 |
ຄົນລາວບໍ່ຖິ້ມກັນ ຮ່ວມໃຈຊ່ວຍເຫລືອຜູ້ປະສົບໄພນ້ຳຖ້ວມ
ປັດຈຸບັນນີ້ ເຮົາຈະເຫັນປະຊາຊົນລາວ, ບັນດາຫ້າງຮ້ານ, ບໍລິສັດ, ສຳນັກງານ, ອົງການ, ນິຕິ ບຸກຄົນ ແລະ ພາກສ່ວນຕ່າງໆ ຈຳນວນນັບບໍ່ຖ້ວນ ໄດ້ພ້ອມກັນລະດົມທຶນ ແລະ ນຳສິ່ງຂອງຈຳເປັນຕ່າງໆ ລົງໄປຊ່ວຍ ຜູ້ປະສົບໄພ ທາງພາກກາງ ແລະ ພາກໃຕ້ ເຊິ່ງສິ່ງທີ່ງົດງາມ ແລະ ປະທັບໃຈທີ່ສຸດ. ທີ່ສຳຄັນ ແມ່ນຄວາມເປັນຫ່ວງ ເປັນໄຍຈາກພາກລັດ ແລະ ກຳລັງໃຈຈາກ ປະຊາຊົນລາວ ທຸກຖ້ວນໜ້າ ໄດ້ຮ່ວມແຮງຮ່ວມໃຈກັນ ໃຫ້ຄວາມຊ່ວຍເຫລືອຄົນລະເລັກລະນ້ອຍໃນສັງຄົມ ເປັນກຳລັງແຮງທີ່ຍິ່ງໃຫຍ່ ແລະ ເປັນພະລັງອັນມະຫາສານ ໃຫ້ແກ່ບັນດາຜູ້ປະສົບໄພ ເຄາະຮ້າຍໃນຄັ້ງນີ້ ເພື່ອຕໍ່ສູ້ຜ່ານຜ່າ ວິກິດການເຫລົ່ານີ້ ໄປໄດ້ດ້ວຍດີ.
ປະຊາຊົນ ຫລາຍພັນຄອບຄົວຢູ່ 6 ແຂວງພາກກາງ ແລະ ພາກໃຕ້, ນອກຈາກຈະຕໍ່ສູ້ກັບສະ ພາບໄພພິບັດນ້ຳຖ້ວມ ໃນໄລຍະຜ່ານມາ ໃນການກອບກູ້ເອົາຊັບສິນ ແລະ ສິ່ງຂອງຕ່າງໆ ລວມທັງ ການເອົາຊີວິດ ລອດແລ້ວ, ຈາກນີ້ໄປ ຍັງຈະຕ້ອງຕໍ່ສູ້ ເພື່ອການຟື້ນຟູ ຫລັງນ້ຳບົກແຫ້ງລົງ ເປັນຕົ້ນ ການສ້ອມ ແປງເຮືອນຊານ, ໂຮງຮຽນ, ສຸກສາລາ, ພື້ນຖານໂຄງລ່າງ, ການຟື້ນຟູເນື້ອທີ່ການຜະລິດ ລວມທັງການຜະລິດທົນແທນ ແລະ ອື່ນໆ ເພື່ອແກ້ໄຂຊີວິດ ການເປັນຢູ່ໃ ຫ້ດີຂຶ້ນເທື່ອລະກ້າວ. ທັງນີ້ ສ່ວນໜຶ່ງແມ່ນ ມີຄວາມຕ້ອງການ ຄວາມຊ່ວຍເຫລືອ ຈາກພາກລັດ ແລະ ສັງຄົມ ທີ່ຈະຕ້ອງໃຫ້ຄວາມສຳຄັນກັບປະຊາຊົນ ໂດຍສະເພາະ ວັດຖຸສິ່ງຂອງ, ເຂົ້າປາ-ອາຫານ, ເງິນຄຳ ແລະ ແນວພັນພືດ ຕ້ອງໃຫ້ເຖິງມືປະຊາຊົນຢ່າງແທ້ຈິງ.
 |
ປະຊາຊົນເມືອງຍົມມະລາດ ໄດ້ຮັບເຂົ້າຊ່ວຍເຫລືອເບື້ອງຕົ້ນ 5 ໂຕນ
ເມືອງຍົມມະລາດ ແຂວງຄຳມ່ວນ ກໍເປັນໜຶ່ງໃນບັນດາເມືອງທີ່ໄດ້ຮັບຜົນກະທົບຈາກໄພນ້ຳຖ້ວມ ປະຊາຊົນໄດ້ຮັບຜົນກະທົບໃນຈຳນວນ 16 ບ້ານ, ມີຈຳນວນ 2,046 ຄອບຄົວ, ຈໍານວນພົນ 9.484 ຄົນ ແລະ ເພື່ອເປັນການຊ່ວຍເຫລືອບັນເທົາທຸກໃນເບື້ອງຕົ້ນ ຄະນະກຳມະການປ້ອງກັນ ແລະ ຄວບຄຸມໄພພິບັດຂັ້ນເມືອງ ກໍໄດ້ມອບເຂົ້າຊ່ວຍເຫລືອປະຊາຊົນແລ້ວຈຳນວນ 5 ໂຕນ ມູນຄ່າ 35 ລ້ານກີບກີບ, ພ້ອມທັງໄດ້ແຕ່ງຕັ້ງກໍາລັງແຮງງານຊາວໜຸ່ມອາສາພັດທະນາ, ກໍາລັງສະຫງົບສຸກ, ກອງຫລອນບ້ານ ແລະ ພະນັກງານເມືອງ ລົງຊ່ວຍເຫລືອຍາມສຸກເສີນປະຈຳຢູ່ຂັ້ນເມືອງ ແລະ ປະຈຳຢູ່ແຕ່ລະບ້ານ ໂດຍສະເພາະຈຸດບ້ານໄຮ່ຜາວຽງ. ເຊິ່ງປັດຈຸບັນ ຍັງຂາດແຄນເຄື່ອງອຸປະໂພກ ແລະ ບໍລິໂພກເປັນຕົ້ນ ຈັກປັ່ນໄຟ, ເຮືອຈັກ, ເສື້ອຊູຊີບ, ຜ້າຢາງ, ເຕັ້ນ, ເຂົ້າສານ, ອາຫານແຫ້ງ, ເຄື່ອງນຸ່ງ, ນ້ຳດື່ມ, ຢາປົວພະຍາດ ແລະ ອຸປະກອນອື່ນໆ.
ກອງເລຂາຄະນະກຳມະການປ້ອງກັນ ແລະ ຄວບຄຸມໄພພິບັດຂັ້ນເມືອງຍົມມະລາດ ລາຍງານວ່າ: ທົ່ວເມືອງມີເນື້ອທີ່ນາປີ ຖືກຖ້ວມ 1.601 ເຮັກຕາ, ເນື້ອທີ່ສວນຖືກຖ້ວມ 98 ເຮັກຕາ, ໜອງປາຖືກຖ້ວມ 40 ໜອງ, ຄວາຍ ຕາຍ 2 ໂຕ, ງົວຕາຍ 5 ໂຕ, ໝູຕາຍ 116 ໂຕ, ແບ້ ຕາຍ 12 ໂຕ ແລະ ສັດປີກ ຕາຍ 1.298 ໂຕ. ຂະນະດຽວກັນ ມີໂຮງຮຽນ 14 ແຫ່ງໄດ້ໂຈະການຮຽນ-ການສອນຊົ່ວຄາວ ໃນນັ້ນ ມີໂຮງຮຽນປະຖົມ 12 ແຫ່ງ ແລະ ມັດທະຍົມ 2 ແຫ່ງ ແລະ ອາຄານຮຽນຖືກນ້ຳຖ້ວມຈຳນວນ 6 ຫລັງ, ສະພາບເສັ້ນທາງ ແລະ ການສັນຈອນ ມີເສັ້ນທາງດິນແດງຖືກຖ້ວມ 2 ເສັ້ນຄື: ທາງເລກທີ 6158 (ບ້ານໄຮ່-ບ້ານທ່າໂຈນ) ເລິກປະມານ 2,5 ແມັດ ແລະ ເສັ້ນທາງ ເລກທີ 5656 (ບ້ານນາໂຊກ-ບ້ານໂພນແສດ) ເລິກປະມານ 1,3 ແມັດ ເຊິ່ງບໍ່ສາມາດໃຊ້ພາຫະນະສັນຈອນໄປມາໄດ້ ແລະ ທາງປູຢາງເລກທີ 12 ຖືກຖວ້ມມີ 3 ຈຸດຄື: ຈຸດໂພນໜອງເຢັນຍາວປະມານ 1 ກິໂລແມັດ ລະດັບນ້ຳເລິກປະມານ 1 ແມັດ, ຈຸດໜອງສະໜາມຍາວປະມານ 850 ແມັດ ລະດັບນ້ຳເລິກປະມານ 1,2 ແມັດ, ແລະ ຈຸດໜອງລ້ຽງຄວາຍຍາວປະມານ 2 ກິໂລແມັດ ລະດັບນ້ຳເລິກປະມານ 1,4 ແມັດ ນອນໃນຂອບເຂດບ້ານນາໂຊກ (ລົດບໍ່ສາມາດສັນຈອນໄປ-ມາໄດ້).
ສຳລັບໄຟຟ້າໄດ້ຖືກຕັດການຊົມໃນຄົວເຮືອນທັງໝົດ 10 ບ້ານ, ໂຮງໝໍນ້ອຍຖືກນ້ຳຖ້ວມ 1 ແຫ່ງ (ບ້ານນາກະຕັງ) ເຊິ່ງທາງຄະນະກຳມະການປ້ອງກັນ ແລະ ຄວບຄຸມໄພພິບັດຂັ້ນເມືອງຍົມມະລາດ ໄດ້ລົງສົມທົບກັບຄະນະພັກຮາກຖານກຸ່ມບ້ານ ແລະ ອຳນາດການປົກຄອງຂັ້ນບ້ານໄດ້ສຳຫລວດ, ກວດກາພື້ນທີ່ສູນລີ້ໄພ ແລະ ຕິດຕາມຊີວິດການເປັນຢູ່, ສິ່ງຂອງທີ່ຈຳເປັນ ແລະ ສິ່ງທີ່ຍັງຂາດເຂີນ, ເຊິ່ງປະຊາຊົນໄດ້ໄປພັກຢູ່ສູນລີ້ໄພທີ່ກຳນົດໃວ້ຈຳນວນ 8 ຈຸດ ມີທັງໝົດ 8 ບ້ານ, ມີ 686 ຄອບຄົວ.
 |
ຜູ້ປະສົບໄພນ້ຳຖ້ວມ ຢູ່ເມືອງຄົງເຊໂດນ ໄດ້ຮັບການຊ່ວຍເຫລືອຢ່າງຕໍ່ເນື່ອງ
ປັດຈຸບັນປະຊາຊົນທີ່ໄດ້ຮັບ ຜົນກະທົບຈາກໄພນ້ຳຖ້ວມ ຢູ່ເມືອງຄົງເຊໂດນ ແລະ ເມືອງວາປີ ແຂວງສາລະວັນ ພວມໄດ້ຮັບການຊ່ວຍເຫລືອ ຢ່າງຕໍ່ເນື່ອງ ຈາກອຳນາດການປົກຄອງແຂວງ, ເມືອງ, ບໍລິສັດ-ຫ້າງຮ້ານຕ່າງໆ ທັງພາກລັດ ແລະ ເອກະຊົນ ໃນຂອບເຂດທົ່ວປະເທດ ເປັນຈຳນວນຫລວງຫລາຍ ເປັນຕົ້ນ ເຄື່ອງອຸປະໂພກ-ບໍລິໂພກ, ນ້ຳດື່ມ, ເຄື່ອງນອນ, ເຄື່ອງນຸ່ງ, ວັດຖຸ, ສິ່ງຂອງເຄື່ອງໃຊ້ຕ່າງໆ ມາຮອດວັນທີ 8 ກັນຍາ 2019 ລວມມູນຄ່າປະມານ 1 ຕື້ກວ່າກີບ.
ພາຍຫລັງທີ່ປະຊາຊົນ ໄດ້ຮັບຜົນກະທົບຈາກໄພພິບັດ ດັ່ງກ່າວ, ນັບແຕ່ວັນທີ 2 ກັນຍາ ເປັນຕົ້ນມາ ອຳນາດການປົກຄອງບ້ານ, ເມືອງ ກໍໄດ້ປະສານສົມທົບກັບ ອຳນາດການປົກຄອງແຂວງ ແລະ ພາກສ່ວນຕ່າງໆ ທັງພາກລັດ ແລະ ເອກະຊົນ ເຂົ້າມາຊ່ວຍເຫລືອບັນເທົາທຸກສຸກເສີນ ໃນເບື້ອງຕົນ.ພ້ອມທັງ ປຸກລະດົມໃຫ້ທົ່ວສັງຄົມ ກໍຄືປະຊາຊົນລາວບັນດາເຜົ່າ ໃນຂອບເຂດທົ່ວປະເທດ ໄດ້ເຂົ້າມາຊ່ວຍເຫລືອໃນຄັ້ງນີ້, ບວກໃສ່ຄວາມເປັນເຈົ້າການ ຂອງປະຊາຊົນທັງພາຍໃນເມືອງ, ຕ່າງເມືອງ ແລະ ຕ່າງແຂວງ ທີ່ໄດ້ປະກອບສ່ວນເຮື່ອແຮງ ສະຕິປັນຍາ, ບຸກຄະລະກອນ, ພາຫະນະ ແລະ ວັດຖຸສິ່ງຂອງຕ່າງໆ ເຊັ່ນ: ລົດ, ເຮືອ ແລະ ອຸປະກອນຈາກກອງ ບັນຊາການ ທະຫານແຂວງ, ປກສ ແຂວງ, ພະແນກແຮງງານແຂວງ, ກອງພົນທີ 5, ກອງພົນທີ 4, ເມືອງລະຄອນເພັງ, ໜ່ວຍງານກູ້ໄພຈາກລະຄອນຫລວງວຽງຈັນ, ແຂວງສະຫວັນນະເຂດ ແລະ ພາກສ່ວນອື່ນໆ ເຮັດໃຫ້ປະຊາຊົນຜູ້ໄດ້ຮັບຜົນກະທົບມີຄວາມພໍໃຈ.
（ໄຊພອນ）
