ການຮ່ວມມືການຊ່ວຍເຫຼືອສັງຄົມລະຫວ່າງຫວຽດນາມ ແລະ ລາວ ນັບມື້ນັບແທດຈິງ ແລະ ມີປະສິດທິຜົນ

16:22 | 01/12/2022

ຍສໝ - ທ່ານຮອງລັດຖະມົນຕີກະຊວງແຮງງານ - ທະຫານເສຍອົງຄະ ແລະ ສັງຄົມ ຫວຽດນາມ ຫງວຽນບ໋າຮວານ ໃຫ້ຮູ້ວ່າ: ການຮ່ວມມືດ້ານແຮງງານ, ວຽກເຮັດງານທຳ ແລະ ການຮັບປະກັນຊີວິດສັງຄົມ ຫວຽດນາມ - ລາວ ນັບມື້ນັບແທດຈິງ.

	ຊຸກຍູ້ການພົວພັນຮ່ວມມືທີ່ເປັນມູນເຊື້ອລະຫວ່າງຫວຽດນາມ ແລະ ອັງໂກລາ
	Wallonie – Bruxelles ສືບຕໍ່ຮ່ວມເດີນທາງ, ໜູນຊ່ວຍ ຫວຽດນາມ ພັດທະນາ ແບບຍືນຍົງ

ການຮ່ວມມືການຊ່ວຍເຫຼືອສັງຄົມລະຫວ່າງຫວຽດນາມ ແລະ ລາວ ນັບມື້ນັບແທດຈິງ ແລະ ມີປະສິດທິຜົນ

ທ່ານຮອງລັດຖະມົນຕີກະຊວງແຮງງານ - ທະຫານເສຍອົງຄະ ແລະ ສັງຄົມ ຫວຽດນາມ ຫງວຽນບ໋າຮວານ ກ່າວຄຳເຫັນໄຂກອງປະຊຸມ

ທີ່ກອງປະຊຸມເຈົ້າໜ້າທີ່ອາວຸໂສ ຫວຽດນາມ - ລາວ ກ່ຽວກັບແຮງງານ, ສະຫວັດດີການສັງຄົມ ແລະ ພັດທະນາແຫຼ່ງຊັບພະຍາກອນມະນຸດ ໄດ້ຈັດຂຶ້ນຢູ່ແຂວງ ກວາງນິງ ໃນວັນທີ 28 ພະຈິກ, ທ່ານຮອງລັດຖະມົນຕີກະຊວງແຮງງານ - ທະຫານເສຍອົງຄະ ແລະ ສັງຄົມ ຫວຽດນາມ ຫງວຽນບ໋າຮວານ ໃຫ້ຮູ້ວ່າ: ການຮ່ວມມືດ້ານແຮງງານ, ວຽກເຮັດງານທຳ ແລະ ການຮັບປະກັນຊີວິດສັງຄົມ ຫວຽດນາມ - ລາວ ນັບມື້ນັບແທດຈິງ.

ທ່ານກ່າວວ່າ: ການຮ່ວມມືລະຫວ່າງສອງກະຊວງໃນຫຼາຍປີຜ່ານມານັບມື້ນັບແທດຈິງ ແລະ ມີປະສິດທິຜົນ. 2 ຝ່າຍໄດ້ແລກປ່ຽນ, ແບ່ງປັນ ແລະ ຖອດຖອນບົດຮຽນໃນການສ້າງ ແລະ ປະຕິບັດກົດໝາຍ, ນະໂຍບາຍກ່ຽວກັບບັນດາຂົງເຂດຄຸ້ມຄອງລັດ ຕາມຂອບເຂດຄວາມຮັບຜິດຊອບຂອງສອງກະຊວງກ່ຽວກັບແຮງງານ, ວຽກເຮັດງານທຳ ແລະ ການຮັບປະກັນຊີວິດສັງຄົມ. 2 ຝ່າຍໄດ້ໜູນຊ່ວຍດ້ານຈິດໃຈ ແລະ ວັດຖຸ, ເຕັກນິກ ແລະ ການເງິນໃຫ້ແກ່ບັນດາການເຄື່ອນໄຫວທີ່ກ່ຽວຂ້ອງ, ພ້ອມກັນສະໜັບສະໜູນທັດສະນະ ແລະ ຂໍ້ລິເລີ່ມຂອງ ຫວຽດນາມ ແລະ ລາວ ໃນຫຼາຍເວທີປາໄສພາກພື້ນຄື ອາຊຽນ, ILO ແລະ ສາກົນອື່ນໆ.

ຕໍ່ບັນດາສິ່ງທ້າທາຍໃນຂົງເຂດແຮງງານ, ວຽກເຮັດງານທຳ ແລະ ການຮັບປະກັນຊີວິດຂອງຍຸກດິຈິຕອລ, ການປ່ຽນແປງຂອງດິນຟ້າອາກາດ ຫຼື ໂລກລະບາດ, ສອງກະຊວງຕ້ອງຜັນຂະຫຍາຍປັບປຸງກົດໝາຍ, ນະໂຍບາຍ, ໂຄງການ ແລະ ການເຄື່ອນໄຫວເພື່ອປັບຕົວເຂົ້າກັບສະພາບການໃໝ່.

ທີ່ກອງປະຊຸມ, ທ່ານ ປະເດີມພອນ ສົນທະນີ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ລາວ ໃຫ້ຮູ້ວ່າ: ໂລກລະບາດ Covid – 19 ສົ່ງຜົນກະທົບເຖິງສອງປະເທດຫວຽດນາມ - ລາວ, ພິເສດແມ່ນໃນບັນຫາແຮງງານ, ສະຫວັດດີການສັງຄົມ ແລະ ຊັບພະຍາກອນມະນຸດ. ເຖິງຢ່າງໃດກໍຕາມ, ການພົວພັນມິດຕະພາບທີ່ເປັນມູນເຊື້ອແບບພິເສດ ແລະ ການຮ່ວມມືຮອບດ້ານລະຫວ່າງພັກ, ລັດ ແລະ ປະຊາຊົນຫວຽດນາມ - ລາວ ໄດ້ພັດທະນາຢ່າງເຂັ້ມແຂງໃນທຸກຂົງເຂດ, ໄດ້ນຳມາເຊິ່ງຜົນປະໂຫຍດໃຫ້ທັງສອງປະເທດ. ພິເສດແມ່ນການຈັດຕັ້ງ ແລະ ຜັນຂະຫຍາຍບັນດາຂໍ້ຕົກລົງຮ່ວມມື ຫວຽດນາມ - ລາວ ເປັນຕົ້ນແມ່ນບັນດາຂໍ້ຕົກລົງດ້ານແຮງງານ ແລະ ສະຫວັດດີການສັງຄົມ ທີ່ອາດສາມາດເຂົ້າສູ່ລວງເລິກ ແລະ ບັນລຸໄດ້ໝາກຜົນທີ່ແທດຈິງຫຼາຍຢ່າງ.

ທ່ານ ປະເດີມພອນ ສົນທະນີ ຮອງລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມລາວ ໄດ້ກ່າວວ່າ: ກອງປະຊຸມກ່ຽວກັບແຮງງານ, ສະຫວັດດີການສັງຄົມ ແລະ ການພັດທະນາຊັບພະຍາກອນມະນຸດ ແມ່ນໂອກາດເພື່ອໃຫ້ຄະນະຜູ້ແທນຂອງສອງກະຊວງ ໄດ້ພົບປະ ແລະ ແລກປ່ຽນວຽກງານກ່ຽວກັບຂົງເຂດດັ່ງກ່າວໂດຍກົງ ພາຍຫຼັງຈາກຜົນກະທົບທາງລົບຂອງ Covid-19. ນີ້ແມ່ນຈຸດເວລາສຳຄັນເພື່ອໃຫ້ 2 ກະຊວງກະກຽມບັນດາເນື້ອໃນໃຫ້ກອງປະຊຸມລັດຖະມົນຕີພິເສດ, ຜ່ານບັນດາການເຄື່ອນໄຫວຄົ້ນຄ້ວາ, ແລກປ່ຽນ, ແບ່ງປັນບັນດາຂໍ້ມູນຂ່າວສານທີ່ເປັນປະໂຫຍດກ່ຽວກັບບັນດານະໂຍບາຍ, ລະບຽບການກ່ຽວກັບແຮງງານ, ສະຫວັດດີການສັງຄົມ ແລະ ພັດທະນາແຫຼ່ງຊັບພະຍາກອນມະນຸດ. ພ້ອມກັນນັ້ນ, ກໍ່ກວດກາຄືນບັນດາບົດບັນທຶກກອງປະຊຸມລັດຖະມົນຕີ ຄັ້ງທີ 7, ຜ່ານນັ້ນກໍ່ເຫັນໄດ້ບັນດາໝາກຜົນ, ຈຸດດີ, ຈຸດອ່ອນ ແລະ ການກຳນົດທິດເນື້ອໃນການຮ່ວມມືໃນໄລຍະຈະມາເຖິງໃຫ້ເໝາະສົມກັບສະພາບຕົວຈິງຂອງແຕ່ລະປະເທດ.

ບຸນຄົງ