ປະທານປະເທດ ຮັບສານຕາຕັ້ງ ຈາກທູດປະເທດເພື່ອນມິດ ພ້ອມແຕ່ງຕັ້ງທູດລາວ ປະຈຳຕ່າງປະເທດ

ເວລາ 8:30 ໂມງ, ທ່ານ ບຸນຍັງ ວໍລະຈິດ ປະທານປະເທດ ໄດ້ຕ້ອນຮັບ ທ່ານ ນາງ Leow Siu Lin ເຂົ້າຍື່ນສານຕາຕັ້ງ ເພື່ອດໍາລົງຕໍາແໜ່ງເປັນ ເອກອັກຄະລັດຖະທູດວິສາມັນ ຜູ້ມີອໍານາດເຕັມ ແຫ່ງ ສາທາລະນະລັດ ສິງກະໂປ ປະຈໍາ ສປປ ລາວ, ໂດຍມີສໍານັກງານການທູດຕັ້ງຢູ່ນະຄອນຫລວງວຽງຈັນ. ກອ່ນມາປະຕິບັດໜ້າທີ່ການທູດຢູ່ລາວ ທ່ານ ນາງ Leow Siu Lin ດໍາລົງຕໍາແໜ່ງເປັນ ຫົວໜ້າກົມອົດສະຕຣາລີ, ນີວຊີແລນ ແລະ ປາຊີຟິກ, ການຊວງການຕ່າງປະເທດ ສາທາລະນະລັດ ສິງກະ ໂປ. ລາວ ແລະ ສິງກະໂປ ໄດ້ສ້າງຕັ້ງສາຍພົວພັນ ການທູດນໍາກັນ ໃນວັນທີ 2 ທັນວາ 1974.

ທ່ານ ນາງ Leow Siu Lin ເອກອັກຄະລັດຖະທູດວິສາມັນ ຜູ້ມີອໍານາດເຕັມ ແຫ່ງ ສາທາລະນະລັດ ສິງກະໂປ ປະຈໍາ ສປປ ລາວ.(ພາບ:ຂປລ)

ເວລາ 9:00 ໂມງ, ທ່ານ ບຸນຍັງ ວໍລະຈິດ ປະທານປະເທດ ໄດ້ຕ້ອນຮັບ ທ່ານ John Pearson ເຂົ້າຍື່ນສານຕາຕັ້ງ ເພື່ອດໍາລົງຕໍາແໜ່ງ ເປັນເອກອັກຄະຣາຊະທູດວິສາມັນ ຜູ້ມີອໍານາດເຕັມ ແຫ່ງ ຣາຊະອານາຈັກ ອັງກິດ ປະຈໍາ ສປປ ລາວ, ໂດຍມີສຳນັກ​ງານການທູດຕັ້ງ ຢູ່ນະຄອນຫລວງວຽງຈັນ. ກ່່ອນມາປະຕິບັດ ໜ້າທີ່ການທູດຢູ່ລາວ ທ່ານ John Pearson ດໍາລົງຕໍາແໜ່ງເປັນ ຮອງຫົວໜ້າກົມອາຊີຕາເວັນອອກ, ສຳນັກງານຕ່າງປະເທດ ແລະ ເຄືອຈັກກະພົບ. ລາວ ແລະ ອັງກິດ ໄດ້ສ້າງຕັ້ງສາຍພົວພັນການທູດນໍາກັນ ໃນວັນທີ 5 ກັນຍາ 1955.

ທ່ານ John Pearson ເປັນເອກອັກຄະຣາຊະທູດວິສາມັນ ຜູ້ມີອໍານາດເຕັມ ແຫ່ງ ຣາຊະອານາຈັກ ອັງກິດ ປະຈໍາ ສປປ ລາວ.(ພາບ: ຂປລ)

ເວລາ 9:30 ໂມງ, ທ່ານ ບຸນຍັງ ວໍລະຈິດ ປະທານປະເທດ ໄດ້ຕ້ອນຮັບ ທ່ານ Keizo Takewaka ເຂົ້າຍື່ນສານຕາຕັ້ງ ເພື່ອດໍາລົງຕໍາແໜ່ງເປັນ ເອກອັກຄະຣາຊະທູດວິສາມັນ ຜູ້ມີອໍານາດເຕັມ ແຫ່ງ ຍີ່ປຸ່ນ ປະຈໍາ ສປປ ລາວ, ໂດຍມີສຳນັກ​ງານການທູດຕັ້ງ ຢູ່ນະຄອນຫລວງວຽງຈັນ. ກ່ອນມາປະຕິບັດໜ້າທີ່ ການທູດຢູ່ລາວ ທ່ານ Keizo Takewaka ດຳລົງຕຳແໜ່ງເປັນ ກົງສຸນໃຫຍ່, ສະຖານກົງສຸນໃຫຍ່ຍີ່ປຸ່ນ ທີ່ ຊິດນີ ປະເທດອົດສະຕຣາລີ. ລາວ ແລະ ຍີ່ປຸ່ນ ໄດ້ສ້າງຕັ້ງສາຍພົວພັນ ການທູດນໍາກັນ ໃນວັນທີ 5 ມີນາ 1955.

ທ່ານ Keizo Takewaka ເປັນເອກອັກຄະຣາຊະທູດວິສາມັນ ຜູ້ມີອໍານາດເຕັມ ແຫ່ງ ຍີ່ປຸ່ນ ປະຈໍາ ສປປ ລາວ.(ພາບ:ຂປລ)

ໃນມື້ດຽວກັນ, ທ່ານປະທານ ປະເທດ ບຸນຍັງ ວໍລະຈິດ ກໍໄດ້ມອບສານແຕ່ງຕັ້ງໃຫ້ ທ່ານ ແສງເພັດ ຮຸ່ງບຸນຍວງ (ຮອງລັດຖະມົນຕີ ກະຊວງການຕ່າງປະເທດ) ເພື່ອໄປດໍາລົງຕໍາແໜ່ງເປັນ ເອກອັກຄະລັດຖະທູດ ແຫ່ງ ສປປ ລາວ ປະຈຳ ສສ. ຫວຽດນາມ, ທ່ານ ນາງ ຄຳເພົາ ເອີນທະວັນ (ຮອງລັດຖະມົນຕີ ກະຊວງການຕ່າງປະເທດ) ເພື່ອໄປດໍາລົງຕໍາແໜ່ງເປັນ ເອກອັກຄະລັດຖະທູດ ແຫ່ງ ສປປ ລາວ ປະຈຳ ສປ ຈີນ, ທ່ານ ພົມມາ ສິດເສນາ (ຫົວໜ້າກົມເອີຣົບ-ອາເມລິກາ, ຄະນະພົວພັນຕ່າງ ປະເທດສູນກາງພັກ) ເພື່ອໄປດໍາລົງຕໍາແໜ່ງເປັນ ເອກອັກຄະລັດຖະທູດ ແຫ່ງ ສປປ ລາວ ປະຈຳ ສ. ອິນໂດເນເຊຍ, ທ່ານ ອານຸພາບ ວົງໜໍ່ແກ້ວ (ຫົວໜ້າກົມອົງການຈັດຕັ້ງສາກົນ) ເພື່ອໄປດໍາລົງຕໍາແໜ່ງເປັນ ເອກອັກຄະລັດຖະທູດ, ຜູ້ຕາງໜ້າຖາວອນ ແຫ່ງ ສປປ ລາວ ປະຈຳອົງການສະຫະປະຊາຊາດ ທີ່ນີວຢອກ) ແລະ ທ່ານ ບຸນລຽບ ຮຸ່ງວົງສອນ (ຮອງຫົວໜ້າກົມອາຊີ, ປາຊີຟິກ ແລະ ອາຟຣິກກາ, ກະຊວງການຕ່າງປະເທດ) ເພື່ອໄປດໍາລົງຕໍາແໜ່ງເປັນ ເອກອັກຄະລັດຖະທູດ ແຫ່ງ ສປປ ລາວ ປະຈຳຊູແອດ.

ທ່ານ ແສງເພັດ ຮຸ່ງບຸນຍວງ (ຮອງລັດຖະມົນຕີ ກະຊວງການຕ່າງປະເທດ) ເພື່ອໄປດໍາລົງຕໍາແໜ່ງເປັນ ເອກອັກຄະລັດຖະທູດ ແຫ່ງ ສປປ ລາວ ປະຈຳ ສສ. ຫວຽດນາມ.(ພາບ:ຂປລ)

（ແຫຼ່ງ​ຂໍ້​ມູນ​： ຂ​ປ​ລ）