ຫວ່າງແລ້ວນີ້, ຢູ່ຮ່າໂນ້ຍ, ໃນຂອບເຂດກອງປະຊຸມໃຫຍ່ຄັ້ງທີ 22 ຂອງສະພາສັນຕິພາບໂລກ, ສະຫະພັນບັນດາອົງການຈັດຕັ້ງມິດຕະພາບ ຫວຽດນາມ ໄດ້ຈັດຕັ້ງລາຍການ “ພົບປະກັບຫວຽດນາມ” ເພື່ອແນໃສ່ສະໜອງບາງຂໍ້ມູນຂ່າວສານໂດຍສັງເຂບຢູ່ຫວຽດນາມ ໃຫ້ບັນດາຜູ້ແທນເຂົ້າຮ່ວມກອງປະຊຸມໃຫຍ່. ການພົບປະໂດຍທ່ານນາງ ຫງວຽນເຟືອງງາ, ປະທານສະຫະພັນບັນດາອົງການຈັດຕັ້ງມິດຕະພາບຫວຽດນາມ ແລະ ທ່ານ Iraklis Tsavdaridis, ເລຂາຜູ້ປະຈໍານການສະພາສັນຕິພາບໂລກ ເປັນປະທານຮ່ວມ.
 |
ຄູ່ຮ່ວມມືທີ່ໄວ້ເນື້ອເຊື່ອໃຈ, ສະມາຊິກທີ່ມີຄວາມຮັບຜິດຊອບຂອງປະຊາຄົມໂລກ
ທີ່ການຕ້ອນຮັບຄະນະຜູ້ແທນທີ່ມາຫວຽດນາມ ເຂົ້າຮ່ວມກອງປະຊຸມໃຫຍ່ຄັ້ງທີ 22 ຂອງສະພາສັນຕິພາບໂລກ, ທ່ານນາງ ຫງວຽນເຟືອງງາ ໄດ້ຂອບອົກຂອບໃຈການໜູນຊ່ວຍທີ່ສະພາສັນຕິພາບໂລກ ສະຫງວນໃຫ້ແກ່ປະຊາຊົນຫວຽດນາມ ໃນການຕໍ່ສູ້ຍາດເອົາເອກະລາດ, ອິດສະຫຼະພາບ, ສັນຕິພາບ ແລະ ທ້ອນໂຮມປະເທດຊາດເປັນເອກະພາບໃນເມື່ອກ່ອນ ແລະ ໃນພາລະກິດແຫ່ງການສ້າງສາ ແລະ ປ້ອງກັນປະເທດຊາດໃນປະຈຸບັນ.
ທີ່ການພົບປະ, ທ່ານນາງ ຫງວຽນເຟືອງງາ ໄດ້ແບ່ງປັນບັນດາຂໍ້ມູນຂ່າວສານໂດຍສັງເຂບກັບບັນດາຜູ້ແທນ ກ່ຽວກັບບັນດາຜົນງານພັດທະນາເສດຖະກິດ - ສັງຄົມ, ນະໂຍບາຍການຕ່າງປະເທດຂອງຫວຽດນາມ ແລະ ແນວທາງພັດທະນາຂອງປະເທດໃນໄລຍະຈະມາເຖິງ.
ທ່ານນາງ ຫງວຽນເຟືອງງາ, ປະທານສະຫະພັນບັນດາອົງການຈັດຕັ້ງມິດຕະພາບ ຫວຽດນາມ ກ່າວຄຳເຫັນທີ່ການພົບປະ (ພາບ: ທູຮ່າ).
ພາຍຫຼັງ 35 ປີແຫ່ງການປ່ຽນແປງໃໝ່, ເປີດກ້ວາງ ແລະ ເຊື່ອມໂຍງ, ຫວຽດນາມ ບັນລຸໄດ້ຜົນງານຫຼາຍຢ່າງຄື: ເສດຖະກິດ-ສັງຄົມທີຄວາມສະຖຽນລະພາບ ແລະ ນັບມື້ນັບພັດທະນາ, ຊີວິດການເປັນຢູ່ຂອງປະຊາຊົນໄດ້ຮັບການປັບປຸງ ແລະ ຍົກສູງຢ່າງຈະແຈ້ງທັງດ້ານມາດຖານຊີວິດການເປັນຢູ່ ແລະ ຄຸນນະພາບຊີວິດ; ລະບົບການເມືອງໄດ້ຮັບການກໍ່ສ້າງ ແລະ ປັບປຸງຢ່າງໝັ້ນຄົງເຂັ້ມແຂງ; ການປ້ອງກັນຊາດ-ປ້ອງກັນຄວາມສະຫງົບໄດ້ຮັບການຮັກສາ ແລະເພີ່ມທະວີ; ການພົວພັນຕ່າງປະເທດ ແລະ ການເຊື່ອມໂຍງເຂົ້າກັບສາກົນນັບມື້ນັບພັດທະນາຢ່າງບໍ່ຢຸດຢັ້ງ, ບົດບາດ ແລະ ທີ່ຕັ້ງສາກົນຂອງ ຫວຽດນາມ ນັບມື້ນັບໄດ້ຮັບການຍົກສູງຂຶ້ນ.
ຫວຽດນາມ ປະຕິບັດນະໂຍບາຍການຕ່າງປະເທດເອກະລາດ, ເປັນເຈົ້າຕົນເອງ, ສັນຕິພາບ, ຫັນເປັນຫຼາຍຮູບຫຼາຍແບບ, ຫຼາຍຝ່າຍ, ເປັນເຈົ້າການ ແລະ ຕັ້ງໜ້າເຊື່ອມໂຍງເຂົ້າກັບສາກົນຢ່າງຮອບດ້ານ, ເລິກເຊິ່ງກວ້າງຂວາງ, ມີປະສິດທິຜົນ, ເປັນເພື່ອນມິດ ຄູ່ຮ່ວມມືທີ່ໄວ້ເນື້ອເຊື່ອໃຈ, ເປັນສະມາຊິກທີ່ມີຄວາມຮັບຜິດຊອບຂອງປະຊາຄົມໂລກ. ໃນໄລຍະຜ່ານມາ, ການພົວພັນຕ່າງປະເທດ ແລະ ການຮ່ວມມືສາກົນຂອງຫວຽດນາມ ໄດ້ສືບຕໍ່ເປີດກວ້າງ ແລະ ເຂົ້າສູ່ລວງເລິກ, ສ້າງຂອບເຂດການພົວພັນທີ່ໝັ້ນຄົງ ແລະ ຍືນຍົງກັບບັນດາຄູ່ຮ່ວມມື ທັງສອງຝ່າຍ ແລະ ຫຼາຍຝ່າຍ, ບົນພື້ນຖານ 3 ເສົາຄ້ຳການພົວພັນຕ່າງປະເທດຂອງພັກ, ການທູດແຫ່ງລັດ ແລະ ການທູດປະຊາຊົນບັນລຸໄດ້ຜົນງານທີ່ສໍາຄັນຫຼາຍຢ່າງ.
ຫວຽດນາມ ໄດ້ສ້າງຕັ້ງການພົວພັນທາງການທູດກັບ 190/193 ປະເທດສະມາຊິກ ສປຊ, ໃນນັ້ນ ສ້າງການພົວພັນຄູ່ຮ່ວມມືຍຸດທະສາດກັບ 17 ປະເທດ, ຄູ່ຮ່ວມມືຮອບດ້ານກັບ 13 ປະເທດ. ຫວຽດນາມ ມີການພົວພັນກັບ 247 ພັກການເມືອງໃນ 111 ປະເທດ. ສະພາແຫ່ງຊາດຫວຽດນາມ ໄດ້ສ້າງ ແລະ ເພີ່ມພູນຄູນສ້າງການພົວພັນກັບບັນດາລັດຖະສະພາ, ສະພາແຫ່ງຊາດຂອງ 140 ກວ່າປະເທດໃນໂລກ.
ບັນດາຜູ້ແທນເຂົ້າຮ່ວມການພົບປະ. (ພາບ: ທູຮ່າ).
ບັນດາອົງການຈັດຕັ້ງປະຊາຊົນຫວຽດນາມ ຕັ້ງໜ້າສ້າງຕັ້ງການພົວພັນກັບບັນດາອົງການຈັດຕັ້ງປະຊາຊົນ ແລະ ອົງການບໍ່ຂຶ້ນກັບລັດຖະບານຕ່າງປະເທດ ນັບພັນອົງການ, ປະກອບສ່ວນສ້າງເຄືອຂ່າຍສາຍພົວພັນທີ່ໝັ້ນຄົງເຂັ້ມແຂງກັບຄູ່ຮ່ວມມືດັ້ງເດີມ ແລະ ຄູ່ຮ່ວມມືໃໝ່.
ມາຮອດປະຈຸບັນ, ຫວຽດນາມ ໄດ້ເຂົ້າຮ່ວມ ແລະ ເປັນສະມາຊິກຂອງກ່ວາ 70 ອົງການ ແລະ ເວທີປາໄສຫຼາຍຝ່າຍໃນພາກພື້ນ ແລະ ສາກົນ (ເຊັ່ນ: ສະຫະປະຊາຊາດ, ອາຊຽນ, APEC, ASEM, WTO). ໃນຕະຫຼອດ 10 ປີຜ່ານມາ, ຫວຽດນາມ ໄດ້ມານະພະຍາຍາມເຂົ້າຮ່ວມບັນດາລະບອບລະບຽບການສາກົນ, ປະຕິບັດຫຼາຍໜ້າທີ່ສຳຄັນ; ຕັ້ງໜ້າເຂົ້າຮ່ວມ ແລະ ປະກອບສ່ວນຢ່າງແທດຈິງເຂົ້າໃນບັນດາເວທີປາໄສຫຼາຍຝ່າຍຂອງບັນດາພັກການເມືອງ, ເຂົ້າຮ່ວມບັນດາຄວາມມານະພະຍາຍາມສາກົນເພື່ອຊຸກຍູ້ການປອງດອງກັນ, ແກ້ໄຂການປະທະກັນ, ສ້າງສັນສັນຕິພາບ...
ນັບແຕ່ປີ 2014, ຫວຽດນາມ ໄດ້ເຂົ້າຮ່ວມການເຄື່ອນໄຫວຮັກສາສັນຕິພາບຂອງ ສປຊ.
ລະດົມກໍາລັງໃຈ ແລະ ເພີ່ມພະລັງແຮງໃຫ້ ຫວຽດນາມ ບັນລຸໄດ້ບັນດາຄາດໝາຍທີ່ວາງອອກ
ໂດຍເຕື້ອງເຖິງເສັ້ນທາງການພັດທະນາຂອງປະເທດໃນໄລຍະຈະມາເຖິງ, ທ່ານນາງ ຫງວຽນເຟືອງງາ ຖືວ່າ ຫວຽດນາມ ຍາມໃດກໍ່ຕັດສິນໃຈກໍ່ສ້າງພື້ນຖານເສດຖະກິດເອກະລາດ, ເປັນເຈົ້າຕົນເອງ, ສາມາດຮັບມືກັບການຜັນແປຂອງພາຍນອກ ແລະ ຕັ້ງໜ້າເຊື່ອມໂຍງເຂົ້າກັບສາກົນຢ່າງເລິກເຊິ່ງກວ້າງຂວາງ, ເປັນເຈົ້າການ, ແທດຈິງ ແລະ ມີປະສິດທິຜົນ. ເປົ້າໝາຍແມ່ນການພັດທະນາປະເທດຊາດໃຫ້ຈະເລີນຮຸ່ງເຮືອງ ແລະ ມີຄວາມຜາສຸກ, ຮອດກາງສະຕະວັດທີ 20, ກາຍເປັນປະເທດພັດທະນາຕາມທິດສັງຄົມນິຍົມ.
ທ່ານນາງ ຫງວຽນເຟືອງງາ ໂອ້ລົມກັບບັນດາຜູ້ແທນພາຍຫຼັງການພົບປະ. (ພາບ: ທູຮ່າ).
ທີ່ການພົບປະແລກປ່ຽນ, ບັນດາຜູ້ແທນໄດ້ຕັ້ງຄຳຖາມຫຼາຍຂໍ້ກ່ຽວກັບສະພາບການພັດທະນາເສດຖະກິດ - ສັງຄົມ, ການສຶກສາສາກົນ, ການປົກປັກຮັກສາສິ່ງແວດລ້ອມ, ຄວາມສະເໝີພາບລະຫວ່າງຍິງຊາຍ, ນະໂຍບາຍການຕ່າງປະເທດຂອງຫວຽດນາມ... ແລະໄດ້ຮັບການຕອບກັບບົນຈິດໃຈເປີດອົກເປີດໃຈ, ມີຄວາມໄວ້ເນື້ອເຊື່ອໃຈ.
ທ່ານນາງປະທານສະຫະພັນບັນດາອົງການຈັດຕັ້ງມິດຕະພາບ ຫວຽດນາມ ຫງວຽນເຟືອງງາ ຂອບອົກຂອບໃຈບັນດາຜູ້ແທນທີ່ໄດ້ມີຄວາມເອົາໃຈໃສ່, ສະໜັບສະໜູນພັກ, ລັດ ແລະ ປະຊາຊົນ ຫວຽດນາມ ກໍຄືໃນພາລະກິດແຫ່ງການສ້າງສາ ແລະ ປ້ອງກັນປະເທດຊາດ ເຊິ່ງປະຊາຊົນຫວຽດນາມ ພວມປະຕິບັດ.
ການພົບປະກັບຫວຽດນາມ: ພົບປະແລກປ່ຽນຢ່າງເປີດອົກເປີດໃຈ, ມີຄວາມໄວ້ເນື້ອເຊື່ອໃຈກ່ຽວກັບສະພາບການຢູ່ຫວຽດນາມ
ທ່ານ Iraklis Tsavdaridis, ເລຂາຜູ້ປະຈໍາການສະພາສັນຕິພາບໂລກ ໄດ້ມອບຂອງຂວັນທີ່ລະນຶກໃຫ້ແກ່ທ່ານນາງ ຫງວຽນເຟືອງງາ, ປະທານສະຫະພັນບັນດາອົງການຈັດຕັ້ງມິດຕະພາບຫວຽດນາມ. (ພາບ: ທູຮ່າ).
ທ່ານນາງຢືນຢັນວ່າ: “ການສະໜັບສະໜູນ ແລະ ການຊ່ວຍເຫຼືອຂອງບັນດາຜູ້ແທນແມ່ນແຫຼ່ງລະກົມກໍາລັງໃຈໃຫ້ແກ່ພວກຂ້າພະເຈົ້າ, ແມ່ນປັດໄຈຕັດສິນໃຈເພື່ອເພີ່ມພະລັງແຮງໃຫ້ພວກຂ້າພະເຈົ້າບັນລຸໄດ້ບັນດາເປົ້າໝາຍທີ່ວາງໄວ້. ພ້ອມທັງຊ່ວຍພວກຂ້າພະເຈົ້າມີກ້າວໜ້າທີ່ໝັ້ນຄົງກວ່າ ແລະ ກ້າວໄປໄວກວ່າໃນເສັ້ນທາງທີ່ໄດ້ເລືອກເຟັ້ນ, ສ້າງປະເທດສັງຄົມນິຍົມຫວຽດນາມທີ່ມີໝັ້ນຄົງເຂັ້ມແຂງ ແລະ ຮັ່ງມີ, ວັດທະນາຖາວອນ ແລະ ສືບຕໍ່ປະກອບສ່ວນຢ່າງຕັ້ງໜ້າ ແລະ ມີປະສິດທິຜົນເຂົ້າໃນການຕໍ່ສູ້ລວມຂອງປະຊາຊົນໂລກ ເພື່ອສັນຕິພາບ, ເອກະລາດແຫ່ງຊາດ, ຄວາມກ້າວໜ້າທາງສັງຄົມ ແລະ ການພັດທະນາແບບຍືນຍົງ.
 |
 |
ບູນມີ
