 |
ເຈົ້າໜ້າທີ່ຈາກກະຊວງກະສິກໍາ ແລະ ປ່າໄມ້, ອົງການອາຫານ ແລະ ການກະເສດ ລວມທັງພາກສ່ວນອື່ນໆທີ່ກ່ຽວຂ້ອງ ໄດ້ປຶກສາຫາລືກັນ ແລະ ລະດົມຄວາມຄິດຄວາມເຫັນ ເພື່ອກະກຽມໃສ່ກອງປະຊຸມລະດັບພາກພື້ນ ອາຊີປາຊີຟິກ ຄັ້ງທີ 35.(ພາບ: ຂປລ)
ທ່ານ ພວງປະຣີສັກ ປຣະວົງວຽງຄຳ ຮອງລັດຖະມົນຕີກະຊວງກະສິກຳ ແລະ ປ່າໄມ້ ກ່າວວ່າ: ຈຸດປະສົງໃນການຈັດກອງປະຊຸມ ໃນຄັ້ງນີ້ ກໍເພື່ອເປັນການລະດົມ ແລະ ສັງລວມຄວາມຄິດຄວາມເຫັນ ຈາກທຸກພາກສ່ວນ ທີ່ມີການຮ່ວມມືກັບອົງການອາຫານ ແລະ ການກະເສດ ໂດຍສະເພາະກ່ຽວ ກັບບັນຫາທີ່ຍັງຄົງຄ້າງ, ບັນຫາທີ່ຍັງເປັນສິ່ງທ້າທາຍ ຕໍ່ວຽກງານກະສິກຳ ແລະ ປ່າໄມ, ວຽກງານພັດທະນາຊົນນະບົດ ວ່າຄວນຈະເອົາໃຈໃສ່ຄືແນວໃດ ຫລື ຄວນມີໂຄງການຄືແນວໃດ. ພາຍຫລັງປຶກສາຫາລືກັນແລ້ວ ກໍຈະໄດ້ສັງລວມເອົາ ເນື້ອໃນຈິດໃຈ ແລະ ບັນຫາສຳຄັນຕ່າງໆ ເພື່ອລາຍງານ ແລະ ສະເໜີຕໍ່ກອງປະຊຸມກ່າວ. ໃນໄລຍະຜ່ານມາ ພວກເຮົາໄດ້ຈັດເປັນກອງປະຊຸມພາຍໃນ ແລະ ຂໍຂໍ້ມູນຈາກທຸກ ພາກສ່ວນທີ່ກ່ຽວຂ້ອງ ເພື່ອມາສັງລວມແລ້ວໄປລາຍງານ ແຕ່ວ່າໃນຄັ້ງນີ້ ທາງພາກສ່ວນທີ່ກ່ຽວຂ້ອງ ໄດ້ເນັ້ນໃຫ້ຈັດກອງປະຊຸມ ຢູ່ແຕ່ລະປະເທດ ເພື່ອເຈາະຈີ້ມກ່ຽວກັບກ່ຽວປະເດັນ ແລະ ບັນຫາ ທີ່ອົງການອາຫານ ແລະ ການກະເສດ ໃຫ້ຄວາມສົນໃຈ ເພື່ອໃຫ້ແຕ່ລະປະເທດທີ່ມີຄຳເຫັນ ແລະ ພ້ອມກັນປຶກສາ ຫາລືໃນປະເດັນຕ່າງໆ.
ກອງປະຊຸມພາກພື້ນ ກ່ຽວກັບກະສິກຳສີຂຽວ ແລະ ຍືນຍົງ ການແລກປ່ຽນບົດຮຽນ ແລະ ປະສົບການໃນການສ້າງນະໂຍບາຍກະສິກຳຍືນຍົງ ທີ່ມີປະສິດທິຜົນ ແລະ ເໝາະສົມໃນພາກພື້ນແມ່ນ້ຳຂອງ ຈັດຂຶ້ນວັນທີ 21-22 ມັງກອນ 2020 ຢູ່ໂຮງແຮມຄຣາວພາຊາ ໂດຍເປັນປະທານຂອງທ່ານ ລຽນ ທິແກ້ວ ລັດຖະມົນຕີ ກະຊວງກະສິກຳ ແລະ ປ່າໄມ້ ທ່ານ Nasar Hayat ຜູ້ຕາງໜ້າອົງການອາຫານ ແລະ ການກະເສດ ປະຈຳລາວ ແລະ ທ່ານ Niall O’ Connor ຫົວໜ້າສະຖາບັນສິ່ງແວດລ້ອມສະຕ໋ອກໂຮມ ປະຈຳອາຊີ ມີຜູ້ຕາງໜ້າຈາກພາກລັດ ອົງການທີ່ບໍ່ຂຶ້ນກັບລັດຖະບານ ພາກເອກະຊົນ ແລະ ຄູ່ຮ່ວມງານ ທັງພາຍໃນ ແລະ ປະເທດໃນພາກພື້ນແມ່ນ້ຳຂອງ ເຂົ້າຮ່ວມ.
ກອງປະຊຸມຄັ້ງນີ້ ໄດ້ຮັບຟັງການສະເໜີຍຸດທະສາດການເຕີບຂອງສີຂຽວແຫ່ງຊາດ ຂອງ ສປປ ລາວ ຮ່າງຂອບຍຸດທະສາດສີຂຽວ ແລະ ຍືນຍົງ ພ້ອມທັງສົນທະນາ ແລກປ່ຽນປະສົບການ ແລະ ບົດຮຽນຕ່າງໆຈາກພາຍໃນ ແລະ ພາກພື້ນ ນອກນີ້ຜູ້ເຂົ້າຮ່ວມປະຊຸມຍັງໄດ້ລົງຢ້ຽມຢາມ ບ້ານທ່າຊ້າງ ເມືອງປາກງື່ມ ນະຄອນຫຼວງວຽງຈັນ ເພື່ອຮຽນຮູ້ກ່ຽວກັບເຕັກນິກການຜະລິດກະສິກຳອິນຊີ ແລະ ການຕະຫຼາດ.
ທ່ານ ລຽນ ທິແກ້ວ ກ່າວວ່າ: ການເຕີບໂຕສີຂຽວ ເປັນໂອກາດໃນການປະກອບສ່ວນ ໃນການພັດທະນາເສດຖະກິດ-ສັງ ຄົມ ແລະ ສິ່ງແວດລ້ອມ ໃຫ້ມີຄວາມໝັ້ນຄົງ ຂະແໜງການກະສິກຳ ແມ່ນ 1 ໃນ 7 ບຸລິມະສິດ ທີ່ມີບົດບາດສຳຄັນໃນຂະບວນການຈັດຕັ້ງ ເພື່ອໃຫ້ມີຄວາມຍືນຍົງ ພ້ອມທັງເປັນການເປີດຕະຫຼາດການແລກປ່ຽນເຕັກໂນໂລຊີ ແລະ ນະວັດຕະກຳຕ່າງໆ ເພື່ອສະໜັບສະໜູນການເຕີບໂຕສີຂຽວ.
ການປ່ຽນແປງຂອງດິນຟ້າອາກາດ ເປັນສິ່ງທ້າທາຍ ແຕ່ເປັນໂອກາດສຳລັບຂະແໜງກະສິກຳໃນການຫຼຸດຜ່ອນການປ່ອຍອາຍພິດເຮືອນແກ້ວ ສານຄາບອນ ແລະ ຄວາມຈຳເປັນໃນການປັບຕົວຂອງຊາວກະສິກອນ ຕາມທີ່ກຳນົດໄວ້ໃນຍຸດທະສາດການເຕີບໂຕສີຂຽວແຫ່ງຊາດ ຂອບຍຸດທະສາດກະສິກຳສີຂຽວ ແລະ ຍືນຍົງ ກຳລັງສ້າງຂຶ້ນ ໂດຍໃຫ້ສອດຄ່ອງກັບນະໂຍບາຍ ແລະ ຍຸດທະສາດທີ່ມີໃນປັດຈຸບັນ ໃນລະດັບຊາດ ພາກພື້ນ ແລະ ສາກົນ ລວມທັງຂະບວນການກະກຽມສ້າງແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ 9 ແລະ ຍຸດທະສາດການພັດທະນາກະສິກຳ ປີ 2021-2025 ສະບັບປັບປຸງ.
（ໄຊພອນ）
