ເຂົ້າຮ່ວມພິທີ, ຝ່າຍຫວຽດນາມມີທ່ານ ເຈິ່ນວັນຕຸ໊ຍ, ອະດີດກຳມະການສູນກາງພັກ, ອະດີດກໍາມະການຜູ້ປະຈໍາການສະພາແຫ່ງຊາດ, ອະດີດຫົວໜ້າຄະນະວຽກງານສະມາຊິກສະພາແຫ່ງຊາດ, ອະດີດຮອງຫົວໜ້າຄະນະຈັດຕັ້ງສູນກາງ, ປະທານສະມາຄົມມິດຕະພາບຫວຽດນາມ - ລາວ, ຫົວໜ້າຄະນະຜູ້ແທນປະຊາຊົນຫວຽດນາມ, ທ່ານ ເລກວາງຕຸ້ງ, ກຳມະການສູນກາງພັກ, ເລຂາພັກແຂວງ, ຫົວໜ້າຄະນະສະມາຊິກສະພາແຫ່ງຊາດແຂວງ ກວາງຈີ້, ທ່ານ ເລຫາຍບິ່ງ, ກຳມະການສໍາຮອງຄະນະບໍລິຫານງານສູນກາງພັກ, ຮອງຫົວໜ້າຄະນະໂຄສະນາສຶກສາສູນກາງ, ທ່ານນາງ ຫງວຽນເຟືອງງາ, ປະທານສະຫະພັນບັນດາອົງການຈັດຕັ້ງມິດຕະພາບຫວຽດນາມ ແລະ ບັນດາການນຳທີ່ຕາງໜ້າໃຫ້ຄະນະພົວພັນຕ່າງປະເທດສູນກາງພັກ, ກະຊວງການຕ່າງປະເທດ, ກະຊວງຕຳຫຼວດ, ກະຊວງປ້ອງກັນປະເທດ, ກຳມາທິການພົວພັນຕ່າງປະເທດສະພາແຫ່ງຊາດ, ຫ້ອງວ່າການສະພາແຫ່ງຊາດ, ຄະນະບໍລິຫານງານສູນກາງຊາວໜຸ່ມ, ສະຫະພັນແມ່ຍິງ ຫວຽດນາມ ແລະ ສະມາຊິກຄະນະຜູ້ແທນສະມາຄົມມິດຕະພາບຫວຽດນາມ - ລາວ 60 ທ່ານ ແລະ ຜູ້ແທນ 600 ຄົນ ທີ່ຕາງໜ້າໃຫ້ປະຊາຊົນທຸກຊັ້ນວັນນະ ຫວຽດນາມ ຢູ່ ແຂວງ ກວາງຈີ້.
 |
| ບັນດາຜູ້ແທນຖ່າຍຮູບເປັນທີ່ລະນຶກ. ພາບ: thoidai.com.vn |
ຝ່າຍລາວ, ມີທ່ານ ບໍ່ວຽງຄຳ ວົງດາລາ ລັດຖະມົນຕີກະຊວງເຕັກໂນໂລຢີ ແລະ ການສື່ສານ, ປະທານສະມາຄົມມິດຕະພາບລາວ-ຫວຽດນາມ, ຫົວໜ້າຄະນະຜູ້ແທນປະຊາຊົນລາວ, ທ່ານ ແສງເພັດ ຮຸ່ງບຸນຍວງ, ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈໍາ ຫວຽດນາມ ແລະ ຄະນະຜູ້ແທນສະມາຄົມມິດຕະພາບ ລາວ-ຫວຽດນາມ ຈຳນວນ 60 ທ່ານ.
ກ່າວຄຳເຫັນທີ່ພິທີໄຂ, ທ່ານຮອງປະທານຜູ້ປະຈໍາການສະພາແຫ່ງຊາດ ເຈີ່ນແທງເໝິ້ນ ຢືນຢັນວ່າ: ຄວາມສາມັກຄີ, ການຮ່ວມມື ແລະ ການຊ່ວຍເຫຼືອເຊິ່ງກັນ ແລະ ກັນລະຫວ່າງ ຫວຽດນາມ - ລາວ ແມ່ນກົດເກນພາວະວິໄສ, ເປັນປັດໄຈມີຄວາມໝາຍເປັນຕາຍ, ແມ່ນຊັບສິນລວມອັນລ້ຳຄ່າຂອງສອງຊາດ. ໃນສະພາບການໂລກພວມມີການຜັນແປຢ່າງສັບສົນ ແລະ ບໍ່ສາມາດຄາດເດົາໄດ້ຍາກນັ້ນ, ພວກເຮົາຍິ່ງຮັບຮູ້ໄດ້ເຖິງຄວາມໝາຍຂອງການພົວພັນທີ່ໄວ້ເນື້ອເຊື່ອໃຈເປັນພິເສດ, ບໍລິສຸດຜຸດຜ່ອງລະຫວ່າງຫວຽດນາມ ແລະ ລາວ ຢ່າງເລິກເຊິ່ງ; ພ້ອມກັນຕັດສິນໃຈປົກປັກຮັກສາ ແລະ ເພີ່ມພູນຄູນສ້າງສາຍພົວພັນແບບພິເສດຫວຽດນາມ - ລາວ ໃຫ້ນັບມື້ນັບເລິກເຊິ່ງ ແລະ ໝັ້ນຄົງໃນທຸກຂົງເຂດ.
ທ່ານຮອງປະທານຜູ້ປະຈໍາການສະພາແຫ່ງຊາດສະແດງຄວາມຊົມເຊີຍ ແລະ ຕີລາຄາສູງຕໍ່ເລື່ອງບັນດາອົງການຈັດຕັ້ງມິດຕະພາບສອງປະເທດສົມທົບກັນຈັດຕັ້ງງານພົບປະແລກປ່ຽນມິດຕະພາບປະຊາຊົນຫວຽດນາມ-ລາວ ຄັ້ງທີ V ຢູ່ ແຂວງ ກວ໋າງຈິ ແລະ ແຂວງສະຫວັນນະເຂດ, ເຊິ່ງແມ່ນສະຖານທີ່ໃນປະຫວັດສາດຄືດັ່ງງອະພິນິຫານຕິດພັນກັບເສັ້ນທາງ ເຈື່ອງເຊີນ-ໂຮ່ຈີມິນ, ເປັນສັນຍາລັກຂອງນໍ້າໃຈສາມັກຄີມິດຕະພາບແບບພິເສດ, ການຮ່ວມສໍາພັນສູ້ຮົບຂອງກອງທັບ ແລະ ປະຊາຊົນສອງປະເທດ ຫວຽດນາມ-ລາວ. ເມື່ອຢັ້ງຢືນບົດບາດສໍາຄັນຂອງວຽກງານພົວພັນຕ່າງປະເທດ, ທ່ານປາດຖະໜາຢາກໃຫ້ບັນດາອົງການຈັດຕັ້ງມິດຕະພາບປະຊາຊົນສອງປະເທດສືບຕໍ່ຍູ້ແຮງການເຄື່ອນໄຫວທີ່ແທດຈິງ ເພື່ອແນໃສ່ເພີ່ມທະວີຄວາມເຂົ້າໃຈໃຫ້ແກ່ປະຊາຊົນທຸກຊັ້ນວັນນະຫຼາຍກວ່າອີກ, ພິເສດແມ່ນໃນຄົນຮຸ່ນໜຸ່ມກ່ຽວກັບປະຫວັດສາດອັນ ສະຫງ່າລາສີຂອງສາຍພົວພັນຫວຽດນາມ-ລາວ ແລະ ພ້ອມກັນຮ່ວມແຮງຮ່ວມໃຈຮັກສາ, ເພີ່ມພູນຄູນສ້າງ ແລະ ພັດທະນາສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ຫວຽດນາມ - ລາວ ໃຫ້ນັບມື້ນັບເຂົ້າສູ່ລວງເລິກ, ມີປະສິດທິຜົນ, ປະກອບສ່ວນແທດຈິງເຂົ້າໃນການພັດທະນາຄວາມຈະເລີນຮຸ່ງເຮືອງຂອງສອງປະເທດ ແລະ ສັນຕິພາບ, ສະຖຽນລະພາບ ຢູ່ ພາກພື້ນ.
ທ່ານ ເຈິ່ນວັນຕຸ໊ຍ ປະທານສະມາຄົມມິດຕະພາບ ຫວຽດນາມ - ລາວ ສະແດງຄວາມຊົມຊື່ນ ແລະ ຄວາມເອກອ້າງທະນົງໃຈກ່ຽວກັບສາຍພົວພັນຫາຍາກທີ່ເປັນແບບຢ່າງ, ສັດຊື່ບໍລິສຸດຜຸດຜ່ອງລະຫວ່າງສອງພັກ, ສອງລັດ ແລະ ປະຊາຊົນສອງປະເທດຫວຽດນາມ ແລະ ລາວ. ໃນໄລຍະຜ່ານມາ, ບັນດາອົງການຈັດຕັ້ງມິດຕະພາບສອງປະເທດ ໄດ້ມີການເຄື່ອນໄຫວທີ່ມີ ຄວາມໝາຍຫຼາຍຢ່າງ ແລະ ມີປະສິດທິຜົນ, ແຜ່ຂະຫຍາຍໄປທົ່ວປະຊາຊົນທຸກຊັ້ນວັນນະຂອງສອງປະເທດ, ປະກອບສ່ວນຕັ້ງໜ້າເຂົ້າໃນການເຮັດ ໃຫ້ເນື້ອໃນພາຍໃນຂອງສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ຫວຽດນາມ - ລາວ ອຸດົມສົມບຸນກວ່າອີກ ແລະ ປັບປຸງ, ພັດທະນາພື້ນຖານປະຊາຊົນອັນໝັ້ນແກ່ນ ໃຫ້ສາຍພົວພັນ ຫວຽດນາມ - ລາວ. ງານມະໂຫລານມິດຕະພາບປະຊາຊົນ ຫວຽດນາມ - ລາວ ຍັງແມ່ນໂອກາດເພື່ອໃຫ້ຜູ້ແທນສອງປະເທດ ພ້ອມກັນຫວນຄືນມູນເຊື້ອອັນອົງອາດກ້າຫານ ແລະ ນໍ້າໃຈສາມັກຄີສະໜິດຕິດພັນ ຫວຽດນາມ - ລາວ ໃນການຕໍ່ສູ້ປ່ອຍຊາດ, ຕ້ານສັດຕູໂຕດຽວກັນ, ສົ່ງເສີມປະຊາຊົນ ແລະ ຄົນຮຸ່ນໜຸ່ມສອງປະເທດ ເສີມຂະຫຍາຍມູນເຊື້ອ, ຜ່ານຜ່າສິ່ງທ້າທາຍ, ສ້າງສາປະເທດລາວ ແລະ ຫວຽດນາມ ກາຍເປັນປະເທດຊາດຮັ່ງມີເຂັ້ມແຂງ, ປະຊາຊົນມີຊີວິດການເປັນຢູ່ທີ່ອີ່ມໜໍາສໍາລານ. ງານມະໂຫລານມິດຕະພາບ ກໍ່ແມ່ນໂອກາດທີ່ດີ ເພື່ອໃຫ້ບັນດາຜູ້ແທນແລກປ່ຽນບົດຮຽນ, ມາດຕະການຍູ້ແຮງການຮ່ວມມືເພື່ອປະຕິບັດພາລະກໍາເປັນຂົວເຊື່ອມຕໍ່ມິດຕະພາບ, ປະກອບສ່ວນເພີ່ມພູນຄູນສ້າງສາຍພົວພັນຫວຽດນາມ-ລາວ.
 |
| ງານມະໂຫລານມິດຕະພາບລາວ-ຫວຽດນາມ ຄັ້ງທີ V ໄດ້ຮັບການເອົາໃຈໃສ່ຈາກການນໍາພັກ, ລັດ. ພາບ: thoidai.com.vn |
ຕາງໜ້າການນຳແຂວງກວາງຈີ້, ທ່ານເລຂາພັກແຂວງ ເລກວາງຕຸ້ງ ຢືນຢັນວ່າ: ໃນຖານະເປັນທ້ອງຖິ່ນທີ່ມີຊາຍແດນຕິດກັບແຂວງສະຫວັນນະເຂດ ແລະ ແຂວງສາລະວັນ, ສປປ ລາວ, ອົງຄະນະພັກ, ອຳນາດການປົກຄອງ ແລະ ປະຊາຊົນແຂວງ ກວາງຈີ້ ລ້ວນແຕ່ຮັບຮູ້ຢ່າງເລິກເຊິ່ງກ່ຽວກັບຄວາມສໍາຄັນຂອງການພັດທະນາການຮ່ວມມືຮອບດ້ານກັບບັນດາທ້ອງຖິ່ນຂອງລາວໃນພາລະກິດປົກປັກຮັກສາ ແລະ ສ້າງສາສອງປະເທດຊາດເວົ້າລວມ ແລະ ບັນດາພາລະກິດພັດທະນາຂອງແຂວງ ກວາງຈີ້ ແລະ ບັນດາທ້ອງຖິ່ນຊາຍແດນລາວເວົ້າສະເພາະ. ເມື່ອຫວນຄືນບັນດາໝາກຜົນແຫ່ງການຮ່ວມມືລະຫວ່າງແຂວງ ກວາງຈີ້ ແລະ ແຂວງເພື່ອນມິດລາວ ໃນຂົງເຂດເສດຖະກິດ, ການຄ້າ, ບຳລຸງສ້າງຊັບພະຍາກອນມະນຸດ, ຕ້ານອາດຊະຍາກຳ, ໂຄສະນາເຜີຍແຜ່ກົດໝາຍກ່ຽວກັບການປ້ອງກັນຊາຍແດນ, ການຊອກຫາອັດຖິນັກຮົບເສຍສະຫຼະຊີວິດເພື່ອຊາດ... ທ່ານໄດ້ສະແດງຄວາມປິຕິຊົມຊື່ນ ແລະ ຄວາມພາກພູມໃຈຂອງແຂວງກວາງຈີ້ ໃນການປະກອບສ່ວນເພີ່ມພູນຄູນສ້າງສາຍພົວພັນມິດຕະພາບອັນເປັນພິເສດ, ຫາຍາກ ແລະ ບໍລິສຸດຜຸດຜ່ອງລະຫວ່າງສອງປະເທດຫວຽດນາມ - ລາວ.
ຕາງໜ້າຄະນະຜູ້ແທນປະຊາຊົນລາວ, ທ່ານ ບໍ່ວຽງຄໍາ ວົງດາລາ ປະທານ ສະມາຄົມມິດຕະພາບລາວ-ຫວຽດນາມ ເນັ້ນໜັກວ່າ ປະຫວັດສາດສາຍພົວພັນ ມິດຕະພາບ ລາວ - ຫວຽດນາມ ໃນຫຼາຍທົດສະວັດຜ່ານມາ ໄດ້ສະແດງໃຫ້ ເຫັນພະລັງຈິດໃຈວິລະຊົນ, ນໍ້າໃຈສັດຊື່ບໍລິສຸດຜຸດຜ່ອງ, ສະເໜີຕົ້ນສະເໝີປາຍ. ໃນສະພາບການໃໝ່, ນໍ້າໃຈສາມັກຄີແບບພິເສດ ແລະ ການຮ່ວມມືືຮອບດ້ານ ລາວ - ຫວຽດນາມ ນັບມື້ນັບໄດ້ຮັບການປັບປຸງ, ພັດທະນາທັງລວງກວ້າງ ແລະ ລວງເລິກ, ນໍາມາເຊິ່ງຜົນປະໂຫຍດທີ່ແທດຈິງໃຫ້ແກ່ປະຊາຊົນສອງປະເທດ. ທ່ານຢືນຢັນວ່າສະມາຄົມຈະມານະພະຍາຍາມເຮັດຈົນສຸດຄວາມ ສາມາດຂອງຕົນພ້ອມກັບພັກ, ລັດ ແລະ ປະຊາຊົນຫວຽດນາມອ້າຍນ້ອງຮັກສາ ແລະ ເສີມຂະຫຍາຍສາຍພົວພັນທີ່ຫາຍາກ, ສັດຊື່ບໍລິສຸດຜຸດຜ່ອງໃນໂລກນີ້ໄວ້.
ກໍ່ໃນຕອນເຊົ້າວັນທີ 28 ກັນຍາ, ບັນດາຜູ້ແທນປະຊາຊົນສອງປະເທດ ໄດ້ເຂົ້າຮ່ວມກອງປະຊຸມແບ່ງປັນບົດຮຽນໃນການເຄື່ອນໄຫວມິດຕະພາບປະຊາຊົນ. ບັນດາບົດປະກອບຄໍາເຫັນທີ່ກອງປະຊຸມ ແລະ ໄຈ້ແຍກ, ຕີລາຄາໝາກຜົນທີ່ບັນລຸໄດ້ ໃນວຽກງານມິດຕະພາບປະຊາຊົນ ຫວຽດນາມ - ລາວ ໃນໄລຍະຜ່ານມາ, ຖອດຖອນບົດຮຽນ ແລະ ປະສົບການ ໃນການເຄື່ອນໄຫວຂອງສະມາຄົມ ໃນຊຸມປີຕໍ່ໄປ. ຜູ້ແທນສອງຝ່າຍໄດ້ປຶກສາຫາລື, ແບ່ງປັນບົດຮຽນ, ພ້ອມທັງສະເໜີມາດຕະການເພື່ອໃຫ້ການເຄື່ອນໄຫວມິດຕະພາບປະຊາຊົນນັບມື້ນັບອຸດົມສົມບູນ, ແທດຈິງ ແລະ ເຂົ້າເຖິງປະຊາຊົນທຸກຊັ້ນວັນນະຂອງສອງປະເທດ, ປະກອບສ່ວນຊຸກຍູ້ສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ຫວຽດນາມ - ລາວ ໃຫ້ນັບມື້ນັບພັດທະນາ.
ບູນມີ
