 | ໂທລະເລກຊົມເຊີຍ ສະເຫຼີມສະຫຼອງ 60 ປີແຫ່ງວັນສ້າງຕັ້ງສາຍພົວພັນທາງການທູດ ແລະ 45 ປີແຫ່ງວັນເຊັນສົນທິສັນຍາມິດຕະພາບ ແລະ ການຮ່ວມມື ຫວຽດນາມ - ລາວ ໃນຕະຫຼອດໄລຍະປະຫວັດສາດຂອງປະຊາຊົນສອງຊາດ ຫວຽດນາມ - ລາວ, ພິເສດແມ່ນໄລຍະທາງ 60 ປີນັບແຕ່ເມື່ອສອງປະເທດສ້າງຕັ້ງສາຍພົວພັນທາງການທູດຢ່າງເປັນທາງການ, ນ້ຳໃຈສາມັກຄີ ມິດຕະພາບແບບພິເສດໂດຍປະທານ ໂຮ່ຈີມິນ ທີ່ຍິ່ງໃຫຍ່, ປະທານ ໄກສອນ ພົມວິຫານ ແລະ ປະທານ ສຸພານຸວົງ ທີ່ແສນເຄົາລົບຮັກ ຕັ້ງພື້ນຖານ, ເພີ່ມພູນຄູນສ້າງ |
 | ຄະນະຜູ້ແທນສູນກາງສະຫະພັນກຳມະບານ ລາວ ຢ້ຽມຢາມ ແລະ ເຮັດວຽກຢູ່ແຂວງ ຮ່ານາມ ໄລຍະຈະມາເຖິງ, ສອງຝ່າຍຈະມີການພົວພັນແລກປ່ຽນບົດຮຽນປະສົບການເພື່ອສືບຕໍ່ສ້າງກຸ່ມກ້ອນກຳມະບານໃຫ້ໝັ້ນຄົງເຂັ້ມແຂງ, ເປັນບ່ອນອີງທີ່ໜ້າໄວ້ເນື້ອເຊື່ອໃຈໃຫ້ແກ່ຊາວຜູ້ອອກແຮງງານ |
ສະຖານທີ່ແດງຢູ່ດິນແດນລາວ
ໃນຊຸມວັນກາງເດືອນກໍລະກົດຢູ່ລາວ ແມ່ນລະດູຝົນ ແຕ່ໃນໂຄງການກໍ່ສ້າງເຂດຫໍບູຊານັກຮົບວິລະຊົນເສຍສະຫຼະຊີວິດ ຫວຽດນາມ - ລາວ ຢູ່ບ້ານຍວນ, ເມືອງແປກ, ແຂວງຊຽງຂວາງ ບັນດາກຸ່ມຊ່າງກໍ່ສ້າງຍັງກໍ່ສ້າງເພື່ອປະຕິບັດສຳເລັດໄລຍະທີ 1, ມຸ່ງໄປເຖິງວັນທີ 24 ກໍລະກົດ ເຊິ່ງແມ່ນວັນຈັດຕັ້ງພິທີສູດສັກອະນິດຈາເພື່ອໃຫ້ນັກຮົບວິລະຊົນທີ່ເສຍສະຫຼະຊີວິດເພື່ອຊາດຢູ່ທຸກແນວຮົມລາວເຕົ້າໂຮມກັນຢູ່ແຫ່ງນີ້.
 |
| ສະຖານທີ່ກໍ່ສ້າງເຂດຫໍບູຊານັກຮົບວິລະຊົນເສຍສະຫຼະຊີວິດ ຫວຽດນາມ - ລາວ(ພາບ: ເຈື່ອງຮຸ່ງ) |
ເຂດຫໍບູຊານັກຮົບວິລະຊົນເສຍສະຫຼະຊີວິດຫວຽດນາມ - ລາວມີເນື້ອທີ 10 ເຮັກຕາ, ໄດ້ເລີ່ມລົງມືກໍ່ສ້າງແຕ່ວັນທີ 24 ມີນາ ປີ 2022. ນີ້ແມ່ນເຂດຫໍບູຊາທຳອິດໂດຍປະຊາຄົມຊາວຫວຽດນາມ ອາໄສຢູ່ລາວກໍ່ສ້າງເພື່ອແນໃສ່ສະແດງຄວາມຮູ້ບຸນຄຸນຕໍ່ນັກຮົບວິລະຊົນເສຍສະຫຼະຊີວິດເພື່ອຊາດ ໃນໄລຍະຕໍ່ສູ້ຍາດເອົາເອກະລາດໃຫ້ແກ່ສອງຊາດ.
ທ່ານ ຮ່າວັນແກ໋ງ, ປະທານສະມາຄົມຊາວຫວຽດນາມ ອາໄສຢູ່ແຂວງຊຽງຂວາງ ໃຫ້ຮູ້ວ່າ: ໃນຊຸມເດືອນເກີດສົງຄາມທີ່ຮ້າຍແຮງຢູ່ແຂວງຊຽງຂວາງ ໃນລະຫວ່າງວັນທີ 1969 – 1972, ສັດຕູໄດ້ດຳເນີນການບຸກໂຈມຈີເຂດປົດປ່ອຍທົ່ງໄຫຫີນ ຊຽງຂວາງ. ໃນຈຸດເວລານັ້ນ, ໂດຍປະຕິບັດຕາມຄວາມຮຽກຮ້ອງຕ້ອງການຂອງການປະຕິວັດລາວ, ພັກ, ລັດ ແລະ ກອງທັບປະຊາຊົນ ຫວຽດນາມ ໄດ້ໜູນຊ່ວຍໃຫ້ແກ່ປະເທດເພື່ອນ.
ມີຫຼາຍກົມກອງທະຫານອາສາສະໝັກ ແລະ ນັກຊ່ຽວຊານຫວຽດນາມ ໄດ້ມາລາວ ຮຽງບ່າຮຽງໄຫຼ່, ຕໍ່ສູ້ຢູ່ຕະຄອງດຽວກັນກັບທະຫານ ແລະ ປະຊາຊົນລາວ ເພື່ອຕ້ານສັດຕູລວມ. ໃນຊຸມວັນນັ້ນ, ມີພະນັກງານ, ນັກຮົບສອງປະເທດຫຼາຍຄົນເສຍຊີວິດ. ໂດຍສະເພາະຢູ່ບໍລິເວນ 3 ແຂວງ ຊຽງຂວາງ, ໄຊສົມບູນ ແລະ ແຂວງວຽງຈັນ ມີນັກຮົບ, ທະຫານອາສາສະໝັກ ແລະ ນັກຊ່ຽວຊານຫວຽດນາມ ກວ່າ 15.000 ຄົນເສຍຊີວິດ.
ຕາມທ່ານ ຮ່າວັນແກ໋ງ ແລ້ວ, ດ້ວຍມູນເຊື້ອ “ກິນເຂົ້າຄິດຮອດຄຸນນາ, ກິນປາຄິດຮອດຄຸນນ້ຳ” ປະຊາຄົມຊາວຫວຽດນາມ ອາໄສຢູ່ແຂວງຊຽງຂວາງ ຖືການກໍ່ສ້າງຫໍບູຊານີ້ແມ່ນຄວາມຮັບຜິດຊອບຂອງຄົນລຸ້ນໜຸ່ມ ເພື່ອແນໃສ່ສະແດງຄວາມຮູ້ບຸນຄຸນ ແລະ ຕອບບຸນແທນຄຸນສ່ວນໃດໜຶ່ງໃນການເສຍສະຫຼະອັນຍິ່ງໃຫຍ່ຂອງບັນດານັກຮົບວິລະຊົນສອງປະເທດ ທີ່ໄດ້ເສຍສະຫຼະຊີວິດເພື່ອພື້ນຖານເອກະລາດ ແລະ ສັນຕິພາບຂອງສອງຊາດ.
ສັນຍະລັກຂອງນ້ຳໃຈສາມັກຄີສຳພັນທະມິດສູ້ຮົບອັນຍິ່ງໃຫຍ່
ໃນທົ່ວທຸກແຂວງ, ນະຄອນຂອງລາວ, ບັນດາສະຖານທີ່ໃນເມື່ອກ່ອນແມ່ນແນວຮົບທີ່ຮ້າຍແຮງ ໃນໄລຍະທີ່ສອງປະເທດຮ່ວມແຮງຮ່ວມໃຈຕໍ່ສູ້ຕ້ານສັດຕູລວມ, ບັນດາເຂດອະນຸສາວະລີຂອງບັນດານັກຮົບເສຍສະຫຼະຊີວິດ, ທະຫານອາສາສະໝັກ ແລະ ນັກຊ່ຽວຊານຫວຽດນາມ ລ້ວນແຕ່ໄດ້ຮັບການກໍ່ສ້າງ, ພົ້ນເດັ່ນຂຶ້ນຢູ່ບັນດາແຂວງທາງພາກເໜືອ ແລະ ພາກກາງລາວຄື: ອຸດົມໄຊ, ຫົວພັນ, ວຽງຈັນ, ຊຽງຂວາງ, ໄຊສົມບູນ, ຄຳມ່ວນ, ບໍລິຄຳໄຊ ແລະ ບັນດາແຂວງທາງພາກໃຕ້ ລາວ ຄື ສະຫວັນນະເຂດ, ເຊກອງ, ຈຳປາສັກ ແລະ ອັດຕະປື.
ເຂດອະນຸສາວະລີທັງແມ່ນໂຄງການວັດທະນະທຳທີ່ມີຄວາມໝາຍລວງເລິກທັງແມ່ນສັນຍາລັກອັນສູງສົ່ງ, ມີຊີວິດຊີວາ, ຊັບສິນທາງດ້ານຈິດໃຈອັນລ້ຳຄ່າ, ສະຖານທີ່ບັນທຶກເພື່ອໃຫ້ຄົນລຸ້ນໜຸ່ມເຂົ້າໃຈແຈ້ງກວ່າກ່ຽວກັບນ້ຳໃຈສາມັກຄີ, ນ້ຳໃຈກ້າຫານ, ການເສຍສະຫຼະຊີວິດຂອງທະຫານ ແລະ ປະຊາຊົນ ຫວຽດນາມ - ລາວ.
ໃນພິທີເປີດການເຄື່ອນໄຫວ ແລະ ມອບຮັບອານຸສາວະລີສຳພັນທະມິດສູ້ຮົບຫວຽດນາມ - ລາວ, ລາວ - ຫວຽດນາມ ໃຫ້ແກ່ແຂວງ ໄຊສົມບູນ ເມື່ອເດືອນພະຈິກ ປີ 2017, ທ່ານພົນໂທ ວິໄລ ຫຼ້າຄຳຟອງ, ຮອງລັດຖະມົນຕີກະຊວງປ້ອງກັນປະເທດ ລາວ ເນັ້ນໜັກວ່າ ປະເທດຊາດ ແລະ ປະຊາຊົນລາວຍາມໃດກໍ່ບັນທຶກເຂົ້າໃນໜ້າປະຫວັດສາດອັນສະຫງ່າອົງອາດຂອງປະຊາຊົນລາວ ກ່ຽວກັບການເສຍສະຫຼະຊີວິດເພື່ອໜ້າທີ່ສາກົນອັນສູງສົ່ງ ຂອງບັນດາທະຫານອາສາສະໝັກ ແລະ ນັກຊ່ຽວຊານ ຫວຽດນາມ ຢູ່ດິນແດນລາວ. ເຂດອະນຸສາວະລີ ສຳພັນທະມິດ ສູ້ຮົບ ລາວ ຫວຽດນາມ ແມ່ນ ສັນຍະລັກສະແດງໃຫ້ເຫັນຈິດໃຈວິລະຊົນ, ອົງອາດກ້າຫານຂອງບັນດາສະຫານທະຫານອາສາສະໝັກ ແລະ ນັກຊ່ຽວຊານ ຫວຽດນາມ ທີ່ເສຍສະຫຼະຊີວິດຢູ່ລາວ ໃນໄລຍະສົງຄາມ.
ທ່ານ ສຈ. ປອ. ສາຍຂອງ ສາຍນະສິນ, ຮອງປະທານຜູ້ປະຈຳການສູນກາງສະມາຄົມມິດຕະພາບ ລາວ - ຫວຽດນາມ, ຮອງອະທິການບໍດີ ມະຫາວິທະຍາໄລແຫ່ງຊາດລາວ ໃຫ້ຂໍ້ສັງເກດເມື່ອແລກປ່ຽນກັບສື່ມວນຊົນວ່າ: “ເຂດອະນຸສາວະລີ ນັກຮົບເສຍສະຫຼະຊີວິດເພື່ອຊາດ ຫວຽດນາມ ຢູ່ດິນແດນລາວ ແມ່ນສັນຍະລັກທີ່ມີຊີວິດຊີວາທີ່ສຸດ, ເພື່ອແນໃສ່ສຶກສາທຸກລຸ້ນຄົນ, ເປັນຕົ້ນແມ່ນລຸ້ນໜຸ່ມສອງປະເທດ ຫວຽດນາມ - ລາວ ຍາມໃດກໍ່ຈາລຶກປະຫວັດສາດການຕໍ່ສູ້ປົດປ່ອຍທ້ອນໂຮມປະເທດຊາດເປັນເອກະພາບ, ຂອງປະຊາຊົນສອງປະເທດ ຫວຽດນາມ ແລະ ລາວ, ເພື່ອແນໃສ່ເພີ່ມພູນຄູນສ້າງນ້ຳໃຈມິດຕະພາບພິເສດ ຫວຽດນາມ - ລາວໃຫ້ໝັ້ນຄົງທະນົງແກ່ນຊົ່ວກາລະນານ, ມີຄວາມຍືນຍົງຄົງຕົວຕະຫຼອດໄປເຊິ່ງການນຳທຸກລຸ້ນ ແລະ ປະຊາຊົນສອງປະເທດໄດ້ອອກເຫື່ອເທແຮງເພີ່ມພູນຄູນສ້າງ”.
ບຸນຄົງ
