| ຫວຽດນາມ ສືບຕໍ່ສະໜັບສະໜູນພາລະກິດແຫ່ງການປ່ຽນແປງໃໝ່ຂອງລາວ ຢ່າງແຮງ ແລະ ຮອບດ້ານ | |
| ສ້າງຕັ້ງຄະນະຊີ້ນຳກ່ຽວກັບວຽກງານປົກປ້ອງພົນລະເມືອງຫວຽດນາມ ຢູ່ຕ່າງປະເທດ |
 |
| ຮອງລັດຖະມົນຕີກະຊວງການຕ່າງປະເທດຫວຽດນາມ ຟ້າມກວາງຢ້ຽວ ແລະ ຮອງລັດຖະມົນຕີກະຊວງການຕ່າງປະເທດລາວ ໂພໄຊ ໄຂຄຳພິທູນ |
ເຂົ້າຮ່ວມມີທ່ານ ແສງເພັດ ຮຸ່ງບຸນເຍືອງ ເອກອັກຄະລັດຖະທູດລາວ ປະຈໍາ ຫວຽດນາມ ແລະ ການນໍາຫຼາຍທ່ານທີ່ມາຈາກຫຼາຍກົມກອງຂອງສອງກະຊວງການຕ່າງປະເທດ ຫວຽດນາມ ແລະ ລາວ.
ສອງຝ່າຍສະແດງຄວາມພາກພູມໃຈກ່ຽວກັບການພັດທະນາຢ່າງຕັ້ງໜ້າ ແລະ ຍືນຍົງຂອງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານຫວຽດນາມ - ລາວ, ໃນນັ້ນມີການປະກອບສ່ວນຂອງສອງກະຊວງການຕ່າງປະເທດ.
ພິເສດ, ກະຊວງການຕ່າງປະເທດສອງປະເທດໄດ້ສົມທົບກັບບັນດາກະຊວງ, ຂະແໜງການ, ທ້ອງຖິ່ນທີ່ກ່ຽວຂ້ອງຂອງສອງປະເທດຈັດຕັ້ງສຳເລັດຫຼາຍການເຄື່ອນໄຫວທີ່ມີຄວາມໝາຍໃນ “ປີສາມັກຄີມິດຕະພາບຫວຽດນາມ - ລາວ, ລາວ - ຫວຽດນາມ 2022” ເພື່ອສະເຫຼີມສະຫຼອງ 60 ປີແຫ່ງວັນສ້າງຕັ້ງການພົວພັນທາງການທູດ ແລະ ສະເຫຼີມສະຫຼອງ 45 ປີແຫ່ງວັນເຊັນສົນທິສັນຍາໄມຕີຈິດມິດຕະພາບແລະການຮ່ວມມືລະຫວ່າງສອງປະເທດ.
2 ຝ່າຍກໍ່ສະແດງຄວາມເພິ່ງພໍໃຈຕໍ່ບັນດາໝາກຜົນທີ່ບັນລຸໄດ້ໃນຂົງເຂດການຮ່ວມມືດ້ານປ້ອງກັນຊາດ, ປ້ອງກັນຄວາມສະຫງົບ. ການຮ່ວມມືດ້ານເສດຖະກິດ, ການຄ້າ ແລະ ການລົງທຶນໄດ້ຮັບຄວາມຄືບໜ້າຢ່າງຕັ້ງໜ້າ; ວົງເງິນການຄ້າສອງສົ້ນໃນ 10 ເດືອນຕົ້ນປີ 2022 ບັນລຸກວ່າ 1,4 ຕື້ USD, ເພີ່ມຂຶ້ນ 28,2% ເມື່ອທຽບໃສ່ໄລຍະດຽວກັນຂອງປີ 2021, ຫວຽດນາມ ສືບຕໍ່ແມ່ນປະເທດລົງທຶນໂດຍກົງໃຫຍ່ອັນດັບ 3 ຢູ່ ລາວ. ບັນດາຂົງເຂດຮ່ວມມືສຳຄັນອື່ນໆຄື: ການສຶກສາ - ບຳລຸງສ້າງ, ພະລັງງານ, ຄົມມະນາຄົມຂົນສົ່ງ, ກະສິກຳ, ວັດທະນະທຳ, ທ່ອງທ່ຽວ, ການຮ່ວມມືທ້ອງຖິ່ນ... ສືບຕໍ່ໄດ້ຮັບຄວາມສົນໃຈ ແລະ ຊຸກຍູ້.
ທ່ານຮອງລັດຖະມົນຕີສອງປະເທດໄດ້ເຫັນດີເປັນເອກະພາບກ່ຽວກັບການກຳນົດທິດ ແລະ ບັນດາມາດຕະການເພື່ອແນໃສ່ເສີມຂະຫຍາຍບົດບາດຂອງກະຊວງການຕ່າງປະເທດສອງປະເທດ ໃນການປະກອບສ່ວນປັບປຸງການພົວພັນດ້ານການເມືອງທີ່ໃກ້ຊິດຕິດແທດ, ມີຄວາມໄວ້ເນື້ອເຊື່ອໃຈ, ກໍ່ຄືຊຸກຍູ້ການຮ່ວມມືສອງຝ່າຍໃຫ້ຫຼາຍກວ່າອີກ.
ກ່ຽວກັບການຮ່ວມມືລະຫວ່າງສອງກະຊວງການຕ່າງປະເທດ ຫວຽດນາມ ແລະ ລາວ, 2 ຝ່າຍໄດ້ເຫັນດີເປັນເອກະສັນສືບຕໍ່ປະຕິບັດບັນດາຂໍ້ຕົກລົງຮ່ວມມືລະຫວ່າງ 2 ກະຊວງໄລຍະ 2021 – 2025; ຮັກສາເປັນປົກກະຕິ ແລະ ການເສີມຂະຫຍາຍບັນດາກົນໄກປຶກສາຫາລືຂັ້ນລັດຖະມົນຕີ ແລະ ຮອງລັດຖະມົນຕີຢ່າງມີປະສິດທິຜົນ; ເພີ່ມທະວີການແລກປ່ຽນຂໍ້ມູນຂ່າວສານ, ປະສົບການດ້ານວິຊາຊີບ ແລະ ການປະສານງານລະຫວ່າງສອງທຽບເທົ່າຂອງສອງກະຊວງ, ໂດຍສະເພາະແມ່ນວຽກງານຄົ້ນຄວ້າດ້ານນະໂຍບາຍ ແລະ ຍຸດທະສາດການຕ່າງປະເທດ, ການທູດເສດຖະກິດ, ກົງສຸນ, ປະຊາຊົນທີ່ຢູ່ຕ່າງປະເທດ, ຊາຍແດນ, ການຝຶກອົບຮົມ...
ບຸນຄົງ
