 |
ທ່ານ ບໍ່ວຽງຄຳ ວົງດາລາ ລັດຖະມົນຕີກະຊວງ ວິທະຍາສາດ ແລະ ເຕັກໂນໂລຊີ, ປະທານສະພາວິທະຍາສາດ ແຫ່ງຊາດ
ໃນປີ 2019 ນີ້ ສປປ ລາວ ໄດ້ພ້ອມກັບບັນດາປະເທດສະມາຊິກ ອົງການມາດຕະຖານສາກົນ(ISO) ໃນທົ່ວໂລກ ສະເຫລີມສະຫລອງວັນດັ່ງກ່າວ ພາຍໃຕ້ຄຳຂວັນທີ່ວ່າ: “ມາດຕະຖານວີດີໂອ ສ້າງໃຫ້ທົ່ວໂລກເປັນເວທີດຽວກັນ” ເຊິ່ງ ປັດຈຸບັນ ສປປ ລາວ ມີມາດຕະຖານແຫ່ງຊາດລາວ ທີ່ປະກາດໃຊ້ຢ່າງເປັນທາງການແລ້ວ 442 ມາດຕະຖານ, ໄດ້ຮັບກາໝາຍມາດຕະຖານແຫ່ງຊາດ ຈໍານວນ 38 ຜະລິດ ຕະພັນ, ຂຶ້ນທະບຽນການກວດກາ ຄຸນນະພາບຜະລິດຕະພັນ ແລະ ສິນຄ້າໄດ້ 111 ລາຍການ, ມີ 25 ບໍລິສັດ ໄດ້ຮັບການຢັ້ງຢືນລະບົບມາດຕະຖານສາກົນ.
ທ່ານ ບໍ່ວຽງຄຳ ວົງດາລາ ຍັງມີຄຳເຫັນອີກວ່າ: ປັດຈຸບັນນີ້ ວີດີໂອ ເປັນສື່ທີ່ສະແດງໃຫ້ເຫັນຮູບພາບ, ສຽງ ແລະ ການເຄື່ອນໄຫວຕ່າງໆ ຢ່າງມີຊີວິດຊີວາ ທີ່ສາມາດຊ່ວຍມວນມະນຸດສ້າງເຄື່ອຄ່າຍພົວພັນ ເຊິ່ງກັນ ແລະ ກັັນໃນທົ່ວໂລກ. ພ້ອມກັນນັ້ນ, ວີດີໂອ ຍັງເປັນແມ່ແບບເຕັກໂນໂລຊີທີ່ທັນສະໄໝໃນການເຜີຍແຜ່, ໂຄສະນາ ເຮັດໃຫ້ຜູ້ຊົມເຂົ້າໃຈງ່າຍ ແລະ ຈື່ຈໍາໄດ້ໄວຂຶ້ນ. ສະນັ້ນຈຶ່ງມີຄວາມຈຳເປັນ ຈະຕ້ອງສ້າງມາດຕະຖານ ກ່ຽວກັບວິດີໂອ ໃຫ້ສອດຄ່ອງກັບກົດໝາຍກ່ຽວກັບຂໍ້ມູນຂ່າວສານ ແລະ ລະບຽບການດ້ານມາດຕະຖານຂອງສາກົນ ເພື່ອເປັນນິຕິກຳໃຫ້ແກ່ການຄຸ້ມຄອງ, ເຜີຍແຜ່ວີດີໂອ ໃຫ້ຖືກຕ້ອງຕາມມາດຕະຖານ ແລະ ກົດໝາຍຂອງລັດວາງອອກ. ການສ້າງມາດຕະຖານ ວີດີໂອ ແມ່ນຜົນຂອງການຮ່ວມມືລະຫວ່າງອົງການເຕັກນິກໄຟຟ້າສາກົນ (IEC), ອົງການມາດຕະຖານສາກົນ (ISO) ແລະ ສະຫະພັນໂທລະຄົມສາກົນ (ITU) ເຊິ່ງໄດ້ສະແດງໃຫ້ເຫັນເຖິງຄວາມສຳຄັນຂອງມາດຕະຖານ ຕໍ່ການພັດທະນາເສດຖະກິດ-ສັງຄົມ ແລະ ການຮ່ວມມືໃນເວທີສາກົນອື່ນໆ.
ການສະເຫລີມສະຫລອງວັນມາດຕະຖານໂລກ ແມ່ນການສ້າງຈິດສຳນຶກໃຫ້ທົ່ວສັງຄົມ ເຊິ່ງມີທັງຜູ້ສ້າງນິຕິກຳ ແລະ ວາງນະໂຍບາຍກ່ຽວກັບມາດຕະຖານ, ຜູ້ບໍລິຫານ ແລະ ຄຸ້ມຄອງ, ຕະຫລອດເຖິງຜູ້ປະກອບການ, ນັກທຸລະກິດ, ຜູ້ຜະລິດ ແລະ ຜູ້ຊົມໃຊ້ເຂົ້າໃຈໄດ້ຢ່າງເລິກເຊິ່ງ ກ່ຽວກັບບົດບາດ ແລະ ຄວາມສຳຄັນຂອງວຽກງານມາດຕະຖານ ຕໍ່ການພັດທະນາເສດຖະກິດ-ສັງຄົມ ໃນລະດັບຊາດ, ພາກພື້ນ ແລະ ສາກົນ. ພ້ອມກັນນັ້ນກໍ່ເພື່ອພັດທະນາ ວຽກງານມາດຕະຖານໃຫ້ເຂັ້ມແຂງ ແລະ ນຳໃຊ້ ຢ່າງກວ້າງຂວາງ ເພື່ອຊຸກຍູ້ສົ່ງເສີມ ແລະ ປົກປ້ອງການຜະລິດພາຍໃນ, ຄຸ້ມຄອງກວດກາການນຳເຂົ້າສິນຄ້າ ແລະ ປົກປ້ອງຜູ້ຊົມໃຊ້ໃຫ້ສັງຄົມມີຄວາມຍຸຕິທຳ, ສີວິໄລ.
ປັດຈຸບັນ ວຽກງານມາດຕະຖານ ຢູ່ ສປປ ລາວ ໄດ້ມີການເຄື່ອນໄຫວຢ່າງຕັ້ງໜ້າພາຍໃຕ້ຄວາມຮັບຜິດຊອບຂອງ ກົມມາດຕະຖານ ແລະ ວັດແທກ ກະຊວງວິທະຍາສາດ ແລະ ເຕັກໂນໂລຊີ. ໃນຊຸມປີທີ່ຜ່ານມາ ໄດ້ສ້າງບັນດານິຕິກຳເພື່ອຄຸ້ມຄອງ, ພັດທະນາ ແລະ ບໍລິການວຽກງານມາດຕະ ຖານ ເປັນຕົ້ນແມ່ນ: ກົດໝາຍວ່າດ້ວຍມາດຕະຖານ, ກົດໝາຍວ່າດ້ວຍການວັດແທກ, ລະບຽບການວ່າດ້ວຍການຂຶ້ນທະບຽນຜະລິດຕະພັນ ແລະ ສິນຄ້າ, ການນໍາໃຊ້ກາໝາຍມາດຕະຖານ ຜະລິດຕະພັນ ແລະ ສິນຄ້າ, ການກວດສອບຜະລິດຕະພັນ ແລະ ສິນຄ້າ, ການໃຫ້ລາງວັນຄຸນນະພາບ, ບັນດານິຕິກຳລຸ່ມກົດໝາຍ ວ່າດ້ວຍການຈັດຕັ້ງ ແລະ ການເຄື່ອນໄຫວຈຸດສອບຖາມ ສິ່ງກີດຂວາງດ້ານເຕັກນິກ ຕໍ່ການຄ້າ, ການຄຸ້ມຄອງ, ກວດກາ ແລະ ຢັ້ງຢືນຄຸນນະພາບນໍ້າມັນເຊື້ອໄຟ, ຜະລິດຕະພັນວັດສະດຸການກໍ່ສ້າງ ແລະ ເຄື່ອງໃຊ້ໄຟຟ້າ-ເອເລັກໂທຣນິກ ອີກດ້ວຍ.
（ແຫຼ່ງຂໍ້ມູນ： ຂປລ）
