ໃນກອງປະຊຸມຄັ້ງນີ້ ທ່ານນາຍົກລັດຖະມົນຕີ ໄດ້ຂຶ້ນກ່າວປາໄສ ໂດຍໄດ້ຍົກໃຫ້ເຫັນເຖິງສະພາບການຄວາມວຸ້ນວາຍສັບສົນ ທີ່ພວມເກີດຂຶ້ນໃນປັດຈຸບັນ ແລະ ໄດ້ສະແດງທັດສະນະ ແລະ ວິໄສທັດ ເພື່ອແກ້ໄຂຄວາມຫຍຸ້ງຍາກສັບສົນດັ່ງກ່າວ ດ້ວຍຂໍ້ລິເລີ່ມ ແລະ ກົນໄກການຮ່ວມມືທີ່ມີຄວາມຍຸຕິທຳ ໂປ່ງໃສ ເທົ່າທຽມກັນ ແລະ ບໍ່ຂຶ້ນກັບປະເທດໃດໜຶ່ງ ຫຼືກຸ່ມເສດຖະກິດໃດໜຶ່ງ ບົນພື້ນຖານການມີສ່ວນຮ່ວມຂອງປະຊາຄົມໃນທົ່ວໂລກ ເພື່ອຈະນຳພາໂລກນີ້ ກ້າວໄປສູ່ໂລກແຫ່ງໂລກາພິວັດທີ່ມີຄຸນນະພາບສູງ ຍືນຍົງມີຄວາມສະເໝີພາບ ມີຜົນປະໂຫຍດຮ່ວມກັນ ແລະ ຄົງຮັກສາໄວ້ສັນຕິພາບ ສະຖຽນລະພາບ ແລະ ຄວາມໝັ້ນຄົງໃນໂລກ.
 |
ທ່ານ ທອງລຸນ ສີສຸລິດ ນາຍົກ-ລັດຖະມົນຕີ ແຫ່ງ ສປປ ລາວ ແລະ ທ່ານ ຊິນໂຊ ອາເບະ ນາຍົກລັດຖະມົນຕີຍີ່ປຸ່ນ ຮ່ວມລົງນາມເອກະສານ. (ພາບ: vientianemai)
ໂອກາດດັ່ງກ່າວ ທ່ານນາຍົກລັດຖະມົນຕີ ແຫ່ງ ສປປ ລາວ ໄດ້ພົບປະເຮັດວຽກກັບທ່ານ ຊິນໂຊ ອາເບະ ນາຍົກລັດຖະມົນຕີຍີ່ປຸ່ນ ເຊິ່ງໄດ້ແລກປ່ຽນຄຳຄິດເຫັນ ກ່ຽວກັບການຮ່ວມມືສ່ອງຝ່າຍ ແລະ ຫຼາຍຝ່າຍ ປຶກສາຫາລື ເພື່ອເພີ່ມທະວີຮັດແໜ້ນການຮ່ວມມືສອງຝ່າຍ ກໍຄື: ທິດທາງການຮ່ວມມືໃນຕໍ່ໜ້າ ນອກນັ້ນ ຝ່າຍລາວ ໄດ້ສະແດງຄວາມຊົມເຊີຍຕໍ່ຜົນສຳເລັດຂອງກອງປະຊຸມສຸດຍອດແມ່ນ້ຳຂອງ-ຍີ່ປຸ່ນ ຄັ້ງທີ 10 ພາຍໃຕ້ການການເຈົ້າພາບຂອງຍີ່ປຸ່ນ ໃນເດືອນຕຸລາ 2018 ທີ່ ໂຕກຽວ ຜ່ານມາ ແລະ ທັງສອງຝ່າຍຈະສືບຕໍ່ຮ່ວມມືກັນຈັດຕັ້ງປະຕິບັດຍຸດທະສາດໂຕກຽວ 2018 ເພື່ອການຮ່ວມມືແມ່ນ້ຳຂອງ-ຍີ່ປຸ່ນ (Tokyo Strategy 2018 for Mekong-Japan Cooperation) ໃຫ້ປະສົບຜົນສຳເລັດ.
ພ້ອມດຽວກັນນີ້ ໄດ້ມີພິທີລົງນາມເອກະສານແລກປ່ຽນ 2 ສະບັບຄື: ໂຄງການພັດທະນາຊັບພະຍາກອນມະນຸດ ມີມູນຄ່າ 308 ລ້ານເຢນ ເຊິ່ງແມ່ນໂຄງການຊ່ວຍເຫຼືອລ້າຂອງລັດຖະບານຍີ່ປຸ່ນ ແລະ ການປັບປຸງສົນທິສັນຍາຂົນສົ່ງທາງອາກາດສອງຝ່າຍ ສປປ ລາວ ແລະ ຍີ່ປຸ່ນ ຮ່ວມລົງນາມໂດຍທ່ານ ວິໂຣດ ສຸນດາຣາ ເອກອັກຄະລັດຖະທູດ ແຫ່ງ ສປປ ລາວ ປະຈຳຍີ່ປຸ່ນ ຕາງໜ້າລັດຖະບານລາວ ແລະ ທ່ານ ຕາເກຊິ ຮິກິຣາລະ ເອກອັກຄະຣາຊະທູດຍີ່ປຸ່ນ ປະຈຳ ສປປ ລາວ ຕາງໜ້າລັດຖະບານຍີ່ປຸ່ນ ໂດຍການເປັນສັກຂີພິຍານຂອງສອງທ່ານນາຍົກລັດຖະມົນຕີ ແຫ່ງ ສປປ ລາວ ແລະ ຍີ່ປຸ່ນ.
（ແຫຼ່ງຂໍ້ມູນ： vientianemai.net）
