຂໍ້ລິເລີ່ມ 30x30 ແມ່ນໜຶ່ງໃນບັນດາເປົ້າໝາຍສຳຄັນຂອງຂອບຊີວະນາໆພັນທົ່ວໂລກ, ເພື່ອຮຽກຮ້ອງທົ່ວໂລກອະນຸລັກຮັກສາ 30% ເນື້ອທີ່ດິນ ແລະ ທະເລຂອງໂລກ ໂດຍຜ່ານການສ້າງຕັ້ງເຂດສະຫງວນ (PA) ແລະ ບັນດາມາດຕະການອະນຸລັກໃຫ້ມີປະສິດທິຜົນໂດຍອີງໃສ່ເຂດອື່ນໆ (OECMs).
ຂໍ້ລິເລີ່ມ 30x30 ຄາດວ່າຈະກາຍເປັນທິດທາງໃໝ່, ພິເສດແມ່ນສືບຕໍ່ຊຸກຍູ້ທົ່ວໂລກອະນຸລັກຮັກສາສິ່ງແວດລ້ອມທາງທະເລດ້ວຍຜົນງານທີ່ໃຫຍ່ກວ່າ.
ການກາຍເປັນສະມາຊິກຂອງພັນທະມິດ GOA ແລະ ການເຂົ້າຮ່ວມປະຕິບັດຂໍ້ລິເລີ່ມ 30x30, ຫວຽດນາມ ໄດ້ປະມວມບັນດາເປົ້າໝາຍທີ່ກ່ຽວຂ້ອງເຂົ້າໃນຍຸດທະສາດແຫ່ງຊາດກ່ຽວກັບຊີວະນາໆພັນ, ໃນນັ້ນມີການເພີ່ມທະວີເນື້ອທີ່ສະຫງວນທາງທະເລ ແລະ ແຄມທະເລແຕ່ 3 – 5% ໃນປີ 2030.
ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ມີບົດບາດແມ່ນອົງການປະສານງານຈັດຕັ້ງປະຕິບັດຍຸດທະສາດແຫ່ງຊາດກ່ຽວກັບຊີວະນາໆພັນຮອດປີ 2030, ກໍຄືຊຸກຍູ້ການນຳໃຊ້ OECM ຢູ່ ຫວຽດນາມ ເພື່ອປະກອບສ່ວນເຂົ້າໃນການປະຕິບັດເປົ້າໝາຍຂໍ້ລິເລີ່ມ 30x30 ໃນທົ່ວໂລກໃຫ້ສໍາເລັດຜົນ.
ໃນກອງປະຊຸມ ບັນດາຝ່າຍທີ່ເຂົ້າຮ່ວມສົນທິສັນຍາຊີວະນາໆພັນ ຄັ້ງທີ 15 ເຊິ່ງກໍາລັງດໍາເນີນຢູ່ Montreal (Canada), ເປົ້າໝາຍດັ່ງກ່າວຍັງຈະໄດ້ຮັບການປຶກສາຫາລືຈາກບັນດາຜູ້ນຳໂລກ ເພື່ອໃຫ້ທິດທາງໃນການປົກປັກຮັກສາມະຫາສະໝຸດໃຫ້ມີປະສິດທິຜົນທີ່ສຸດ.
ສ່ວນພວກເຮົາ, ໃນເບື້ອງຕົ້ນ, ຫວຽດນາມ ຈະເຂົ້າຮ່ວມບັນດາການແລກປ່ຽນທີ່ກ່ຽວຂ້ອງ ເພື່ອມີການກະກຽມໃຫ້ດີທີ່ສຸດ ກ່ອນທີ່ຈະກາຍເປັນສະມາຊິກຂອງພັນທະມິດ GOA ຢ່າງເປັນທາງການ.
ຢູ່ນອກກອງປະຊຸມ, ຄະນະຫວຽດນາມ ກໍຈະເຮັດວຽກສອງຝ່າຍກັບບັນດາອົງຈັດຕັ້ງຄູ່ຮ່ວມມື ເພື່ອລະດົມກຳລັງໜູນຊ່ວຍໃຫ້ ຫວຽດນາມ ປະຕິບັດເປົ້າໝາຍ 30x30 ແລະ ຍຸດທະສາດແຫ່ງຊາດກ່ຽວກັບຊີວະນາໆພັນຮອດປີ 2030, ມຸ່ງໄປເຖິງປີ 2050.
ພາຍຫຼັງ ທ່ານຮອງນາຍົກລັດຖະມົນຕີ ຟ້າມບິງມິງ ຕົກລົງເຫັນດີນະໂຍບາຍເຂົ້າຮ່ວມສະຫະພັນມະຫາສະໝຸດໂລກ, ກະຊວງຊັບພະຍາກອນ ແລະ ສິ່ງແວດລ້ອມ ຈະສືບຕໍ່ປະຕິບັດບັນດາລະບຽບການທີ່ກ່ຽວຂ້ອງເພື່ອຂຶ້ນທະບຽນເຂົ້າຮ່ວມສະຫະພັນນີ້ ຕາມຂໍ້ຕົກລົງສາກົນ 2020.
ຫອມມາລາ
